Bilong Wanem Ol i No Gat Pikinini?

DELE na Fola,a tupela marit, ol i sindaun long brens ofis bilong Sosaiti Was Taua long Naijiria na mekim wok. Ol i stap sotpela taim na mama bilong Fola i kam lukim ol. Em i kam longwe bilong toktok wantaim tupela long wanpela samting em i pilim i bikpela samting, na dispela samting i mekim na inap planti nait em i no slip.

Em i tok: “Yupela i save mekim gutpela pasin long mi. Yupela save salim ol presen long mi na kam lukim mi. Dispela i makim olsem yupela i laikim mi, na mi amamas long dispela samting. Tasol dispela i mekim na mi tingting planti, long wanem, mi save ting husat bai mekim wankain pasin long yupela taim yupela i lapun olsem mi? Yupela i marit tupela yia pinis na yupela i no gat pikinini. Olsem wanem? Yupela i ting em i taim bilong lusim Betel na kirap kamapim ol pikinini?”

Tingting bilong mama i olsem: Wok Dele na Fola i mekim pinis long Betel em inap. Nau em i taim bilong ol long tingim i stap bilong ol long bihain. Ol narapela inap mekim wok tupela i save mekim. I no olsem Dele na Fola i no ken mekim wok bilong Kingdom long olgeta de, nogat, tasol ol inap mekim narapela wok bilong Kingdom ol inap mekim na kisim amamas long kamapim ol pikinini tu wantaim.

Wari Bilong Mama

Yumi inap save long wari bilong mama. Laik bilong kamapim ol pikinini em i wanpela laik i stap long bel na tingting bilong olgeta lain, maski ol i stap long wanem taim. Pasin bilong kamapim ol pikinini i save kirapim ol manmeri long pilim bikpela amamas na pilim olsem gutpela samting bai kamap long bihain. Baibel i tok, “God i mekim gut long yumi na givim yumi ol pikinini olsem presen.” Em nau, pasin bilong kamapim ol pikinini em i gutpela presen yumi kisim long Man bilong wokim yumi, em i laikim yumi tru.​—⁠Song 127:⁠3.

Long planti hap ol manmeri i save strong long subim ol marit long kamapim ol pikinini. Olsem long Naijiria, olgeta wan wan meri i save karim planti pikinini, olsem sikspela samting, na long de ol i marit ol pren bai tokim nupela marit olsem: “Nainpela mun bihain bai mipela i laik harim krai bilong bebi long haus bilong yupela.” Ating wanpela presen ol man bai givim long ol nupela marit em i wanpela liklik bet bilong bebi. Ol tambu mama bai skelim gut kalenda. Sapos nupela meri marit i no kisim bel insait long wanpela yia samting, tambu bai wok long painimaut, i gat wanpela hevi em inap helpim ol long stretim bambai nupela meri marit i ken kisim bel o nogat.

Long tingting bilong planti mama, as bilong man na meri i marit em bilong kamapim ol pikinini na bai lain bilong famili i no ken pinis. Mama bilong Fola i tokim em olsem: “Sapos yu no laik kamapim ol pikinini, bilong wanem yu bin marit? I gat meri i bin karim yu; olsem na yu mas karim pikinini bilong yu yet.”

I gat ol narapela samting tu bilong tingim. Long planti kantri long Afrika ol gavman i no save lukautim ol lapun tumas. Long pasin bilong ples em i wok bilong ol pikinini long lukautim ol lapun papamama bilong ol, wankain olsem ol papamama i bin lukautim ol pikinini taim ol i yangpela. Olsem na mama bilong Fola i ting sapos ol pikinini bilong em i no kamapim sampela pikinini bilong ol yet, bihain bai ol i stap wanpis na rabis, na i no gat man i laik lukautim ol, na i no gat man bilong planim ol taim ol i dai.

Long olgeta hap bilong Afrika em i samting nogut tru sapos yu no gat ol pikinini. Long sampela hap, paslain long ol meri i marit, ol i mas kamapim long ples klia olsem ol inap karim pikinini. Ol meri i no inap kisim bel, planti bilong ol bai strong long traim kain kain marasin samting bilong helpim ol bambai ol inap kisim bel.

Ol manmeri i gat dispela kain tingting ol i save ting sapos long laik bilong ol yet ol marit i no kamapim pikinini, ol i pasim ol yet long kisim wanpela gutpela samting tru. Planti man bai ting ol i narapela kain, na ol i tingting long nau tasol, na ol i sori long ol.

Amamas na Wok Yu Mas Mekim

Lain bilong Jehova i luksave olsem i gat bikpela amamas long kamapim ol pikinini, tasol tu i gat bikpela wok yu mas mekim. Long 1 Timoti 5:​8, Baibel i tok: “Sapos wanpela man i no lukautim ol wanblut tru bilong em yet . . . orait dispela man i lusim pinis bilip bilong em, na em i man nogut tru.”

Ol papamama i mas lukautim ol pikinini bilong ol long ol samting bilong skin na spirit wantaim, na ol mas lusim bikpela taim na strong bilong mekim olsem. Ol i no kisim tingting olsem God i bin givim ol pikinini long ol, olsem na em i wok bilong em long lukautim ol, nogat. Ol i save, wok bilong mekim bikpela long ol pikinini olsem ol lo bilong Baibel i makim, em i wok God i givim long ol papamama na ol i no inap givim dispela wok long ol narapela.​—⁠Lo 6:​6, 7.

Wok bilong mekim bikpela long ol pikinini em i hatwok tru nau long “taim bilong las de” i gat “planti hevi nogut tru” i save kamap. (2 Timoti 3:​1-5) Long nau i hatwok moa long mekim bikpela long ol pikinini, long wanem, pe bilong ol samting i go antap, na mani i sot, na tu pasin bilong givim baksait long God i go bikpela. Tasol long olgeta hap bilong graun i gat planti Kristen marit ol i wok long kamapim ol pikinini i stap aninit long God na ol i “skulim ol long ol tok bilong Bikpela.” (Efesus 6:⁠4) Jehova i save laikim na mekim gut long ol dispela papamama long hatwok ol i mekim.

As na Sampela i No Kamapim Pikinini

Planti marit Kristen ol i no gat pikinini. Sampela i no inap kamapim ol pikinini, tasol ol i no adoptim wanpela pikinini. Sampela ol inap long kamapim ol pikinini tasol ol i no mekim. As na ol i no kamapim ol pikinini, i no olsem ol i les o pret long mekim bikpela wok bilong lukautim ol pikinini, nogat. Ol i laik givim olgeta tingting na strong bilong ol long mekim ol narapela narapela wok bilong autim tok long olgeta de em ol i no inap mekim sapos ol i gat ol pikinini. Sampela i mekim wok misineri. Sampela i mekim wok bilong Jehova olsem wasman bilong raun o long Betel.

Wankain olsem ol narapela Kristen, ol i save i gat wanpela bikpela wok yumi mas hariap long mekim. Jisas i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” Ol i mekim dispela wok long nau. Em i wanpela bikpela wok, long wanem, taim dispela “las de” i kamap, bagarap bai painim ol man i givim baksait long gutnius.​—⁠Matyu 24:14; 2 Tesalonaika 1:​7, 8.

Taim bilong yumi i wankain olsem long taim Noa wantaim famili bilong em ol i bin wokim wanpela traipela bot bambai ol inap winim bikpela Tait Wara. (Stat 6:​13-16; Matyu 24:37) Maski tripela pikinini man bilong Noa i marit pinis, ol i no kamapim ol pikinini inap long bikpela Tait Wara i pinis. Ating wanpela as bilong dispela em i olsem, ol i laik givim olgeta tingting na strong bilong ol long mekim dispela wok. O ating ol i no laik kamapim ol pikinini long dispela taim nogut, long wanem, “pasin bilong ol man long olgeta hap i nogut tru. [Na] ol manmeri i tingting tasol long ol samting nogut.”​—⁠Stat 6:⁠5.

Dispela i no makim olsem em i no stret long kamapim ol pikinini long nau, tasol planti marit Kristen ol i no kamapim ol pikinini bambai ol inap insait moa yet long mekim dispela bikpela wok Jehova i givim long ol manmeri bilong em. Sampela marit i bin wet inap sampela yia pastaim na bihain ol i kamapim pikinini; sampela narapela ol i no kamapim ol pikinini na ol i tingting long kamapim ol long nupela taim Jehova bai kamapim. Olsem wanem? Ol i no tingting long bihain? Ol i lus long kisim ol gutpela samting? Ol manmeri i mas sori long ol?

Sindaun i Gat Bel Isi na Amamas

Dele na Fola, em yumi bin stori long ol pastaim, ol i marit inap 10-pela yia pinis, na ol i no gat tingting long kamapim ol pikinini. Dele i tok: “Ol wanblut i wok yet long subim mipela long kamapim ol pikinini. Ol i tingting planti long i stap bilong mipela long bihain. Mipela save tok tenkyu long pasin bilong ol long tingim mipela, tasol mipela save stori gut long ol olsem mipela i save amamas tru long wok mipela i mekim. Na mipela i save stori long i stap bilong mipela long bihain olsem mipela i bilip long Jehova, em i save lukautim ol manmeri i stap gut long em. Na tu, maski ol marit i gat pikinini, ol i no save tru tru olsem ol pikinini bai lukautim ol taim ol i lapun o nogat. Sampela ol i no lukautim ol papamama bilong ol liklik, na sampela ol i no inap helpim papamama, na sampela i dai paslain long papamama. Tasol yumi save tru olsem Jehova bai lukautim yumi long bihain.”

Dele na ol narapela i wankain olsem em ol i bilip tru long tok promis Jehova i mekim long ol wokboi bilong em ol i stap gut long em: “Bai mi no lusim yu. Bai mi no larim yu i stap nating. Nogat tru.” (Hibru 13:⁠5) Na ol i no ting olsem “Bikpela i no gat strong bilong kisim bek [ol]. Na . . . em i yaupas na i no inap harim ol prea bilong [ol]. Nogat.”​—⁠Aisaia 59:⁠1.

Narapela as na yumi ken bilip long Jehova, em yumi ken lukim ol samting em i mekim bilong lukautim ol wokboi bilong em ol i stap gut long em. King Devit i bin tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i singaut long ol arapela man bilong ol i ken helpim ol. Nogat tru.” Tingim gut dispela samting. Yu save long wanpela wokboi bilong Jehova i stap gut long em na “God i givim baksait” long em?​—⁠Song 37:⁠25.

Ol brata sista i bin mekim wok bilong Jehova long laip olgeta bilong ol na helpim ol wanbilip Kristen, ol i no bel hevi long wok ol i bin mekim, nogat; ol i amamas. Brata Iro Umah i bin mekim wok autim tok long olgeta de inap 45 yia na nau em i wanpela wasman bilong raun long Naijiria. Em i tok: “Maski mi wantaim meri bilong mi i no gat pikinini, mipela tingim olsem Jehova i bin lukautim mipela long ol samting bilong spirit na skin wantaim. Mipela i no sot long wanpela samting. Em i no inap lusim mipela taim mipela i wok long go lapun. Amamas mipela kisim long ol dispela yia mipela mekim wok autim tok long olgeta de, em i winim olgeta narapela yia long laip bilong mipela. Mipela i amamas long mipela inap helpim ol brata bilong mipela, na ol brata i amamas long wok mipela mekim, na ol i save helpim mipela.”

Planti marit i no bin kamapim ol pikinini bilong skin, tasol ol i bin kamapim ol narapela kain pikinini, em ol disaipel Kristen i lotuim Jehova. Aposel Jon i gat klostu 100 krismas taim em i tok: “Taim mi harim tok long ol pikinini bilong mi i bihainim tok tru, orait mi save amamas tru, na dispela amamas i winim ol arapela kain amamas bilong mi.” (3 Jon 4) Ol dispela “pikinini” bilong Jon​—⁠em ol manmeri em i bin lainim ol long tok i tru​—⁠em i bin kisim bikpela amamas tru long ol i bin i stap gut long Jehova.

Wankain amamas i stap long nau. Wanpela meri Naijiria, nem bilong em Bernice, em i marit inap 19 yia na long laik bilong em yet em i no gat pikinini. Inap 14 yia em i mekim wok painia. Krismas bilong em i wok long go antap na klostu em bai lusim taim bilong karim pikinini, tasol em i no bel hevi long em i bin givim laip bilong em long kamapim ol disaipel. Em i tok: “Mi amamas long lukim ol pikinini bilong mi long spirit i wok long kamap bikpela. Sapos mi gat ol pikinini bilong mi yet, mi no ting bai ol i pas gut wantaim mi olsem ol manmeri mi bin helpim ol long lainim tok i tru. Ol i mekim pasin long mi olsem mi mama tru bilong ol, na ol i toktok wantaim mi long ol amamas na ol hevi i save painim ol, na ol i save askim mi long givim tingting long ol. Ol i salim ol pas long mi, na mi save go lukim ol na ol i save kam lukim mi.

“Sampela i ting em i samting nogut sapos yu no gat ol pikinini yu yet i bin karim. Ol i tok, taim yu lapun bai yu painim taim nogut. Tasol mi no ting olsem. Mi save sapos mi givim bel olgeta long mekim wok bilong Jehova em bai mekim gut long mi na lukautim mi. Em i no inap rausim mi taim mi lapun.”

God i Laikim Tru Ol

Ol papamama i bin kamapim na mekim bikpela long ol pikinini i “bihainim tok tru,” ol i gat planti samting bilong tok tenkyu long en. Olsem na Baibel i tok: “Sapos man i gat gutpela tingting na i bihainim stretpela pasin, orait papa bilong en i save amamas tru. Yu mas bihainim ol dispela gutpela pasin, na bai papamama bilong yu i belgut tru na i amamas.”​—⁠Sindaun 23:​24, 25.

Ol Kristen em ol i no bin kisim dispela amamas bilong kamapim ol pikinini, God i givim ol narapela blesing long ol. Planti marit em ol i no gat pikinini, ol i mekim bikpela wok tru long helpim wok bilong Kingdom i go bikpela. Inap planti yia ol samting i wok long painim ol i givim save na tingting long ol na ol i kisim gutpela tingting na save bilong mekim kain kain wok, na olgeta dispela samting i helpim ol long mekim gutpela wok bilong Kingdom. Planti bilong ol, ol i go pas long mekim wok bilong Kingdom.

Tru, ol i tingim wok bilong Kingdom na ol i no kamapim ol pikinini, tasol Jehova i mekim gut long ol na givim ol wanpela famili bilong spirit i save laikim ol na i pilim tru ol samting ol i bin lusim bilong mekim wok bilong Jehova. I olsem Jisas i bin tok: “Olgeta man i bin ting long mi na long gutnius na i lusim haus o brata o susa o mama o papa o pikinini o gaden, bai ol i kisim 100 moa. Taim ol i stap yet long dispela graun God bai i givim ol planti samting tru, i winim ol samting ol i bin i gat bipo. Ol bai i kisim planti haus na planti brata na planti susa na planti mama na planti pikinini na planti gaden. . . . Na long taim i laik kamap bihain ol bai i kisim laip i stap gut oltaim oltaim.”​—⁠Mak 10:​29, 30.

Long ai bilong Jehova ol dispela manmeri i stap gut long em ol i gutpela samting tru! Aposel Pol i mekim tok bilong strongim olgeta manmeri i stap gut long God, em ol i gat pikinini o ol i no gat pikinini, olsem: “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em. Na yupela i save mekim olsem yet.”​—⁠Hibru 6:⁠10.

[Futnot]

[Ol Piksa long pes 23]

Jehova i mekim gut long ol marit i no gat pikinini na em i givim ol wanpela famili bilong spirit i save laikim tru ol