Yumi Mas i Gat Oganaisesen Bilong Jehova

YU BIN harim wanpela man i tok, “Mi bilip long God tasol mi no bilip long wanpela lotu”? Em tingting bilong planti man bipo ol i bin amamas long i go long lotu tasol bihain ol i lusim, long wanem, lotu i no inapim ol long ol samting bilong spirit ol i laik kisim. Tru ol i no amamas long ol lotu, tasol planti i tok olsem ol i laik yet long lotuim God. Ol i bilip olsem, em i gutpela long lotuim God long pasin na rot ol yet i laikim, na maski long bung wantaim wanpela lotu o oganaisesen.

Baibel i tok wanem long dispela? God i laik bai ol Kristen i mas bung wantaim wanpela oganaisesen?

Pasin Bilong Stretim Gut Ol Samting i Bin Helpim Ol Kristen Bipo

Long de Pentikos long yia 33 C.E., Jehova i kapsaitim spirit holi bilong em long wanpela lain man na meri i bung wantaim long rum antap long “wanpela haus” i stap long Jerusalem. Ol i no stap longwe long narapela, nogat. (Aposel 2:⁠1) Long dispela taim, kongrigesen Kristen i kamap, em dispela kongrigesen i go bikpela na long nau em i kamap olsem wanpela oganaisesen i stap long olgeta hap. Dispela em i wanpela gutpela blesing tru long ol dispela disaipel bilong pastaim. Bilong wanem? Wanpela samting i olsem: Ol i bin kisim wanpela bikpela wok​—⁠ol i gat wok bilong autim gutnius bilong Kingdom bilong God “long olgeta hap bilong graun.” (Matyu 24:14) Insait long kongrigesen ol Kristen i gat save pinis ol inap skulim ol nupela bilipman long pasin bilong mekim wok autim tok.

I no longtaim na ol i autim gutnius bilong Kingdom i go kalapim banis bilong Jerusalem na i go longwe moa. Namel long yia 62 na 64 C.E., aposel Pita i raitim namba wan pas bilong em i go long ol Kristen “i stap nabaut olsem tripman long provins Pontus na Galesia na Kapadosia na Esia na Bitinia,” olgeta dispela ples i stap long kantri Turki long nau. (1 Pita 1:⁠1) Na tu, i gat ol bilipman i stap long Palestain, Lebanon, Siria, Saiprus, Grik, Krit, na Itali. Olsem Pol i bin tok long ol Kolosi long yia 60-​61 C.E., ol i bin autim gutnius “long olgeta manmeri i stap long graun.”​—⁠Kolosi 1:⁠23.

Namba tu samting em pasin bilong bung wantaim olsem wanpela oganaisesen inap mekim i olsem, ol narapela Kristen bai strongim narapela. Taim Kristen i bung wantaim wanpela kongrigesen, em inap harim ol tok bilong God, na ol bai stadi long Baibel wantaim, na kamapim ol ekspiriens inap strongim bilip bilong ol narapela na beten wantaim ol wanbilip. (1 Korin sapta 14) Na ol strongpela Kristen inap “lukautim gut ol manmeri bilong God.”​—⁠1 Pita 5:⁠2.

Ol Kristen i insait long dispela kongrigesen, ol i kirap save long narapela, na narapela i laikim narapela. Pasin bilong bung wantaim i no bin givim hevi long ol Kristen bilong pastaim, nogat, em i bin strongim ol.​​—⁠Aposel 2:​42; 14:27; 1 Korin 14:26; Kolosi 4:​15, 16.

Narapela as na yumi mas i gat dispela kongrigesen, olsem oganaisesen, i stap long olgeta hap na i stap wanbel, em i olsem, dispela oganaisesen i mekim na ol Kristen i stap wanbel. Ol Kristen i lain long pasin bilong ‘wanbel long ol toktok ol i mekim.’ (1 Korin 1:10) Dispela em i bikpela samting tru. Ol lain insait long dispela kongrigesen ol i bin i go long ol narapela narapela skul, na ol i bilong narapela narapela lain. Ol i gat narapela narapela tok ples, na pasin na tingting bilong ol i narapela narapela. (Aposel 2:​1-​11) Sampela taim ol Kristen i gat ol narapela narapela tingting. Tasol ol hetman i bin helpim ol Kristen long stretim ol dispela hevi i kamap insait long kongrigesen.​​—⁠Aposel 15:​1, 2; Filipai 4:​2, 3.

Taim ol elda bilong dispela kongrigesen i no inap stretim ol bikpela askim, orait ol i askim ol wasman bilong raun i bin mekim wok longpela taim kain olsem Pol long stretim ol dispela askim. Taim ol i laik stretim sampela bikpela samting bilong bilip, ol i askim ol lain bilong bosim ol Kristen i stap long Jerusalem long stretim. Pastaim ol aposel bilong Krais Jisas tasol i bin insait long dispela lain, tasol bihain ol i makim ol hetman bilong kongrigesen long Jerusalem tu long insait long dispela lain. Ol wan wan kongrigesen i tingim wok em God i bin givim long lain bilong bosim ol Kristen na ol lain i wok wantaim ol long ol wok bilong stretim ol samting bilong autim tok, na makim ol brata long kisim sampela wok, na pasim tok long ol samting bilong bilip. Taim lain bilong bosim ol Kristen i stretim wanpela hevi, ol kongrigesen i orait long dispela tok ol hetman i pasim na “ol i amamas long kisim dispela gutpela tok bilong strongim ol.”​​—⁠Aposel 15:​1, 2, 28, 30, 31.

Em nau, Jehova i bin mekim wok long wanpela oganaisesen long taim bilong ol aposel. Tasol olsem wanem long nau?

Yumi Mas i Gat Wanpela Oganaisesen Long Nau

Olsem ol wanwok bilong ol long bipo, ol Witnes Bilong Jehova i tingim tru dispela wok bilong autim gutnius bilong Kingdom long nau. Wanpela rot bilong ol long mekim olsem, em ol i tilim ol Baibel na buk bilong stadi long Baibel, na i mas i gat wanpela oganaisesen bilong stretim gut ol dispela wok.

Ol i mas wokim gut ol buk na nius Kristen, na skelim gut ol tok bilong ol dispela buk na nius, nogut i gat sampela popaia, na ol i mas prinim, na bihain ol i mas salim i go long ol kongrigesen. Orait nau ol Kristen wan wan yet i mas kisim ol dispela buk na nius i go long ol man i laik kaunim. Planti milion manmeri i bin kisim tok bilong Kingdom long dispela rot. Ol man bilong autim gutnius i strong long mekim dispela wok long pasin i stret, na ol i was gut bambai ol i no ken mekim wok long wanpela teritori planti taim na long sampela hap nogat. Bilong stretim gut dispela wok i mas i gat wanpela oganaisesen.

Tasol “God i save mekim wankain pasin long olgeta manmeri,” olsem na i gat wok long tanim tok bilong Baibel na ol buk na nius bilong Baibel. (Aposel 10:34) Long nau, ol i wokim dispela nius long 132 tok ples, na narapela nius i save kamap wantaim dispela, em Kirap!, ol i wokim long 83 tok ples. Bilong mekim dispela wok i mas i gat ol lain bilong tanim tok long olgeta hap bilong graun.

Ol lain insait long kongrigesen i save kisim ol tok bilong strongim ol long taim ol i go long ol miting Kristen na ol kibung. Long miting ol i save harim ol gutpela tok bilong Baibel, na ol i save stadi wantaim long ol tok bilong Baibel, na ol i save stori wantaim long ol gutpela stori bilong strongim narapela, na ol i save beten wantaim ol wanbilip bilong ol. Na olsem ol brata bilong ol long bipo, ol i save amamas long ol gutpela wasman bilong raun i save kam lukim kongrigesen bilong ol. Olsem na ol Kristen long nau “i gat wanpela lain sipsip tasol na wanpela wasman tasol bilong ol sipsip.”​—⁠Jon 10:⁠16.

Tru, ol Witnes Bilong Jehova i no gutpela man olgeta, na i wankain tu long ol wanwok bilong ol bilong bipo. Tasol ol i save wok wantaim long pasin wanbel. Olsem na wok bilong autim tok bilong Kingdom i kamap gut long olgeta hap bilong graun.​—⁠Aposel 15:​36-40; Efesus 4:⁠13.