Ol Yangpela—Wok Long Winim Ol Mak i Givim Biknem Long God
“Yu mas lain gut long pasin bilong God.”—1 TIMOTI 4:7.
1, 2. (a) Bilong wanem Pol i mekim tok amamas long Timoti? (b) Olsem wanem ol yangpela long nau ol i “lain gut long pasin bilong God”?
“I NO gat narapela man i stap wantaim mi em i wankain olsem Timoti. Em i save wanbel wantaim mi na oltaim em i save tingting long painim rot bilong helpim yupela. . . . Em i bin helpim mi long wok bilong gutnius, olsem pikinini i save helpim papa.” (Filipai 2:20, 22) Aposel Pol i mekim dispela tok long yangpela man Timoti long pas em i raitim long ol Kristen long Filipai. Tingim amamas bilong Timoti taim em i kisim save olsem Pol i laikim em na i trastim em!
2 Olsem Timoti, ol yangpela i save daun long God ol i gutpela samting tru long lain bilong Jehova. (Song 110:3, NW) Long nau, oganaisesen bilong God i gat planti yangpela i mekim wok olsem painia, misineri, konstraksen volantia, na wok long ol brens ofis. Yumi amamas tu long ol narapela i givim bel long mekim ol wok bilong kongrigesen na ol narapela wok. Ol yangpela olsem ol i kisim amamas tru taim ol i wok long winim ol mak i givim biknem long Papa bilong ol long heven, em Jehova. Tru tumas, ol i wok long “lain gut long pasin bilong God.”—1 Timoti 4:7, 8.
3. Bai yumi skelim wanem ol askim long dispela stori?
3 Sapos yu wanpela yangpela, yu wok long putim sampela mak bilong spirit long winim? Yu ken kisim we ol tok bilong helpim na strongim yu long mekim olsem? Olsem wanem yu ken sakim tingting bilong ol man bilong dispela graun long strong long kisim planti mani kago? Yu inap kisim wanem ol blesing sapos yu wok strong long winim ol mak i givim biknem long God? Orait bilong kisim bekim bilong ol dispela askim yumi ken skelim sindaun bilong Timoti na wok em i mekim.
Sindaun Bilong Timoti
4. Stori liklik long wok bilong Timoti olsem wanpela Kristen.
4 Timoti i kamap bikpela long Listra, wanpela liklik taun long Galesia em wanpela provins bilong Rom. Ating em i kisim save long lotu Kristen taim em i yangpela, taim Pol i autim tok long Listra long 47 C.E. samting. I no longtaim na Timoti i kamap strong long ol samting bilong spirit, na ol brata long kongrigesen bilong em i luksave long dispela samting. Tupela yia bihain, Pol i kam bek long Listra na em i kisim save olsem Timoti i kamap strong, olsem na em makim Timoti long raun wantaim em long mekim wok misineri. (Aposel 14:5-20; 16:1-3) Taim Timoti i kamap strong long ol samting bilong spirit, em i kisim sampela bikpela wok moa, em i kisim tu wok bilong i go na strongim ol brata. Taim Pol i stap kalabus long Rom long 65 C.E. samting na raitim pas i go long Timoti, Timoti i mekim wok olsem wanpela elda Kristen long Efesus.
5. Olsem 2 Timoti 3:14, 15 i kamapim, wanem 2-pela samting i stiaim Timoti long putim ol mak bilong spirit long winim?
5 Dispela i kamapim klia olsem Timoti i bin putim sampela mak bilong spirit em i laik winim. Tasol wanem samting i kirapim em long mekim olsem? Long namba 2 pas Pol i raitim long Timoti, em i kolim 2-pela samting i bin kirapim Timoti long mekim olsem. Em i tok: “Yu mas holim strong dispela tok yu bin kisim na yu save bilip strong long en. Yu save gut long mipela ol manmeri i bin skulim yu long dispela tok. Na yu save, taim yu bin i stap liklik pikinini yet, yu stat long kisim save long ol buk i gat tok bilong God.” (2 Timoti 3:14, 15) Orait pastaim bai yumi skelim olsem wanem ol narapela Kristen i bin stiaim Timoti long ol samting em i laik mekim.
Kisim Helpim Long Ol Strongpela Kristen
6. Timoti i kisim wanem kain skul? Em i mekim wanem long dispela skul?
6 Timoti i kamap bikpela insait long famili em ol i no stap wanbel long lotu. Papa bilong em i bilong Grik, na mama bilong em, Yunis, na bubu meri bilong em, Lois, ol i bilong Juda. (Aposel 16:1) Yunis na Lois i skulim em long ol tok bilong Ol Skripsa Hibru long taim em i liklik yet. Taim ol i kamap Kristen, ol i skulim em long ol bilip Kristen na em i bilip. Timoti i kisim gutpela skul long ol samting em i lainim. Pol i tok: “Mi save gut olsem yu bilip tru long Krais, long wankain pasin olsem bipo tumbuna bilong yu Lois na mama bilong yu Yunis i bin bilip.”—2 Timoti 1:5.
7. Planti yangpela i gat wanem gutpela samting? Dispela inap helpim ol olsem wanem?
7 Long nau planti yangpela i gat ol papamama na bubu em ol i save aninit long God wankain olsem Lois na Yunis, ol i luksave olsem em i bikpela samting long ol pikinini i mas putim ol mak bilong spirit long winim. Olsem: Samira em inap tingim yet ol toktok papamama i bin mekim wantaim em taim em i yangpela. Em i tok: “Mama na Papa i skulim mi long kisim tingting bilong Jehova long ol samting na long putim wok bilong autim tok olsem bikpela samting long i stap bilong mi. Oltaim ol i kirapim mi long putim mak long insait long fultaim sevis.” Samira i bihainim tok bilong papamama na nau em i amamas long insait long famili Betel long kantri bilong em. Sapos papamama bilong yu i kirapim yu long putim ol mak bilong spirit long winim, orait tingim gut tok bilong ol. Ol i tingim tru ol samting i gutpela long helpim yu.—Sindaun 1:5.
8. Timoti i pas gut wantaim strongpela Kristen na olsem wanem dispela i helpim em?
8 Em i bikpela samting tu long yu painim ol gutpela poroman namel long lain brata Kristen. Ol elda long kongrigesen bilong Timoti na long Aikoniam, em longwe long ples bilong Timoti inap 30 kilomita, ol i save gut long em. (Aposel 16:1, 2) Em i pas gut wantaim Pol, em i strongpela man bilong toktok. (Filipai 3:14) Ol pas bilong Pol i soim olsem Timoti i bihainim ol gutpela tok em i kisim na em i redi long bihainim pasin bilong ol man i bilip. (1 Korin 4:17; 1 Timoti 4:6, 12-16) Pol i tok: “Yu bin i stap wantaim mi, na yu save pinis long pasin bilong mi long skulim ol manmeri long ol pasin God i laikim. Na yu save long ol pasin mi save wokabaut long en, na long as tru bilong dispela olgeta pasin bilong mi. Yu save olsem, mi save bilip strong long God, na oltaim mi save strongim bel bilong mi na mekim wok, na mi save laikim tru ol arapela na mi stap strong na karim hevi.” (2 Timoti 3:10) Yes, Timoti i save long ol pasin bilong Pol na em i bihainim gut. Olsem tasol sapos yu pas gut wantaim ol strongpela bratasista long kongrigesen, dispela bai helpim yu long putim ol mak bilong spirit em yu laik winim.—2 Timoti 2:20-22.
Stadi Long “Buk i Gat Tok Bilong God”
9. Yu mas makim ol gutpela poroman, na wanem narapela samting yu mas mekim bilong “lain gut long pasin bilong God”?
9 Bilong winim ol mak bilong spirit, yu ting yu mas bung wantaim ol gutpela poroman na em tasol? Nogat. Olsem Timoti, yu mas skelim gut “ol buk i gat tok bilong God.” Tru, ating yu pilim i hatwok long stadi, tasol tingim olsem Timoti i bin “lain gut long pasin bilong God.” Ol man bilong pilai spot ol i save trening inap planti mun na bai ol inap winim mak ol i putim. Olsem tasol, bilong winim ol mak bilong spirit yu mas daunim sampela laik bilong yu yet na wok strong. (1 Timoti 4:7, 8, 10) Tasol ating yu laik save, ‘Olsem wanem pasin bilong stadi long Baibel inap helpim mi long winim ol mak mi putim?’ Orait bai yumi skelim 3-pela rot em Baibel inap helpim yu.
10, 11. Olsem wanem ol tok bilong Baibel bai kirapim yu long putim ol mak bilong spirit long winim? Stori long ekspiriens bilong wanpela yangpela.
10 Namba 1, ol tok bilong Baibel bai kirapim yu na bai yu gat laik long mekim ol wok i givim biknem long God. Ol tok bilong Baibel i kamapim klia gutpela pasin bilong Papa bilong yumi long heven, bikpela pasin laikim em i bin mekim bilong helpim yumi, na ol blesing bilong i stap oltaim oltaim em bai i givim long ol gutpela wokman bilong em. (Amos 3:7; Jon 3:16; Rom 15:4) Taim save bilong yu long Jehova i go bikpela, pasin bilong yu long laikim em bai wok long kamap strong na bai yu gat laik long dediketim laip bilong yu long em.
11 Planti yangpela Kristen i tok olsem pasin bilong stadi oltaim long Baibel i bin helpim ol long pilim tru tok i tru. Adele i kamap bikpela insait long famili Kristen tasol em i no bin putim sampela mak bilong spirit long winim. Em i tok: “Papamama i kisim mi i go long ol miting long Haus Kingdom, tasol mi no mekim stadi bilong mi yet na mi no putim yau long ol tok i kamap long miting.” Tasol bihain long taim bikpela susa bilong em i kisim baptais, dispela i kirapim Adele long tingting strong long tok i tru. Em i tok: “Mi kirap ritim Baibel. Mi save ritim sampela hap bilong Baibel na raitim liklik tok long samting mi bin ritim. Mi holim yet ol dispela tok mi bin raitim. Insait long wanpela yia mi ritim Baibel olgeta.” Dispela i kirapim Adele long dediketim laip bilong em long Jehova. Maski em i gat sampela bagarap long skin, nau em i mekim wok painia, olsem em i save autim tok bilong God long olgeta de.
12, 13. (a) Pasin bilong stadi long Baibel bai helpim yangpela long senisim wanem ol samting? Olsem wanem em bai mekim olsem? (b) Stori long sampela samting em gutpela tingting na save bilong Baibel bai helpim yu long en.
12 Namba 2, Baibel bai helpim yu long senisim sampela pasin bilong yu em yu mas senisim. Pol i tokim Timoti long “ol buk i gat tok bilong God” na em i tok: “[Ol] i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.” (2 Timoti 3:16, 17) Sapos yu tingim tingim ol tok bilong Baibel na yu bihainim ol stiatok bilong en, dispela bai opim rot long spirit bilong God i helpim yu long senisim pasin bilong yu. Em bai helpim yu long kisim ol gutpela pasin olsem pasin daun, no ken les kwik, wok strong, na pasin bilong laikim tru ol wanbilip Kristen. (1 Timoti 4:15) Timoti i gat ol dispela pasin, olsem na em inap helpim gut Pol na ol kongrigesen.—Filipai 2:20-22.
13 Namba 3, Tok Bilong God i gat planti gutpela tingting na save. (Song 1:1-3; 19:7; 2 Timoti 2:7; 3:15) Em bai helpim yu long bihainim gutpela tingting taim yu makim ol man yu laik poromanim, ol amamas yu laik kisim, na ol narapela samting yu laik mekim. (Stat 34:1, 2; Song 119:37; 1 Korin 7:36) Bilong winim ol mak bilong spirit yu putim em i bikpela samting long yu mas wokim ol gutpela disisen long nau.
‘Ran Strong Long Resis’
14. Bilong wanem i hatwok long winim ol mak i givim biknem long God?
14 Em i gutpela long wok strong long winim ol mak i givim biknem long God, tasol i no isi long mekim olsem. Taim yu mas makim wanem wok yu bai mekim, ating ol wanblut, wankrismas, na ol tisa bai strong long yu mas i go long bikpela skul na bai yu kisim gutpela wok mani na dispela bai mekim yu i stap gut na amamas. (Rom 12:2) Tasol olsem Timoti, yu mas “ran strong long dispela gutpela resis” na bai yu ken “kisim laip i stap gut oltaim oltaim” em Jehova i tok promis long givim yu.—1 Timoti 6:12; 2 Timoti 3:12.
15. Ating Timoti i bin karim wanem hevi?
15 Taim ol famili bilong yu i no wanbilip bilong yu na ol i no amamas long samting yu laik mekim, dispela inap putim bikpela hevi long yu. Ating Timoti tu i mas winim kain hevi olsem. Wanpela buk i tok, famili bilong Timoti ol i “bilong ol lain i bin kisim bikpela skul na ol i maniman.” Ating papa bilong Timoti i laik bai Timoti i go long bikpela skul na helpim em long wok bisinis bilong famili.a Ating papa bilong Timoti i bel hevi tru taim em i save olsem Timoti i laik mekim wok misineri wantaim Pol—em wanpela wok em inap kisim bagarap na em i no inap kisim bikpela mani long en!
16. Wanpela yangpela i mekim wanem bilong karim hevi bilong papa i birua long em?
16 Ol yangpela Kristen long nau i gat wankain hevi. Matthew em i wok long wanpela brens ofis bilong ol Witnes Bilong Jehova, em i tok: “Taim mi kirap mekim wok painia, papa bilong mi i bel hevi tru long mi. Taim mi mekim wok olsem man bilong klinim ol haus bilong helpim mi yet long mekim wok autim tok, papa i pilim olsem mi no mekim gutpela wok long save mi bin kisim long skul. Em i save tok bilas long mi, na tokim mi long hamas mani mi inap kisim sapos mi mekim wok mani fultaim.” Matthew i mekim wanem bilong karim dispela hevi? Em i tok: “Mi save ritim Baibel na beten oltaim, na mi mekim olsem moa yet long taim mi pilim olsem mi laik kros.” Dispela pasin bilong Matthew i bin kamapim gutpela samting. Bihain em na papa bilong em i pas gut wantaim gen. Na tu, Matthew i go klostu moa long Jehova. Matthew i tok: “Mi bin lukim Jehova i lukautim mi long ol samting mi mas i gat, na em i strongim mi, na helpim mi long wokim ol gutpela disisen. Mi no inap kisim ol dispela samting sapos mi no bin tingim ol wok bilong spirit na putim olsem mak bilong winim.”
Tingim Ol Mak Bilong Spirit Yu Putim
17. Olsem wanem sampela inap pasim ol yangpela husat i laik insait long fultaim sevis? (Matyu 16:22)
17 Narapela samting inap pasim yu long winim ol mak bilong spirit em ol tok ol wanbilip inap mekim. Ating sampela bai tok, ‘Bilong wanem yu mas mekim wok painia? Yu inap kisim gutpela sindaun olsem ol narapela man na insait long wok autim tok wantaim. Kisim wanpela gutpela wok mani na dispela bai lukautim yu.’ Ating yu inap ting olsem dispela em i gutpela tok, tasol yu ting dispela bai helpim yu long lain gut long pasin bilong givim bel olgeta long God sapos yu bihainim dispela tok?
18, 19. (a) Yu mas mekim wanem bilong tingim ol samting bilong spirit? (b) Stori long ol samting em yu, wanpela yangpela, i mekim bilong helpim wok bilong Kingdom.
18 Sampela Kristen long taim bilong Timoti i gat wankain tingting. (1 Timoti 6:17) Bilong helpim Timoti long tingim ol samting bilong spirit, Pol i tokim em: “Yu save long pasin bilong ol soldia. Taim ol i mekim wok soldia, ol i no save holim ol arapela kain wok wantaim. Nogat. Ol i save mekim gutpela wok soldia tasol, bai ofisa bilong ol i ken laikim wok bilong ol.” (2 Timoti 2:4) Taim soldia i wok em i no inap larim ol narapela samting i pulim taim bilong em. Laip bilong em na bilong ol narapela i stap long han bilong em, olsem na oltaim em i redi long bihainim tok bilong man bilong bosim ol soldia. Olsem wanpela soldia i stap aninit long Krais, yu mas i gat wanpela tingting tasol na sakim pasin bilong bungim ol samting bilong skin em ol inap pasim yu long mekim tru dispela wok bilong autim tok na helpim ol man long kisim laip.—Matyu 6:24; 1 Timoti 4:16; 2 Timoti 4:2, 5.
19 Yu mas kisim pasin bilong redi long daunim laik bilong yu yet. “Olsem soldia bilong Krais Jisas, no ken tingting tumas long bungim ol gutpela gutpela samting bilong skin.” (2 Timoti 2:3, The English Bible in Basic English) Taim Timoti i raun wantaim Pol, em i lainim pasin bilong i stap isi long taim bilong hevi tu. (Filipai 4:11, 12; 1 Timoti 6:6-8) Yu tu inap mekim olsem. Olsem wanem? Yu redi long lusim sampela samting bilong yu yet na bai yu ken mekim ol wok bilong Kingdom?
Ol Blesing Nau na Bihain
20, 21. (a) Stori long sampela gutpela blesing yu inap kisim sapos yu putim ol mak bilong spirit long winim. (b) Yu tingting strong long mekim wanem?
20 Inap 15 yia samting Timoti i wok gut wantaim Pol. Timoti i lukim ol nupela kongrigesen i kamap taim ol i autim gutnius long klostu olgeta hap not bilong Mediterenian. Laip bilong em i gat amamas long en winim amamas em inap kisim sapos em i kisim wankain sindaun olsem ol wanlain bilong em. Sapos yu wok long winim ol mak bilong spirit, yu tu inap kisim planti gutpela blesing bilong spirit. Yu bai pas gut wantaim Jehova, na ol wanbilip Kristen bai laikim na rispektim yu. Bai yu kisim amamas long pasin bilong givim, na bai yu abrusim hevi bilong pasin bilong bungim planti mani kago samting. Tasol bikpela samting moa, yu bai “kisim dispela laip em i laip tru”—em laip oltaim long Paradais long graun.—1 Timoti 6:9, 10, 17-19; Aposel 20:35.
21 Olsem na sapos yu no mekim yet, mipela i laik strongim yu long kirap nau long putim mak long lain gut long pasin bilong God. Pas gut wantaim ol lain insait long kongrigesen em ol inap helpim yu long winim ol mak bilong spirit yu putim, na askim ol long stiaim yu. Putim mak long mekim stadi long Baibel. Wok strong long sakim tingting bilong dispela graun long kisim mani kago. Na oltaim tingim olsem God bilong “givim yumi planti gutpela samting bilong mekim yumi amamas,” em i tok promis olsem yu inap kisim planti gutpela blesing long nau na long bihain sapos yu wok long winim ol mak i givim biknem long em.—1 Timoti 6:17.
[Futnot]
a Long ol Grik bikpela skul em i bikpela samting. Plutarch, em i bin i stap long taim bilong Timoti, em i tok: “Gutpela skul em i as bilong olgeta gutpela samting. . . . Em bai helpim yu long bihainim stretpela pasin na bai yu stap amamas. . . . Olgeta narapela samting i no bikpela samting tumas.”—Moralia, I, “The Education of Children.”
Yu Tingim Yet?
• Ol yangpela inap kisim helpim long husat na bai ol i ken putim ol mak bilong spirit em ol i laik winim?
• Bilong wanem pasin bilong stadi long Baibel i bikpela samting?
• Olsem wanem ol yangpela i ken sakim tingting bilong ol man bilong dispela graun long kisim planti mani kago samting?
• Ol yangpela inap kisim wanem ol blesing sapos ol i tingim ol wok bilong spirit na putim olsem mak bilong winim?
[Piksa long pes 24]
Timoti i putim ol gutpela mak long winim
[Ol Piksa long pes 25]
Husat ol lain i helpim Timoti?
[Ol Piksa long pes 26]
Olsem wanem? Yu putim mak long ol samting bilong spirit long winim?