Marit na Wok Papamama Long Taim Bilong Las De

“Taim i sotpela nau.”​​—1 KO. 7:​29.

1. (a) Wanem ol senis long nau i mekim na i gat “planti hevi nogut tru”? (b) Bilong wanem yumi mas tingim ol senis i kamap long sindaun bilong ol famili?

BAIBEL i tok profet olsem long taim bilong “las de” bai i gat ol woa, guria, bikpela hangre, na ol bikpela sik. (Dan. 8:​17, 19; Lu. 21:​10, 11) Na tu, Baibel i tokaut olsem long dispela bikpela haptaim bilong nau bai i gat ol bikpela senis long sindaun bilong ol man. Ol bikpela hevi insait long ol famili i wanpela samting bilong dispela “taim bilong las de” we “planti hevi nogut tru bai i kamap.” (2 Ti. 3:​1-4) Bilong wanem yumi mas tingim ol dispela senis? Long wanem, ol i stap long olgeta hap na i bikpela tru, olsem na ol inap stiaim tingting bilong ol Kristen long nau long ol samting bilong marit na long wok papamama. Olsem wanem ol dispela senis inap stiaim tingting bilong ol Kristen?

2. Planti man i gat wanem tingting long marit na pasin bilong katim marit?

² Long nau, i no hatwok long katim marit na pasin bilong katim marit i wok long kamap long olgeta hap. Long planti kantri namba bilong ol manmeri i katim marit i wok long go antap. Tasol yumi mas tingim olsem tingting bilong God Jehova long marit na pasin bilong katim marit i narapela kain olgeta long tingting bilong planti man long nau. Orait, Jehova i gat wanem tingting long dispela samting?

3. Jehova na Jisas Krais i gat wanem tingting long marit?

³ God Jehova i laik bai ol manmeri i marit ol i mas bihainim tok promis ol i bin mekim taim ol i marit. Taim Jehova i maritim namba wan man na meri, em i tok “man i [mas] . . . pas wantaim meri bilong en, na tupela i kamap wanpela bodi tasol.” Bihain, Jisas Krais i kamapim gen dispela tok, na em i tok moa: “Olsem na samting God i pasim pinis, em man i no ken katim.” Na tu, Jisas i tok: “Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.” (Stt. 2:24; Mt. 19:​3-6, 9) Olsem na Jehova na Jisas i laik bai man na meri marit i mas i stap wantaim inap long olgeta yia ol i stap laip na marit i pinis taim wanpela poroman i dai. (1 Ko. 7:39) Marit i samting holi, olsem na ol man i no ken ting pasin bilong katim marit i liklik samting. Tru tumas, Baibel i tok Jehova i nolaik tru long pasin bilong katim marit taim dispela pasin i no stret wantaim ol lo bilong Baibel.a​​—Ritim Malakai 2:​13-​16; 3:6.

Tingim Gut Marit

4. Bilong wanem sampela yangpela Kristen i bel hevi long ol i marit taim ol i yangpela tru?

⁴ Ol manmeri bilong dispela graun i givim baksait long God ol i tingting tasol long ol samting bilong maritpasin. Long olgeta de, long rot bilong TV na nius samting ol i save soim planti piksa bilong pasin sem. Yumi no ken ting ol dispela piksa i no inap mekim sampela samting long yumi, na moa yet long ol gutpela yangpela bilong yumi insait long kongrigesen. Ol yangpela Kristen i mas mekim wanem long ol dispela samting nogut, em dispela inap kirapim laik bilong ol long mekim maritpasin, maski ol i wok strong long sakim dispela laik? Bilong winim dispela hevi, sampela i marit taim ol i yangpela tru. Long dispela rot ol i ting ol inap abrusim pasin pamuk. Tasol i no longtaim bihain na sampela i bel hevi long ol i bin marit taim ol i yangpela tru. Bilong wanem? Taim amamas bilong marit nupela i pinis, ol i luksave olsem ol yet na poroman bilong ol i no gat wankain laik long planti samting long i stap bilong ol long ol wan wan de. Yumi ken save, ol marit olsem ol i gat bikpela hevi.

5. Wanem samting bai helpim ol marit long stap gut long tok promis ol i bin mekim taim ol i marit? (Lukim tu futnot.)

⁵ Sapos yumi marit long wanpela​—maski em i wanpela wanbilip Kristen​—na em i no gat pasin olsem yumi bin ting em bai i gat, em bai i hatwok tru. (1 Ko. 7:28) Tasol maski i gat ol hevi insait long marit, ol Kristen tru i save olsem i no stret long katim nating marit bilong pinisim ol hevi taim ol i no amamas insait long marit bilong ol. Olsem na ol marit em ol i wok strong bilong lukautim marit bilong ol, long wanem, ol i tingim tok promis ol i bin mekim taim ol i marit, kongrigesen Kristen i mas rispek long ol na helpim ol.b

6. Ol yangpela Kristen i mas ting olsem wanem long marit?

⁶ Olsem wanem? Yu yangpela na yu no marit yet? Sapos olsem, yu mas i gat wanem tingting long marit? Yu inap abrusim planti hevi sapos yu wet inap long taim yu bikpela pinis long ol samting bilong skin, tingting, na spirit na bai yu ken redi long marit, na bihain yu prenim wanpela Kristen brata o sista. Tru, Baibel i no tokaut long yu mas i gat hamas krismas na yu ken marit.c Tasol Baibel i kamapim olsem i gutpela yu wet inap long taim we strongpela laik bilong mekim maritpasin i pinis. (1 Ko. 7:36) Bilong wanem? Long wanem, strongpela laik long mekim maritpasin inap paulim pasin bilong tingting stret, na em inap mekim na yu no bihainim savepasin taim yu makim ol samting yu bai mekim na bihain bai yu gat hevi. Tingim, ol gutpela tok bilong Jehova i stap long Baibel long marit em bilong helpim yu na mekim yu i amamas.​​—Ritim Aisaia 48:​17, 18.

Mekim Gut Wok Papamama

7. Wanem samting i painim sampela yangpela marit? Bilong wanem dispela inap givim hevi long marit bilong ol?

⁷ Sampela marit em ol i bin marit taim ol i yangpela, ol i kamapim pikinini taim ol i yangpela tru. Narapela i no save gut yet long narapela paslain long taim bebi i kamap, na ol i mas lukautim bebi inap 24 aua long olgeta de. Yumi save olsem ol mama i save tingim ol bebi pastaim, olsem na ating ol yangpela man marit bai jeles. Na tu, planti taim ol i no inap slip gut long nait na dispela inap kamapim hevi namel long tupela. Orait nau tupela yangpela marit i pilim olsem ol i no stap fri moa, na ol i no ken go raun na mekim ol samting olsem bipo ol i mekim. Ol i mas ting olsem wanem long ol senis i kamap long sindaun bilong ol?

8. Yumi mas i gat wanem tingting long wok papamama? Bilong wanem yumi mas ting olsem?

⁸ Yumi mas tingim marit olsem bikpela samting, na tu, yumi mas tingim wok papamama i wanpela gutpela wok God i givim long yumi. Maski wanem senis nupela bebi bai kamapim long laip bilong tupela marit Kristen, ol i mas wok strong tru long mekim gut dispela wok. Jehova i givim rot long ol manmeri long kamapim pikinini, olsem na ol papamama i mas tingim nupela bebi olsem wanpela “presen” i kam long Jehova. (Sng. 127:3) Mama na papa Kristen bai wok strong long mekim wok bilong ol olsem ‘papamama i pas wantaim Bikpela.’​​—Ef. 6:1.

9. (a) Wanem samting i insait long wok papamama? (b) Man marit i ken mekim wanem bilong helpim meri bilong em long i stap strong long ol samting bilong spirit?

⁹ Bilong mekim bikpela long pikinini, papamama i mas daunim sampela laik bilong ol yet inap planti yia. Papamama i mas lusim bikpela hap taim na strong bilong mekim olsem. Maritman Kristen i mas save olsem inap sampela yia bihain long bebi i kamap, meri bilong em bai i no inap putim gut yau long ol tok bilong miting na em i no inap stadi planti taim na tingim gut ol tok long bel. Dispela inap mekim na em i no strong tumas long ol samting bilong spirit. Bilong mekim gut wok papamama, man marit i mas mekim olgeta samting em inap long mekim bilong helpim meri long lukautim pikinini. Ating meri i no inap putim gut yau long taim bilong ol miting, olsem na bihain long haus man marit i ken stori long em long ol samting bilong program. Na em inap helpim tu meri long lukautim bebi bambai meri i gat rot long autim gut tok bilong Kingdom.​​—Ritim Filipai 2:​3, 4.

10, 11. (a) Olsem wanem papamama i ken stretim gut ol pikinini bilong ol na “skulim” ol long tok bilong Bikpela? (b) Bilong wanem i stret yumi tok amamas long planti papamama Kristen?

¹⁰ Bilong mekim gut wok papamama, ol papamama i no ken lukautim tasol pikinini long kaikai, klos, haus, na helt. Ol i mas mekim sampela samting moa. Nau long dispela taim bilong pinis we i gat planti hevi, kirap long taim ol i liklik ol yangpela i mas lain long ol stretpela lo ol i mas bihainim. Ol papamama i mas ‘stretim gut ol pikinini bilong ol na skulim ol long tok bilong Bikpela.’ (Ef. 6:4) Insait long pasin bilong “skulim” pikinini em olsem: Kirap long taim ol i liklik yet na i go inap long taim ol i yangpela, ol papamama i mas putim tingting bilong Jehova i go insait long tingting bilong ol pikinini.​​—2 Ti. 3:​14, 15.

¹¹ Taim Jisas i tokim ol disaipel long ol i mas “mekim olgeta lain manmeri i kamap disaipel bilong [em],” yumi ken save olsem Jisas i tingim tu olsem ol papamama i mas helpim ol pikinini bilong ol long kamap disaipel. (Mt. 28:​19, 20) Dispela i hatwok, long wanem, ol manmeri bilong dispela graun i putim presa long ol yangpela. Olsem na olgeta insait long kongrigesen i mas tok amamas long ol papamama em ol i bin helpim ol pikinini bilong ol long kamap Kristen i dediket pinis. Long bilip na pasin bilong i stap gut long wok bilong ol olsem papamama, ol i “winim” strong bilong dispela graun.​​—1 Jo. 5:4.

Stap Singel o No Gat Pikinini

12. Bilong wanem sampela Kristen i laik i stap singel inap sampela yia?

¹² “Taim i sotpela nau” na “i no longtaim na bai dispela graun wantaim olgeta samting bilong en bai i pinis,” olsem na Baibel i kirapim yumi long tingim olsem pasin bilong i stap singel i gutpela samting. (1 Ko. 7:​29-​31) Sampela Kristen i laik i stap singel long laip olgeta bilong ol o ol i laik i stap singel inap sampela yia na bihain ol i laik marit. Yumi amamas olsem ol i no stap singel bilong inapim laik bilong ol yet. Planti i stap singel, long wanem, ol i no laik ol samting i “pulim nabaut tingting” bilong ol taim ol i mekim wok bilong Jehova. (Ritim 1 Korin 7:​32-​35.) Sampela Kristen i singel i mekim wok olsem painia o ol i mekim wok long Betel. Sampela i laik mekim sampela wok moa insait long oganaisesen bilong Jehova na ol i wok long kisim mak bilong i go long Ministerial Trening Skul. Tru tumas, ol brata na sista em ol i bin mekim wok fultaim inap sampela yia taim ol i singel na bihain ol i marit, ol i pilim olsem ol gutpela samting ol i bin lainim taim ol i yangpela i helpim tru marit bilong ol.

13. Bilong wanem sampela marit Kristen i wokim disisen olsem ol i no laik kamapim pikinini?

¹³ Long sampela hap bilong graun, i gat narapela senis i kamap long sindaun bilong famili​—planti marit i wokim disisen olsem ol i no laik kamapim pikinini. Sampela i mekim olsem, long wanem, ol i tingim mani; na sampela i mekim olsem, long wanem, ol i laik kisim gutpela wok mani. Na namel long ol Kristen tu i gat sampela marit ol i no kamapim pikinini. Tasol planti taim ol i mekim olsem, long wanem, ol i laik i stap fri moa long mekim wok bilong Jehova. Dispela i no makim olsem ol i no amamas long marit bilong ol. Ol i amamas. Tasol ol i orait long lusim sampela gutpela samting bilong marit bambai ol i ken tingim wok bilong Kingdom pastaim. (1 Ko. 7:​3-5) Sampela marit olsem i mekim wok sekit na wok distrik o ol i wok long Betel bilong mekim wok bilong Jehova na helpim ol bratasista bilong ol. Sampela i mekim wok painia o misineri. Jehova i no inap lusim tingting long wok bilong ol na pasin laikim ol i soim long nem bilong em.​​—Hi. 6:10.

“Painim Planti Hevi Long Laip Bilong Ol”

14, 15. Ol papamama Kristen inap painim wanem ol “hevi long laip bilong ol”?

¹⁴ Aposel Pol i tokim ol marit Kristen olsem ol bai “painim planti hevi long laip bilong ol.” (1 Ko. 7:28) Sampela hevi olsem em tupela marit, ol pikinini bilong ol, o papamama bilong ol em ol i lapun pinis, ol inap kisim sik. Na tu, ol i gat hatwok o kisim sampela bel hevi long wok bilong ol long mekim bikpela long ol pikinini. Olsem yumi stori long kirap bilong dispela stadi, Baibel i tok profet olsem long “taim bilong las de planti hevi nogut tru bai i kamap.” Wanpela hevi olsem em ol pikinini “i sakim tok bilong papamama.”​​—2 Ti. 3:​1-3.

¹⁵ Pasin bilong mekim bikpela long ol pikinini em wanpela bikpela hatwok long ol papamama Kristen. Yumi no inap abrusim ol “planti hevi nogut tru” i stap long nau. Olsem na long olgeta taim ol papamama Kristen i mas pait long sakim “ol pasin nogut bilong dispela graun” em ol inap bagarapim ol pikinini bilong ol. (Ef. 2:​2, 3) Na sampela taim ol i lus long dispela pait! Sapos wanpela pikinini man o pikinini meri i lusim pasin bilong lotuim Jehova, ol papamama em ol i bin wok strong long helpim pikinini long bilip long tok i tru bilong God ol i karim bikpela “hevi.”​​—Snd. 17:25.

“Long Dispela Taim Bai i Gat Bikpela Hevi Tru”

16. Jisas i tok profet long wanem “hevi” bai kamap?

¹⁶ Tasol wanpela bikpela hevi moa bai kamap, winim olgeta “hevi” i kamap insait long marit na pasin bilong karim pikinini. Long tok profet bilong em long taim bilong em long i kam i stap na long pasin bilong dispela graun i laik pinis, Jisas i tok: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Mt. 24:​3, 21) Bihain Jisas i kamapim olsem wanpela bikpela lain manmeri bai abrusim bagarap bilong “bikpela hevi tru.” Tasol lain bilong Satan bai mekim yet laspela bikpela pait long ol Witnes Bilong Jehova i stap isi. Yumi ken save, em bai taim nogut long yumi olgeta​​—ol manmeri i bikpela pinis na ol pikinini tu.

17. (a) Bilong wanem yumi ken wetim gutpela samting bai kamap bihain? (b) Wanem samting i mas stiaim tingting bilong yumi long ol samting bilong marit na wok papamama?

¹⁷ Tasol yumi no ken pret tumas long ol samting bai kamap bihain. Ol papamama em ol i stap gut long Jehova ol i ken save olsem Jehova bai lukautim ol na ol yangpela pikinini bilong ol. (Ritim Aisaia 26:​20, 21; Sef. 2:​2, 3; 1 Ko. 7:​14) Long nau yumi save olsem yumi stap long taim bilong hevi na dispela i mas stiaim tingting bilong yumi long ol samting bilong marit na wok papamama long dispela taim bilong las de. (2 Pi. 3:​10-​13) Long dispela rot, laip bilong yumi​—maski yumi singel o marit, o yumi gat pikinini o no gat pikinini​—bai litimapim nem bilong Jehova na givim ona long em na long kongrigesen Kristen.

[Ol Futnot]

Sampela Askim

• Bilong wanem i gutpela sapos ol yangpela Kristen i no marit hariap?

• Wanem ol samting i insait long wok bilong mekim bikpela long ol pikinini?

• Bilong wanem planti Kristen i stap singel o, sapos ol i marit, ol i no kamapim pikinini?

• Ol papamama Kristen inap kisim wanem ol “hevi”?

[Piksa long pes 17]

Bilong wanem ol yangpela i bihainim savepasin sapos ol i no marit taim ol i yangpela tumas?

[Piksa long pes 18]

Man marit i ken mekim planti samting bilong helpim meri bilong em long mekim gut wok bilong God

[Piksa long pes 19]

Bilong wanem sampela marit Kristen i wokim disisen olsem ol i no laik kamapim pikinini?