Holimpas Strong Ol Tok Bilong God
“Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”—SINDAUN 3:5, 6.
1. Olsem wanem yumi inap kisim save long planti save bilong ol man, winim olgeta taim bipo?
LONG nau, long olgeta hap bilong graun, i gat 9,000 narapela narapela niuspepa ol i save wokim long olgeta de. Long Amerika long olgeta yia ol i save wokim 200,000 nupela buk. Ol i tok, long Mas 1998 i gat 275 milion pes bilong Web-sait long Intenet. Dispela namba i wok long i go bikpela—long olgeta wan wan mun i gat 20 milion pes moa. Winim olgeta taim bipo, nau ol man i gat rot long kisim save long klostu olgeta samting. Ol dispela planti save i bin helpim ol man, tasol em i bin kamapim sampela hevi tu.
2. Ol man i gat rot long kisim save long planti planti samting, na wanem sampela hevi inap kamap long dispela?
2 Sampela man i gat bikpela laik long kisim moa moa save—oltaim ol i wok long kisim ol nupela nupela save, tasol ol i no tingim tumas ol samting i bikpela samting tru. Na sampela ol i kisim hap save tasol long ol samting i gat hatwok long save long en na nau ol i ting ol i man bilong save long ol dispela samting. Maski ol i sot long sampela save, ol i kirap mekim sampela samting na nau hevi i painim ol na ol narapela. Na ating sampela tok ol i kisim em i giaman tasol o i kranki stret. Planti taim i no gat rot long save tru tru olsem ol tok ol i kisim em i stret na i gutpela o nogat.
3. Baibel i mekim wanem tok lukaut long pasin bilong kisim save bilong dispela graun?
3 Inap longpela taim pinis, pasin bilong yumi man i olsem: Yumi gat laik long kisim save long ol samting. Tasol long bipo yet King Solomon i luksave olsem pasin bilong lusim bikpela hap taim tumas long kisim save long ol samting i no inap helpim tru yumi na em inap paulim tingting bilong yumi. Em i tok: “Ol man i save raitim planti buk, na dispela kain wok i no gat pinis bilong en. Na sapos yu wok oltaim long stadi, bai skin bilong yu i les olgeta. Olsem na yu mas lukaut long dispela pasin.” (Saveman 12:12) Sampela handet yia bihain long Solomon, aposel Pol i tokim Timoti: “Yu mas was gut long dispela wok God i bin givim long yu. Givim baksait long olkain toktok nabaut i no bihainim tingting bilong God. Na stap longwe long ol man i ting ol i gat gutpela save na ol i mekim kain kain toktok i pait long tingting bilong God. Sampela man i bihainim dispela kain save na ol i lusim pinis pasin bilong bilip.” (1 Timoti 6:20, 21) Tru tumas, ol Kristen long nau i mas klia long ol tok inap bagarapim bilip bilong ol.
4. Wanem wanpela samting yumi ken mekim bilong soim olsem yumi bilip strong long Jehova na ol tok bilong em?
4 Ol lain bilong Jehova i mas bihainim tu tok bilong Sindaun 3:5, 6: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” Bilong bilip strong long Jehova, yumi mas sakim olgeta tingting i pait wantaim Tok Bilong God, maski yumi yet i as bilong dispela tingting o narapela i as bilong en. Bilong lukautim yumi long ol samting bilong spirit, yumi mas skulim gut tingting bilong yumi bambai yumi ken save wanem ol tok inap paulim tingting bilong yumi na bai yumi ken givim baksait long en. (Hibru 5:14) Orait nau yumi ken stori long sampela as bilong dispela kain save.
Satan i Bosim Dispela Graun
5. Wanem wanpela as bilong ol save bilong paulim tingting bilong ol man? Husat tru i as bilong en?
5 Ol man bilong dispela graun ol i as bilong planti kain tingting em inap mekim nogut long ol narapela. (1 Korin 3:19) Krais Jisas i tingim ol disaipel bilong em na em i beten long God olsem: “Mi no askim yu long tekewe ol long dispela graun. Nogat. Mi beten long yu long yu ken lukautim ol, na man nogut i no ken bagarapim ol.” (Jon 17:15) Taim Jisas i askim God long lukautim ol disaipel na bai “man nogut” i no ken bagarapim ol, dispela i soim olsem Satan i gat strong long stiaim tingting na pasin bilong ol man bilong dispela graun. Tru, yumi Kristen, tasol dispela samting yet i no save banisim yumi bambai ol tingting nogut bilong dispela graun i no ken paulim yumi, nogat. Jon i tok: “Yumi save, yumi stap pikinini bilong God, tasol dispela graun olgeta em i stap aninit long strong bilong Satan.” (1 Jon 5:19) Yumi stap klostu long pinis bilong taim bilong las de, olsem na yumi ken save, Satan na ol spirit nogut bilong em bai i strong moa long kamapim ol save bilong paulim tingting bilong ol man, na ol dispela save bai pulap long graun.
6. Olsem wanem ol amamas bilong dispela graun inap mekim na yumi no pilim moa ol pasin i nogut tru?
6 Sampela bilong ol dispela save i olsem i no inap paulim tingting bilong yumi. (2 Korin 11:14) Tingim ol samting bilong amamas, olsem ol stori long TV, ol piksa wokabaut, musik, na ol buk na nius. Planti man i wanbel long tok olsem sampela kain amamas i wok long kamapim moa moa yet ol pasin i nogut tru, olsem pasin pamuk, pait na bagarapim man, na kisim drak. Namba wan taim ol man i lukim kain piksa nogut olsem, ating ol i kirap nogut. Tasol taim ol i lukim planti taim, ol i no pilim moa. Yumi no ken orait liklik long ol amamas em yumi inap kisim sampela tingting nogut long en na i paulim tingting bilong yumi.—Song 119:37.
7. Wanem kain save bilong dispela graun inap daunim bilip bilong yumi long Baibel?
7 Orait nau tingim narapela samting em inap paulim tingting bilong yumi—em tingting bilong sampela saientis na saveman em ol i sutim tok long Baibel olsem ol tok bilong en i no tru. (Skelim wantaim Jems 3:15.) Kain tingting olsem i kamap planti taim long ol nius na ol buk em ol man i save laikim, na dispela tingting inap daunim bilip bilong ol man long Baibel. Sampela man i amamas long kamapim kain kain tok bilong daunim strong bilong Tok Bilong God. Kain samting olsem i bin stap long taim bilong ol aposel, olsem aposel Pol i kamapim klia: “Yupela i mas lukaut gut, nogut wanpela man i autim olkain giaman save na toktok nating long yupela na em i mekim yupela i bihainim tingting bilong en. Ol dispela kain man i save kisim tingting bilong ol tumbuna na bilong ol spirit i save bosim ol samting bilong skai na graun. Ol i no save bihainim tingting bilong Krais.”—Kolosi 2:8.
Ol Birua Bilong Tok i Tru
8, 9. Pasin bilong bikhet na lusim bilip i kamap ples klia olsem wanem long nau?
8 Ol man i bikhet na lusim bilip tru ol tu inap bagarapim yumi long ol samting bilong spirit. Aposel Pol i tok profet olsem pasin bilong bikhet na lusim bilip bai kamap namel long ol man i tok ol i Kristen. (Aposel 20:29, 30; 2 Tesalonaika 2:3) Olsem em i tok profet, taim ol aposel i dai pinis, planti man i bihainim pasin bilong bikhet na lusim bilip na nau wanpela lain i kamap ol i holim nating nem Kristen. Long nau, namel long lain bilong God, i no gat planti man i bihainim pasin bilong bikhet na lusim bilip. Tasol i gat sampela i bin lusim lain bilong yumi, na sampela namel long ol i tingting strong long bagarapim gutnem bilong ol Witnes Bilong Jehova—ol i kamapim nabaut sampela tok giaman long yumi. Na sampela i wok wantaim sampela lain ol i laik pasim lotu i tru. Taim ol i mekim olsem, ol i helpim namba wan man bilong bikhet na lusim lotu i tru, em Satan.
9 Sampela man i bikhet na lusim bilip tru ol i mekim wok long redio na televisen samting, na Intenet tu, bilong kamapim nabaut ol tok giaman long ol Witnes Bilong Jehova. Olsem na taim ol man i gat gutpela bel ol i laik kisim save long ol bilip bilong yumi na ol i wok long painim dispela save, ating ol i harim sampela tok ol dispela man bilong lusim bilip tru ol i as bilong en. Sampela Witnes i no tingting gut na ol tu i bin harim kain tok olsem. Na sampela taim ol man i bikhet na lusim bilip tru ol i insait long sampela stori i kamap long televisen o redio. Orait, long kain taim olsem, wanem rot i gutpela long bihainim?
10. Taim yumi harim sampela tok em ol man i bikhet na lusim bilip tru ol i as bilong en, i gutpela yumi mekim wanem?
10 Aposel Jon i tokim ol Kristen ol i no ken kisim ol man i bikhet na lusim bilip tru i go long haus bilong ol. Em i tok: “Sapos wanpela man i kam long yupela, na em i no bringim dispela kain tok i kam, orait yupela i no ken givim gude long em, na yupela i no ken kisim em i go long haus bilong yupela. Man i givim gude long dispela kain man, em i helpim em long wok nogut bilong em.” (2 Jon 10, 11) Sapos yumi klia olgeta long ol dispela kain man, dispela bai lukautim yumi na tingting nogut bilong ol i no ken bagarapim bilip bilong yumi. Sapos yumi harim tok bilong ol long rot bilong redio, televisen, Intenet samting, dispela bai nogutim yumi wankain olsem yumi kisim dispela man yet i kam long haus bilong yumi. Yumi no ken larim laik bilong kisim save long ol samting i pulim yumi long mekim olsem, nogat!—Sindaun 22:3.
Insait Long Kongrigesen
11, 12. (a) Long taim bilong ol aposel, wanem samting inap paulim tingting bilong ol Kristen? (b) Sampela Kristen ol i mekim wanem na ol i no holimpas ol tok bilong God?
11 Orait nau tingim narapela samting em inap paulim tingting bilong yumi. Maski Kristen i dediket pinis em i no tingting long lainim narapela long ol tok giaman, em inap kisim pasin bilong mekim ol tok na i no tingting gut pastaim. (Sindaun 12:18) Yumi sinman, olsem na sampela taim yumi mekim sin long tok bilong yumi. (Sindaun 10:19; Jems 3:8) Long taim bilong aposel Pol, sampela insait long kongrigesen ol i no bosim maus na ol i save tok resis na tok pait long ol liklik liklik samting. (1 Timoti 2:8) Na sampela ol i strong long bihainim tingting bilong ol yet na ol i laik daunim namba bilong Pol. (2 Korin 10:10-12) Dispela i kamapim planti tok pait i no gat as na ol i mekim.
12 Sampela taim ol samting ol i no wanbel long en i mekim na “oltaim ol i tok kros nabaut,” na dispela i bagarapim bel isi bilong kongrigesen. (1 Timoti 6:5; Galesia 5:15) Pol i toktok long ol man i kamapim ol dispela tok pait, olsem: “Tok bilong Bikpela bilong yumi Jisas Krais, em i save skulim yumi gut long pasin bilong God. Na sapos wanpela man i lusim dispela tok na i skulim ol man long narapela tok i no wankain olsem dispela stretpela tok bilong Jisas, orait yumi ken save, dispela man em i laikim tumas pasin bilong em yet na em i bikhet nating tasol. Em i no gat save liklik. Nogat. Em i gat laik nogut bilong tok resis na tok pait nabaut long ol liklik samting nating . . . Dispela kain tok i save mekim ol man i bel nogut long ol arapela man na ol i tok pait na ol i tok bilas na ol i tingting nogut long ol arapela.”—1 Timoti 6:3, 4.
13. Long taim bilong ol aposel, klostu olgeta Kristen ol i save bihainim wanem pasin?
13 Tasol gutpela tru, long taim bilong ol aposel klostu olgeta Kristen ol i stap gut long God na ol i stap strong long wok bilong autim gutnius bilong Kingdom bilong God. Ol i wok strong long lukautim ‘ol pikinini, papamama bilong ol i dai pinis, na ol meri, man bilong ol i dai pinis, na ol i helpim ol long karim ol hevi bilong ol.’ Na ol i was gut na bai ‘pasin bilong dispela graun i no mekim ol i kamap doti long ai bilong God’—ol i no lusim taim long tok pait long ol liklik samting nating. (Jems 1:27) Ol i no save “poroman wantaim ol man nogut,” maski ol i insait long kongrigesen Kristen, na long dispela rot ol i lukautim ol yet long ol samting bilong spirit.—1 Korin 15:33; 2 Timoti 2:20, 21.
14. Sapos yumi no was gut, olsem wanem ol tok nating bilong kamapim sampela tingting bilong yumi em inap kamap olsem samting bilong bagarapim yumi?
14 Na olsem tasol, ol samting paragraf 11 i stori long en i no makim ol kongrigesen bilong ol Witnes Bilong Jehova long nau. Tasol yumi mas save olsem pasin bilong tok pait long ol liklik samting nating em inap kamap. Tru, i no gat rong long toktok long ol stori bilong Baibel o long sampela samting bilong nupela taim em God i no kamapim yet long yumi. Na i no gat rong long toktok long ol samting bilong yumi yet, olsem klos na bilas o ol amamas yumi laikim. Tasol sapos yumi strong long ol narapela i bihainim tingting bilong yumi na yumi bel nogut taim ol narapela i no wanbel long tok bilong yumi, ating kongrigesen inap bruk long ol liklik liklik samting. Sampela liklik toktok nating yumi mekim em inap kamap olsem samting bilong bagarapim yumi long ol samting bilong spirit.
Lukautim Samting God i Givim Long Yumi
15. Ol “tok bilong ol spirit nogut” inap bagarapim yumi long ol samting bilong spirit olsem wanem? Baibel i tok yumi mas mekim wanem?
15 Aposel Pol i tok lukaut olsem: “Holi Spirit i tok klia olsem, long dispela taim i laik kamap bihain sampela man bai i lusim bilip bilong ol, long wanem, ol bai i putim yau long tok bilong ol spirit bilong giaman na ol spirit nogut na bihainim tok bilong ol.” (1 Timoti 4:1) Tru tumas, ol kain tok olsem inap bagarapim bilip bilong yumi. Olsem na Pol i tokim gutpela pren bilong em Timoti olsem: “Timoti, yu mas was gut long dispela wok God i bin givim long yu. Givim baksait long olkain toktok nabaut i no bihainim tingting bilong God. Na stap longwe long ol man i ting ol i gat gutpela save na ol i mekim kain kain toktok i pait long tingting bilong God. Sampela man i bihainim dispela kain save na ol i lusim pinis pasin bilong bilip.”—1 Timoti 6:20, 21.
16, 17. God i bin givim yumi wanem samting bilong lukautim? Bilong lukautim gut dispela samting, yumi mas mekim wanem?
16 Olsem wanem dispela gutpela tok lukaut inap helpim yumi long nau? God i givim Timoti wanpela gutpela samting tru bilong lukautim na was gut long en. Em wanem samting? Pol i tok: “Yu mas tingim gut ol dispela gutpela tok mi bin givim yu na yu mas autim tok long wankain pasin na skulim ol manmeri. Olsem na yu mas bilip strong long Krais Jisas na givim bel bilong yu long em, na long dispela pasin yu mas autim tok long ol. Dispela gutnius God i bin putim long han bilong yu bilong yu lukautim, em i gutpela samting tru, na yu mas was gut long en.” (2 Timoti 1:13, 14) Em nau, Timoti i mas lukautim “ol dispela gutpela tok,” em ol tok i stret wantaim “pasin bilong God.” (1 Timoti 6:3) Ol Kristen long nau tu ol i save tingting strong long lukautim bilip bilong ol na olgeta tok i tru God i bin givim long ol.
17 Bilong lukautim gut dispela samting God i bin givim long yumi, yumi mas kisim pasin bilong stadi gut long Baibel na beten oltaim, na mekim ‘gutpela pasin long ol arapela, na strong tru long mekim gutpela pasin long ol arapela manmeri i bilip long Bikpela.’ (Galesia 6:10; Rom 12:11-17) Pol i tok moa: “Yu mas wok long kisim stretpela pasin na pasin tru bilong God na pasin bilong bilip tru na pasin bilong laikim tru ol arapela na pasin bilong sanap strong na karim olgeta hevi na pasin bilong isi long ol manmeri. Man i bilip long Krais, em i olsem man i ran long resis. Olsem na yu mas ran strong long dispela gutpela resis na bai yu kisim laip i stap gut oltaim oltaim. Long taim yu bin sanap strong na autim bilip bilong yu long ai bilong planti man, God i bin singautim yu bilong kisim dispela laip.” (1 Timoti 6:11, 12) Dispela tok Pol i kolim olsem ‘ran strong long resis’ na “sanap strong,” em i makim olsem yumi mas wok strong long sakim ol samting bilong bagarapim yumi long ol samting bilong spirit.
Yumi Mas Skelim Gut Ol Samting
18. Olsem wanem yumi inap bihainim stretpela tingting bilong Kristen long ol save bilong dispela graun?
18 Bilong ran strong long resis, yumi mas kisim pasin bilong skelim gut ol samting. (Sindaun 2:11; Filipai 1:9) Olsem: I no stretpela tingting sapos yumi ting olgeta save bilong dispela graun i no gutpela long bilip long en. (Filipai 4:5; Jems 3:17) I no olsem olgeta tingting bilong man i pait wantaim Tok Bilong God, nogat. Tok bilong Jisas i makim olsem ol sikman i mas i go lukim dokta—man i mekim wok dokta em i bin kisim bikpela save. (Luk 5:31) Tru, ol dokta long taim bilong Jisas ol i no gat bikpela save olsem ol dokta bilong nau, tasol Jisas i luksave olsem man i mekim wok dokta em inap helpim yumi long dispela save bilong em. Ol Kristen long nau ol i gat stretpela tingting long ol save bilong dispela graun, tasol ol i sakim ol samting em inap bagarapim ol long ol samting bilong spirit.
19, 20. (a) Ol elda i save mekim wanem na ol i bihainim pasin bilong skelim gut ol samting taim ol i laik helpim ol brata i no bihainim gutpela tingting na ol i save mauswara nating? (b) Kongrigesen i save mekim wanem long ol man i strong long kamapim ol bilip giaman?
19 Ol elda tu i mas bihainim pasin bilong skelim gut ol samting taim ol i laik helpim ol brata i no bihainim gutpela tingting na ol i save mauswara nating. (2 Timoti 2:7) Nogut sampela taim ol brata sista long kongrigesen ol i insait long ol tok pait long ol liklik liklik samting. Bilong lukautim kongrigesen na bai kongrigesen i stap wanbel, ol elda i mas kirap kwik na stretim kain samting olsem. Tasol ol i no kisim tingting nogut long ol brata bilong ol, na ol i no hariap tumas long ting ol i bikhet na lusim bilip tru.
20 Pol i stori long pasin ol elda i mas bihainim taim ol i laik helpim ol brata. Em i tok: “Ol brata, sapos yupela i save olsem wanpela bilong yupela i bin mekim sin, orait yupela man i bihainim Holi Spirit, yupela i mas mekim pasin isi long dispela man na helpim em long stretim pasin bilong em.” (Galesia 6:1) Jut i tok long ol Kristen i gat tupela tingting long sampela samting na em i tok: “Yupela i mas sori long ol man bilip bilong ol i no strong. Sampela bilong ol i olsem ol i stap pinis long paia, olsem na kwiktaim tumas yupela i mas kisim bek ol.” (Jut 22, 23) Tasol sapos planti taim ol elda i bin givim tok long wanpela brata, tasol em i strong yet long kamapim ol bilip giaman, orait ol elda i mas kirap mekim sampela samting bilong lukautim kongrigesen.—1 Timoti 1:20; Taitus 3:10, 11.
Tingim Ol Pasin Yumi Amamas Tru Long Lukim Ol Man i Mekim
21, 22. Yumi mas skelim gut wanem ol samting? Yumi mas pulapim wanem samting long tingting bilong yumi?
21 Kongrigesen Kristen i no save putim yau long ol tok bilong paulim tingting bilong ol, em dispela kain tok “i olsem sua nogut bilong bagarapim man, na em bai i kamap bikpela tru.” (2 Timoti 2:16, 17; Taitus 3:9) Ol dispela kain tok bai mekim olsem, maski em ol tok i kamapim ol save bilong dispela graun, o ol tok bilong ol man i bikhet na lusim bilip, o ol tok bilong sampela insait long kongrigesen, em ol i no tingting gut pastaim na ol i mekim tok. Tru, laik bilong yumi long kisim save long ol nupela nupela samting em inap helpim yumi, tasol sapos yumi laik kisim save long olgeta samting na yumi no bosim gut dispela laik, dispela inap opim rot na yumi kisim sampela tok em inap paulim tingting bilong yumi. Yumi save pinis long tingting na pasin bilong Satan. (2 Korin 2:11) Yumi save em i wok strong tru long pulim yumi na bai yumi no wok strong moa long mekim wok bilong God.
22 Yumi ol gutpela wokman bilong God, yumi mas holimpas strong ol tok bilong God. (1 Timoti 4:6) Yumi mas mekim gutpela wok long taim bilong yumi na skelim gut ol tok yumi laik kisim save long en. Sapos yumi mekim olsem, orait ol tok Satan i kamapim em i no inap paulim yumi. Em nau, yumi mas wok long tingting tasol long “ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.” Sapos yumi larim ol dispela samting i pulap long tingting na bel bilong yumi, orait God, em i as bilong pasin bilong bel isi, em bai i stap wantaim yumi.—Filipai 4:8, 9.
Yumi Lainim Wanem Samting?
• Olsem wanem save bilong dispela graun inap bagarapim yumi long ol samting bilong spirit?
• Yumi ken mekim wanem na bai ol tok bilong ol man i bikhet na lusim bilip tru em i no ken bagarapim yumi?
• Yumi mas givim baksait long wanem kain tok insait long kongrigesen?
• Olsem wanem yumi inap bihainim stretpela tingting bilong Kristen long ol planti samting yumi inap kisim save long en?
[Piksa long pes 9]
Planti nius na buk ol man i save laikim ol i pait wantaim ol lo Kristen bilong yumi
[Piksa long pes 10]
Taim ol Kristen i toktok wantaim, i no gat rong long narapela i kamapim tingting bilong em long narapela, tasol nogut wanpela i ting olsem tingting bilong em tasol i stret