Pasin Bilong Oraitim Sik Long Rot Bilong Bilip—Bilong Wanem Planti Man i Laikim?

Ol man i paitim gita na kundu na winim biugel na bikpela pairap bilong en i pulap long haus lotu. Ol manmeri pikinini wantaim i amamas nogut tru na ol i danis na singsing. Ol i redi nau long taim bilong mekim orait ol sikman.

Man bilong oraitim sik long rot bilong bilip em i pasim longpela waitpela klos na em i kirap putim han bilong em long het bilong wanpela man em i lek nogut, em inap wokabaut long skru tasol. Bihain wanpela aipas i kam, em aiglas tudak i haitim ai bilong em. Ol manmeri i lukluk i stap na nau lek nogut i kirap wokabaut na aipas i lukluk liklik, olsem na ol manmeri i singaut strong na i tok: “Em wanpela mirakel!”. . .

LONG Afrika kain samting olsem i save kamap planti taim insait long ol haus lotu bilong ol misin i tok ol inap oraitim sik bilong ol man long rot bilong bilip. Long Afrika na long ol narapela hap tu, planti man i save go long ol man i tok ol inap stretim kain kain hevi long rot bilong beten na bilip long God. Sampela man i gat hevi long mani ol i go long kain man olsem. Na long Afrika, sapos meri i no inap karim pikinini em i save sem na planti ol i save go long ol dispela man i tok ol inap oraitim sik long rot bilong bilip.

Tasol ol dispela man i no tingting tumas long stretim ol dispela narapela hevi; ol i tingting long oraitim ol sik bilong skin. Long nau i gat kain kain marasin na ol dokta i kisim bikpela save long rot bilong stretim sampela sik, tasol sik i stap yet olsem wanpela bikpela hevi long ol man. Sampela sikman i tromoi bikpela mani long painim rot bilong stretim sik bilong ol, tasol nogat. Olsem na long nau planti man i save go long dispela man i tok ol inap oraitim sik long rot bilong bilip.

Sampela i pilim olsem dispela samting i bin helpim ol na i no pait wantaim bilip Kristen. Na ol dispela man bilong oraitim sik planti ol i tok ol i mekim wok bilong ol long nem bilong Jisas, olsem na planti man i go long ol i bilong wanpela bikpela lotu, olsem lotu Katolik samting, na ol i go tu long wanpela liklik misin i save oraitim sik long rot bilong bilip. Tasol olsem wanem? Man i lotu tru long God, i orait em i go long wanpela man i tok i inap oraitim sik long rot bilong bilip? (Jon 4:23) Na taim ol dispela kain man i oraitim sik, tru God i as bilong dispela, o nogat?