Tikikus—Wanpela Gutpela Wanwok
SAMPELA taim Tikikus i raun wantaim aposel Pol na em i bin wok olsem man bilong bringim tok bilong Pol i go long ol man. Pol i bilip tru em inap holim wok bilong lukautim mani na wok wasman. Baibel i kamapim tok olsem em i wanpela man ol inap bilip tru long em—em wanpela pasin olgeta Kristen i mas kisim—olsem na ating yu laik kisim sampela save moa long Tikikus.
Pol i stori long Tikikus olsem ‘wanwok na brata tru bilong em, na gutpela wokman tru bilong Bikpela.’ (Kolosi 4:7) Bilong wanem dispela aposel i stori long em olsem?
Helpim Ol Brata Long Jerusalem
Long yia 55 C.E. samting, ol Kristen i stap long Judia ol i sot long ol samting bilong skin. Olsem na bilong helpim ol, Pol i stretim rot bilong ol kongrigesen long Yurop na Esia Maina i ken helpim ol long mani samting. Tikikus, em i bilong provins Esia, na em i insait long dispela wok bilong helpim ol brata.
Bihain long Pol i tokim ol long ol samting ol i mas mekim long dispela mani, em i tok, ol i mas salim ol man ol narapela i bilip tru long ol i go long Jerusalem, o salim ol wantaim Pol bilong karim dispela mani i go long Jerusalem. (1 Korin 16:1-4) Taim Pol i lusim Grik bilong i go longwe long Jerusalem, sampela man i go wantaim em, na ating wanpela bilong ol em Tikikus. (Aposel 20:4) Ating bikpela lain man olsem i mas i go, long wanem, ol i holim mani sampela kongrigesen i bin givim long ol. Na ating ol i mas go olsem sekyuriti tu, long wanem, ol stilman i wokabaut long rot na ol inap mekim nogut long ol.—2 Korin 11:26.
Aristarkus na Trofimus i go wantaim Pol long Jerusalem, olsem na sampela man i ting Tikikus na ol narapela tu i go wantaim em. (Aposel 21:29; 24:17; 27:1, 2) Tikikus i insait long wok bilong helpim ol brata, olsem na ol i ting, em i dispela “brata” i bin wok wantaim Taitus long Grik long stretim ol samting bilong bungim mani, na em i dispela man “ol sios i bin makim em bilong em i ken wokabaut wantaim [Pol] na . . . mekim dispela wok marimari bilong bungim mani samting.” (2 Korin 8:18, 19; 12:18) Sapos namba wan wok ol i givim long Tikikus em i bikpela wok, namba tu wok i wankain.
Lusim Rom i Go Long Kolosi
Inap 5-pela o 6-pela yia bihain (yia 60-61 C.E.), Pol i ting em bai lusim kalabus. Em namba wan taim em i kalabus long Rom. Tikikus i stap wantaim Pol, na i longwe long ples bilong em inap planti handet kilomita. Nau Tikikus bai go bek long Esia. Dispela i opim rot long Pol i ken salim ol pas long ol kongrigesen Kristen i stap long dispela hap, na long salim wokboi nating bilong Filemon, em Onesimus, i go bek long Kolosi. Tikikus na Onesimus i karim 3-pela pas na nau ol dispela pas i hap bilong Baibel—wanpela bilong ol Efesus, wanpela bilong ol Kolosi, na wanpela bilong Filemon. Na ating ol i go givim wanpela pas long kongrigesen long Laodisia, em wanpela taun i stap longwe long Kolosi inap 18 kilomita.—Efesus 6:21; Kolosi 4:7-9, 16; Filemon 10-12.
Tikikus i no man bilong i go givim ol pas tasol. Em wanpela man Pol inap bilip tru long em bilong bringim ol tok bilong em i go long ol kongrigesen. Na yumi save long dispela, long wanem, Pol i tok: “Tikikus bai i tokim yupela long olgeta wok mi mekim. Tikikus em i wanwok na brata tru bilong yumi, na em i gutpela wokman tru bilong Bikpela. Mi salim em i kam long yupela long dispela as tasol, bilong yupela i ken save long mipela i stap olsem wanem, na bilong em i ken strongim bel bilong yupela.”—Kolosi 4:7, 8.
Saveman E. Randolph Richards i tok, man bilong bringim ol pas “planti taim em i stap olsem namelman bilong man i raitim pas na ol man i kisim pas. . . . [Wanpela as] na i mas i gat man ol inap bilip tru long em bilong i go givim ol pas long ol narapela, em olsem: Planti taim em i bringim sampela toksave moa. Pas inap stori liklik long wanpela samting, olsem tingting bilong man i raitim pas, tasol man i bringim pas em i mas stori gut long dispela samting long man i kisim pas.” Pas inap stori long sampela bilip na ol samting ol i mas stretim hariap, tasol ol narapela samting gutpela man bilong bringim pas bai stori long en.
Ol pas i go long ol Efesus, na ol Kolosi, na Filemon, ol i stori liklik tasol long i stap bilong Pol. Olsem na Tikikus i mas stori long i stap bilong Pol long Rom, na kisim gut save long i stap bilong ol kongrigesen bambai em inap strongim ol. Ol dispela kain toksave na wok ol i givim tasol long ol man ol inap bilip tru olsem ol bai mekim gut wok bilong man i bin salim ol bilong mekim. Tikikus em i wanpela kain man olsem.
Wok Wasman Long Ol Longwe Ples
Taim Pol i lusim kalabus long Rom, em i tingting long salim Tikikus o Artemas i go lukim Taitus i stap long ailan Krit. (Taitus 1:5; 3:12) Taim Pol i kalabus namba tu taim long Rom (ating long yia 65 C.E.), em i salim Tikikus gen bilong i go long Efesus, ating bilong kisim ples bilong Timoti bambai Timoti inap i kam na stap wantaim Pol.—2 Timoti 4:9, 12.
Yumi no save, Tikikus i go long Krit na long Efesus long dispela taim o nogat. Tasol ol dispela kain stori i makim olsem, Tikikus em i wanpela bilong ol gutpela pren bilong Pol i go inap long ol laspela yia bilong wok bilong dispela aposel. Sapos Pol i tingting long salim Tikikus olsem senis bilong Timoti na Taitus long mekim bikpela wok i gat hatwok long en, dispela i kamapim klia olsem, Tikikus em i strongpela wasman Kristen. (Skelim wantaim 1 Timoti 1:3; Taitus 1:10-13.) Em i amamas long raun na mekim wok long ol longwe hap, olsem na em inap mekim wok bilong helpim Pol na kongrigesen Kristen olgeta.
Long nau, ol Kristen i daunim laik bilong ol yet, ol i amamas long mekim wok bilong God long ol kongrigesen bilong ol Witnes Bilong Jehova, o ol i redi long go na mekim wok bilong Kingdom long ol narapela hap. Planti tausen ol i amamas long mekim wok olsem misineri, wasman bilong raun, wokman intenesenel bilong wokim ol haus Betel samting, o long wok long hetkota bilong Sosaiti Was Taua, o long wanpela brens-ofis bilong en. Olsem Tikikus, ol i no stap ples klia tumas, tasol ol i save wok strong. Ol i ‘gutpela wokman’ em God na ol narapela Kristen i save laikim tru olsem ‘ol wanwok long wok bilong Bikpela.’