Stori Bilong Wanpela Man

Pastaim Wokim Ol Samting Bilong Pait​—⁠Nau Helpim Ol Man Long Abrusim Bagarap

STORI BILONG ISIDOROS ISMAILIDIS

Mi brukim skru i stap na aiwara bilong mi i kapsait i kam daun long pes bilong mi. Mi beten olsem: “O God, maus bilong bel i tokim mi olsem mi no inap wok moa long wokim ol samting bilong pait. Mi bin traim painim narapela wok mani, tasol mi no inap painim. Tumora bai mi toksave long bos olsem mi pinis long wok. Plis, Jehova, no ken larim fopela pikinini bilong mipela i sot long kaikai.” Olsem wanem na mi bin i stap olsem?

MIPELA i stap bel isi na mipela i no save wok long painim planti samting bilong skin long Drama, long hap not bilong kantri Grik, em ples mama i karim mi long 1932. Papa bilong mi i save toktok wantaim mi long ol samting em i laik bai mi mekim. Em i laik kirapim mi long i go long Amerika bilong kisim skul. Long Namba Tu Pait ol paitman i bin stilim olgeta samting bilong kantri Grik, na bihain long dispela taim ol Grik i kamapim wanpela tok olsem: “Yu inap stilim ol mani kago bilong mipela, tasol yu no inap stilim ol samting i stap long tingting bilong mipela.” Mi gat strongpela tingting long kisim bikpela skul na kisim samting ol man i no inap stilim.

Kirap long taim mi liklik yet, mi insait long ol narapela narapela lain bilong ol yangpela em Misin Grik Otodoks i kamapim. Ol i tokim mipela long lukaut na abrusim ol liklik lotu nogut. Mi tingim wanpela lain ol i kolim, em ol Witnes Bilong Jehova, na ol i tok dispela lain i makim birua bilong Krais.

Long 1953 mi winim wanpela skul teknikol long Atens na mi go long Jemani bilong painim wok mani na go long skul wantaim. Tasol mi no inap mekim, olsem na mi raun long sampela narapela kantri. Sampela wik bihain mi no gat mani na mi stap long wanpela hap bilong Beljam ol sip i save sua long en. Mi wokabaut i go insait long wanpela haus lotu, na mi sindaun na kirap krai nogut tru na aiwara bilong mi i pundaun long plua. Mi beten olsem, sapos God i helpim mi long kamap long Amerika, mi no inap wok long kisim planti samting bilong skin, nogat, bai mi kisim gutpela skul na wok long i stap gutpela Kristen na gutpela man bilong dispela kantri. Bihain, long yia 1957 mi kamap pinis long dispela hap.

Nupela Sindaun Long Amerika

Sindaun bilong mi long Amerika i gat hatwok long en, long wanem, mi man bilong narapela kantri na mi no save long dispela tok ples, na mi no gat mani. Mi mekim tupela wok mani long nait na go long skul long san. Mi skul long sampela skul koles na kisim wanpela setifiket. Bihain mi go long Yunivesiti Bilong Kalifonia long Los Enjeles na skul long samting bilong saiens na kisim narapela setifiket. Tok papa bilong mi i bin mekim long kisim bikpela skul i strongim mi long skul yet maski i hatwok.

Long dispela taim mi bungim wanpela naispela meri Grik, nem bilong em Ekaterini, na mitupela i marit long 1964. Tripela yia bihain namba wan pikinini man bilong mipela i kamap, na insait long fopela yia, meri bilong mi i karim tupela pikinini man moa na wanpela pikinini meri. Em i bikpela wok long lukautim famili na stadi long yunivesiti wantaim.

Mi wok wantaim lain ami bilong balus bilong Yunaitet Stets long Saniveil, Kalifonia, long wanpela kampani i save wokim ol roket-bom na ol roket bilong raun antap tru long skai. Mi wok long ol narapela narapela roket bilong karim ol man i go antap long skai, olsem ol roket Agena na Apollo. Mi bin kisim ol medal long wok mi bin mekim long tupela roket, em Apollo 8 na Apollo 11. Bihain long dispela, mi wok yet long skul na mi mekim bikpela wok long ol roket samting bilong pait. Long dispela taim mi pilim olsem laip bilong mi i gat as tru bilong en​—⁠mi gat wanpela naispela meri, fopela gutpela pikinini, wok mani i gat nem, na wanpela gutpela haus.

Wanpela Man i No Les

Long kirap bilong 1967 mi bungim wanpela man long ples wok em i gat pasin daun na i save mekim gutpela pasin, nem bilong em Jim. Olgeta taim pes bilong Jim i lait na em i save lap, na em i no inap tok nogat sapos mi askim em long malolo na dring kofi wantaim mi. Long dispela taim em i save toktok wantaim mi long ol tok bilong Baibel. Jim i tokim mi olsem em i wok long stadi wantaim ol Witnes Bilong Jehova.

Mi kirap nogut long harim olsem Jim em i pas wantaim dispela lotu. Olsem wanem wanpela gutpela man olsem Jim i larim dispela liklik lotu i birua bilong Krais i paulim em? Tasol mi no inap givim baksait long em, long wanem, em i save tingim mi na mekim gutpela pasin long mi. I olsem long olgeta de em i givim sampela samting long mi bilong ritim. Olsem wanpela de em i kam long ofis bilong mi na tok: “Isidoros, dispela hap bilong Wastaua i stori long pasin bilong helpim famili long pas gut wantaim. Kisim i go long haus na ritim wantaim meri bilong yu.” Mi tokim em bai mi mekim olsem, tasol bihain mi go long toilet na brukbrukim dispela nius na tromoi long dram pipia.

Inap tripela yia mi wok long bagarapim olgeta buk na nius Jim i save givim long mi. Mi save tingting nogut long ol Witnes Bilong Jehova, tasol mi laik bai Jim i stap pren bilong mi, olsem na mi ting mi mas harim tok Jim i mekim na bihain lusim tingting wantu long tok bilong em.

Tasol long rot bilong toktok wantaim Jim mi kisim save olsem Baibel i no as bilong ol samting mi bilip long en na ol pasin mi save mekim. Mi kisim save olsem bilip bilong God Triwan, na bikpaia, na yumi gat tewel i no save dai, ol dispela bilip i no stap long Baibel. (Saveman 9:10; Esekiel 18:4; Jon 20:17) Mi wanpela Grik Otodoks i gat pasin antap, na mi no laik tokaut olsem tok bilong Jim i stret. Tasol olgeta taim em i mekim wok long Baibel na em i no kamapim tingting bilong em yet, olsem na mi luksave olsem dispela man i gat sampela gutpela tok bilong Baibel bilong givim long mi.

Meri bilong mi i pilim olsem sampela samting i wok long kamap, olsem na em i askim mi olsem mi bin toktok wantaim dispela poroman bilong mi i save bung wantaim ol Witnes. Taim mi tok yes, em i tok: “Yumi ken go long ol narapela lotu, tasol long ol Witnes Bilong Jehova nogat.” Tasol i no longtaim na mi wantaim meri pikinini bilong mi i go oltaim long ol miting bilong ol Witnes.

Bikpela Samting Bilong Tingim

Taim mi wok long stadi long Baibel, mi ritim dispela tok bilong profet Aisaia: “Bikpela bai i stretim tok bilong olgeta lain manmeri na bai ol i sindaun gut wantaim. Na bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.” (Aisaia 2:⁠4) Mi askim mi yet, ‘Olsem wanem wanpela wokboi bilong wanpela God i laikim tru bel isi em inap wokim ol samting bilong bagarapim ol man long pait?’ (Song 46:⁠9) I no longtaim na mi luksave olsem mi mas senisim wok mani bilong mi.

Olsem na dispela em i bikpela senis tru. Mi mekim wanpela wok mani i gat biknem. Inap planti yia mi bin mekim bikpela hatwok na kisim planti skul bilong mekim dispela wok. Mi bin kisim wok i gat namba na nau mi mas lusim dispela wok. Tasol mi laikim tumas Jehova na mi gat bikpela laik long mekim wok bilong em, olsem na dispela laik i win.​—⁠Matyu 7:⁠21.

Mi tingting long kisim wok mani long wanpela kampani long Siatel, Wosington. Tasol i no longtaim na mi painimaut olsem wok dispela kampani i mekim, em tu i no stret wantaim tok bilong Aisaia 2:⁠4. Mi traim mekim ol narapela wok long dispela kampani i no pait wantaim tok bilong Baibel tasol mi no inap, na bel bilong mi i kirap kotim mi gen. Mi luksave olsem mi no inap holim dispela wok mani na bel i no gat tok.​—⁠1 Pita 3:⁠21.

Mipela lukim olsem mipela i mas mekim sampela bikpela senis long i stap bilong mipela. Insait long sikspela mun mipela senisim sindaun bilong mipela na mani mipela tromoi bilong baim ol samting em i liklik olsem 50 pesen bilong mani bipo mipela i save tromoi. Mipela salim naispela haus bilong mipela na baim wanpela haus i liklik long en long Denva, Kolorado. Nau mi redi long mekim laspela samting​—⁠lusim dispela wok mani. Mi raitim pas i toksave long kampani olsem mi bai lusim wok, na mi stori gut long as bilong tingting bilong mi. Long dispela nait, taim ol pikinini i slip pinis, mitupela meri bilong mi i brukim skru na beten long Jehova, olsem mi bin mekim long kirap bilong dispela stori.

Wanpela mun i no pinis yet na mipela i stap pinis long Denva, na tupela wik bihain, long Julai 1975, mi na meri bilong mi i kisim baptais. Inap sikspela mun mi no inap painim wanpela wok mani na ol mani bilong mipela long beng i wok long pinis. Long mun namba 7 mani bilong mipela long beng i no inap long baim dinau bilong haus mipela mas baim long olgeta mun. Mi kirap long painim kain kain wok mani maski em i wanem kain, tasol long dispela taim stret mi kisim wanpela wok ensinia. Pe bilong dispela wok em i hap tasol bilong pe mi save kisim bipo; tasol em i bikpela moa long samting mi bin askim Jehova long en. Mi amamas mi bin putim samting bilong spirit i stap namba wan!​—⁠Matyu 6:⁠33.

Lainim Ol Pikinini Long Laikim Jehova

Mi na Ekaterini i wok oltaim long bihainim ol lo bilong God bilong mekim bikpela long fopela pikinini bilong mipela. Mipela i amamas long helpim Jehova i bin givim, olgeta pikinini bilong mipela ol i kamap strongpela Kristen na ol i givim ol yet long mekim wok bilong autim tok bilong Kingdom long olgeta de. Tripela pikinini man bilong mipela, em Christos, Lakes, na Gregory, ol i winim Skul Bilong Lainim Wok Bilong Lukautim Kongrigesen na ol i mekim kain kain wok bilong go lukim na strongim ol kongrigesen. Toula, pikinini meri bilong mipela, i mekim wok volantia long hetkota bilong ol Witnes Bilong Jehova long Nu Yok. Bel bilong mipela i kirap tru taim mipela i lukim ol pikinini bilong mipela i givim baksait long gutpela wok mani bambai ol inap mekim wok bilong Jehova.

Planti ol i bin askim mipela olsem mipela i mekim wanem na ol pikinini bilong mipela i kamap gutpela. Tru i no gat wanpela pasin tasol yumi inap mekim na ol pikinini bai kamap gutpela, tasol mipela i wok strong long putim pasin bilong laikim tru Jehova na laikim tru ol narapela manmeri i go daun long bel bilong ol. (Lo 6:​6, 7; Matyu 22:​37-39) Ol pikinini i kisim save olsem yumi no inap tokim Jehova yumi laikim em sapos ol pasin yumi mekim i no kamapim dispela laik.

Wanpela de long wik, olsem long Sarere, mipela i mekim wok autim tok wantaim olsem wanpela famili. Long olgeta Mande long nait bihain long kaikai mipela i mekim famili-stadi long Baibel, na tu mipela i mekim Baibel-stadi long olgeta pikinini wan wan. Taim ol pikinini i liklik yet, mipela save stadi wantaim ol planti taim insait long wanpela wik, tasol ol stadi i sotpela tasol, na bihain, taim ol i kamap bikpela liklik, mipela stadi wantaim ol inap longpela taim liklik long wanpela taim long wik. Long taim bilong ol dispela stadi, ol pikinini i no pret long toktok wantaim mipela long ol hevi bilong ol.

Na tu, mipela famili olgeta i save kisim amamas wantaim. Mipela save amamas long pilaim musik wantaim, na olgeta wan wan pikinini i gat singsing ol yet i laikim na ol i amamas long pilaim. Long sampela Sarere Sande mipela i singautim sampela famili long kam bung na toktok wantaim mipela. Na tu, mipela famili olgeta i go holide wantaim. Long wanpela kain raun olsem, inap tupela wik mipela i bin raun lukim ples maunten bilong Kolorado na mekim wok autim tok wantaim ol kongrigesen bilong dispela ples. Ol pikinini i save amamas long tingim wok ol i bin mekim long ol kibung distrik na long helpim wok bilong sanapim ol nupela Haus Kingdom long ol narapela ples. Taim mipela i kisim ol pikinini i go long kantri Grik long lukim ol wanblut, ol inap bungim ol Witnes i stap gut long Jehova na ol i holimpas bilip bilong ol na gavman i bin kalabusim ol. Dispela i strongim tingting bilong ol pikinini long sanap strong na no ken pret long mekim wok bilong autim tok i tru.

Tru, sampela taim sampela pikinini bilong mipela i bikhet o ol i popaia na makim poroman nogut long raun wantaim. Na long sampela taim, mipela papamama i bin kamapim sampela hevi taim mipela i putim sampela tambu i strong tumas long ol. Tasol taim mipela skulim ol long tok bilong Jehova, i stap long Baibel, dispela i bin helpim mipela long stretim wokabaut bilong mipela olgeta.​—⁠Efesus 6:4; 2 Timoti 3:​16, 17.

Bikpela Amamas Moa Yet

Taim ol pikinini bilong mipela i kirap pinis long mekim wok autim tok long olgeta taim, bihain mi na Ekaterini i kirap tingting strong long wanem samting mitupela inap mekim bilong insait moa long dispela wok bilong helpim ol manmeri long kisim laip. Olsem na long 1994, mi pinis long wok mani na mitupela i kirap mekim wok painia oltaim. Mitupela i save autim tok long ol skul koles na ol yunivesiti long hap mipela i stap long en, na mipela i toktok wantaim ol sumatin na mekim ol Baibel-stadi wantaim sampela. Mi inap pilim tru hevi bilong ol, long wanem, mi bin stap wankain olsem ol long sampela yia i go pinis. Olsem na mi bin helpim planti long kisim save long Jehova. Mi amamas long stadi wantaim ol sumatin bilong Bolivia, Brasil, Isip, Itiopia, Meksiko, Saina, Sili, Tailan, na Turki! Mi amamas tu long mekim wok autim tok long telefon, na mi amamas moa yet taim mi toktok wantaim man long tok ples bilong mi yet.

Maski tok ples i mekim na maus i hevi long kolim tok Inglis na mi wok long go lapun, olgeta taim mi traim long stap redi long mekim wok na bihainim pasin bilong Aisaia taim em i tok: “Mi stap! Salim mi.” (Aisaia 6:​8, NW ) Mipela i bin helpim sikspela manmeri long dediketim laip bilong ol long Jehova. Dispela em i nambawan bikpela amamas mipela i bin kisim.

Bipo, nambawan bikpela samting long mi em bilong wokim ol roket nogut bilong kilim i dai ol manmeri. Tasol long rot bilong marimari bilong em, Jehova i bin opim rot long mi wantaim famili bilong mi bambai mipela inap dediket na kamap wokboi bilong em, na mipela i givim laip bilong mipela long autim gutnius bilong laip oltaim long Paradais long graun. Taim mi tingting long ol bikpela samting mi bin mekim, mi tingim tok bilong Malakai 3:10: “Yupela i mekim olsem na bai mi ken givim planti gutpela samting long yupela na yupela i no ken sot. Bihainim dispela rot na bai yupela i ken save olsem tok bilong mi em i tru olgeta.” Jehova i bin mekim olsem long mipela na mipela i belgut tru!

[Blok/Piksa long pes 27]

Lakes: Papa i no laikim tru pasin bilong tupela maus. Em i bin wok strong bambai em i no stap man bilong tupela maus, na em i mekim moa yet taim em i makim gutpela pasin em i laik bai famili i mas bihainim. Planti taim em i tokim mipela: “Sapos yu givim laip bilong yu long Jehova, dispela i gat as bilong en. Yu mas i gat laik long lusim samting bilong yu yet bilong mekim wok bilong Jehova. Dispela em i pasin Kristen.” Dispela tok i pas long tingting bilong mi na mi bihainim gutpela pasin bilong papa na lusim samting bilong mi yet bilong mekim wok bilong Jehova.

[Blok/Piksa long pes 27]

Christos: Mi pilim tru pasin bilong papamama long givim bel na stap gut long Jehova na ol i wok strong long mekim ol wok papamama i mas mekim. Mipela famili i mekim olgeta samting wantaim​—⁠olsem wok autim tok bilong mipela na ol narapela samting tu olsem kisim malolo wantaim. Papamama bilong mi inap mekim planti narapela samting, tasol ol i save tingim wok bilong autim tok na ol i no wok long kisim planti samting bilong skin. Long nau, mi save olsem amamas bilong mi i bikpela moa taim mi givim bel long mekim wok bilong Jehova.

[Blok/Piksa long pes 28]

Gregory: Papamama i bin mekim gutpela tok bilong strongim mi long mekim bikpela wok moa long autim tok, tasol samting i helpim mi moa yet, em i pasin ol i save bihainim na amamas ol i kisim long mekim wok bilong Jehova. Dispela i helpim mi long skelim gut i stap bilong mi, na lusim pasin bilong tingting planti long kirap mekim wok painia oltaim, na givim bel moa yet long mekim wok bilong Jehova. Mi tok tenkyu long papamama long ol i bin helpim mi long kisim amamas bilong givim bel long mekim wok.

[Blok/Piksa long pes 28]

Toula: Olgeta taim papamama i save tok, pasin bilong i stap gut wantaim Jehova em i nambawan bikpela samting yumi inap kisim, na i gat wanpela rot tasol long i stap amamas tru, em long givim ol gutpela samting bilong yumi long Jehova. Tupela i mekim na Jehova i stap olsem man tru tru long tingting bilong mipela. Planti taim papa i bin tokim mipela olsem, taim yu laik slip long nait, sapos bel i no gat tok, long wanem, yu save yu bin mekim olgeta samting yu inap long mekim bilong amamasim Jehova, i no gat narapela samting i winim dispela.

[Piksa long pes 25]

Taim mi stap soldia long kantri Grik, long 1951

[Piksa long pes 25]

Mi wantaim Ekaterini long 1966

[Piksa long pes 26]

Famili bilong mi long 1996: (kirap long han kais i go long han sut, long baksait) Gregory, Christos, Toula; (poret) Lakes, Ekaterini, na mi