Ol i Painim Ol Tok Profet Ol Inap Bilip Long En
BIHAIN liklik long taim king bilong Masedonia—em Bikpela King Aleksander—em i kamap king long yia 336 B.C.E., em i go long ples holi bilong Delfi, long sentral Grik. Em i gat bikpela laik tru long daunim planti kantri long dispela taim bipo. Tasol em i laik bai god bilong em i ken strongim bel bilong em na em i ken bilip olsem dispela bikpela wok em i laik mekim bai kamap gutpela. Wanpela stori bilong bipo i tok, long dispela de Aleksander i bin go long Delfi, ol i no orait long em i toktok wantaim glasmeri. Aleksander i no laik lusim dispela ples na em i no bin kisim tok long samting em i laik save long en, olsem na em i strong long glasmeri i mas tokaut long samting em bai kamap. Meri i les na singaut olsem: “Eh! Pikinini, i no gat wanpela inap daunim yu!” Yangpela king i ting dispela tok i makim olsem gutpela samting bai kamap—olsem ami bilong em bai winim ol pait.
Tasol Aleksander inap kisim stretpela save long samting bai kamap long wok bilong em sapos em i bin skelim ol tok profet i stap long Buk Daniel long Baibel. Ol dispela tok profet i tok, em bai daunim kwik planti kantri, na dispela samting i kamap stret tru olsem dispela tok profet i makim. Ol stori bilong bipo i tok, bihain rot i op bilong Aleksander i ken lukim ol tok Daniel i bin mekim long em. Wanpela man Juda bilong raitim stori bilong ol samting i bin kamap bipo, em Josifas, em i tok, taim dispela king bilong Masedonia em i go insait long Jerusalem, ol i soim tok profet bilong Daniel long em—ating sapta 8 bilong dispela buk. (Daniel 8:5-8, 20, 21) Wanpela stori i tok, dispela samting i mekim na ami bilong Aleksander i no bagarapim dispela taun.
Yumi Olgeta Man i Gat Laik Long En
King o man nating, man bilong bipo o man bilong nau—ol man i gat laik long save long ol tok bilong ol samting bai kamap bihain na ol inap bilip long en. Yumi ol man i gat tingting, olsem na yumi save skelim ol samting i bin kamap bipo, na yumi save long ol samting i kamap nau, na yumi laik tru long save long ol samting bai kamap bihain. Wanpela savetok bilong ol Saina i tok: “Sapos man inap save long ol samting bai kamap tru 3-pela de bihain, em bai stap olsem maniman inap planti tausen yia.”
Long bipo yet na i kam inap long nau, planti milion man ol i bin wok strong long kisim save long ol samting bai kamap bihain long rot bilong wanpela samting ol i ting em i wanpela god. Tingim ol Grik bilong bipo. Ol i gat planti ples holi bilong ol, olsem ol ples holi bilong Delfi, na Delos, na Dodona, em ol ples ol inap go long en bilong kisim save long ol god bilong ol long ol samting bilong gavman o ami, na long ol samting bilong ol yet olsem long raun bilong ol, marit, na pikinini. I no ol king na bikman bilong ami tasol ol i bin wok strong long kisim save i kam long ples spirit long rot bilong ol glasman, nogat; ol lain na biktaun samting tu ol i bin mekim olsem.
Wanpela profesa i tok, long nau ‘planti lain i kamap em ol i givim bel long kisim save long ol samting bai kamap bihain.’ Tasol planti ol i sakim wanpela buk i kolim stret ol samting i mas kamap bihain—em Baibel. Ol i no laik bilip olsem ol tok profet bilong Baibel i kolim stret ol samting ol i wok strong long kisim save long en. Sampela saveman i tok, ol tok profet bilong Baibel na ol tok ol glasman bilong bipo ol i bin mekim, tupela wantaim i bikpela samting. Na ol man bilong nau i no bilip tumas, planti taim ol i save sakim ol tok profet bilong Baibel.
Mipela i laik bai yu yet yu skelim gut ol tok profet bilong Baibel na ol tok bilong ol glasman, na bai yu ken save dispela i kamapim klia wanem samting. Olsem wanem? Yu inap bilip long ol tok profet bilong Baibel, winim ol tok bilong ol glasman bilong bipo? Yu inap mekim ol samting long i stap bilong yu i makim olsem yu bilip long ol tok profet?
[Piksa long pes 3]
Baibel i tok profet long wok bilong Aleksander long daunim kwik planti kantri
[Kredit Lain]
Cortesía del Museo del Prado, Madrid, Spain
[Piksa long pes 4]
Bikpela King Aleksander
[Kredit Lain]
Musei Capitolini, Roma
[Piksa Kredit Lain long pes 2]
COVER: General Titus and Alexander the Great: Musei Capitolini, Roma