Ol i Mekim Laik Bilong Jehova

Jop i Holimpas Bilip na Em i Kisim Blesing

JOP em man i gat pasin sori, na em i save sambai long ol meri em man bilong ol i dai pinis, na ol pikinini i no gat papamama, na ol man i gat hevi na i stap nogut. (Jop 29:​12-​17; 31:​16-​21) Orait wantu tasol taim nogut i painim em, na ol mani kago bilong em i lus, na ol pikinini bilong em i dai, na bikpela sik i painim em. Tarangu, dispela man i gat namba na em i bin strongim ol man i gat hevi, tasol nau em yet i gat hevi, na i no planti man i helpim em. Na meri bilong em yet i tokim em long ‘tok nogut long God na em i ken i dai.’ Na ol “pren” bilong em, em Elifas, Bildat, na Sofar i no bin strongim bel bilong em. Ol i strong long tok olsem Jop i bin mekim sin na em i kisim pen long dispela.​—⁠Jop 2:9; 4:​7, 8; 8:​5, 6; 11:​13-​15.

Maski taim nogut tru i painim Jop, em i stap gut long God. Olsem na bihain Jehova i marimari long em na mekim gut long em. Stori bilong ol samting Em i mekim bilong mekim gut long Jop i strongim olgeta wokboi bilong God i save holimpas bilip olsem bihain bai God i mekim gut long ol tu.

Hevi i Pinis na Em i Kamap Gutpela Gen

Pastaim Jehova i stretim Elifas, Bildat, na Sofar. Elifas i bikpela long ol, olsem na Jehova i tokim em olsem: “Mi kros long yu na long tupela pren bilong yu wantaim. Long wanem, yupela i no bin autim tok tru long pasin bilong mi olsem wokman bilong mi, Jop, i bin autim. Orait yupela go nau na kisim 7-pela bulmakau man na 7-pela sipsip man na bringim ol i go long Jop, wokman bilong mi. Na yupela i mas kilim ol i dai na mekim ol ofa bilong paia i kukim olgeta. Na bai Jop i beten na askim mi long marimari long yupela.” (Jop 42:​7, 8) Tingim dispela samting ol i mas mekim!

Jehova i laik bai Elifas, Bildat, na Sofar i mas mekim bikpela ofa tru, ating em i mekim olsem bai ol i ken pilim tru olsem sin bilong ol i bikpela. Tru, ating ol i save o ol i no save, tasol ol i tok bilas long God na i tok em ‘i no save bilip long ol wokboi bilong em’ na em i no tingim tumas olsem Jop i stap gut long em o nogat. Elifas i tok tu olsem long ai bilong God Jop i no gat nem liklik na em i no winim wanpela bataflai! (Jop 4:​18, 19; 22:​2, 3) Olsem na yumi ken save bilong wanem Jehova i tok: “Yupela i no bin autim tok tru long pasin bilong mi”!

Na i no dispela tasol. Elifas, Bildat, na Sofar i bin mekim sin tu long Jop yet na ol i tokim em olsem em yet i as bilong ol dispela hevi i bin painim em. Tok ol i sutim long em i no gat as bilong en na i no olsem pasin sori, na dispela i mekim na bel bilong Jop i bagarap stret na em i bel hevi, na em i krai olsem: “Tok bilong yupela i givim bikpela pen long mi na i bagarapim mi tru. Wanem taim bai yupela i lusim dispela kain tok?” (Jop 10:1; 19:⁠2) Tingim pes bilong dispela 3-pela man​—⁠ol i sem, long wanem, nau ol i mas givim ofa bilong ol long Jop long sin bilong ol!

Tasol i no olsem Jop i mas amamas na daunim ol. Jehova i laik bai em i beten bilong helpim ol dispela lain i sutim tok long em. Jop i mekim olsem Jehova i tokim em long mekim, na long dispela Jehova i mekim gut long em. Pastaim, Jehova i pinisim sik nogut em i bin kisim. Na bihain ol brata, sista, na ol pren bilong Jop long bipo ol i kam na mekim gut long em, “na olgeta wan wan i givim wanpela mani silva na wanpela ring gol long em.”a Na Jop “i kisim 14,000 sipsip na 6,000 kamel na 2,000 bulmakau na 1,000 donki meri.”b Na meri bilong Jop i kamap wanbel gen wantaim em. Bihain Jehova i mekim gut long Jop na em i kamapim 7-pela pikinini man na 3-pela pikinini meri, na em i stap inap em i lukim ol tumbuna pikinini bilong em na ol tumbuna pikinini bilong ol.​—⁠Jop 42:​10-​17.

Dispela i Lainim Yumi Long Wanem Samting?

Jop i stap olsem gutpela piksa tru long ol wokboi bilong God long nau. Em i “gutpela man na i no gat asua,” na Jehova i amamas long kolim em “wokboi bilong mi.” (Jop 1:8; 42:​7, 8) Tasol dispela i no makim olsem Jop i stretpela man olgeta. Long taim traim i painim em, em i mekim wanpela tok kranki olsem God i as bilong ol hevi i painim em. Na em i bin toktok planti long pasin God i bin mekim long ol man. (Jop 27:2; 30:​20, 21) Na em i kamapim stretpela pasin bilong em yet na bilong God nogat. (Jop 32:⁠2) Tasol Jop i no laik givim baksait long Man bilong wokim yumi, na long pasin daun em i kisim ol tok bilong stretim em i kam long God. Em i tok: “Mi bin mekim planti kranki toktok long ol samting mi no klia olgeta long as bilong en. Mi sem tru long mi yet na long olgeta tok mi bin mekim. Na mi sindaun long das na long sit bilong paia, bilong soim yu olsem mi tanim bel pinis.”​—⁠Jop 42:​3, 6.

Taim traim i painim yumi, ating yumi tu bai tingting, o toktok, o mekim pasin em i no stret. (Skelim wantaim Saveman 7:⁠7.) Tasol sapos yumi laikim tumas God, bai yumi no sakim ol tok bilong em o bel nogut long em i bin larim ol traim i painim yumi, nogat. Bai yumi holim yet bilip bilong yumi, na bihain bai yumi kisim bikpela blesing. Man bilong raitim Song i tok long Jehova olsem: “Bikpela, sapos man i no lusim yu, orait yu no save lusim em.”​—⁠Song 18:⁠25.

Pastaim long Jehova i ken oraitim sik bilong Jop, em i laik bai Jop i mas beten bilong helpim ol man i bin mekim sin long em. Dispela i olsem gutpela piksa tru long yumi! Jehova i laik bai yumi mas lusim tingting long sin ol narapela i mekim long yumi na bai em i ken lusim tingting long sin bilong yumi. (Matyu 6:12; Efesus 4:32) Sapos yumi no laik lusim sin bilong ol narapela na i gat rot long mekim olsem, inap yumi ting Jehova i ken marimari long yumi? Nogat a?​—⁠Matyu 18:​21-35.

Sampela taim ol traim i save painim yumi olgeta. (2 Timoti 3:​12) Tasol olsem Jop i bin mekim, yumi tu inap holimpas bilip. Taim yumi mekim olsem, bai yumi kisim gutpela pe tru. Jems i tok: “Harim. Yumi save tok olsem, ‘Ol man i bin strongim bel na karim hevi, ol i save stap gut na amamas i stap.’ Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em. Yes, yumi save, Bikpela em i save sori moa yet long yumi, na oltaim em i save marimari long yumi.”​—⁠Jems 5:⁠11.

[Ol Futnot]