Yu Ting Yu Inap i Stap Bel Isi Long Dispela Taim Nogut?

YU SAVE stap bel isi? Planti man bai i tok, nogat. Ol i sindaun long ol hap we i gat woa, kros pait bilong politik, wanpela lain i pait long narapela lain, o pasin teroris. Tasol maski ol dispela hevi i no painim yu, ating yu no stap bel isi, long wanem, i gat pasin raskol, pasin birua, na kros wantaim ol lain yu wok bisnis wantaim ol o ol neiba. Insait long ol famili tu, planti taim i gat pait na famili i no stap bel isi.

Planti man i gat laik tru long i stap bel isi. Ol i laik painim bel isi insait long lotu, long sampela kain kos bilong helpim tingting, o sampela eksasais olsem yoga. Sampela i laik painim bel isi long rot bilong kisim holide, wokabaut long ol maunten na bikbus, o go long ol ples we ol hatwara i save kamap. Maski ol dispela man i kisim bel isi, ating i no longtaim na ol i luksave olsem dispela kain bel isi i no helpim ol tru na i stap sotpela taim tasol.

Olsem na yu inap painim we bel isi tru? As bilong bel isi em Man Bilong Wokim yumi, God Jehova. Bilong wanem? Long wanem, em i ‘God bilong givim bel isi.’ (Rom 15:33) Aninit long wok bos bilong Kingdom bilong em klostu nau bai i kamap, bai i gat “planti gutpela samting,” olsem bel isi. (Song 72:7; Matyu 6:​9, 10) Dispela i winim ol kontrak bilong bel isi ol man i save kamapim. Planti taim ol dispela kain kontrak i pasim kros na pait inap sotpela taim tasol. Tasol bel isi God i save givim bai pinisim olgeta as bilong ol woa na pait. Bai i no gat man i lain moa long pait. (Song 46:​8, 9) Olgeta man bai i stap bel isi tru!

Tru, yumi wetim dispela gutpela samting bai kamap bihain, tasol ating yu laik tru long i stap bel isi long nau tu. Yu ting i gat rot long painim bel isi bilong helpim yumi long dispela taim nogut long nau? Baibel i soim yumi long dispela rot. Tingim sampela stiatok long sapta 4 bilong pas em aposel Pol i raitim long ol Filipai. Mipela i laik singautim yu long ritim ves 4 i go long ves 13 long Baibel bilong yu yet.

“Bel Isi God i Save Givim Yumi”

Ves 7 i tok: “Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” Dispela bel isi i no kam long rot bilong tingim tingim ol samting long bel, o long ol samting ol man yet i mekim bilong stretim pasin bilong ol, nogat. Dispela bel isi i kam long God. Dispela pasin bilong i stap bel isi i strong tru na yumi “no inap tru long save long as bilong en.” Em i winim tu ol wari, save, na tingting bilong yumi. Ating yumi ting i no gat rot bilong winim ol hevi bilong yumi, tasol bel isi God i save givim inap strongim bilip bilong yumi olsem bihain bai olgeta hevi i pinis.

Yu ting dispela i no inap kamap? Yes, man i no inap kamapim, tasol “God em inap mekim olgeta samting.” (Mak 10:27) Pasin bilong bilip na trastim God inap lukautim tingting na yumi no wari tumas. Tingim wanpela yangpela pikinini i lus long wanpela bikpela stua. Em i save olsem em i mas painim Mama na olgeta samting bai i orait gen. Olsem dispela pikinini taim Mama i painim em, yumi ken bilip olsem God bai kisim yumi long han bilong em. Em bai mekim isi bel bilong yumi, na helpim yumi long rausim olgeta wari.

Planti manmeri i lotuim Jehova ol i bin kisim bel isi God i save givim long taim ol i gat bikpela hevi tru. Olsem: Tingim Nadine, em pikinini bilong em i lus long bel. Em i tok: “Mi hatwok long toktok long ol samting mi pilim long bel, na long olgeta taim mi traim long soim olsem mi no wari long dispela samting. Tasol bel bilong mi i bagarap tru. Klostu olgeta de, mi kamapim tru bel bilong mi long Jehova na mi askim em long helpim mi. Mi pilim tru strong bilong beten, long wanem, taim mi bel hevi tru na mi ting, ‘Mi no inap moa long karim dispela hevi,’ long dispela taim stret mi save kisim bel isi. Mi pilim olsem i no gat wanpela samting inap bagarapim mi.”

Lukautim Bel na Tingting

Orait, yumi ken tingim gen tok bilong Filipai 4:7. Dispela ves i tok, bel isi God i save givim bai lukautim bel na tingting bilong yumi. Olsem wasman i save lukautim banis, bel isi God i save givim i save lukautim bel bilong yumi, na bai pasin bilong tingting long kisim planti mani, tingting planti tumas, na ol samting God i no laikim, ol i no pulim yumi nabaut. Tingim wanpela eksampel:

Planti man long dispela taim nogut ol i ting bilong i stap amamas na bel isi, ol i mas i gat planti mani kago. Ol i bihainim tok bilong sampela man na baim ol sea long ol bisnis. Orait, yu ting nau ol i stap bel isi? Nogat, a? Ating long olgeta de bai ol i skelim ol sea na tingting planti, ol bai salim, baim, o holim ol sea. Taim stok maket i lusim sampela mani, ol i pret. Baibel i no tambuim pasin bilong putim mani long sampela bisnis, tasol Baibel i tok: “Sapos bel bilong man i skrap long kisim planti mani, orait oltaim bai em i ting em i sot long mani. Sapos man i tingting long kamap maniman, orait olgeta samting em i kisim i no inapim em. Olsem na dispela pasin bilong laikim tumas mani samting, em i no gat as bilong en. Ol wokman i save slip gut long nait, maski ol i gat planti kaikai o kaikai bilong ol i sot. Tasol maniman i no olsem. Em i save wari long ol planti samting bilong en, olsem na em i no inap slip gut.”​—Saveman 5:​10, 12.

Filipai 4:7 i pinisim tok olsem, bel isi God i save givim bai lukautim bel na tingting bilong yumi na bai yumi “pas gut wantaim Krais Jisas.” Olsem wanem Krais Jisas na bel isi God i save givim i poroman wantaim? Jisas i gat bikpela wok tru long truim ol samting God i tingting pinis long mekim. Jisas i givim laip bilong em bilong kisim bek yumi long sin na indai. (Jon 3:16) Em i stap tu olsem King bilong Kingdom Bilong God. Taim yumi save long wok bilong Jisas, dispela inap helpim tru yumi na bai tingting na bel i ken i stap isi. Long wanem rot?

Sapos yumi tanim bel tru long ol rong na askim God long lusim ol rong bilong yumi long rot bilong ofa bilong Jisas, God bai lusim ol rong, na dispela bai helpim yumi na tingting na bel bai i stap isi. (Aposel 3:19) Taim yumi luksave olsem yumi no inap i stap amamas tru inap long taim Kingdom Bilong Krais i kamap, bai yumi abrusim pasin bilong mekim ol samting olsem yumi stap bilong nau tasol. (1 Timoti 6:19) Tru, yumi no inap abrusim ol hevi, tasol bilip bilong yumi olsem gutpela laip tru bai kamap bihain, dispela inap strongim tru bel bilong yumi.

Rot Bilong Painim Bel Isi Em God i Save Givim

Olsem wanem yu inap painim bel isi God i save givim? Filipai 4:​4, 5, i givim sampela gutpela tok long yumi, olsem: “Oltaim yupela i mas amamas long Bikpela. Mi tok gen, yupela i mas amamas. Yupela i mas isi isi long olgeta man na larim ol i lukim dispela gutpela pasin bilong yupela. Tingim. Klostu nau Bikpela bai i kam.” Taim Pol i raitim dispela tok, em i stap kalabus nating long Rom. (Filipai 1:13) Em i no toktok planti long dispela pasin i no stret ol i mekim long em, nogat, em i strongim ol wanbilip bilong em long oltaim ol i mas amamas long Bikpela. Amamas bilong em i kam long pasin bilong em long pas gut wantaim God, na i no long ol samting i painim em. Yumi tu i mas lain long amamas long mekim wok bilong God, maski wanem samting i painim yumi. Sapos yumi save gut long Jehova na yumi bihainim tru laik bilong em, dispela bai helpim yumi long amamas moa yet long mekim wok bilong em. Na dispela bai mekim gut bel bilong yumi na yumi ken i stap bel isi.

Na tu, Pol i strongim yumi long isi long ol man. Sapos yumi kisim dispela pasin, bai yumi no putim bikpela mak tumas long yumi yet i mas winim. Yumi save olsem yumi no gutpela olgeta; yumi no inap stap nambawan long olgeta samting. Olsem na maski long tingting planti long olsem wanem yumi ken i stap gutpela olgeta, o winim ol narapela. Na tu, bai yumi no strong long ol narapela i mas i stap gutpela olgeta. Olsem na yumi inap i stap isi taim ol i mekim sampela samting em yumi bel hevi long en. Narapela tok Grik ol i tanim olsem “isi long ol man,” em “holim stretpela tingting.” Sapos yumi holim stretpela tingting long ol samting yumi yet i laikim, yumi inap abrusim ol kros, em planti taim ol i no helpim yumi liklik, tasol ol inap pinisim pasin bilong i stap bel isi wantaim ol narapela, na pinisim tu bel isi bilong yumi yet.

Narapela tok bilong Filipai 4:5 i tok: “Klostu nau Bikpela bai i kam.” I olsem dispela tok i no poroman gut wantaim ol narapela tok Pol i mekim. Tru, klostu nau God bai rausim dispela olpela pasin na kamapim nupela pasin aninit long Kingdom bilong em. Tasol nau tu em inap i stap klostu long olgeta man i go klostu long em. (Aposel 17:27; Jems 4:8) Taim yumi save olsem em i stap klostu long yumi, dispela i helpim yumi long i stap amamas, isi long ol man, na yumi no tingting planti long ol hevi bilong nau o long ol samting bai kamap bihain, olsem ves 6 i tok.

Taim yumi ritim ves 6 na 7, yumi luksave olsem bel isi God i save givim i kam long rot bilong beten. Sampela i ting beten i olsem pasin bilong tingim tingim ol samting long bel; ol i ting olsem olgeta kain rot bilong beten bai helpim ol long i stap bel isi. Tasol Baibel i tok long pasin bilong toktok wantaim Jehova; i olsem wanpela pikinini i kamapim ol amamas na ol wari bilong em long gutpela papa o mama bilong em. Yumi amamas long save olsem yumi inap kam long God wantaim “olgeta hevi” bilong yumi. Maski yumi tingting planti long wanem samting o wanem samting i stap long bel bilong yumi, yumi inap toktok long ol dispela samting long Papa bilong yumi long heven.

Ves 8 i kirapim yumi long tingting long ol gutpela samting tasol. Tasol dispela i no inap. Olsem ves 9 i tok, yumi mas bihainim tu ol gutpela tok bilong Baibel. Taim yumi mekim olsem, bel bilong yumi bai i no gat tok. Dispela savetok i tru, olsem: Sapos bel i no gat tok yu inap slip gut!

Tru tumas, yu inap i stap bel isi. Dispela pasin i kam long God Jehova, na em i save givim long ol man i go klostu long em na i laik bihainim ol tok bilong stiaim ol. Taim yu skelim Tok bilong em, em Baibel, yu inap kisim save long tingting bilong em. Pasin bilong bihainim tok bilong em i no isi. Tasol ol gutpela samting bai kamap sapos yu wok strong long mekim olsem, long wanem, “God, em i as bilong pasin bilong bel isi, em bai i stap wantaim [yu].”​—Filipai 4:9.

[Rait long pes 10]

‘God bai i mekim yumi i stap bel isi, na tingting bilong yumi bai i stap gut tru.’​​—FILIPAI 4:7

[Rait long pes 12]

Yumi amamas long save olsem yumi inap kam long God wantaim “olgeta hevi” bilong yumi