Askim

Ol Witnes Bilong Jehova i gat wanem tingting long pasin bilong vot?

Baibel i kamapim ol lo i klia tru bilong helpim ol wokboi bilong God long kisim stretpela tingting long dispela samting. Tasol i no gat wanpela lo i tambuim man long vot. Olsem: I no gat rong sapos wanpela lain dairekta i vot bilong pasim tok long mekim wanpela samting long bisnis bilong ol. Ol kongrigesen bilong ol Witnes Bilong Jehova i save apim han na vot bilong makim taim bilong ol miting, na bilong makim ol samting ol bai baim long mani bilong kongrigesen.

Tasol olsem wanem long pasin bilong vot long eleksen bilong wok politik? Long sampela kantri demokratik, inap 50 pesen bilong ol manmeri i no save vot long de bilong eleksen. Ol Witnes i no save pasim ol narapela long vot, na tu, ol i no save mekim sampela tok bilong daunim ol eleksen. Ol i save daun na wok gut wantaim ol bikman bilong gavman em ol man i bin votim ol. (Rom 13:​1-7) Olgeta wan wan Witnes i mas bihainim maus bilong bel em Baibel i skulim pinis na skelim samting em i laik mekim, olsem em bai vot long wanpela man i sanap long eleksen o nogat. Na tu, em i mas tingim ol samting em i mas mekim bilong i stap daun long God na gavman. (Matyu 22:21; 1 Pita 3:16) Taim Witnes i laik pasim tok long ol samting em bai mekim, i gat sampela samting em i save skelim pastaim.

Namba wan samting: Krais Jisas i tok long ol disaipel bilong em olsem: “Ol manmeri bilong mi ol i no bilong dispela graun, olsem mi tu mi no bilong dispela graun.” (Jon 17:14) Ol Witnes Bilong Jehova i save tingim tru dispela lo. Ol “i no bilong dispela graun,” olsem na ol i no insait long ol samting bilong wok politik bilong dispela graun.​—⁠Jon 18:⁠36.

Namba 2 samting: Aposel Pol i tok, em i olsem mausman bilong Krais bilong autim tok long ol manmeri long taim bilong em. (Efesus 6:20; 2 Korin 5:20) Ol Witnes i bilip olsem nau Krais Jisas em i King bilong Kingdom bilong God, na ol Witnes i mas autim dispela tok long ol manmeri, olsem ol mausman bilong dispela Kingdom. (Matyu 24:14; KTH 11:15) Ol mausman bilong ol gavman ol i no ken insait long wok politik, na ol i no insait long ol wok gavman bilong kantri em gavman bilong ol yet i bin salim ol long en. Ol Witnes i olsem mausman bilong Kingdom bilong God, na ol tu i ting olsem ol i no ken insait long wok politik bilong kantri ol i sindaun long en.

Namba 3 samting bilong skelim i olsem: Ol man i votim wanpela man long kisim namba, ol dispela man inap kisim hap asua long ol samting dispela man i mekim. (Skelim wantaim 1 Timoti 5:⁠22.) Ol Kristen i mas skelim gut, ol i laik insait long wok bilong helpim wanpela man long kisim namba o nogat.

Namba 4 samting: Ol Witnes i ting olsem pasin wanbel bilong ol Kristen em i bikpela samting. (Kolosi 3:14) Taim lotu i insait long wok politik, lain bilong en i save bruk. Olsem Krais Jisas, ol Witnes i no insait long ol samting bilong wok politik, olsem na ol i stap wanbel.​—⁠Matyu 12:​25; Jon 6:​15; 18:​36, 37.

Namba 5 na laspela samting: Taim ol Witnes i no insait long wok politik, ol inap autim tok bilong Kingdom long ol man i gat kain kain tingting long ol samting bilong wok politik.​—⁠Hibru 10:⁠35.

Ol dispela lo bilong Baibel i stap antap i mekim na long planti kantri ol Witnes i pasim tok long bel olsem bai ol i no vot long ol eleksen bilong wok politik, na lo bilong gavman i orait long ol i ken mekim olsem. Tasol olsem wanem sapos lo i tok ol man i mas vot? Long kain taim olsem olgeta wan wan Witnes i gat wok long pasim tok long bel long ol samting ol i laik mekim, na tok bilong Baibel i mas i stap olsem as bilong en. Sapos wanpela brata i go long ples bilong putim vot, em i samting bilong em yet. Samting em i mekim long dispela ples, em i samting bilong em na Man bilong wokim em. Sampela i no bin raitim wanpela samting long pepa bilong vot. Sampela narapela i bin raitim sampela tok i makim olsem ol i no laik vot. Maski ol i mekim wanem, ol gutpela Kristen i save olsem ol i mas klia long ol samting bilong wok politik, na ol i mas bihainim maus bilong bel em Baibel i skulim pinis.

Nius Wastaua (tok Inglis) bilong Novemba 15, 1950, long pes 455 na 446 i tok: “Long ol kantri em lo i tok ol man i mas vot . . . [ol Witnes] i ken i go long ples bilong putim vot. Long dispela ples, ol i mas raitim tok long pepa bilong vot i kamapim tingting bilong ol. Samting ol i mekim long dispela pepa, em samting bilong ol yet. Olsem na long ai bilong God, ol witnes bilong em ol i mas mekim ol samting i stret wantaim lo bilong God na bilip bilong ol. Em i no wok bilong mipela long tokim ol long samting ol i mas mekim long pepa bilong vot.”

Olsem wanem sapos man bilong wanpela meri Kristen i no bilip na em i strong long meri i mas i go long ples bilong putim vot? Dispela meri i mas daun long man bilong em, olsem ol Kristen i daun long ol gavman. (Efesus 5:​22; 1 Pita 2:​13-17) Sapos em i bihainim tok bilong man bilong em na i go long ples bilong putim vot, em i samting bilong em yet. Ol narapela i no ken toktok planti long em.​—⁠Skelim wantaim Rom 14:⁠4.

Olsem wanem sapos lo bilong wanpela kantri i no tok ol man i mas vot, tasol ol man i save birua long ol man i no go long ples bilong putim vot, na ating ol inap mekim nogut long ol? O olsem wanem sapos lo i no tok ol man i mas vot, tasol ol man bai putim sampela bikpela hevi long ol taim ol i no go long ples bilong putim vot? Long kain taim olsem, Kristen i mas skelim samting em yet i laik mekim. Baibel i tok: “Olgeta man wan wan bai i karim hevi bilong pasin ol yet i mekim.”​—⁠Galesia 6:⁠5.

Ating sampela man bai tingting planti taim ol i lukim olsem long taim bilong eleksen long kantri bilong ol, sampela Witnes i go long ples bilong putim vot na sampela nogat. Ating ol bai tok, ‘ol Witnes i no bihainim wankain pasin.’ Tasol ol man i mas save olsem, dispela em i samting bilong maus bilong bel bilong olgeta wan wan man yet, na long ai bilong God Jehova olgeta wan wan Kristen i mas pasim tok long bel long ol samting ol bai mekim.​—⁠Rom 14:⁠12.

Maski ol Witnes i pasim tok long mekim wanem samting taim kain kain samting i kamap, ol i was gut bambai ol i no insait long ol samting bilong wok politik, na bai no gat wanpela samting i mekim na ol i mas sem long autim tok. Long olgeta samting ol i bilip na wetim God Jehova long strongim ol, na givim gutpela tingting long ol, na helpim ol long abrusim pasin i no stret wantaim bilip bilong ol. Long dispela rot ol i kamapim klia olsem ol i bilip long tok bilong man i raitim Song: “Yu olsem ples hait bilong mi na yu lukautim mi. Yu go pas long mi na bringim mi i go long gutpela rot, olsem yu bin tok bipo long mekim.”​—⁠Song 31:⁠3.