Yunis na Lois—Gutpela Piksa Tru Bilong Skulim Pikinini
Yumi ol wokboi bilong Jehova yumi save, wok bilong skulim gut ol pikinini bilong yumi long ol samting bilong lotu em i wanpela bikpela wok yumi mas mekim. Maski ples yu sindaun long en i gutpela, ating dispela wok i hatwok na kain kain hevi inap kamap long en. Na i hatwok moa taim papa o mama Kristen i mas mekim dispela wok insait long famili i no stap wanbel long ol samting bilong lotu. Kain samting olsem i no nupela. Baibel i stori long wanpela mama em kain samting olsem i painim em long taim bilong ol aposel.
Famili bilong wanpela meri, nem bilong em Yunis, i sindaun long Listra, em wanpela taun long hap bilong Likonia long saut-sentral bilong Esia Maina. Listra i wanpela liklik taun i no gat nem. Bipo ol Rom i bosim dispela taun na ol i kolim nem Julia Feliks Gemina Lustra long en. Sisar Ogastus i kamapim dispela taun bilong daunim wok bilong ol man nogut long ol ples klostu. Yunis em i wanpela meri Juda i Kristen na famili bilong em i no stap wanbel long lotu—em i stap wantaim man bilong em bilong lain Grik, na pikinini bilong em Timoti, na mama bilong em Lois.—Aposel 16:1-3.
Ating i no gat planti Juda long Listra, long wanem, Baibel i no stori long wanpela haus lotu bilong ol Juda i stap long dispela hap. Tasol i gat sampela Juda i stap long Aikoniam, em i stap longwe long Listra inap 30 kilomita. (Aposel 14:19) Olsem na ating Yunis i hatwok long mekim wok bilong lotu bilong em. Ol i no bin katim skin bilong Timoti bihain long Yunis i karim em, olsem na sampela saveman i ting man bilong Yunis i no orait long dispela samting.
Tasol i no Yunis tasol i bilip, nogat. Yumi ken ting olsem mama bilong Timoti na bubu bilong em, Lois—em mama bilong Yunis—ol i bin skulim Timoti long “ol buk i gat tok bilong God.”a Aposel Pol i tokim Timoti: “Yu mas holim strong dispela tok yu bin kisim na yu save bilip strong long en. Yu save gut long mipela ol manmeri i bin skulim yu long dispela tok. Na yu save, taim yu bin i stap liklik pikinini yet, yu stat long kisim save long ol buk i gat tok bilong God. Dispela ol buk ol inap long givim gutpela tingting long yu, na bai yu bilip long Krais Jisas, na bai God i kisim bek yu.”—2 Timoti 3:14, 15.
Ol i Skulim Em Taim Em i “Liklik Pikinini Yet”
Taim Pol i tok, ol i bin skulim Timoti long “ol buk i gat tok bilong God” kirap long taim em i “liklik pikinini yet,” dispela i makim olsem ol i skulim em taim em i bebi yet. Pol i mekim wok long wanpela tok Grik (breʹphos) i save makim wanpela nupela pikinini. (Skelim wantaim Luk 2:12, 16.) Olsem na Yunis i tingim tru wok God i bin givim long ol papamama, na em i kirap skulim Timoti taim em i liklik yet bambai dispela i ken helpim Timoti long kamap wanpela gutpela wokboi bilong God.—Lo 6:6-9; Sindaun 1:8.
Ol i skulim Timoti na em i “bilip strong” long tok i tru bilong Baibel. Wanpela buk dikseneri bilong tok Grik i tok, insait bilong dispela tok Pol i mekim wok long en long hia i olsem “bilip tru long; bilip long” wanpela samting. Yumi ken ting olsem Yunis na Lois ol i lusim bikpela hap taim na ol i bin wok strong tru bambai bilip i kamap strong long bel bilong Timoti, na dispela i helpim em long skelim gut Tok Bilong God na bilip long en. Olsem na ating Yunis tupela Lois i bin wok strong long skulim Timoti long tok bilong Baibel. Na ol i kisim gutpela blesing long dispela wok ol i mekim! Pol inap tok long Timoti olsem: “Mi save gut olsem yu bilip tru long Krais, long wankain pasin olsem bipo tumbuna bilong yu Lois na mama bilong yu Yunis i bin bilip.”—2 Timoti 1:5.
Yunis na Lois i bin mekim bikpela wok tru bilong helpim Timoti! David Read, em man bilong raitim ol buk, em i tok long dispela samting olsem: “Sapos aposel Pol i ting, ol samting i bin painim Timoti na em i kamap Kristen dispela em i bikpela samting, ating kwiktaim Pol bai tokim em long dispela samting. Tasol taim em i toktok long bilip bilong Timoti, namba wan samting em i tok long en, em pastaim bilip i bin ‘stap long Lois . . . na Yunis.’ ” Tok bilong Pol long bilip bilong Lois, na Yunis, na Timoti i kamapim long ples klia olsem, planti taim pasin bilong papamama na ol bubu long skulim gut ol pikinini long tok bilong Baibel taim ol i liklik yet, em i bikpela samting bilong helpim pikinini long ol samting bilong spirit long bihain. Olsem wanem? Yu ting dispela i mas kirapim ol papamama na ol bubu long tingim gut ol samting ol i mekim bilong inapim dispela wok God i bin givim long ol bilong helpim pikinini?
Ating Pol i bin tingim tu gutpela kain sindaun Lois na Yunis i bin kamapim insait long famili. Em i bin stap wantaim ol taim em i bin go long Listra long namba wan taim long yia 47/48 C.E. samting. Ating dispela tupela meri i bin kamap Kristen long dispela taim. (Aposel 14:8-20) Pasin sori na amamas i stap insait long dispela famili na dispela i mekim na Pol i kolim Lois olsem “tumbuna” bilong Timoti. Saveman Ceslas Spicq i tok, dispela hap tok Grik Pol i mekim wok long en (em i kolim hap tok mamʹme, na em i no kolim hap tok teʹthe, em ol i kolim long wanpela lapun ol i no save gut long em), em “wanpela tok pikinini i mekim bilong kamapim olsem em i laikim tru” bubu bilong em, na taim Pol i kolim tok olsem long dispela ves, dispela i kamapim olsem “em i save gut long ol na i laikim tru ol.”
Timoti i Lusim Famili
Yumi no save gut long ol samting bilong marit bilong Yunis long taim Pol i go long Listra long namba tu taim (long 50 C.E. samting). Planti saveman i ting em i meri wanpis. Yumi no save long dispela samting, tasol mama na bubu bilong Timoti ol i bin stiaim gut em na em i kamap wanpela gutpela yangpela man i gat 20 krismas samting. Na “ol Kristen long Listra na Aikoniam ol i tok long pasin bilong em olsem, Timoti i gutpela man.” (Aposel 16:2) Laik bilong autim gutnius bilong Kingdom i stap pinis long bel bilong Timoti, na taim Pol i singautim em long raun wantaim em na Sailas long wok misineri bilong ol, Timoti i orait long go wantaim ol.
Ating Yunis na Lois i tingting planti taim Timoti i laik lusim ol, a? Ol i save, taim Pol i kam long taun bilong ol long namba wan taim, ol manmeri i bin tromoi ston long em na lusim em, long wanem, ol i ting em i dai pinis. (Aposel 14:19) Olsem na ating i hatwok long ol i larim yangpela Timoti i go. Ating ol i tingting, em bai raun inap longpela taim na em bai kam bek gut o em bai kisim bagarap. Tasol maski ol i tingting planti, ating mama na bubu bilong em ol i strongim em long mekim dispela gutpela wok bambai em inap mekim wok bilong Jehova moa yet.
Ol Bikpela Samting Yumi Lainim
Yumi ken lain long planti samting taim yumi skelim gut stori bilong Yunis na Lois. Bilip i kirapim ol long skulim gut Timoti long ol samting bilong spirit. Taim ol lapun bubu i stap olsem gutpela piksa bilong ol tumbuna pikinini bilong ol na ol narapela long pasin bilong givim bel long God, dispela inap helpim tru kongrigesen Kristen olgeta. (Taitus 2:3-5) Na pasin bilong Yunis i helpim ol mama i gat poroman marit i no bilip, olsem ol i mas tingim gut wok bilong ol na ol gutpela samting i kamap long en taim ol i skulim ol pikinini bilong ol long ol samting bilong spirit. Bilong mekim olsem, sampela taim meri i mas strongim bel, na em i mas mekim moa yet sapos papa bilong pikinini i no amamas long bilip bilong poroman marit bilong em. Na tu, meri Kristen i mas mekim long gutpela pasin isi, long wanem, em i mas daun long man bilong em.
Timoti i wok long kamap strong long ol samting bilong spirit na em i kamap gutpela misineri na wasman, na dispela i olsem gutpela pe Lois na Yunis i kisim long bilip bilong ol, na hatwok ol i mekim, na pasin bilong ol long daunim laik bilong ol yet. (Filipai 2:19-22) Na long nau tu, bilong skulim ol pikinini bilong yumi long tok i tru bilong Baibel, yumi mas lusim hap taim, na yumi no ken les kwik, na yumi mas tingting strong long mekim. Tasol taim ol gutpela samting i kamap long dispela, yumi save bikpela wok bilong yumi i no lus nating. Planti gutpela yangpela Kristen em papa o mama tasol i bilip na i bin skulim ol long ‘ol buk i gat tok bilong God taim ol i stap liklik pikinini yet,’ ol i givim bikpela amamas long papa o mama i bilip. Wanpela savetok i stret tru, em i tok: “Sapos man i gat gutpela tingting na i bihainim stretpela pasin . . . papamama bilong [em] i belgut tru na i amamas.”—Sindaun 23:23-25.
Aposel Jon i tok long ol pikinini bilong em long spirit olsem: “Taim mi harim tok long ol pikinini bilong mi i bihainim tok tru, orait mi save amamas tru, na dispela amamas i winim ol arapela kain amamas bilong mi.” (3 Jon 4) Tru tumas, planti meri ol bai wanbel long dispela tok bilong aposel Jon, em ol meri i olsem Yunis na Lois, em tupela i stap olsem gutpela piksa tru bilong skulim pikinini.
[Futnot]
a Long tok ples Siria, 2 Timoti 1:5 i tok “mama bilong mama bilong yu,” na dispela i kamapim klia olsem Lois i no mama bilong papa bilong Timoti.