Marasin Bilong Ol Dokta Bilong Ples Long Afrika—i Stret Wantaim Lotu Kristen o Nogat?

Planti milion Afrika, taim ol i gat sik, ol i save go lukim dokta bilong ples, long wanem i no gat narapela rot bilong kisim marasin. Long ol hap bilong bus long Afrika i no gat planti haus sik na wan wan dokta tasol i stap. Tasol ol bilip giaman na wok bilong ol spirit nogut i as bilong planti samting ol dokta bilong ples i mekim. Olsem na taim Kristen i gat sik, em i mas mekim wanem?

“‘DISPELA marasin bai kilim em i dai, na bai olgeta hevi bilong em yet na bilong mipela tu i pinis.’ Ol i ting dispela nupela marasin bai kilim mi i dai na ol i kapsaitim long maus bilong mi.”

Wanpela dokta long Lagos, long Naijiria, i stori olsem long hap bilong wanpela nius (Sunday Times) i gat het-tok olsem: “No Ken Ting Ol Dokta Bilong Ples i Samting Nating.” Em i stori long taim em i gat wanpela krismas na bikpela sik i kisim em na papamama i ting em bai dai. Dispela marasin ol i givim long em, wanpela dokta bilong ples i bin salim long ol, na ol i ting dispela marasin i helpim em na em i no i dai.

Planti Afrika, em ol i save bilip long ol dokta bilong ples, ol i save stori long strongpela wok o mirakel ol dispela kain dokta i bin wokim. Ol i tok, ol i bin stretim sik bilong sampela man ol dokta long haus sik i no inap stretim. Tasol sampela man i tok, ol samting ol dokta bilong ples i mekim i no klin na i giaman tasol. Long namel i gat sampela man ol i laik bai ol saveman i mas skelim marasin ol dokta bilong ples i wokim long ol lip bilong diwai sayor samting, na bai ol man i ken orait long ol dispela kain dokta. Planti man i laik bai ol dokta bilong ples na ol dokta long ol haus sik ol i mas wok wantaim, olsem ol i mekim long ples Saina na long India.

Long hap bilong Papua Niugini tu i gat ol dokta bilong ples na ol i save wokim marasin na mekim pasin wankain olsem ol dokta bilong ples long Afrika. Olsem na ating yu laik save, marasin samting bilong ol dispela dokta bilong ples em i gutpela na em inap stretim sik o nogat. Olsem wanem long pasin planti dokta bilong ples long Afrika i save mekim, em ol i save singautim ol spirit long helpim ol taim ol i wok long stretim sik bilong man? Dispela em i samting nogut na yumi mas sakim o em i rot bilong stretim sik? Kristen i mas ting olsem wanem long marasin bilong ol dokta bilong ples?

Marasin Ol i Wokim long Lip Samting

Yumi save kaikai lip bilong diwai sayor samting; em gutpela samting bilong strongim skin. Tasol i gat sampela diwai sayor samting ol man i kisim strongpela marasin long en, olsem drak, o marasin nogut i gat gip, na dispela i bin bagarapim planti man ol i mekim nabaut long en. Tasol ol dokta long haus sik ol i save mekim wok long sampela marasin olsem bilong stretim sik. Ol saveman bilong saiens i bin skelim lip bilong sampela diwai sayor samting, em ol dokta bilong ples i save kisim na wokim marasin long en, na long dispela rot ol i bin kisim save long sampela marasin o drak em inap helpim skin bilong man na stretim sik bilong em. Ol i kisim sampela lip samting na glasim gut, na ol i lukim wok bilong marasin bilong en long ol liklik samting i givim sik long man, na ol i painim pinis sampela marasin o drak ol dokta inap mekim wok long en bilong stretim sik, olsem kinin na resepin na dijitelis na kodin.

Ol tumbuna i bin mekim traim na ol i kisim save long sampela lip samting i gat marasin bilong stretim sik, o ol i lukim ol animal i kaikai lip bilong sampela diwai sayor samting na ol i lukim ol samting i kamap long skin bilong animal taim em i kaikai, na long dispela rot ol i kisim save long sampela lip i gutpela bilong stretim sik. Ol man i kisim dispela save na ol i kirap oraitim sik bilong ol man, ol i haitim dispela save na famili tasol i ken save long en. Olsem na papa i givim dispela save long pikinini man bilong em, o em i givim long narapela man em i laik lainim em long en. Ol dokta bilong ples i save wokim marasin long pasin hait na ol i no laik tokaut long wanem wanem kain lip ol i kisim bilong wokim marasin long en. Tasol ol dokta bilong ples long Afrika ol i no mekim wok long marasin tasol.

Ol Spirit i Stiaim Ol

Planti dokta bilong ples long Afrika ol i bilip olsem ol spirit i givim save long ol na helpim ol long stretim sik bilong ol man. Planti ol i ting olsem ol diwai sayor samting i gat tingting, na ol inap toktok wantaim ol man, na ol inap save long samting yumi no inap lukim o harim o smelim o holim o pilim. Sampela dokta bilong ples i tok, ol inap toktok wantaim ol diwai sayor samting na ol i save long tok ol diwai sayor i mekim. Sampela i tok, i no ol diwai sayor samting i tokim ol long ol lip ol i mas kisim; nogat; sampela spirit ol i no inap lukim ol ol i bin makim ol lip samting ol i ken mekim wok long en bilong stretim sik.

Olsem na wok bilong ol spirit i as bilong planti samting ol dokta bilong ples long Afrika i mekim. Taim sik i kisim wanpela man o wanpela man i dai, planti Naijiria i ting olsem ol god (o spirit bilong ol tumbuna) i kros na dispela man i kisim sik o em i dai, o wanpela birua i bin wokim posin. Olsem na ol i mekim ol ofa bilong mekim gut bel bilong ol dispela god o spirit, na ol i save mekim kain kain pasin i olsem pasin bilong lotuim ol spirit.

Asuko (Asuquo), em i wanpela dokta bilong ples long Naijiria, bipo em i bilip tru olsem ol spirit i save helpim em. Em i tok: “Papa bilong mi i lainim mi long ol lip samting bilong wokim marasin, na taim mi wokim mi save mekim ofa long ol god na long ol spirit bilong ol tumbuna bilong mipela. Mi bilip olsem ol yet i gat strong bilong oraitim sik na sapos i no gat ofa bai ol i givim sik o kilim man i dai.”

Tasol planti taim, ol man i mekim wok bilong ol spirit ol i kisim nogut long dispela. Ol kain bilip giaman olsem i mekim ol man i pret na ol i stap aninit long strong bilong ol spirit. Planti ol i gat spirit nogut i stap long ol na ol spirit i mekim nogut long ol. Dispela tasol em i strongpela as bilong kirapim ol Kristen long klia long marasin samting bilong dokta bilong ples em i mekim wok bilong ol spirit tu wantaim. Na ol dispela spirit i laik kalabusim tingting bilong ol man, na ol i mekim nogut long ol man, na ol i kirapim ol man long bilip olsem ol tumbuna bilong ol i stap laip yet long wanpela ples spirit na ol diwai sayor samting inap toktok wantaim ol, ol dispela kain spirit i giaman na ol i spirit nogut. Baibel i toksave olsem: “Samting ol haiden i save ofaim, em ‘ol i ofaim long ol spirit nogut. Ol i no ofaim long God.’ Na mi no laik yupela i bung wantaim ol spirit nogut.”—1 Korin 10:20.

God i tok, ol spirit nogut, em ol ensel i bikhet, ol i mas bagarap. Ol dispela spirit nogut i laik pulim ol man na bai ol i no lotu moa long God tru, em Jehova. (2 Pita 2:4; Jut 6) Ol i giaman olsem ol yet ol i gutpela god. (2 Korin 11:14) Ol i giaman na makim man i dai pinis bambai ol man i ting olsem ol tumbuna bilong ol i stap laip yet long wanpela ples spirit. Tasol Baibel i tok klia olsem: “Ol man i dai pinis ol i no save long wanpela samting, ․․․ long wanem i no gat wok o tingting o save o savepasin long [matmat], em bai yu go long en.”—Eklisiastis 9:5, 10, NW.

Olsem na ol man i lotuim God tru, i no stret ol i kisim marasin samting long wanpela dokta bilong ples em i save mekim wok bilong ol spirit tu bilong oraitim sik. Na ol dokta bilong ples, sapos ol i laik lotu long God long pasin em i laikim, ol i mas lusim olgeta pasin i olsem wok bilong ol spirit nogut. Tru tumas, ol man i mekim wok bilong ol spirit nogut, Jehova i no ken orait long ol o lukautim ol, na ol i no ken i stap long kongrigesen Kristen. (Galesia 5:19-21; Revelesen 21:8) Planti man, bipo ol i mekim wok bilong ol spirit nogut, ol i lusim pinis ol dispela wok na pasin. Nau ol i save, ol kain marasin ol man i save wokim long lip bilong diwai sayor samting em inap stretim sik, maski ol i no mekim sampela pasin o wok bilong ol spirit tu wantaim. Taim ol i gat sik, ol i kisim dispela kain marasin tasol. Ol i no mekim sampela pasin o wok bilong ol spirit tu wantaim.

Senis na Kamap Kristen

Wanpela dokta, em gavman i orait long em, na em i gat haus sik bilong em yet, na em i save mekim wok long ol kain marasin ol i bin wokim long lip bilong diwai sayor samting, nem bilong em Erhabor, em i stori olsem: “Bipo mi ting olsem mi mas mekim ofa long ol spirit taim mi givim marasin long man i gat sik, long wanem wanpela spirit i bin givim dispela sik long em. Tasol taim ol Witnes Bilong Jehova i lainim mi long ol tok bilong Baibel na mi kamap Kristen, nau mi lusim ol dispela pasin na mi bihainim ol lo bilong Baibel. Nau mi save, samting bilong oraitim sik i stap long ol lip yet.”

Asuko i mekim wankain tok. Em i tok: “Taim mi kisim save long Jehova, dispela i stretim tingting bilong mi. Mi no pret moa long ol tumbuna i dai pinis; mi kisim save long God tru. Na mi save, i no gat wok long mekim ol ofa long ol spirit, long wanem wara bilong skin o lip samting bilong ol diwai sayor, dispela samting yet i oraitim sik bilong man. Planti man i save kam long mi long nau, long wanem ol i save mi no ken tingim ol bilip giaman bilong ol i save mekim ol i pret na singaut long ol i mas mekim ofa. Mi save givim marasin tasol, olsem na ol i no ken tromoi bikpela mani olsem long taim ol i go long ol dokta bilong ples i save givim marasin na singaut long ol spirit tu wantaim.”

Narapela man, nem bilong em Okon, em tu i save mekim wok long marasin ol i bin wokim long lip samting bilong ol diwai sayor na em i no save singaut long ol spirit bilong helpim em o mekim ol ofa long ol spirit. Em i tok ol narapela man i mekim wok long dispela kain marasin ol i save sutim tok long em na tok, em i ‘bagarapim wok bisnis bilong ol.’ Em i tok, “Sampela man i gat sik ol i kam long mi bilong lukstil bambai ol i ken save, mi save hait na mekim yet ofa long ol spirit o nogat. Inap tupela wik mi givim marasin long ol na helpim gut skin bilong ol, na bihain ol i tok, nau ol i save mi mekim wok long marasin tasol na mi no save singaut long ol spirit bilong helpim mi. Mi save toktok wantaim ol sikman long sampela tok bilong Baibel na dispela samting tu i helpim ol. Mi kirap nogut long lukim 4-pela man, bipo ol i gat sik na ol i bin i kam long mi, em ol i stap long ‘Sori Bilong God’ Kibung Distrik long Desemba 1980. Ol i kam holim mi na ol i tok: ‘Mipela i bin i go lukim yu bai yu oraitim sik bilong skin, tasol yu oraitim mipela long spirit tu.’”

Ol Kristen kain olsem ol dispela Kristen ol i mas sanap strong bambai ol inap sakim ol man i laik kirapim ol long mekim gen wok bilong ol spirit. Ol i save sapos ol i kirap mekim gen Sampela wok o pasin bilong ol spirit bilong oraitim sik bilong man, bai ol i no inap i stap moa long kongrigesen Kristen. Olsem na taim ol i givim marasin long sikman na wok long helpim em, ol i no save mekim sampela singsing samting bilong singautim ol spirit long helpim ol o mekim ofa long ol spirit. Nogat. Na ol i no save giaman na tok ol inap oraitim olgeta kain kain sik; ol i no save giamanim ol man bambai ol i ting ol i gat narapela kain strong bilong oraitim sik. Ol i no laik mekim wanpela samting em inap kirapim ol man long ting olsem ol i kisim strong long ol spirit o ol i mekim wok bilong ol spirit. Ol i was gut tru long dispela samting.

God Tasol Inap Oraitim Tru Yumi

Long planti kantri i stap rabis na i no gat planti wok bisnis long en, taim man i gat sik, em i save go long dokta bilong ples. Planti man i save bilip long dispela kain dokta, na ol i no gat narapela rot, long wanem i no gat planti haus sik na dokta long ples bilong ol. Olsem na ating planti man long ol dispela kantri bai i go yet long ol dokta bilong ples, em planti ol i save singautim ol spirit bilong helpim ol long stretim ol sik. Tasol bai yu mekim wanem?

Jisas i tok: “Yupela bai i save long tok tru. Na tok tru em bai i mekim yupela i kamap fri.” (Jon 8:32) Ol Kristen i save, Baibel i tambuim pasin bilong singaut long ol spirit na ol kain pasin olsem, olsem na ol i save stap gut long God na ol i no save askim long ol spirit o kisim marasin long wanpela dokta bilong ples em i save singautim ol spirit bilong helpim em. (Diuteronomi 18:10-13; lukim tu Nambas 23:21, 23.) Na sapos Kristen i gat sik, em i no ken ting em sik bilong ples. Em i no ken ting wanpela birua i bin wokim posin. Sapos Kristen i stap gut long God na em i sakim olgeta wok bilong ol spirit nogut, em i no ken pret long posin, na marila samting, na ting dispela inap givim sik long em. Nogat. Yumi olgeta i gat sin na skin bilong yumi i no gutpela olgeta, olsem na sik i save kisim yumi, na taim sik i kisim yumi, yumi yet yumi mas tingim wanem kain marasin bai yumi kisim. Em samting bilong yumi yet.

Ofa bilong Jisas tasol em i rot bilong tekewe sin em i as bilong sik na i dai. (Jon 3:16; Aposel 4:12) Dispela ofa tasol i opim rot bambai ol manmeri i stap gut long God ol i ken kisim laip i stap oltaim long paradais long graun, na long dispela paradais “bai i no gat wanpela man i tok, ‘Mi gat sik.’”—Aisaia 33:24, NW.

Yumi wetim dispela gutpela taim i kamap na God I Gat Olgeta Strong em i tok promis olsem em bai lukautim ol man i bilip tru long em long nau. Olsem na olgeta Kristen i mas givim bel long Jehova na wetim em i helpim ol; ol i mas i go klostu long em long rot bilong beten. Dispela bai helpim ol long i stap gutpela long nau, na long kisim laip i gutpela olgeta long paradais long graun, em God i tok promis long en.—2 Pita 3:10-14; 1 Jon 2:17.