Ol Narapela Kain Tingting Long As Bilong Sik
LIKLIK OWMADJI I GAT SIK PEKPEK WARA. Mama bilong em, Hawa, em i tingting planti, nogut wara i pinis long skin bilong pikinini. Em i bin harim olsem pikinini bilong kasen susa long ples em i bin dai long pekpek wara. Lapun bubu meri bilong Owmadji, em tambu bilong Hawa, em i laik kisim Owmadji i go long wanpela glasman. Tambu meri i tok: “Wanpela spirit nogut i mekim na pikinini i gat sik. Yu no laik pasim wanpela paspas long han bilong pikinini bilong lukautim em, olsem na nau ol hevi i wok long kamap!”
DISPELA samting i save kamap long planti hap bilong graun. Planti milion manmeri i bilip olsem ol spirit nogut i save kamapim ol sik. Olsem wanem? Dispela tok i stret?
As Bilong Dispela Kain Tingting
Ating yu yet yu no bilip olsem ol spirit nogut em yumi no inap lukim ol i save kamapim ol sik. Na ating yu tingting, olsem wanem na ol man inap bilip olsem, long wanem, ol saientis i soim yumi pinis olsem ol kain kain liklik binatang nogut i save kamapim ol sik. Tasol yumi mas save, long bipo bipo ol man i no bin save long ol dispela liklik binatang bilong sik. Dispela save i stap hait inap longtaim tru, na inap olsem 300 yia samting i go pinis, Antoni van Lewenhuk i wokim samting bilong glasim ol liklik samting tru, na nau ol man inap glasim na lukim ol liklik liklik binatang long ai bilong ol yet, em pastaim ol i no inap lukim. Tasol long dispela taim ol saientis i no klia yet olsem ol binatang samting i save kamapim ol sik, i kam inap long yia olsem 1860 samting, taim Louis Pasteur i kisim sampela bikpela save long dispela samting.
Em nau, kirap long bipo yet na i kam inap long ol yia klostu long taim bilong yumi, ol man i bin kisim kain kain tingting kranki long as bilong ol sik, na wanpela em dispela tingting olsem ol spirit nogut i as bilong olgeta sik. Wanpela bikpela buk (The New Encyclopædia Britannica) i kolim wanpela rot ol i ting dispela kain tingting i bin kamap. Buk i tok, sampela man olsem dokta bilong ples ol i mekim wok long rop bilong ol sayor samting, na lip bilong diwai, na ol samting olsem. Sampela marasin olsem, ol i bin oraitim sik bilong man. Orait bihain dispela dokta bilong ples em i mekim ol kain kain pasin bilong glasman taim em i givim ol dispela marasin long ol sikman, na dispela i giamanim ol na ol i no save olsem ol dispela rop o lip yet i bin oraitim sik bilong ol, na i no ol dispela pasin bilong glasman samting. Em i mekim olsem na bai ol man i mas i kam long em bilong pinisim sik bilong ol. Long dispela rot, marasin i kamap olsem samting i gat pasin hait long en, na ol man bilong mekim dispela wok i kirapim ol manmeri long bilip olsem ol i mas kisim helpim long ol spirit i stap long ples antap.
Long planti kantri long nau, ol i bihainim yet pasin bilong ol tumbuna long oraitim sik. Planti ol i save tok, tewel bilong ol tumbuna i dai pinis ol i save kamapim ol sik. Na sampela i tok, God i mekim na yumi save sik, na em i wanpela strafe yumi kisim long ol rong yumi bin mekim. Na maski sampela man i save pinis olsem ol binatang samting i save givim sik long man, ol i pret yet long tewel bilong ol tumbuna o ol spirit samting, nogut ol i givim sik long ol.
Ol posinman na ol glasman olsem dokta bilong ples ol i save ol man bilong ples i pret long ol dispela samting, na ol i mekim wok long dispela rot bilong kisim mani samting. Orait yumi mas bilip long wanem samting? Yu ting ol spirit inap oraitim sik bilong yumi? Baibel i tok wanem?