Daunim Pasin Olsem Ol Man i No Stap Wankain
Klostu nau Man bilong wokim yumi bai kamapim laik bilong ol man olsem ol i laik stap wankain, olsem narapela i no winim narapela. Tasol taim yumi wetim God i mekim olsem, yumi ken helpim yumi yet wantaim famili bilong yumi na mekim sampela wok bilong daunim dispela pasin olsem ol man i no stap wankain. Nelson Mandela, bipo em presiden bilong Saut Afrika, em i tok: ‘Samting i mekim na yumi stap narapela kain long narapela, em ol wok yumi mekim long samting yumi kisim pinis; i no samting yumi kisim long narapela, nogat.’
OL SAMTING i bin kamap bipo i kamapim klia olsem dispela tok bilong Mandela em i tok tru. Planti man na meri, taim mama i karim ol, ol i no holim planti samting, tasol ol i mekim wok long ol samting ol i holim pinis na ol i kisim planti gutpela samting, na dispela i mekim ol i stap narapela long ol wanlain bilong ol i bin kisim bikpela skul. Tasol sampela, taim mama i karim ol, ol i holim planti gutpela samting, tasol ol i lusim nating ol dispela samting na ol i no mekim bikpela wok long save bilong ol.
Mekim Gutpela Wok Long Ol Samting Yu Holim!
Ol Witnes Bilong Jehova i gat bikpela laik long helpim ol man long kisim save long ol samting God i laik mekim na ol i helpim ol long rot bilong stadi wantaim ol long Baibel. Tasol ol i save pinis, bilong dispela save i ken helpim tru tru ol man, ol dispela man i mas save long rit rait. Olsem na ol Witnes Bilong Jehova i bin skulim planti planti tausen manmeri long rit rait—long wanpela kantri long Wes Afrika, ol i bin skulim 23,000 manmeri (kirap long 1995) long rit rait. Nius San Francisco Examiner i tok long gutpela wok ol Witnes i mekim olsem: “Ol i save bihainim ol lo bilong kantri. Ol i save tromoi takis, na lukautim ol sikman, na skulim ol man i no save rit rait.”
Na tu, ol Witnes Bilong Jehova i bin mekim wok long wanpela skul bilong lainim ol man long mekim tok long pletfom. Ol i bin skulim planti handet tausen man long save gut long pasin bilong toktok long ai bilong ol man. Sampela bilong ol, pastaim ol i gat hevi long toktok. Tingim wanpela man long Saut Afrika, em i tok: ‘Maus bilong mi i hevi na mi no inap toktok gut, olsem na mi save sem. Mi pasim maus na larim ol narapela i kamapim toktok bilong mi. Taim mi go insait long Skul Bilong Wok Autim Tok, mi mas kaunim wanpela hap bilong Baibel. Maus i hevi tru, olsem na mi no inap pinisim tok bilong mi long taim stret. Bihain long miting man bilong lukautim skul i mekim sampela gutpela tok bilong helpim mi. Em i tok, taim mi kaunim buk long haus, mi no ken mekim long tingting tasol, mi mas kaunim long maus. Mi kirap na mekim olsem long olgeta de taim mi kaunim Baibel o nius Wastaua.’ Pasin bilong em long toktok i wok long kamap gutpela na nau em i save mekim ol pablik-tok long ai bilong planti manmeri, olsem sampela handet, na sampela tausen tu.
Stap Wankain Namel Long Ol Brata
I stap bilong ol Witnes Bilong Jehova long ol samting bilong edukesen, lukautim skin, mani, sindaun, em i no wankain. Ol dispela samting ol i no stap wankain long en, em ol samting i stap pinis insait long dispela pasin bilong graun i gat kain kain hevi long en. Tasol taim yumi skelim ol Witnes wantaim ol narapela lain lotu, yumi kisim save olsem ol i no save tingim skin, na sindaun samting bilong ol narapela.
Ol i bin mekim olsem long rot bilong givim bel long bihainim ol tok ol i bin lainim long Baibel. Sampela lo i olsem: “Mi no save skelim ol man olsem ol man i save skelim. Nogat. Ol man i save lukluk long bodi. Tasol mi save lukim tingting na laik bilong man na mi skelim ol.” (1 Samuel 16:7) “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) “Sapos ol i mekim pasin nogut long yupela, orait yupela i no ken bekim pasin nogut long ol. Nogat. Oltaim yupela i mas tingting long mekim pasin i gutpela long ai bilong olgeta man. Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man.”—Rom 12:17, 18; lukim tu 1 Timoti 6:17-19; Jems 2:5, 9.
Ol Witnes Bilong Jehova i save bihainim ol dispela lo bilong Baibel i kamapim pasin wanbel, olsem na ol i no larim pasin bilong tingim skin na sindaun samting bilong ol man i stap namel long ol. Ol i no tingim ol dispela samting taim ol i laik makim sampela long holim wok insait long kongrigesen Kristen. Ol i givim wok olsem wok tisa na wok wasman long ol man i winim mak bilong ol samting bilong spirit.—1 Timoti 3:1-13; Taitus 1:5-9.
Ol man i no gat wankain sindaun olsem ol narapela na ol i bin kisim hevi long dispela, ol i save kisim nupela strong taim ol Witnes i tingim ol i olsem brata na sista bilong ol i stap wankain tasol long ai bilong Man bilong wokim ol! Martina i pilim tru dispela samting. Taim papa bilong em i lusim famili, mama tasol i mekim bikpela long em, na ol i stap rabis. Planti taim ol narapela i no tingim gut em, na em i save sem, na em i hatwok long stap pren wantaim ol narapela. Em i kisim pasin bilong les. Tasol senis i kamap taim em i kirap na stadi long Baibel na kamap wanpela Witnes Bilong Jehova. Em i tok: “Mi mas wok yet long daunim ol tingting i save mekim mi i bel hevi, tasol nau mi no hatwok olsem bipo long karim dispela hevi. Nau mi laikim mi yet na mi no pret long toktok. Tok i tru i bin helpim mi na mi pilim olsem i gat sampela samting em wok bilong mi yet long mekim. Nau mi save Jehova i laikim tru mi na mi amamas long i stap laip.”
Ol Witnes Bilong Jehova ol i wanpela lain Kristen i stap long olgeta hap bilong graun, olsem long 230 kantri, na narapela i no winim narapela, na dispela i narapela kain tru long pasin bilong dispela graun. Yu ting i gat narapela lain lotu i stap olsem? Ating nogat, a?
Tasol ol Witnes Bilong Jehova ol i gat stretpela tingting long dispela samting. Ol i save, insait long planti handet yia i kam inap nau, wok bilong ol man long pinisim dispela pasin olsem narapela i winim narapela, em i lus nating. Olsem na ol i save ol yet i no inap pinisim dispela pasin nogut. Tasol ol Witnes i amamas olsem, insait long lain bilong ol yet, ol i bin mekim planti samting bilong daunim dispela pasin. Na ol i bilip strong long promis bilong God, olsem wanpela nupela taim bai kamap i gat stretpela pasin long en na i no gat dispela pasin olsem narapela i winim narapela.
Tru tumas, olgeta man i bihainim tok bilong God, klostu nau olgeta bai kamap olsem “man i gat nem na ol inap mekim ol samting i stret long ol i ken mekim,” em samting Man bilong wokim ol i gat laik long ol i mas kisim. Olaman! Em i gutpela samting tru! Na dispela samting bai kamap tru tru!
[Piksa long pes 7]
Ol Witnes Bilong Jehova i save skulim planti tausen manmeri i no save rit rait
[Piksa long pes 8]
Ol tok i tru bilong Baibel i helpim ol man long daunim pasin bilong tingting nogut long man bilong narapela skin o sindaun, na man i gat hevi long mani