Ripot Long Wok Bilong Kingdom
Ol Manmeri Bilong Yu Bai Amamas Long Mekim Wok
NAMAN em strongpela hetman bilong ami bilong Siria, em i gat sik lepra. Sapos man i no kisim marasin bilong pinisim dispela sik, dispela sik nogut inap bagarapim tru skin bilong man na bai em i dai. Naman bai mekim wanem bilong pinisim dispela sik? Wanpela liklik meri i stap long haus bilong Naman, em ol ami bilong Siria i bin holimpas em long Israel na kisim em i kam. Em i tokaut olsem profet Elisa inap long oraitim sik bilong Naman.—2 King 5:1-3.
Liklik meri i no pret long tokaut olsem na Naman i go painim Elisa na em i oraitim Naman. Na tu, Naman i kamap wanpela man i lotuim Jehova! Dispela stori i stap long Baibel em i bin kamap long yia 900 B.C.E. samting. (2 King 5:4-15) Long nau planti yangpela i save strongim bel wankain olsem dispela liklik meri Israel na ol i tokaut long ol samting bilong Kingdom. Dispela stori bilong Mosambik i stap daunbilo i kamapim dispela samting.
Nuno i gat 6-pela krismas na em i wanpela pablisa i no baptais yet i save autim tok. Paslain long taim Nuno i kamap pablisa i no baptais yet, em i save bungim ol pikinini i stap klostu long hap em i stap long en, na em i beten na lainim ol long Baibel—em i save mekim wok long Baibel Stori Buk Bilong Mi.
Planti taim Nuno i save kirap long Sarere long bikmoning na tokim famili bilong em: “Nau yumi go mekim wok autim tok.” Em i mekim ol narapela samting tu bilong kamapim klia laik bilong em long autim tok. Taim Nuno i autim tok long rot wantaim papamama bilong em long Maputo, planti taim em yet i save i go long ol man na toktok wantaim ol. Wanpela taim wanpela bisnisman i kam long em na i askim em: “Bilong wanem yu salim ol dispela nius?” Nuno i tok: “Mi no salim dispela nius, tasol mi save kisim kontribusen bilong helpim wok bilong autim tok.” Bisnisman i bekim tok olsem: “Maski mi no gat laik long kisim ol nius, tasol mi amamas long tingting na save bilong yu. Mi laik givim kontribusen long dispela wok.”
Long narapela taim, Nuno i go toktok long wanpela man long rot na soim buk Bel Isi na Gutpela Sindaun—Bai Kamap Olsem Wanem? long em. Dispela man i askim em: “Yu save go long dispela skul long hap, a?” Nuno i tok, “Yes, mi save go long dispela skul, tasol nau mi soim wanpela bikpela tok long ol man long dispela buk. Em i soim yu olsem yu inap i stap long nupela taim God bai kamapim, olsem piksa i stap long dispela buk i kamapim.” Nuno i no luksave olsem dispela man em i wanpela tisa long skul bilong em. Tisa i kisim dispela buk, na tu, nau em i save kisim Wastaua na Kirap! long Nuno long olgeta mun.
Taim sampela i askim Nuno bilong wanem em i save amamas long mekim wok autim tok, em i save tok: “Mi laik toktok wantaim ol man na lainim ol long Jehova na Pikinini bilong em, Krais Jisas.” Em i tok moa: “Na sapos ol man i no laik harim tok, i no gat as na mi bel hevi long dispela samting.”
Long olgeta hap bilong graun, planti tausen yangpela olsem Nuno, ol i amamas long skulim ol man na autim tok bilong Kingdom bilong God. (Song 110:3) Tasol ol pikinini i no kirap nating long mekim olsem. Ol papamama i save skulim ol pikinini long Jehova taim ol i liklik yet, na ol i stap olsem gutpela piksa long autim tok, na givim bel long mekim wok bilong Kingdom, ol bai kisim planti blesing.