Olsem Wanem? Yu Save Soim Gutpela Pasin Bilong Yu Long Ol Narapela?

‘Ol narapela i gat wanem tingting long mi, mi no tingting planti long dispela!’ Taim yu kros o bel hevi, ating yu bin hambak na mekim kain tok olsem. Tasol taim yu stap isi gen, ating yu kirap na tingting planti long dispela. Bilong wanem? Long wanem, tingting tru bilong yumi olgeta i olsem: Yumi laik bai ol narapela i gat gutpela tingting long yumi.

TRU TUMAS, ol narapela i gat wanem tingting long yumi, em i samting yumi mas tingim. Na yumi ol Kristen i gat namba olsem wokman bilong God Jehova yumi mas tingim moa yet dispela samting. Long wanem, yumi stap “long ai bilong olgeta manmeri.” (1 Korin 4:⁠9) Long 2 Korin 6:​3, 4, aposel Pol i mekim dispela gutpela tok: “Mipela i no laik bai ol man i tok nogut long dispela wok bilong mipela, olsem na mipela i no save mekim wanpela samting i save sutim lek bilong ol dispela man na ol i pundaun. Nogat. Mipela i stap wokman bilong God, olsem na oltaim mipela i save soim gutpela pasin bilong mipela long olgeta manmeri.”

Tasol olsem wanem yumi inap soim gutpela pasin bilong yumi long ol narapela? Yu ting yumi mas litimapim nem bilong yumi yet o tokim ol narapela long ol save na pasin bilong yumi? Nogat, i no long dispela rot. Yumi mas bihainim tok bilong 1 Pita 2:​12: “Yupela i mas wokabaut stret namel long ol haiden. Na . . . bihain ol bai i lukim gutpela pasin bilong yupela, na ol bai i litimapim nem bilong God.” Em nau, ol Kristen i save larim wokabaut bilong ol i tokaut, na long dispela rot ol i soim gutpela pasin bilong ol long ol narapela man! Ol man bai lukim na bihain ol bai litimapim nem bilong God. Tasol maski ol i no litimapim nem bilong yumi yet, sapos yumi soim gutpela pasin bilong yumi long ol narapela, dispela inap helpim yumi. Orait nau yumi ken skelim 3-pela samting dispela inap helpim yumi long en.

Stap Olsem Poroman Em Narapela i Laik Maritim

Tingim marit. Em wanpela presen i kam long God Jehova, em i “Papa bilong olgeta lain i stap long heven na long graun, na em yet i givim nem long olgeta dispela lain.” (Efesus 3:​15) Ating yu laik marit long wanpela taim bihain. Sapos olsem, orait yu save mekim wanem bilong soim ol narapela olsem pasin bilong yu i gutpela inap long narapela i ken marit long yu? Taim yu singel yet, yu bin kisim wanem kain nem?

Long sampela kantri, dispela em i wanpela bikpela samting ol famili i save tingting planti long en. Wanpela kantri olsem, em Gana. Taim man na meri i laik marit, tupela i save bihainim pasin bilong ples na toksave long papamama bilong ol. Toksave pinis, orait nau ol papamama i toksave long famili bilong ol. Nau famili bilong man i kirap na askim ol narapela, dispela meri i gat wanem kain nem. Taim papamama i bilip olsem pasin bilong meri i gutpela inap long pikinini man bilong ol i ken marit long em, ol i tokim famili bilong meri olsem pikinini man bilong ol i laik maritim dispela meri. Tasol famili bilong meri i no save tok orait hariap. Pastaim ol i askim ol narapela olsem dispela man i gat wanem kain nem. Olsem na wanpela savetok bilong Gana i tok: “Taim yu tingting long marit, givim askim long ol narapela i save gut long poroman yu laik marit long en.”

Olsem wanem long ol kantri long hap bilong Wes, em ol i save larim ol wan wan man na meri yet i makim poroman ol i laik maritim? Long dispela hap tu, man o meri i strongpela Kristen na em i gat gutpela tingting, em bai givim askim long ol narapela i save gut long poroman em i laik maritim​—⁠em i ken askim papamama o ol pren i gat gutpela tingting olsem dispela poroman i gat wanem kain nem na pasin. Buk Rot Bilong Famili i Ken Stap Amamas i tok, sapos yu wanpela meri yu ken askim olsem: “ ‘Dispela man i gat wanem kain nem namel long ol man? Husat ol pren bilong em? Em i save bosim gut skin bilong em? Em i save mekim wanem kain pasin long ol lapun? Em i gat wanem kain famili? Em i stap olsem wanem wantaim ol? Em i gat wanem tingting long mani? Em i save dring planti? Em i save belhat hariap, na paitim man? Em i holim wanem ol wok insait long kongrigesen? Em i save mekim gut ol dispela wok o nogat? Mi inap givim biknem long em?’​​—⁠Wok Pris 19:32; Sindaun 22:29; 31:23; Efesus 5:​3-5, 33; 1 Timoti 5:8; 6:​10; Taitus 2:​6, 7.”a

I gutpela sapos man tu i askim ol narapela long pasin bilong meri Kristen em i gat tingting long maritim. Baibel i tok Boas i bin mekim olsem long Rut, em dispela meri bihain em i marit long em. Taim Rut i askim em: “Mi meri bilong narapela ples. Olsem wanem na yu lukluk long mi na yu mekim gut long mi?” Boas i tok: “Mi harim tok pinis long olgeta samting yu bin mekim.” (Rut 2:​10-​12) Em nau, Boas yet i luksave olsem Rut i stap gut long God na em i save wok strong, tasol em i kisim tok tu long ol narapela olsem Rut i gutpela meri.

Na olsem tasol, pasin bilong yu bai kamapim klia olsem yu wanpela man o meri ol narapela i laik marit long en o nogat. Olsem wanem? Yu save soim ol narapela olsem pasin bilong yu i gutpela inap long wanpela i ken marit long yu?

Olsem Wanpela Wokman

Long ples wok tu, sapos yumi wokabaut stret, dispela inap helpim yumi. Sampela taim ol man i resis long kisim wok mani. Ol wokman i gat nem olsem man i save bikhet, na i kam bihaintaim long wok, na i no mekim pasin i stret, planti taim ol bos i save pinisim kain man olsem long wok. Na ol kampani i no laik tromoi planti mani tumas long baim wokman, olsem na sampela taim ol i pinisim tu ol wokman i gat save long mekim wok. Taim man i no gat wok mani na em i laik kisim wok, ating ol kampani bai givim askim long olpela bos bilong em. Ol i laik save long pasin na tingting bilong em long mekim wok, na em i gat save pinis long dispela wok o nogat. Planti Kristen i bin kisim wanpela wok, long wanem, ol bos i lukim pasin bilong ol long daun long ol, na bilas gut, na amamas, na mekim ol gutpela pasin Kristen.

Stretpela pasin em i wanpela pasin olsem​—⁠em pasin planti bos ol i laikim tru. Olsem aposel Pol, yumi tu i mas laik long “wokabaut stret long olgeta taim.” (Hibru 13:18) Long Gana, long wanpela kampani i gat main ol i harim tok olsem sampela wokman i save stil. Ol i pinisim sampela long wok, tasol ol i no pinisim nambatu bos bilong faktori, em i wanpela Witnes. Bilong wanem? Long wanem, inap planti yia ol bikpela bos i bin lukim olsem em i save mekim pasin i stret tasol. Na planti man i save olsem em i man bilong wok strong na i save daun long ol bosman. Em nau, stretpela pasin bilong em i mekim na em i holim yet wok bilong em!

Wanem sampela samting Kristen i ken mekim bilong soim olsem em inap long holim wok? Em i mas lain long mekim gut wanem wanem wok ol i givim long em. (Sindaun 22:29) Em i mas wok strong na tingting strong long mekim gut dispela wok. (Sindaun 10:4; 13:⁠4) Em i mas daun long bikpela bos na nambatu bos bilong em. (Efesus 6:⁠5) Pasin bilong kam stret long taim, na mekim pasin i stret, na wok gut, na wok strong, em sampela pasin ol bos i save laikim, na ol dispela pasin inap helpim yu long kisim wok, maski i no gat planti wok mani.

Ol Wok Insait Long Kongrigesen

Winim olgeta taim bipo, i mas i gat ol strongpela brata bilong i go pas long lukautim wok insait long kongrigesen Kristen. Bilong wanem? Aisaia i tok profet olsem: “Yu mas makim bikpela hap graun na sanapim haus sel bilong yu. Na yu mas opim haus sel bilong yu olgeta.” (Aisaia 54:⁠2) Dispela tok profet i kamap tru long lain bilong Jehova​—⁠long olgeta hap dispela lain i wok long i go bikpela bikpela.

Olsem na sapos yu wanpela man Kristen, yu ken mekim wanem bilong soim olsem yu inap long holim wanpela wok insait long kongrigesen? Tingim yangpela man Timoti. Luk i tok long Timoti olsem: “Ol Kristen long Listra na Aikoniam ol i tok long pasin bilong em olsem, Timoti i gutpela man.” Tru tumas, long tupela taun, gutpela pasin bilong dispela yangpela man i soim olsem em i gutpela man. Olsem na Pol i singautim Timoti long raun wantaim em na mekim wok.​​—⁠Aposel 16:​1-4.

Sapos wanpela man long nau “i laik i stap wasman” na em i wok strong long kisim wok olsem, orait olsem wanem em inap mekim long pasin i stret olsem God i save laikim? Em i no ken strong long stiaim tingting bilong ol narapela na bai ol i mas makim em, nogat. Em i mas wok long kisim ol gutpela pasin bilong spirit na bai em inap winim ol mak bilong mekim dispela wok. (1 Timoti 3:​1-​10, 12, 13; Taitus 1:​5-9) Na tu, bilong kamapim klia olsem em i “laikim gutpela wok,” em i mas insait tru long wok bilong autim tok na kamapim disaipel. (Matyu 24:14; 28:​19, 20) Ol man i soim olsem ol i gutpela Kristen ol i save tingim tru ol brata spirit bilong ol. Ol i bihainim gutpela tok bilong aposel Pol: “Sapos sampela manmeri bilong God i sot long ol samting, orait yupela i mas helpim ol. Sapos ol man bilong narapela ples ol i kamap long yupela, orait yupela i mas lukautim ol gut.” (Rom 12:13) Taim man Kristen i mekim olsem, em i soim olsem em inap long holim wok olsem “wokman bilong God.”

Long Olgeta Taim

Bilong soim ol narapela yumi inap long mekim wok, yumi no ken giaman na mekim olsem yumi inap, o mekim ol samting ol narapela i laikim bilong “grisim” ol tasol, nogat. (Efesus 6:⁠6) Bikpela samting i olsem: Yumi mas soim gutpela pasin bilong yumi long Man bilong wokim yumi, em God Jehova, long rot bilong bihainim tru ol tok na ol lo bilong em. Sapos yu wok long kamap strong moa long ol samting bilong spirit na yu strongim pasin bilong yu long pas gut wantaim God Jehova, ol narapela bai lukim olsem pasin yu mekim long famili, na ol wanwok, na ol wanlain Kristen, dispela i kamap gutpela moa. Na ol bai lukim tu olsem yu stap strong, yu gat stretpela tingting, yu save skelim gut ol samting, yu inap lukautim gut wok, na yu gat pasin daun. Dispela bai mekim na ol bai laikim tru na tingim gut yu, na bikpela samting moa yet, God Jehova bai orait long yu, long wanem, yu soim gutpela pasin bilong yu long ol narapela!

[Futnot]

[Piksa long pes 19]

Planti papamama i save bihainim gutpela tingting na ol i askim ol narapela long pasin bilong man o meri em pikinini bilong ol i gat laik long marit long en

[Piksa long pes 20]

Long pasin bilong em long tingim gut ol narapela, brata i soim olsem em inap long kisim sampela wok insait long kongrigesen