Ripot Long Wok Bilong Kingdom
Ol Witnes i Go Toksave Long Ol Man Long Frans
KIRAP long moningtaim tru long Fraide, Janueri 29, 1999, na i go inap long Sarere na Sande, ol Witnes Bilong Jehova long Frans i amamas tru long tilim 12 milion liklik nius long ol rot, na bihain long ol haus, nem bilong nius em, Yupela Ol Manmeri Bilong Frans, Ol i Bin Giamanim Yupela! Bilong wanem ol i mekim dispela bikpela wok bilong tilim nius?
Long wanpela kibung bilong ol niusman long Paris long dispela moningtaim long Fraide, ol i tokaut long as bilong dispela bikpela wok bilong tilim nius. Wanpela mausman bilong ol Witnes i stori gut olsem: “Samting mipela i laik mekim long nau em olsem, mipela i laik toksave long yupela long mipela i wanem kain lain, na mipela i laik pasim ol tok ol man i mekim bilong bagarapim gutnem bilong mipela. Mipela i orait long ol man i skelim skelim pasin bilong mipela, tasol mipela i no laik moa long harim ol tok giaman na ol tok i bagarapim gutnem bilong mipela.”
Maski ol Witnes Bilong Jehova i namba tri bikpela lotu Kristen long Frans, ol i bin mekim nogut long planti pikinini Witnes long skul. Ol i rausim ol man long wok na mekim nogut long ol, long wanem, ol i stap long dispela lotu. Yumi kirap nogut long gavman i tok long ol Witnes i mas givim 60 pesen takis long mani ol i kisim olsem kontribusen bilong helpim lotu. Dispela bikpela wok bilong tilim ol liklik nius i mekim wanem bilong daunim pasin bilong mekim nogut long wanpela lain?
Dispela liklik nius i tok: “Ol 250,000 Witnes Bilong Jehova wantaim ol man i save bung wantaim ol na ol i sindaun long Frans ol i TOKAUT long pasin giaman ol man i mekim bilong bungim lotu Kristen bilong ol Witnes—em dispela lotu bilong ol i bin stap long Frans kirap long 1900—wantaim ol liklik lotu nogut kirap long 1995. . . . Dispela TOKAUT i bilong pasim ol man i save mekim nogut long ol Witnes long olgeta taim.” Ol Witnes i tokaut klia long ol tok ol man i sutim long ol long Frans bilong bagarapim nem bilong ol na pasin giaman ol dispela man i mekim na bai ol man i kisim tingting kranki long ol Witnes. Liklik nius i pinisim tok olsem: “Long nau, winim 2 milion Witnes Bilong Jehova na ol man i save bung wantaim ol i sindaun long Yurop. Ol i save bihainim ol lo bilong gavman long hap ol i stap long en na ol i tingim lo bilong Baibel i bikpela samting. Yupela ol manmeri bilong Frans, dispela tok em i tru. Em i wok bilong mipela long kamapim dispela samting, long wanem, ol dispela tok i tru!”
Kwiktaim Gutpela Samting i Kamap
Ol i tilim planti milion liklik nius long de namba wan. Long Paris tasol, long belo inap 7,000 Witnes i tilim 1.3 milion liklik nius long ol man. Em namba wan taim ol man i lukim planti Witnes moa yet i tilim ol liklik nius long rot. Ol niusman, ol niuspepa bilong kantri na bilong dispela hap yet, na televisen tu, i mekim sampela gutpela tok long ol. Nius Le Progrès de Lyon i tok: ‘Dispela samting ol i mekim i kamapim klia tingting kranki ol man i bin kisim long wanpela tok. Insait long 10-pela yia i go pinis ol man i kisim kranki insait bilong dispela tok “wanpela liklik lain,” na ol i ting em i makim ol liklik lain i save wok hait na i gat tingting long bagarapim kantri. Ol Witnes Bilong Jehova i no wanpela lain nogut i save mekim ol samting na bai kantri i no stap gut.’
Ol man i save long ol Witnes Bilong Jehova ol i save amamas long pasin bilong ol long stap bel isi na tingim ol narapela na mekim gutpela pasin. Olsem na planti man long ol rot ol i tokaut olsem ol i pilim gutpela pasin bilong ol Witnes na ol i laik sambai long helpim ol dispela planti tausen Witnes i bin mekim dispela bikpela wok bilong tilim liklik nius. Kwiktaim ol man i ring i kam, na sampela i salim feks, na pas bilong tok tenkyu long ol liklik nius ol i kisim. Na bikpela samting moa yet, rot i op long ol man i gat gutpela bel long harim stori tru bilong ol Witnes, em i narapela kain long ol tok giaman i no gat as bilong en, em ol man i bin sutim long ol; na dispela lain em ol man i bin toknogutim ol, ol i kamapim klia tingting bilong ol long dispela bilip em ol i laikim tru.