“Ol i Toktok Long Gutpela Pasin na Pasin Sori”
INAP sampela yia nau, ol i bin bagarapim tru nem bilong ol Witnes Bilong Jehova long Frans. Ol birua bilong ol i bin mekim kain kain tok giaman bambai ol man i ken kisim tingting kranki long ol Witnes. Long kirap bilong 1999, ol Witnes Bilong Jehova long olgeta hap bilong Frans ol i tilim 12 milion liklik nius, nem bilong en, People of France, You Are Being Deceived! (Yupela Ol Manmeri Bilong Frans, Ol i Bin Giamanim Yupela!) Long dispela liklik nius ol Witnes i mekim strongpela tok bilong daunim ol tok ol man i mekim bilong bagarapim nem bilong ol.
Inap sampela de bihain long ol i tilim dispela nius, Mista Jean Bonhomme, em wanpela dokta na bipo em wanpela memba bilong palamen, em i raitim pas i go long wanpela nius. Em i tok: “Sampela taim ol Witnes Bilong Jehova i save kam long haus bilong mi. Ol i kam bilong toktok long gutpela pasin na long pasin sori i stap long olgeta hap. . . . Ol i no subim mi long toktok wantaim ol, nogat. Ol i mekim tok long pasin isi, na maski mi no bilip tumas ol i harim gut tingting bilong mi.”
Mista Bonhomme i tok long tingting bilong ol Witnes Bilong Jehova, em ol i ting olsem wanem long ol samting bilong spirit, na em i tok: “Ol i no gat bikpela save long ol pasin bilong dispela graun, tasol dispela i no inap bagarapim man. Tasol sampela man bilong wok politik ol i no gat bikpela save long ol pasin bilong graun, na dispela inap bagarapim bel isi na pasin wanbel bilong ol man.”