Yu Ting Satan i Save Givim Sik Long Yumi?

I NO LAIK BILONG GOD LONG SIK I KAMAP LONG GRAUN. Em i bin wokim yumi bilong i stap oltaim oltaim na skin bilong yumi i no gat sik liklik long en. Wanpela spirit, em Satan, em yet i bin kamapim sik, pen, na dai long ol man taim em i pulim tupela tumbuna bilong yumi bilong pastaim tru, em Adam na Iv, long mekim sin.​—⁠STAT 3:​1-5, 17-​19; ROM 5:​12.

OLSEM WANEM? Dispela i makim olsem ol lain i stap long ples bilong ol spirit ol i as bilong olgeta sik i save painim yumi? Olsem yumi lukim pinis long namba wan stori, planti man ol i save ting olsem. Bubu meri bilong liklik pikinini Owmadji em i bin ting olsem. Tasol dispela sik pekpek wara em Owmadji i bin kisim​—⁠em sampela pikinini long ples hat ol i save dai long dispela sik​—⁠yu ting ol spirit em yumi no inap lukim ol i as bilong en?

Wok Bilong Satan

Baibel i bekim klia tru dispela askim. Pastaim em i soim yumi olsem tewel bilong ol tumbuna i no inap mekim wanpela samting long ol man i stap laip. Taim ol man i dai, “ol i no inap save long wanpela samting.” Ol i no gat wanpela tewel i stap laip yet taim ol i dai, nogat. Ol i slip i stap long matmat, na long dispela ples ol i “no inap mekim wok o tingting o kisim gutpela tingting na save.” (Saveman 9:​5, 10) Em nau, ol man i dai pinis ol i no inap tru long givim sik long ol man i stap laip!

Tasol Baibel i kamapim klia olsem ol spirit nogut ol i stap. Namba wan bikhetman em dispela spirit nau yumi save kolim em Satan. Sampela spirit moa i bihainim em, em yumi save kolim ol olsem ol spirit nogut. Orait yu ting Satan wantaim ol spirit nogut ol inap kamapim ol sik? Bipo dispela samting i bin kamap. Taim Jisas i wokim mirakel na oraitim sik bilong man, sampela taim em i bin rausim ol spirit nogut long skin bilong ol na ol i orait. (Luk 9:​37-​43; 13:​10-​16) Tasol planti sik em Jisas i bin oraitim, i no ol spirit nogut i kamapim. (Matyu 12:15; 14:14; 19:⁠2) Na long nau tu, ol sik yumi save kisim, em ol binatang o ol narapela samting bilong graun i save kamapim, na i no ol spirit nogut.

Orait, olsem wanem long posin na ol kain wok olsem? Sindaun 18:10 (NW ) i tokim yumi: “Nem bilong Jehova i olsem strongpela haus. Ol stretpela man i ran i go insait long en na i stap gutpela.” Jems 4:7 i tok: “Yupela i mas sakim Satan, na em bai i lusim yupela na ranawe.” Em nau, God inap lukautim ol man i stap gut long em na bai posin na ol narapela kain strong i olsem ol spirit i as bilong en i no inap bagarapim ol. Dispela em i wanpela as bilong tok bilong Jisas, olsem: “Yupela bai i save long tok tru, na tok tru bai i mekim yupela i kamap fri.”​—⁠Jon 8:​32.

Tasol ating sampela bai askim olsem: ‘Olsem wanem long Jop? Wanpela spirit nogut i bin givim sik long em, a?’ Tru, Baibel i tok Satan yet i as bilong dispela sik bilong Jop. Tasol samting i bin painim Jop i narapela kain tru. Inap planti yia God i bin lukautim Jop na ol spirit nogut i no inap mekim nogut long em. Orait nau Satan i tokim Jehova long mekim nogut long Jop. Bipo sampela bikpela tok i bin kamap, na long dispela as Jehova i larim Jop na i no lukautim tumas dispela man i save lotuim em. Jehova i mekim olsem long dispela wanpela taim tasol.

Tasol God i putim mak na Satan i no inap kalapim. Taim em i larim Satan i givim bikpela hevi long Jop, Satan inap givim sik long Jop inap long wanpela hap taim, tasol Satan i no inap kilim em i dai. (Jop 2:​5, 6) Bihain ol pen na hevi bilong Jop i pinis, na Jehova i praisim em gut tru, long wanem, em i bin stap gut long Jehova. (Jop 42:​10-​17) Pasin bilong Jop long i stap gut long God, dispela i kamapim long ples klia sampela bikpela samting, na ol i bin raitim long Baibel long bipo tru na i stap ples klia long olgeta man. I no gat wok moa long Satan i mas traim narapela man, olsem em bai stap gut long God o nogat.

Satan i Save Wok Olsem Wanem?

Klostu olgeta sik i save painim ol man, Satan i no insait long en. Samting em i bin mekim i olsem: Em i bin traim namba wan man na meri, na ol i pundaun na mekim sin. Em wantaim ol spirit nogut bilong em ol i no kamapim olgeta wan wan sik i save painim ol man. Tasol Satan i laik stiaim yumi na taim yumi laik skelim ol samting yumi mas mekim, bai yumi no bihainim gutpela tingting, na bai yumi mekim wanpela samting i no stret wantaim bilip bilong yumi, na dispela inap nogutim skin bilong yumi. Satan i no bin mekim posin samting long Adam tupela Iv, o kilim ol i dai, o givim bikpela sik long tupela, nogat. Em i pulim Iv long bikhet long God, na Adam i bihainim pasin bikhet bilong Iv. Em nau, sik na dai i kamap long dispela.​—⁠Rom 5:​19.

Taim lain Israel i kem long arere bilong graun bilong ol Moap, king bilong Moap i baim wanpela profet i no stap gut long God, em Balam, na bai em i ken tok long lain Israel i mas bagarap. Balam i traim long mekim olsem, tasol em i no inap, long wanem, Jehova i lukautim ol Israel. Orait nau ol Moap i kirap na ol i laik pulim ol Israel long lotuim ol god giaman na mekim pasin pamuk. Em nau, ol Israel i pundaun na nau Jehova i no lukautim ol.​—⁠Namba 22:​5, 6, 12, 35; 24:10; 25:​1-9; KTH 2:​14.

Dispela samting i bin kamap bipo em inap lainim yumi long wanpela bikpela samting. God i save helpim ol man i stap gut long lotuim em, na em i save lukautim ol na bai ol spirit nogut i no ken mekim nogut long ol. Tasol sampela taim Satan i save wok strong long kirapim ol man long mekim sampela samting i no stret wantaim bilip bilong ol. Na sampela taim em i wok strong long pulim ol na bai ol i mekim pasin pamuk. O em i save mekim pasin olsem wanpela laion i krai strong​—⁠em i laik pretim ol na bai ol i mekim wanpela pasin i no stret na nau God i no lukautim ol moa. (1 Pita 5:⁠8) Olsem na aposel Pol i kolim Satan olsem “dispela man i gat strong bilong mekim ol manmeri i dai.”​—⁠Hibru 2:​14.

Bubu meri bilong Owmadji i laik kirapim Hawa long mekim wok long ol paspas na ol liklik samting olsem god giaman bilong lukautim pikinini na bai em i no ken sik. Orait sapos Hawa i mekim olsem, wanem samting bai kamap? Dispela bai kamapim bel bilong em olsem em i no bilip tru long God Jehova, na em i no inap bilip moa olsem Jehova bai lukautim em.​—⁠Kisim Bek 20:5; Matyu 4:​10; 1 Korin 10:21.

Satan i traim long pulim Jop tu. Satan i tekewe ol pikinini bilong em, na ol bikpela lain animal na ol narapela gutpela samting bilong em, na bagarapim skin bilong em, tasol i no dispela samting tasol i painim Jop. Meri bilong em i givim sampela tok kranki tru long em, olsem: “Mobeta yu lusim [God] na tok nogut long em na yu ken i dai.” (Jop 2:⁠9) Orait bihain 3-pela pren giaman ol i kam lukim em na ol i strong tru long kirapim em long ting em asua bilong em yet na dispela sik i painim em. (Jop 19:​1-3) Sik bilong Jop i mekim na skin bilong em i no gat strong moa, na Satan i mekim wok long dispela rot bilong mekim Jop i bel hevi na bai em i no bilip moa long stretpela pasin bilong Jehova. Tasol Jop i wok yet long tingim Jehova wanpela tasol inap helpim em.​—⁠Skelim wantaim Song 55:⁠22.

Taim yumi gat sik, sampela taim yumi tu i bel hevi. Long kain taim olsem, kwiktaim Satan i laik kirapim yumi long mekim wanpela pasin i no stret wantaim bilip bilong yumi. Olsem na taim sik i painim yumi, yumi no ken lusim tingting olsem as tru bilong dispela sik, em sin yumi bin kisim long papamama, na i no wanpela samting ol spirit nogut i mekim long yumi long rot bilong glasman samting. Yumi ken tingim Aisak, em man bilong i stap gut long God. Planti yia paslain long taim em i dai, em i kamap aipas. (Stat 27:⁠1) As bilong dispela, i no ol spirit nogut​—⁠em i go lapun na dispela yet i as bilong en. Resel i dai taim em i wok long karim pikinini, long wanem, skin bilong em i no strong​—⁠i no Satan i mekim, nogat. (Stat 35:​17-​19) Olgeta man bilong bipo i bin stap gut long God, bihain ol i dai. Tasol ol man i no mekim posin long ol o tok long ol i mas bagarap na long dispela as ol i dai, nogat. Ol i dai, long wanem, ol i bin kisim sin long papamama.

Pasin bilong tingting olsem ol spirit yumi no inap lukim ol yet i as bilong olgeta sik i save painim ol man, dispela kain tingting i save kalabusim yumi. Em inap kirapim yumi long pret pret long ol spirit. Na taim sik i painim yumi, ating yumi laik mekim sampela samting bilong mekim kol bel bilong ol spirit nogut, na yumi no mekim ol samting bilong i stap longwe long ol. Sapos Satan inap pretim yumi na yumi kirap mekim sampela pasin bilong ol spirit nogut olsem papait samting, i olsem yumi givim baksait long God tru, em Jehova. (2 Korin 6:​15) Pasin bilong pret long God, dispela yet i mas stiaim ol samting yumi mekim. Yumi no ken pret long Birua bilong God na larim dispela pret i stiaim yumi, nogat.​—⁠KTH 14:⁠7.

Liklik pikinini Owmadji i gat wanpela gutpela samting tru bilong lukautim em na bai ol spirit nogut i no ken bagarapim em. Aposel Pol i tok, God i tingim dispela pikinini i olsem “holi,” long wanem, mama bilong em i bilip, na mama inap beten askim God long i stap wantaim pikinini meri bilong em long rot bilong spirit holi. (1 Korin 7:​14) Hawa i gat dispela stretpela save, olsem na em inap painim sampela gutpela marasin bilong helpim Owmadji, na em i no mekim wok long ol paspas.

Ol Sik i Gat Kain Kain As

Planti man ol i no save bilip long ol spirit. Taim sik i painim ol, ol i save go lukim dokta​—⁠sapos ol i gat mani bilong baim em. Tru, sampela taim sikman i save go lukim dokta na sik bilong em i no pinis. Ol dokta i no inap wokim ol mirakel. Tasol planti sikman em dokta inap oraitim sik bilong ol, ol i save bilip olsem ol spirit nogut i as bilong sik bilong ol, na ol i save wet wet na taim sik i go bikpela tru ol i go lukim em, na nau em i no inap stretim. Pastaim ol i save go long glasman samting bilong oraitim sik bilong ol, na taim glasman i no inap mekim, ol i go lukim dokta. Planti ol i save dai long ol sik em dokta inap oraitim sapos ol i bin go lukim em hariap.

Sampela man i save dai long sik, long wanem, ol i no gat save long dispela sik. Ol i no luksave long ol samting i kamap bilong makim olsem ol i gat sik, na ol i no save long ol samting ol i ken mekim bilong sakim ol sik. Sapos yumi gat save long ol dispela samting, dispela inap helpim yumi long abrusim sampela sik na pen. Ating bai yu kirap nogut long save, ol mama i no gat save long rit rait, planti pikinini bilong ol i save dai long sik, winim ol mama i gat save long rit rait. Tru tumas, man i no gat save long kain samting olsem, em inap kisim bagarap long en.

Narapela as bilong sik i olsem: Taim ol i no kaikai yet ol i save larim ol lang na kokros samting i sindaun long kaikai, o taim ol i redim kaikai ol i no save wasim han pastaim. Na tu, long ol ples i gat ol natnat bilong sik malaria, sapos ol i no pasim taunam taim ol i laik slip, dispela inap bagarapim ol.a Sapos yumi lukautim gut skin na bai sik i no painim yumi, dispela i winim tru hatwok bilong oraitim sik.

Sampela pasin ol manmeri i save bihainim long i stap bilong ol, dispela i mekim na planti milion ol i kisim sik na ol i dai taim ol i no lapun yet. Dring longlong, pasin pamuk, kisim drak, na smok, ol dispela samting i bin bagarapim skin bilong planti manmeri. Sapos man i mekim ol dispela samting na bihain sik i painim em, yu ting as bilong dispela sik em wanpela man i bin mekim posin long em o wanpela spirit i mekim nogut long em? Nogat. Em asua bilong dispela man yet na em i gat sik. Sapos em i putim asua i go long ol spirit nogut, i olsem em i no laik kamapim olsem em i bin bihainim pasin i no gat gutpela tingting long en.

Tru, i gat sampela samting yumi no inap abrusim. Olsem: I gat sampela liklik binatang tru em yumi no inap lukim, o win na wara samting i bagarap, na dispela i save kamapim sik. Kain samting olsem i bin painim Owmadji. Mama bilong em i no save wanem samting i mekim na em i gat sik pekpek wara. Ol pikinini bilong em i no save sik planti taim olsem ol narapela pikinini, long wanem, em i save klinim gut haus na klinim ples arere long haus, na oltaim em i save wasim han taim em i redim kaikai. Tasol sik i save painim olgeta pikinini long sampela taim. I gat olsem 25 binatang samting inap kamapim sik pekpek wara. Ating i no gat wanpela man bai save, wanem binatang i bin givim sik pekpek wara long Owmadji.

Samting Bilong Pinisim Tru Sik

I no asua bilong God na sik i save painim yumi. “Sin i no inap pulim God, na God i no save pulim man long mekim sin.” (Jems 1:​13) Sapos sik i painim wanpela man bilong lotuim Jehova, em i save lukautim dispela man long ol samting bilong spirit. “Taim dispela man i gat sik, Bikpela bai i lukautim em.” (Song 41:⁠3) Em nau, God i gat pasin sori. Em i laik helpim yumi​—⁠em i no laik bagarapim yumi.

Yes, God i wokim pinis rot bilong pinisim tru ol sik​—⁠dispela rot em dai bilong Jisas na kirap bek bilong em. Long ofa bilong Jisas, ol man i gat stretpela bel Jehova i save kisim bek ol long sin bilong ol, na bihain bai ol i gat rot long kamap gutpela olgeta, i no gat sik moa, na ol inap kisim laip i stap oltaim oltaim long Paradais long graun. (Matyu 5:5; Jon 3:​16) Ol mirakel Jisas i bin wokim, ol i olsem piksa bilong samting Kingdom bilong God bai mekim, olsem em bai oraitim tru olgeta sik. Na God bai rausim Satan wantaim ol spirit nogut bilong em. (Rom 16:20) Tru tumas, Jehova i gat ol gutpela samting tru bilong givim long ol man i bilip long em. Tasol yumi mas wetim em na karim hevi na no ken les.

Nau long dispela taim God i save givim gutpela tingting na save long yumi na stiaim yumi long ol samting bilong spirit long rot bilong Baibel na bikpela lain brata i stap long olgeta hap, em ol i save lotuim Jehova na stap gut long em. Em i soim yumi long rot bilong abrusim ol pasin nogut i save kamapim sik. Na em i save givim ol gutpela pren long yumi em ol bai helpim yumi taim sampela hevi i kamap.

Yumi ken tingting gen long Jop. Sapos em i bin go long wanpela glasman, em bai kisim nogut tru long dispela! God i no inap lukautim em, na em bai lus long kisim ol gutpela samting God i laik givim long em taim dispela bikpela hevi bilong em i pinis. God i no lusim tingting long Jop, na em i no ken lusim tingting long yumi. Disaipel Jems i tok: “Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em.” (Jems 5:​11) Sapos yumi sanap strong na yumi no les, yumi tu bai kisim ol gutpela samting tru long taim God i makim.

Orait olsem wanem long sik bilong liklik pikinini Owmadji? Mama bilong em i tingim stori i stap long wanpela nius i poroman bilong Wastaua, em nius i toktok long pasin bilong tanim wara wantaim sampela samting na pikinini i dring.b Mama i bihainim dispela tok na em i tanim wara olsem na i givim long Owmadji na em i dring. Nau dispela pikinini i stap gutpela na i no gat sik.

[Ol Futnot]

[Ol Piksa long pes 7]

Jehova i bin stretim rot na bai ol sik i pinis olgeta