Klostu Nau—Bel Hevi Bai Pinis Olgeta
I STAP bilong yumi long nau i hatwok moa na i gat planti samting inap mekim yumi bel hevi. Taim yumi bel hevi, ating yumi hatwok long bosim gut bel bilong yumi. Na maski man i laik tru long i stap laip, sampela taim em inap bel hevi stret! Tingim stori bilong sampela man.
Long bipo bipo profet Moses em i bel hevi nogut tru na em i tokim God olsem: “Sapos yu laik mekim olsem long mi, orait mobeta yu sori long mi na yu kilim mi i dai na bai mi no ken hatwok moa long karim dispela hevi.” (Namba 11:15) Taim profet Elaija i ranawe long ol birua em i tok: “Bikpela, mi inap pinis long ol dispela hevi i kamap long mi. Nau mi laik bai yu larim mi i dai.” (1 King 19:4) Na profet Jona i bin tok: “Orait Bikpela, nau yu mas pinisim laip bilong mi. Sapos mi dai, em i gutpela. Na sapos mi no i dai, em i no gutpela.” (Jona 4:3) Tasol Moses, Elaija na Jona ol i no bin kilim i dai skin bilong ol yet. Ol i save long lo bilong Jehova i tok: “Yupela i no ken kilim i dai ol arapela manmeri.” (Kisim Bek 20:13) Ol i bilip strong long God, olsem na ol i save i gat rot bilong stretim olgeta hevi i save painim ol, na tu, laip em i wanpela presen God i save givim long ol man.
Olsem wanem long ol hevi i painim yumi long nau? Bikpela bel hevi na sik bilong skin i save kamap, na sampela taim ol wanblut o ol man i stap klostu long yumi o ol wanwok ol i mekim nogut long yumi. Baibel i stori long ol man ‘ol i save mekim ol kain kain pasin nogut olsem, ol pasin i no stret na mangal nogut na pasin birua, na bel nogut long ol man i gat planti samting, na kilim ol man i dai na kros nabaut na giaman na pulim samting bilong ol arapela man, na mekim nogut long ol arapela man, na tok baksait na mekim ol giaman tok bilong bagarapim nem bilong ol arapela man, na birua long God na bikmaus nabaut na hambak na litimapim nem bilong ol yet, na kamapim ol nupela kain pasin nogut, na sakim tok bilong papamama, no gat gutpela tingting, i no bihainim tok na promis bilong ol yet, i no laikim ol wanblut, i no sori long ol arapela man.’ (Rom 1:28-31) Taim yumi stap namel long ol kain man olsem long olgeta de, dispela inap givim bel hevi long yumi. Olsem wanem yumi inap helpim ol man ol i bel hevi i stap?
Laik Long Putim Yau
Ol hevi na pen inap mekim na tingting i no wok gut. Saveman i bin tok: “Taim ol i mekim nogut long wanpela man na daunim em, maski em i gat gutpela tingting, em bai kirap mekim pasin kranki.” (Saveman 7:7, NW ) Olsem na sapos wanpela i toktok long kilim i dai skin bilong em yet, yumi mas bilipim tok bilong em. Wantu yumi mas mekim samting bilong helpim em, maski em i gat hevi long bel, skin, tingting o samting bilong spirit. I gat kain kain pasin ol dokta i save bihainim bilong stretim dispela, na em i samting bilong wan wan yet long makim wanem kain pasin ol bai bihainim bilong oraitim ol.—Galesia 6:5.
Maski wanem as bilong tingting bilong yu long kilim i dai skin bilong yu yet, sapos yu inap toktok gut wantaim wanpela man i gat gutpela tingting na em i pilim hevi bilong narapela na em i no save les kwik long man, dispela inap helpim yu tru. Ol wanblut na pren em ol i amamas long putim yau long ol hevi bilong yu ating ol inap helpim yu. Pasin bilong mekim gut na sori long narapela inap helpim em, na tu, ol tok i stap long Baibel bilong strongim man em inap helpim tru ol man i pilim olsem i no gat gutpela samting bai painim ol long bihain.
Helpim Bilong Spirit Bilong Ol Lain i Bel Hevi
Ating yu bai kirap nogut long save olsem pasin bilong ritim Baibel em inap strongim tru bel bilong yu. Baibel i no buk bilong stretim sik bilong tingting, nogat, tasol em inap helpim yumi long tingim laip bilong yumi i gutpela samting tumas. King Solomon i tok: “Mi tingting long dispela samting na mi save i gat wanpela pasin i win tru. Dispela pasin i olsem. Yumi mas amamas na mekim gutpela pasin long taim yumi stap long graun. Na tu yumi mas kaikai na dring na amamas long olgeta samting yumi mekim. Dispela i olsem presen God i givim yumi.” (Saveman 3:12, 13) Wok i gat as bilong en na yumi amamas long mekim, na ol samting olsem gutpela win, lait bilong san, ol plaua, diwai, pisin—dispela olgeta samting em ol presen God i bin givim long yumi bambai yumi ken amamas long en.
Samting i strongim bel bilong yumi moa yet em i olsem: Baibel i tokim yumi olsem God Jehova na pikinini bilong em, Jisas Krais, ol i save tingim yumi. (Jon 3:16; 1 Pita 5:6, 7) Olsem na i stret man bilong raitim Song i tok: “Yumi litimapim nem bilong Bikpela. Olgeta de em i save karim ol hevi bilong yumi. God wanpela tasol i save kisim bek yumi.” (Song 68:19) Ating yumi inap pilim olsem yumi samting nating o yumi no gutpela man, tasol God i save singautim yumi long beten long em. Yumi ken bilip tru olsem God i no inap givim baksait long ol man i askim em long helpim ol na ol i mekim long pasin daun.
Yumi no ken ting sindaun bilong yumi long nau bai i no gat hevi long en. (Jop 14:1) Tasol tok i tru bilong Baibel i bin helpim planti manmeri long kisim save olsem pasin bilong kilim i dai ol yet i no gutpela rot bilong stretim ol hevi bilong ol. Tingim samting aposel Pol i bin mekim bilong helpim wanpela woda, bel bilong em i bagarap stret taim em “i kirap na i lukim olgeta dua bilong haus kalabus i op i stap, na em i ting olgeta kalabus i ranawe pinis. Olsem na em i pulim bainat bilong en na i laik kilim i dai em yet.” Kwiktaim dispela woda i ting mobeta em i kilim i dai skin bilong em, long wanem, taim ol bosman i kisim save olsem ol kalabusman i ranawe, ol bai semim em na kilim em i dai isi isi. Aposel i singaut olsem: “Yu no ken bagarapim yu yet. Mipela olgeta i stap.” Pol i no mekim dispela tok tasol. Nogat. Em wantaim Sailas i mekim isi bel bilong woda na ol i bekim askim bilong em: “Tupela bikman, mi mas mekim wanem samting na bai God i kisim bek mi?” Tupela i bekim olsem: “Yu mas bilip long Bikpela Jisas, na bai God i kisim bek yu wantaim ol lain bilong yu.” Tupela i autim tok bilong Jehova long em wantaim lain bilong em na “em wantaim olgeta lain bilong en i kisim baptais.” Dispela woda wantaim lain bilong em ol i amamas tru na ol i painim nupela as bilong i stap bilong ol.—Aposel 16:27-35.
Long nau yumi amamas long save olsem God i no as bilong ol pasin nogut! Baibel i tok wanpela spirit nogut, “ol i kolim em Satan,” em i “man bilong giamanim olgeta manmeri bilong graun.” Tasol taim bilong em i laik pinis. (KTH 12:9, 12) Klostu nau God bai pinisim olgeta hevi Satan na ol spirit nogut bilong em i bin kamapim long ol man. Bihain, olsem God i tok promis pinis, em bai kamapim nupela taim i gat stretpela pasin tasol long en, na long dispela taim em bai pinisim tru as bilong olgeta hevi i save bagarapim bel bilong ol man na i kirapim ol long kilim i dai skin bilong ol yet.—2 Pita 3:13.
Mekim Gut Bel Bilong Ol Man i Krai Long Kisim Helpim
Long nau tu Baibel inap strongim bel bilong ol man i bel hevi. (Rom 15:4) Devit i singsing olsem: “Mi save, yu no givim baksait long man i pilim hevi long sin na i daunim em yet.” (Song 51:17) Tru, sampela traim i save painim yumi na yumi no inap abrusim na sin i givim hevi long yumi. Tasol taim yumi kisim stretpela save long Papa bilong yumi long heven, em man bilong mekim gut na laikim tru na isi long yumi, bai yumi save tru olsem em i tingim yumi olsem samting i gutpela tru. God inap kamap nambawan Pren na Tisa bilong yumi. Sapos yumi wok long kisim pasin bilong pas gut wantaim Jehova, em i no inap lusim yumi. Man bilong wokim yumi i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”—Aisaia 48:17.
Pasin bilong bilip long God em i bin helpim planti manmeri. Olsem: Inap longpela taim Mara i gat wanpela bikpela bel hevi i wok long pinisim strong bilong em, na long dispela taim pikinini man bilong em i dai taim ka i bam. Mara i gat dispela wanpela pikinini man tasol.a Em i longlong nabaut na traim kilim i dai skin bilong em yet. Tasol nau long olgeta de em i save kirap long moningtaim tru bilong mekim wok bilong lukautim haus. Em i save kisim amamas long harim musik na helpim ol narapela. Em i bilip na wet “long God bai i kirapim bek ol man i dai pinis, em ol stretpela man na ol man nogut wantaim,” na dispela i mekim na em i no bel hevi nogut tru long i dai bilong pikinini man bilong em, na dispela bilip i strongim bilip bilong em long God. (Aposel 24:15) Mara i no bin tingting liklik long kamap wankain olsem ol ensel long heven, olsem na bel bilong em i pilim tru tok bilong Song 37:11, i tok: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”
Narapela meri Brasil, nem bilong em Sandra, em i save wok strong long i stap gutpela mama tru long 3-pela pikinini bilong em. Em i tok: “Mi mekim planti wok tru, olsem na taim papa bilong mi i dai wantu tasol na long wankain taim mi kisim save olsem man bilong mi i pamuk wantaim narapela meri, mi lusim tingting olgeta long beten askim God long helpim mi.” Bel bilong Sandra i bagarap stret na em i traim kilim i dai em yet. Wanem samting i helpim em long kamap orait gen? Em i tingim tru ol samting bilong spirit. “Long olgeta nait taim mi laik slip, mi save ritim Baibel na mi wok long tingting olsem, bai mi mekim wanem sapos mi bin stap wantaim ol? Na tu mi save ritim Wastaua na Kirap!, na mi laikim tru ol stori bilong ol man, long wanem, ol i save helpim mi long stap bel gut.” Em i save Jehova em i nambawan pren bilong em, olsem na taim em i beten em i save kamapim olgeta tingting bilong em.
Bihain Bai i No Gat Bel Hevi
Bel bilong yumi i stap isi taim yumi save ol pen na hevi ol manmeri i karim em i bilong i stap sotpela taim tasol! Aninit long wok bos bilong Kingdom bilong God, ol pikinini na ol man i bikpela pinis em nau long dispela taim ol i karim hevi long pasin raskol, na pasin i no stret, na pasin bilong tingting nogut long narapela lain, ol bai amamas. Olsem wanpela Song i tok profet long en, Jisas Krais, em King Jehova i makim, em bai “helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol.” Na tu, em bai “sori long ol manmeri i no gat strong na i stap rabis. Na ol manmeri i no gat samting em i save kisim bek ol.” Na tru tumas, “sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.”— Song 72:12-14.
Taim bilong truim bilong ol dispela tok profet i kam klostu. Olsem wanem? Yu laik i stap oltaim oltaim long kain ples olsem? Sapos olsem, i gat as na yu ken stap bel gut na amamas tru long laip God i givim long yu olsem presen. Na sapos yu stori wantaim ol narapela long ol dispela gutpela tok promis bilong Baibel i save mekim gut bel bilong man, ating yu inap givim bikpela amamas long ol manmeri ol i stap namel long ol lain i no tingim na laikim ol narapela, na ol i krai long kisim helpim.
[Futnot]
a Sampela nem i no nem tru bilong ol.
[Piksa long pes 6]
I gat planti samting yumi inap amamas long en long nau
[Piksa long pes 7]
Olsem wanem? Yu save tingim nupela taim bihain, taim i no gat ol samting bilong mekim man i bel hevi?