Daun Long Ol Man i Gat Namba Long Bosim Yumi—Bilong Wanem Ol Man i No Laik Mekim?
“Ol man i bikhet long ol samting i stap bilong bosim ol, olsem lotu na ol samting bilong ples, na pasin yumi bihainim long sindaun bilong yumi na wok gavman. Dispela samting i kamap long olgeta hap bilong graun na ating bihain ol man bai tok dispela pasin ol man i bihainim long nau em i nam- bawan bikpela samting i kamap insait long dispela 10-pela yia i go pinis.”
PLANTI yia i go pinis, Hannah Arendt, em wanpela savemeri bilong raitim ol stori bilong ol samting i bin kamap bipo, i stori long pasin i bin kamap namel long 1960 i go inap long 1969, na em i bin mekim dispela tok i stap antap. Long nau pasin bilong bikhet long ol man i gat wok long bosim man i wok long kamap strong moa yet na i winim ol taim bipo.
Nius The Times bilong Landon i tok: “Sampela papamama i no inap larim ol tisa i bosim ol pikinini bilong ol, na taim ol tisa i laik stretim pikinini bilong ol ol i toktok planti long dispela.” Taim ol tisa i stretim ol pikinini bilong ol, planti taim ol papamama bai kam kamap long skul bilong mekim tok bilong pretim ol tisa na sampela taim ol i laik paitim ol tisa.
Wanpela mausman bilong Nesenel Asosiesen Bilong Ol Het-Tisa long Briten i tok: “Ol manmeri ol i tok, ‘Mipela i gat ol samting i stret long mipela i mekim,’ tasol ol i mas tok ‘Mipela i gat ol samting mipela mas mekim.’ ” Sampela papamama i no lainim ol pikinini long daun long ol man i gat namba long bosim ol, na ol i no stretim ol o larim ol narapela tu i stretim ol. Ol pikinini i tok em i samting bilong ol yet long makim ol samting ol i laik mekim, na ol papamama i larim ol na ol pikinini i sakim wok bos bilong ol papamama na ol tisa. Wanpela niusmeri, em Margarette Driscoll, i tok dispela samting i mekim na “wanpela nupela lain i kamap na ol i no save daun long ol man i gat namba bilong bosim ol na ol i no save long wanem pasin i stret na wanem pasin i no stret.”
Nius Time i kamapim tingting bilong planti yangpela bilong Rasia em ol i bel hevi long i stap bilong ol, na nius i kolim tok bilong wanpela man bilong mekim musik rap na em i tok: “Ol samting bilong nau i no save stap longpela taim na ol man i no save mekim wankain pasin long olgeta man, na olsem wanem ol lain i kamap long nau ol inap bilip long ol man bilong graun?” Mikhail Topalov, wanpela saveman i save skelim sindaun bilong ol man, i wanbel wantaim dispela tok na em i tok: “Ol dispela yangpela ol i no longlong. Ol i lukim pinis gavman i giamanim papamama bilong ol, na ol i lukim mani papamama i putim long beng i lus na wok mani i lus. Olsem na yu ting ol bai daun long gavman?”
Tasol yumi kisim tingting kranki sapos yumi ting em ol yangpela tasol i no save bilip long ol man i gat namba long bosim ol man. Long nau, ol manmeri, maski ol i gat hamas krismas, ol i no bilip long ol man i gat namba long bosim ol samting na ol i pilim olsem ol i samting nogut. Orait olsem wanem? Dispela i makim olsem i no gat wanpela wok bos yumi inap bilip long en? Dispela tok wok bos i makim “strong bilong bosim man, o i stret em i bosim, o skelim, o tambuim sampela samting ol man i mekim,” na sapos ol i mekim wok bos long stretpela pasin, dispela inap kamapim ol gutpela samting. Em inap helpim ol wan wan man na olgeta man bilong wanpela ples. Long stori i kamap bihain long dispela, bai yumi toktok long dispela samting.