Bilong Wanem Sol i Mekim Nogut Long Ol Kristen?

‘BIPO MI BIN TING MI MAS MEKIM planti samting bilong daunim nem bilong Jisas bilong Nasaret. Na mi mekim ol dispela samting long Jerusalem. Mi bin kisim namba long ol bikpris, na mi kalabusim planti manmeri bilong God. Na taim ol i vot long kilim ol disaipel i dai, mi tu mi bin tok long ol i mas i dai. Planti taim mi bin i go insait long ol haus lotu bilong holimpas ol na mekim save long ol. Mi bin trai hat long mekim ol i givim baksait long Bikpela na tok nogut long em. Mi belhat nogut tru long ol, na mi bin i go painim ol long ol taun i stap longwe tu, bai mi ken mekim save long ol.’​—⁠Aposel 26:​9-​11.

EM TOK bilong Sol bilong Tarsus, em yumi save long em olsem aposel Pol. Yumi save taim em i mekim dispela tok, em i senisim pinis pasin bilong em. Em i no birua moa long lotu Kristen. Nogat. Nau em i wanpela bilong ol man i wok strong long mekim wok bilong en. Tasol wanem samting i bin kirapim Pol na em i bin mekim nogut long ol Kristen? Bilong wanem em i ting em i mas mekim ol dispela pasin? Na i gat sampela samting yumi ken lain long dispela stori bilong em?

Ol i Kilim i Dai Stiven

Baibel i tok Sol em wanpela bilong ol man i bin kilim i dai Stiven. “Ol i rausim [Stiven] i go ausait long taun, na ol i tromoi ston long em bilong kilim em i dai. Ol man pastaim i bin sutim tok long em, ol i rausim longpela klos bilong ol na putim i stap klostu long lek bilong wanpela yangpela man, nem bilong en Sol.” “Na long ai bilong Sol, dispela pasin ol i mekim long Stiven em i stret.” (Aposel 7:​58; 8:⁠1) Wanem samting i mekim na ol i laik kilim Stiven i dai? Ol Juda na sampela lain bilong Silisia tu, ol i bin tok pait wantaim Stiven, tasol ol i no inap winim em long toktok. Sol tu em i bilong Silisia, tasol yumi no save em i bin insait long dispela o nogat. Ol i kisim ol man bilong sutim tok giaman long Stiven na tok em i bin mekim tok nogut long God na ol i kisim em i go long kaunsil. (Aposel 6:​9-​14) Dispela kaunsil, em hetpris i bosim, em i wok olsem nambawan kot bilong ol Juda. Nambawan kaunsil i bosim olgeta samting bilong lotu, na ol lain bilong en i save was tu long ol samting ol i ting i stretpela bilip. Long tingting bilong ol, i stret Stiven i mas i dai long samting em i bin mekim. Olaman! Stiven i no bin pret long sutim tok long ol olsem ol i no bihainim Lo, a? (Aposel 7:​53) Orait, tete bai ol i soim em olsem ol i save bihainim stret lo!

Sol i orait long ol i kilim Stiven, long wanem, dispela i stret wantaim bilip bilong em. Em i wanpela Farisi. Dispela lain i gat strong na ol i laik bai ol man i mas bihainim stret olgeta lo na pasin bilong ol Juda. Ol i ting lotu Kristen i birua long ol bilip bilong ol na skulim ol man long nupela rot bilong kisim laip, em long rot bilong Jisas. Ol Juda long taim bilong ol aposel i ting, Mesaia bai kain olsem wanpela strongpela King na em bai helpim ol long stap fri na ol Rom i no ken bosim strong ol. Man i kisim strafe long Nambawan Kaunsil, long wanem, ol i ting em i tok nogut long God na ol i hangamapim em long diwai olsem wanpela man nogut tru bilong givim pen long em, long tingting bilong ol, dispela man i no Mesaia. Nogat tru.

Lo i tok sapos ol i hangamapim wanpela man long pos, dispela man i “samting nogut long ai bilong God.” (Lo 21:​22, 23; Galesia 3:​13) Frederick F. Bruce i tok, long tingting bilong Sol, “dispela tok i makim stret Jisas. Em i dai olsem wanpela man nogut long ai bilong God, olsem na em i no Mesaia, long wanem, olsem pasin bilong ol Juda i makim, God bai mekim gut tru long Mesaia. Olsem na man i tok Jisas em i Mesaia, em i olsem man bilong tok nogut long God, na ol man i tok olsem ol i mas i dai olsem ol man bilong tok nogut long God.” Bihain Sol yet i tok, dispela tingting olsem ‘Krais i dai pinis long diwai, em i olsem tok nogut long tingting bilong ol Juda.’​—⁠1 Korin 1:23.

Taim Sol i lukim ol man i bihainim dispela bilip em i strong tru long birua long en. Bilong pinisim dispela kain bilip em i ting i orait tu long bagarapim ol man. Em i bin bilip tru olsem dispela em i laik bilong God. Taim Sol i stori long tingting bilong em long bipo, em i tok: “Mi strong tru long mekim wok bilong God, olsem na bipo mi bin wok long mekim nogut long ol manmeri bilong sios. Sapos ol man i tingting long ol tok bilong lo na ol i skelim pasin bilong mi, orait mi no gat asua.” “Mi bin mekim nogut tru long ol manmeri bilong sios bilong God. Mi bin wok long bagarapim sios olgeta. Mi bin strong tumas long bihainim olgeta pasin bilong ol tumbuna bilong mi, na long dispela pasin mi . . . winim pasin bilong planti bilong ol yangpela man bilong ol Juda ol i wanlain wantaim mi.”​—⁠Filipai 3:6; Galesia 1:​13, 14.

Man i Go Pas Long Mekim Nogut Long Ol Kristen

Taim Stiven i dai pinis, Sol i no stap moa olsem man bilong helpim wok bilong mekim nogut long ol Kristen, nogat; em i stap olsem man i go pas long mekim dispela wok. I luk olsem em i gat nem long mekim dispela pasin, long wanem, taim em i kamap wanpela Kristen na em i laik bung wantaim ol disaipel, “olgeta ol i pret long em, na ol i no bilip olsem em i bin kamap disaipel.” Taim ol i save tru olsem em i wanpela Kristen, ol disaipel i amamas tru long dispela samting na ol i tenkyu long God. Ol i save i no wanpela man nating i senisim pasin bilong em, tasol em “dispela man i wok long kilim [ol], tasol nau em i save autim gutnius bilong dispela pasin bilong bilip bipo em i wok long bagarapim.”​—⁠Aposel 9:​26; Galesia 1:​23, 24.

Damaskus i stap longwe long Jerusalem inap 220 kilomita​—⁠man i mas wokabaut inap 7-pela o 8-pela de bilong i go kamap long en. Tasol Sol i “strong yet long bagarapim ol disaipel bilong Bikpela na kilim ol i dai,” olsem na em i go long hetpris na askim em long raitim ol pas long ol hetman bilong ol haus lotu long Damaskus. Sol i mekim olsem bambai em i ken kalabusim ol manmeri i bihainim dispela “Rot” na bringim ol i kam long Jerusalem. Taim em i kisim tok orait, em i kirap long ‘bagarapim ol manmeri bilong kongrigesen. Em i go insait long ol haus bilong ol na em i kisim ol man na meri wantaim. Na em i putim ol long kalabus.’ Na sampela narapela em i ‘wipim ol insait long haus lotu,’ na em i ‘vot long ol i mas i dai.’​—⁠Aposel 8:​3; 9:​1, 2, 14; 22:​5, 19; 26:​10.

Ol saveman i tingim skul Sol i bin kisim long Gamaliel na strongpela wok em i mekim bihain, olsem na ol i ting pastaim em i wanpela sumatin bilong Lo, tasol bihain em i kamap wanpela man i gat nem insait long lotu Juda. Wanpela man bilong raitim buk i tok, ating Sol i bin kamap wanpela tisa long haus lotu long Jerusalem. Tasol yumi no save gut long insait bilong dispela tok olsem “mi tu mi bin tok long ol mas i dai.” Ating dispela i makim olsem em i insait long lain bilong harim kot o em i olsem wanpela man i mekim tok bilong helpim wok bilong kilim i dai ol Kristen.a

Long pastaim olgeta Kristen i kamap long lain Juda o long ol narapela man i bihainim lotu Juda, olsem na Sol i ting lotu Kristen i wanpela lain i bikhet na givim baksait long lotu Juda, na em i ting em wok bilong ol hetman bilong lotu Juda long stretim dispela lain. Saveman Arland J. Hultgren i tok: “Pol, em man bilong mekim nogut long ol Kristen, ating em i no inap birua long lotu Kristen, sapos lotu Kristen i wanpela lotu i no insait long lotu Juda, olsem wanpela narapela lotu i resis wantaim lotu Juda. Pol na ol narapela i bin tingim lotu Kristen olsem wanpela lain i stap yet aninit long ol hetman bilong lotu Juda.” Olsem na em i laik ol dispela Juda i mas lusim lotu Kristen na kam bek long lotu Juda, na em i mekim wok long ol kain kain samting bilong mekim olsem. (Aposel 26:11) Wanpela rot em olsem, em i putim ol long kalabus. Narapela em long wipim ol long haus lotu. Em wanpela pasin ol i bihainim bilong mekim save long ol man i sakim tok bilong ol rabai na olgeta kot i gat 3-pela jas long en inap givim dispela strafe long ol man.

Taim Sol i laik go long Damaskus na Jisas i kamap long em long rot, dispela i pasim em long mekim ol dispela samting. Pastaim Sol i stap birua tru bilong lotu Kristen, tasol wantu em i kamap strongpela man bilong tokaut long en, na i no longtaim na ol Juda long Damaskus i painim rot bilong kilim em i dai. (Aposel 9:​1-​23) Taim Sol i kamap Kristen, em i karim planti hevi olsem em yet i bin givim long ol Kristen, olsem na sampela yia bihain em inap tok: “Ol Juda i bin paitim mi 39 taim long wip, na dispela samting i kamap long mi inap 5-pela taim.”​—⁠2 Korin 11:​24.

Ol i Givim Bel Long Samting i No Stret

Taim Sol i kamap Kristen pinis na ol man i kolim em Pol, em i tok: “Bipo mi bin tok bilas long nem bilong [Jisas], na mi birua long em na mi bin tok nogut long em. Tasol em i save, mi bin mekim ol dispela pasin, long wanem, mi no bin save gut long em na mi no bilip long em. Olsem na em i sori long mi.” (1 Timoti 1:​13) Olsem na sapos wanpela man i givim bel tru long lotu bilong em, dispela i no makim olsem God i orait long em. Sol i givim bel tru na bihainim maus bilong bel, tasol dispela i no makim olsem em i bihainim pasin i stret. Pasin bilong em long wok strong tru, i no kamapim stretpela wok. (Skelim wantaim Rom 10:​2, 3.) Dispela i mas kirapim yumi long tingim pasin bilong yumi yet.

Planti manmeri long nau i bilip strong olsem, God i laik bai ol i mas i stap olsem wanpela gutpela man, na em tasol. Tasol dispela tingting i stret? I gutpela sapos olgeta i tingim gut dispela tok Pol i bin mekim: “Yupela i mas skelim gut olgeta tok na pasin. Na yupela i mas holimpas ol gutpela pasin.” (1 Tesalonaika 5:21) Bilong mekim olsem, yumi mas lusim sampela hap taim bilong kisim stretpela save long tok i tru bilong Baibel na bihainim stret ol dispela tok. Taim yumi skelim ol tok bilong Baibel na yumi luksave olsem yumi mas senisim sampela pasin bilong yumi, orait yumi no ken lusim taim, yumi mas senisim ol dispela pasin. Ating yumi no bin tok nogut long God, o birua tru long ol narapela o bikhet tru long God olsem Sol i bin mekim. Tasol olsem Sol, yumi tu i mas mekim ol wok i stret long bilip bilong yumi na stretpela save yumi kisim na bai God i orait long yumi.​—⁠Jon 17:​3, 17.

[Futnot]