Olsem Wanem Yu Inap Kisim Bel Isi?
Planti samting bilong taim bilong yumi i narapela kain long taim bilong Thoreau, em dispela man mipela i stori long em long stori i kamap paslain long dispela. Wanpela bikpela samting i narapela kain long taim bilong yumi em olsem: I gat planti buk samting bilong helpim man long kisim bel isi. Ol dokta bilong glasim tingting bilong man, na ol man i raitim ol buk i stori long pasin bilong helpim yumi yet—na ol niuspepa tu—ol i kamapim tingting bilong ol yet long wanem ol samting inap helpim man. Tok bilong ol inap helpim man inap liklik taim, tasol i mas i gat sampela samting inap helpim tru man long stap gut inap longpela taim. Ol manmeri em mipela i stori long ol long stori i kamap paslain long dispela, ol i bin kisim save long dispela samting.
ANTÔNIO, Marcos, Gerson, Vania, na Marcelo ol i gat narapela narapela sindaun na hevi bilong ol i no wankain. Tasol 3-pela samting bilong ol i wankain. Namba wan samting em olsem: Bipo ol i ‘no gat wanpela gutpela samting i stap bilong ol i wetim i kamap bihain. Na ol i no save long God.’ (Efesus 2:12) Namba tu samting, ol i laik kisim bel isi. Na namba tri, olgeta i kisim bel isi taim ol i stadi long Baibel wantaim ol Witnes Bilong Jehova. Taim ol i stadi i go, ol i kisim save olsem God i save tingim tru ol. Tru tumas, olsem Pol i tokim ol man bilong Atens, God “i no stap longwe long yumi olgeta wan wan.” (Aposel 17:27) Taim man i bilip tru long dispela samting, dispela em i wanpela bikpela samting bilong helpim em long kisim bel isi.
Bilong Wanem Planti Man i No Stap Bel Isi?
Baibel i kamapim tupela bikpela as na planti man i no stap bel isi—bel bilong ol i no stap isi na ol i no stap isi wantaim ol narapela. Jeremaia 10:23 i kamapim namba wan as: “Mipela man i no inap bosim wokabaut bilong mipela yet na bihainim ol rot mipela i laikim.” Man i no gat gutpela tingting na em i no gat save long ol samting bai kamap bihain, olsem na em i no inap bosim wokabaut bilong em yet taim i no gat man i helpim em. Helpim i gutpela tru i kam long God tasol. Ol manmeri i no askim God long stiaim ol, bai ol i no inap kisim bel isi i stap oltaim. Tok bilong aposel Jon i kamapim namba tu as na i no gat bel isi. Em i tok: “Dispela graun olgeta em i stap aninit long strong bilong Satan.” (1 Jon 5:19) Sapos God i no stiaim ol man, wok bilong wanpela strongpela spirit—“Satan”—bai mekim na ol wok bilong ol man bilong kamapim bel isi bai no kamap gutpela.
Long dispela tupela as—olsem planti man i no askim God long stiaim ol na Satan i wok strong tru—olgeta lain manmeri i stap nogut. Aposel Pol i kamapim gut dispela samting: “Olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.” (Rom 8:22) Husat inap tok dispela tok i no tru? I no gat wanpela. Long ol kantri i gat planti mani na long ol kantri i stap rabis tu, ol hevi bilong famili, pasin raskol, pasin i no stret, kros namel long ol man, hevi bilong mani, pasin bilong birua long narapela lain, pasin bilong daunim man, sik, na planti hevi moa i mekim na ol man i no gat bel isi.
Husat Inap Givim Bel Isi
Taim Antônio, Marcos, Gerson, Vania, na Marcelo ol i stadi long Tok Bilong God, em Baibel, ol i kisim save long ol samting i senisim i stap bilong ol. Ol i kisim save olsem bihain sindaun bilong ol man bai kamap narapela kain. Dispela tingting olsem olgeta samting bai kamap gutpela, dispela i no wanpela tingting nating tasol, nogat. Yumi inap bilip tru olsem God i gat laik long helpim ol man, na long nau tu em inap helpim yumi sapos yumi mekim laik bilong em. Ol i bihainim ol samting ol i kisim save long en long Baibel, na i stap bilong ol i kamap gutpela moa. Amamas na bel isi ol i kisim i winim tru amamas na bel isi ol i ting ol inap kisim.
Antônio i no insait moa long ol mats samting bilong helpim ol wokman. Em i save ol senis i save kamap long dispela rot ol i no stretim olgeta samting na ol dispela senis bai stap inap sotpela taim tasol. Dispela man, em bipo em i lida bilong wanpela lain bilong helpim ol wokman, em i kisim save long Kingdom bilong God. Planti milion manmeri ol i beten askim God long kamapim dispela Kingdom taim ol i kolim Beten Bilong Bikpela, na ol i tok long God olsem: “Kingdom bilong yu i mas i kam.” (Matyu 6:10a) Antônio i kisim save olsem Kingdom bilong God em i wanpela gavman tru i stap long heven na em bai kamapim bel isi tru long ol manmeri.
Marcos i lain long bihainim gutpela tok bilong Baibel long ol samting bilong marit. Olsem na dispela man, bipo em i man bilong politik, em i stap wanbel gen wantaim meri bilong em. Em tu i wet long dispela taim em i klostu pinis nau, em taim Kingdom bilong God bai pinisim pasin bilong ol manmeri bilong dispela graun, olsem mangal, na tingim ol yet tasol, na em bai kamapim nupela taim. Nau em i save gut long insait bilong tok bilong Beten Bilong Bikpela: “Mipela i mas bihainim laik bilong yu long graun olsem ol i save bihainim long heven.” (Matyu 6:10b) Taim laik bilong God i kamap long graun, i stap bilong ol manmeri bai gutpela tru, winim bilong olgeta taim bipo.
Olsem wanem long Gerson? Em i lusim pinis pasin bilong raun nating na stil. I stap bilong dispela man—em bipo em i save slip long rot—i gat as bilong en, long wanem, em i mekim wok long strong bilong em bilong helpim ol narapela long kisim bel isi. Olsem ol stori bilong ol dispela man i kamapim, pasin bilong stadi long Baibel na bihainim tok bilong en inap mekim na i stap bilong man bai kamap gutpela moa.
Bel Isi Long Taim Bilong Hevi
Krais Jisas em i nambawan bikpela rot bilong God long kamapim laik bilong em, na taim ol manmeri i stadi long Baibel wantaim ol Witnes Bilong Jehova, ol i kisim planti save long Jisas. Long nait mama i karim Jisas, ol ensel i singsing bilong litimapim nem bilong God, olsem: “Litimapim nem bilong God i save stap antap tru. Na long graun ol manmeri God i belgut long ol, ol i ken i stap bel isi.” (Luk 2:14, NW ) Taim Jisas i go bikpela, em i laik helpim ol manmeri long mekim i stap bilong ol i kamap gutpela. Em i pilim tru tingting bilong ol, na em i sori long ol man i gat hevi o sik. Na olsem ensel i bin tok, Jisas i givim bel isi long ol man i gat pasin daun. Klostu long taim Jisas i pinisim wok bilong em long graun, em i tokim ol disaipel bilong em olsem: “Mi laik lusim yupela, na mi givim bel isi long yupela bai em i ken i stap long yupela. Bel isi bilong mi, em mi givim long yupela. Na bel isi mi givim long yupela, em i no wankain olsem ol manmeri bilong graun i save givim. Olsem na yupela i no ken bel hevi na tingting planti, na yupela i no ken pret.”—Jon 14:27.
Jisas i no helpim tasol ol man. Em i tok em i olsem wasman bilong ol sipsip, na ol gutpela disaipel bilong em ol i olsem sipsip. Em i tok: “Mi kam bilong ol i ken kisim laip, na bilong laip i ken pulap tru long ol. Mi yet mi gutpela wasman bilong ol sipsip. Gutpela wasman bilong sipsip em i save lusim laip bilong em yet bilong helpim ol sipsip.” (Jon 10:10, 11) Em nau, planti bikman bilong nau ol i save tingim ol yet pastaim, tasol Jisas i givim laip bilong em bilong helpim ol sipsip bilong em.
Ol samting Jisas i bin mekim inap helpim yumi olsem wanem? Planti ol i save long ol dispela tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Bilong man i ken bilip long Jisas, pastaim em i mas kisim save long em na long Papa bilong em, Jehova. Taim yumi save long God na long Krais Jisas, dispela bai helpim yumi long pas gut wantaim God Jehova na dispela samting bai helpim yumi long stap bel isi.
Jisas i tok: “Ol sipsip bilong mi i save harim maus bilong mi, na mi save long ol, na ol i bihainim mi. Mi givim laip i stap gut oltaim oltaim long ol, na ol bai i no inap lus. Nogat tru. Na bai i no gat man inap rausim ol long han bilong mi.” (Jon 10:27, 28) Ol dispela gutpela tok i mekim gut bel bilong yumi, a? Tru, Jisas i mekim dispela tok inap 2 tausen yia i go pinis, tasol ol i gat bikpela strong yet olsem long bipo. Yu no ken lusim tingting olsem Krais Jisas i stap laip yet na em i save mekim wok; em i King long Kingdom bilong God long heven. Olsem long taim em i bin wokabaut long graun long planti yia i go pinis, long nau tu em i save tingim ol man i gat pasin daun em ol i gat bikpela laik long kisim bel isi. Na tu, em i stap yet olsem Wasman bilong ol sipsip bilong em. Sapos yumi bihainim Jisas, em bai helpim yumi long kisim bel isi na bilip tru olsem bihain bel isi bai stap long olgeta hap—pasin bilong bagarapim narapela man, na pait, na pasin raskol i no ken i stap.
Taim yumi save na bilip tru olsem Jehova bai helpim yumi long rot bilong Jisas, dispela bai givim bel isi tru long yumi. Olsem wanem? Yu tingim Vania, em i mas mekim bikpela wok taim em i yangpela yet, na em i bin ting God i lusim tingting pinis long em? Nau Vania i save olsem God i no bin givim baksait long em. Em i tok: “Mi kisim save olsem God em i wanpela man tru i gat ol gutpela pasin. Pasin sori bilong em i kirapim em long salim Pikinini man bilong em i kam long graun bilong givim laip long yumi. Em i bikpela samting tru long save long dispela samting.”
Marcelo i kamapim klia olsem em i pas gut wantaim God. Dispela man, em bipo em i save raun long ol pati, em i tok: “Planti yangpela i no save bai ol i mekim wanem, na ol i bagarapim ol yet. Sampela ol i kisim ol drak, olsem mi bin mekim. Mi laik bai planti man moa i kisim ol gutpela samting olsem mi bin kisim long rot bilong kisim save long tok i tru bilong God na bilong Pikinini man bilong em.”
Vania na Marcelo ol i stadi gut long Baibel na long dispela rot bilip bilong ol long God i kamap strong, na ol i bilip olsem God i laik helpim ol long karim hevi bilong ol. Sapos yumi mekim samting ol i bin mekim—stadi long Baibel na bihainim tok bilong en—bai yumi kisim bel isi, olsem ol i bin kisim. Long dispela taim tok aposel Pol i mekim bilong strongim ol man bai i stret long yumi: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.”—Filipai 4:6, 7.
Kisim Bel Isi Tru Long Nau
Ol man i hangre long kisim tok i tru, Krais Jisas i stiaim ol long rot i go long laip oltaim long Paradais long graun. Taim em i stiaim ol i go long lotu tru bilong God, ol i kisim wankain bel isi olsem Baibel i tok long en: “Ol manmeri bilong [mi] bai i gat gutpela sindaun na bai ol i stap gut na malolo long ol ples bilong ol. Na bai ol i no pret long wanpela samting.” (Aisaia 32:18) Na dispela i soim olsem bel isi ol bai kisim long bihain i gutpela moa. Baibel i tok: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap. Ol stretpela man bai i kisim graun God i givim ol, na bai ol i stap oltaim long en.”—Song 37:11, 29.
Olsem wanem? Yumi inap i stap bel isi long nau? Yes, yumi inap. Na tu, yumi ken bilip tru olsem klostu nau, God bai givim gutpela bel isi long ol manmeri i bihainim tok bilong em, winim olgeta taim bipo. Olsem na gutpela sapos yu beten askim em long givim bel isi long yu, a? Sapos yu gat sampela hevi na long dispela as yu no stap bel isi, beten olsem King Devit i bin beten: “Yu tekewe olgeta bel hevi bilong mi, na bel bilong mi i ken i stap isi. Yu helpim mi na ol hevi i no ken daunim mi. Tingting long olgeta bel pen na hevi i stap long mi, na tekewe olgeta sin bilong mi.” (Song 25:17, 18) Yu ken bilip tru olsem God i save harim kain beten olsem. Em i save givim bel isi long olgeta man i gat gutpela bel na ol i askim God long givim bel isi long ol. Baibel i mekim gutpela tok long yumi: “Wanem ol manmeri i save bel tru na i singaut long em, em i save stap klostu long ol. Wanem ol manmeri i save pret long em, em i save givim ol samting long ol. Na em i save harim krai bilong ol na kisim bek ol.”—Song 145:18, 19.
[Rait long pes 5]
Man i no gat gutpela tingting na save inap long em i bosim wokabaut bilong em yet taim i no gat man i helpim em
[Rait long pes 6]
Taim yumi save long God na long Krais Jisas, dispela bai helpim yumi long pas gut wantaim God Jehova na dispela samting bai helpim yumi long stap bel isi
[Piksa long pes 7]
Pasin bilong bihainim tok bilong Baibel i kamapim bel isi insait long famili