Ol Man i Askim . . .

Ol Witnes Bilong Jehova i Save Oraitim Ol Sikman Long Rot Bilong Mirakel?

▪ Ol Witnes Bilong Jehova i no save oraitim ol sikman long rot bilong mirakel. Olsem Jisas, ol i ting olsem nambawan wok bilong ol em long autim gutnius bilong Kingdom Bilong God. Na tu, ol i no ting olsem pasin bilong oraitim ol sikman long rot bilong mirakel em i mak bilong ol Kristen tru, nogat, ol i ting olsem i gat wanpela samting i bikpela moa na dispela em i mak bilong ol Kristen tru.

Pasin bilong Jisas Krais long sori long ol sikman na oraitim ol, dispela em i bikpela samting long yumi olgeta. Taim em i mekim olsem, em i kamapim long ples klia olsem long taim em i mekim wok king long Kingdom Bilong God, bai i no gat man i tok olsem: “Mi gat sik.”​—Aisaia 33:24.

Tasol olsem wanem long nau? Long ol lotu Kristen na ol lotu i no Kristen, i gat sampela man em ol i tok ol inap oraitim ol sikman long rot bilong mirakel. Tasol Jisas i givim tok lukaut long ol man husat i tok ol i “wokim planti mirakel” long nem bilong em. Em bai tokim ol: “Mi no save liklik long yupela. Yupela ol man bilong mekim pasin nogut, yupela klia long mi.” (Matyu 7:​22, 23) Olsem na yu ting ol mirakel ol dispela man i tok ol i mekim long nau i makim olsem God i orait long ol na em i blesim ol?

Tingim tok Baibel i mekim long pasin bilong Jisas long oraitim ol sikman. Sapos yumi skelim ol dispela stori bilong Baibel wantaim pasin bilong ol man em ol i tok ol inap long oraitim ol sikman long nau, bai yumi save tru olsem God i orait long pasin bilong ol dispela man o nogat.

Jisas i no bin mekim wok long pasin bilong oraitim ol sikman bilong pulim ol man long bihainim em, o bilong pulim bikpela lain manmeri i kam harim tok bilong em, nogat. Em i oraitim sampela sikman taim ol narapela man i no lukim. Planti taim em i tokim ol man em i bin oraitim olsem ol i no ken tokim ol narapela long dispela samting.​—Luk 5:​13, 14.

Jisas i no bin askim mani long ol mirakel em i wokim. (Matyu 10:8) Na tu, long olgeta taim ol mirakel em i wokim i save oraitim tru man. Jisas i save pinisim tru sik bilong olgeta sikman i kam long em, maski sikman i gat bilip o nogat. (Luk 6:19; Jon 5:​5-9, 13) Na Jisas i bin kirapim bek ol daiman tu!​—Luk 7:​11-17; 8:​40-56; Jon 11:​38-44.

Tru em i wokim ol dispela mirakel, tasol em i no mekim olsem bilong pulim ol man i kam long em, nogat. Nambawan wok bilong em i bilong autim gutnius bilong Kingdom Bilong God. Na Jisas i givim wok long ol disaipel bilong em long kamapim disaipel na skulim ol narapela long bilip na wetim taim we helt bilong ol bai kamap gutpela olgeta aninit long Kingdom Bilong God.​—Matyu 28:​19, 20.

Sampela disaipel bilong Jisas i kisim presen bilong oraitim ol sikman, tasol ol dispela presen i no bilong i stap oltaim. (1 Korin 12:​28-30; 13:​7, 8, 12, 13) Mak bilong ol Kristen tru long nau em pasin bilong laikim tru narapela, na i no pasin bilong oraitim sikman. (Jon 13:35) Pasin bilong oraitim ol sikman long nau i no mekim na ol manmeri bilong kain kain lain na sindaun i pas gut wantaim, nogat, pasin laikim tru i save helpim ol man long pas gut wantaim.

Tasol i gat wanpela lain Kristen em pasin laikim i mekim na ol i stap wanbel tru. Pasin laikim bilong ol i strong tru, olsem na ol i no inap mekim nogut long narapela man, maski i gat kros na pait namel long ol lain man. Husat dispela lain? Em ol Witnes Bilong Jehova. Long olgeta hap bilong graun, ol man i save long ol olsem ol i lain bilong kamapim pasin laikim olsem bilong Krais. Pasin wanbel namel long ol man bilong kain kain lain, kantri, na sindaun, dispela i olsem wanpela mirakel na em samting holi spirit bilong God tasol inap kamapim. I gutpela yu go long wanpela miting bilong ol na yu yet i ken lukim.

[Piksa long pes 13]

Yu ting God i save givim strong long ol man long oraitim ol sikman long nau, olsem piksa i soim?