Ol Man i No Stap Wankain—Yu Ting Em Laik Bilong God?

Bekim bilong dispela askim em nogat. Orait nau yumi ken stori long dispela.

GOD i laik bai olgeta manmeri i gat wankain rot long amamas long i stap bilong ol. Baibel i stori long taim God i wokim man, olsem: “God i tok olsem, ‘Nau yumi wokim ol manmeri bai ol i kamap olsem yumi yet. Bai yumi putim ol i stap bos bilong ol pis na ol pisin na bilong olgeta kain animal na bilong olgeta samting bilong graun.’ ” Taim God i wokim pinis olgeta samting bilong graun, “[em] i lukim olgeta dispela samting i gutpela, na em i amamas tru.”​—⁠Stat 1:​26, 31.

Tasol ol man long nau ol i no stap wankain, olsem na yu ting God inap tok dispela em “i gutpela”? Em i no ken mekim olsem, long wanem, ‘God em i as bilong pasin bilong laikim ol arapela.’ (1 Jon 4:⁠8) Na Baibel i tok, “Em i no save bihainim wantok pasin” na “pasin bilong en i gutpela na stretpela tasol.” (Lo 10:17; 32:4; skelim wantaim Jop 34:19.) Na aposel Pita i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”​—⁠Aposel 10:​34, 35.

God i no save bihainim pasin wantok; em i save laikim ol arapela, na bihainim stretpela pasin, na mekim ol samting i stret, olsem na em i no inap wokim ol man bambai ol i no gat rot long kisim amamas. Sapos em i wokim ol bambai narapela i ken daunim narapela na ol i no stap wankain, orait dispela i no stret wantaim pasin bilong em. Em i laik bai “olgeta man, taim mama i karim ol, ol i stap fri na olgeta i stap olsem man i gat nem na ol inap mekim ol samting i stret long ol i ken mekim.” Tasol long nau ol samting i no stap olsem. Bilong wanem?

I Gat Wanem As na Ol Man i No Stap Wankain

Tru, God i wokim ol man bambai olgeta i gat rot long i stap wankain, olsem narapela i no winim narapela, tasol i no olsem em i laik bai olgeta i mas wankain stret long olgeta wan wan samting, nogat. Ol inap stap narapela kain long save bilong ol long wokim ol samting, na long ol samting ol i laik mekim, na long pasin bilong ol. Na tu, ol inap stap narapela kain long wok bilong ol na long namba ol i kisim. Olsem: Man na meri ol i no wankain long olgeta samting, tasol God i wokim meri olsem “wanpela poroman” bilong man. (Stat 2:​18) Ol pikinini i no holim wankain namba olsem papamama i holim. Tasol maski ol man i no stap wankain long ol dispela samting, olgeta​—⁠em man, meri, pikinini​—⁠ol i mas i gat wankain rot, em God i bin givim long ol, long painim amamas. Olgeta i mas stap olsem man i gat nem na God i orait long ol.

Na olsem tasol, God i bin givim narapela narapela wok long ol pikinini spirit bilong Em, em God i bin wokim ol taim em i no wokim yet ol man long graun. (Stat 3:​24; 16:​7-​11; Aisaia 6:​6; Jut 9) Tasol olgeta i gat wankain rot long amamas long i stap bilong ol. Dispela i kamapim klia pasin bilong God long mekim wankain pasin long olgeta man.

Tasol sori tru, wanpela ensel i gat tok long pasin bilong God long mekim wankain pasin long olgeta man. Em i laik kisim samting God i no bin givim long em; em i laik kisim bikpela namba moa. Em i wok long tingim tingim dispela laik nogut, na nau em i kirap mekim wok bilong winim Jehova​—⁠em Man bilong wokim olgeta samting, olsem na i stret em i holim wok olsem Nambawan Bos bilong heven na graun. Dispela pikinini spirit bilong God em i bikhet, bihain em i pulim man na meri long tokim God long givim samting long ol em God i no bin givim long ol. (Stat 3:​1-6; skelim wantaim Aisaia 14:​12-​14.) Olsem na nau olgeta man i no gat wankain rot long amamas long i stap bilong ol, em God i bin wokim ol bilong kisim. Dispela bikhet-ensel, em Kamapim Tok Hait 20:2 i tok, em “Satan,” em i kamap man nogut na em i as bilong dispela pasin olsem ol man i no stap wankain.

Yu Ting Dispela Samting Bai Senis?

Yes, em bai senis!

Tasol husat inap kamapim ol dispela senis yumi laik bai i mas kamap? Inap planti handet yia ol bikman long graun i bin givim bel long helpim ol man long stap wankain, olsem narapela i no winim narapela. Tasol ol i bin helpim sampela tasol, olsem na planti man i ting i no gat rot long stretim tru tru dispela hevi. Tingting bilong God i stap long Aisaia 55:​10, 11 i olsem: “Ren i save pundaun long skai, em i no save go bek nating antap long skai. Nogat. Em i save givim wara long graun na mekim ol kaikai i kamap long gaden, na ol man i save kisim. Sampela ol i save kaikai na sampela pikinini kaikai ol i save planim. Olsem tasol tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”

God Jehova i bin tokaut olsem em bai truim laik bilong em bilong pastaim olsem em i laik bai olgeta man i gat wankain rot long stap laip na kisim amamas​—⁠yumi save long dispela na i mekim gut bel bilong yumi! Em i God bilong tok tru, olsem na em bai truim ol samting em i bin tok promis long mekim. Gutpela tru, em i gat laik na em i gat strong long mekim olsem. Em bai mekim olsem wanem?

Em bai kamapim dispela samting long rot bilong Kingdom em Krais Jisas i bin lainim ol disaipel bilong em long beten askim God long salim i kam: “Papa bilong mipela, yu stap long heven . . . Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:​9, 10) Em nau, Kingdom bilong God em i rot Jehova bai mekim wok long en bilong ‘daunim na bagarapim ol king [i stap long nau] na Kingdom bilong em bai i stap oltaim.’​—⁠Daniel 2:​44.

Aninit long wok bos bilong dispela Kingdom bilong heven, wanpela nupela lain manmeri bai stap. Aposel Jon i tingim dispela samting na long laspela buk bilong Baibel, Kamapim Tok Hait, em i tok: “Mi lukim nupela skai na nupela graun i stap. Namba wan skai na namba wan graun i go pinis olgeta.” (KTH 21:⁠1) Ol samting nogut i bin kamap long wanem ol man i no stap wankain​—⁠olsem pasin bilong i stap rabis, sik, no gat save, pasin bilong daunim narapela, na ol narapela samting i givim pen na hevi long ol man​—⁠olgeta dispela samting bai pinis.a

Winim 100 yia pinis, ol Witnes Bilong Jehova i bin wok long helpim ol man long kisim save long dispela Kingdom. (Matyu 24:14) Long rot bilong ol buk na nius ol i bin wok strong long helpim ol man long kisim save long ol samting God i gat laik long mekim, olsem Baibel i stori long en. Bikpela wok ol i bin mekim long olgeta hap bilong graun bilong skulim ol man, dispela i bin helpim ol man long kisim tingting olsem bihain ol inap stap wankain olsem ol narapela na stap amamas, tasol i no dispela samting tasol. Dispela wok i bin helpim ol man long nau tu long daunim dispela pasin olsem ol man i no stap wankain.

[Futnot]

[Rait long pes 5]

God i laik bai olgeta manmeri i gat wankain rot long amamas long i stap bilong ol