Oraitim Sik Long Rot Bilong Bilip—God i Orait Long Dispela?
“NAU yumi lukim ol narapela kain samting tru i kamap!” Ol manmeri i kirap nogut tru long lukim wanpela man, em ol bun bilong em i dai olgeta, em i kamap orait. Man bilong mekim em i kamap orait i bin tokim em: “Yu kirap na kisim bet bilong yu, na yu go long haus bilong yu.” Na man i mekim olsem! Em i kamap orait pinis, na ol manmeri i lukim dispela, ol i “litimapim nem bilong God”! (Luk 5:18-26) Krais Jisas i mekim orait dispela man inap olsem 2,000 yia bipo, na yumi save, God i orait long dispela wok Jisas i mekim.
Olsem wanem long nau? Sapos man i gat sik na ol dokta i no inap oraitim sik bilong em, i orait em i ken i go long ol man i tok ol inap wokim mirakel na oraitim sik olsem Jisas i bin mekim? Yumi mas ting olsem wanem long tok bilong ol dispela man, em ol i tok ol inap oraitim sik long rot bilong bilip?
Wanpela buk i tok, pasin bilong oraitim sik long rot bilong bilip em “wanpela pasin bilong stretim sik long rot bilong beten na bilip long God.” Narapela buk (Encyclopædia Britannica) i mekim wankain tok, olsem: “Ol narapela kain wok Jisas na ol aposel i bin mekim i as bilong pasin bilong oraitim sik insait long lotu Kristen.” Tru, Jisas i bin wokim ol mirakel na oraitim sik. Tasol ol man long nau i tok ol inap oraitim sik long rot bilong bilip, yu ting ol i wokim ol mirakel olsem Jisas i bin mekim?
Sikman i Mas Bilip o Nogat?
Wanpela buk (Black’s Bible Dictionary) i tok, Jisas i bin “tok olsem sikman i mas bilip bambai em inap wokim mirakel na oraitim sik bilong em.” Tasol tru Jisas i bin tok olsem? Nogat. Em i no bin tok sikman i mas bilip. Man bilong oraitim sik, em i mas bilip; tasol sikman i bilip o nogat, dispela i no bikpela samting. Wanpela taim ol disaipel bilong Jisas i no inap oraitim sik bilong wanpela manki, tasol Jisas i mekim na bihain em i tokim ol disaipel, i gat wanem as na ol i no inap mekim. Em i tok: “Bilip bilong yupela i liklik tumas.”—Matyu 17:14-20.
Long Matyu 8:16, 17, Baibel i tok, Jisas i “mekim orait olgeta sikman.” Tru, ol dispela sikman i bilip long Jisas, olsem na ol i go long em. (Matyu 8:13; 9:22, 29) Na planti ol i mas i go long em pastaim na askim em long helpim ol na nau em i kirap na mekim orait sik bilong ol. Tasol Jisas i no bin putim lo na tok ol i mas tokaut long bilip bilong ol pastaim bambai em i ken wokim mirakel na helpim ol. Wanpela taim Jisas i mekim orait wanpela lek nogut i no save liklik long em. (Jon 5:5-9, 13) Na taim ol birua i kam bilong holim em na wanpela disaipel i katim yau bilong wokboi bilong hetpris na yau i pundaun, Jisas i mekim yau bilong dispela man i kamap gutpela gen, maski dispela man i stap long lain birua bilong em, em ol i kam bilong holim em. (Luk 22:50, 51) Na Jisas i bin kirapim bek sampela man i dai pinis!—Luk 8:54, 55; Jon 11:43, 44.
Olsem wanem Jisas inap wokim kain mirakel olsem? Em i mekim long strong bilong God, em spirit holi bilong God. Spirit bilong God i mekim orait sikman, i no bilip bilong dispela sikman. Sapos yu kaunim ol stori bilong Jisas, em Matyu na Mak na Luk na Jon i raitim, bai yu lukim olsem taim Jisas i oraitim sikman, em i no mekim bilaspasin o hambakpasin o kirapim nabaut bel bilong ol man. Nogat. Na maski wanem kain sik bilong man, Jisas inap oraitim. No gat wanpela taim em i no inap mekim, na em i no save singaut long pe.—Matyu 15:30, 31.
Long Nau Ol Man Inap Oraitim Sik Olsem Jisas i Bin Mekim o Nogat?
Sik em i samting nogut tru, na taim sik i kisim yumi, yumi save painim rot bilong stretim. Tasol olsem wanem sapos yumi stap long wanpela hap em ol dokta na ol narapela i gat wok long helpim ol sikman ‘ol i no mekim gut long ol olsem long man, na ol i mekim olsem moa yet long ol rabisman’? Wanpela dokta i lukim kain pasin olsem i stap long wanpela kantri bilong Latin Amerika. Na olsem wanem sapos yumi stap long wanpela ples, olsem long dispela kantri, na ‘long lain bilong ol man i mekim wok dokta, wan wan tasol i bin winim skul na i gat save inap tru long mekim dispela wok’?
Long dispela as planti sikman i pilim olsem i no gat narapela rot na ol i laik i go long man o meri i tok em inap oraitim sik long rot bilong bilip; ol i laik mekim traim tasol. Tasol tru ol dispela manmeri inap oraitim sik? Olsem: Inap olsem 70,000 manmeri i bin bung long Sau Paulo, long Brasil, na tupela man i tok ol inap oraitim sik ‘i krungutim planti handet aiglas ol lain i kam bung i tromoi i kam long ol, na ol i tok promis long oraitim ai bilong ol dispela manmeri i bilip nating long ol.’ Sampela man i bin toktok wantaim wanpela bilong dispela tupela man na dispela man i tokaut stret olsem: “Mi no inap tok olgeta sikman em mipela i beten bilong helpim ol bai kamap orait gen. Em samting bilong ol—ol yet i mas bilip. Sapos man i bilip, bai em i kamap orait.” Em i tok, sapos sikman i no kamap orait, em asua bilong sikman—sikman i sot long bilip. Tasol yu tingim tok bilong Jisas? Em i tok, sapos sikman i no kamap orait, em asua bilong man i laik oraitim sik—em yet i sot long bilip!—Mak 9:37-42.
Narapela man bilong oraitim sik i tok promis long oraitim sik kensa na sik i save mekim ol bun bilong man i dai. Orait, em i bin mekim o nogat? Wanpela nius (Veja) i tok: “Em i no truim tok promis bilong em.” Na harim stori long ol pasin em i bin mekim: “Inap tupela aua [dispela man bilong oraitim sik long rot bilong bilip] em i bin mekim ol tok, na beten, na singaut bikmaus, na mekim singsing bilong pulim ai na tingting bilong ol manmeri i kam bung—em i bin paitim tu ol sikman bilong rausim ol spirit nogut i stap long skin bilong ol. Pinis nau na em i kisim nektai na hankisip bilong em na tromoi i go long ol dispela manmeri i amamas tru long em, na em i salim plet i go long ol bilong ol i ken putim mani long en ‘long laik bilong ol yet.’ ” Taim Jisas na ol aposel i wokim mirakel na oraitim sik, ol i no bin askim ol man long givim mani, na ol i no bin mekim ol pasin bilong pulim ai na tingting bilong ol man olsem dispela man i mekim.
Olsem na yumi save, ol manmeri long nau i tok ol inap oraitim sik long rot bilong bilip ol i no mekim wok olsem Jisas i bin mekim. Na yumi no inap ting olsem God i orait long wok ol i mekim. Tasol olsem wanem? God i orait long sampela mirakel bilong oraitim sik long nau? I gat rot na bilip bilong yumi inap helpim yumi long taim yumi yet o wanpela famili bilong yumi i gat sik?