Wanpela Singaut Bilong Kisim Helpim

“GOD i lusim tingting pinis long mi!” em wanpela meri Brasil i singaut olsem. Man bilong em i bin i dai wantu tasol na bihain em i pilim olsem i stap bilong em i no gat as bilong en. Olsem wanem? Yu bin traim long mekim gut bel bilong wanpela man o meri i bel hevi olsem na em i singaut long wanpela man i helpim em?

Sampela, bel bilong ol i bagarap stret na ol i kilim i dai skin bilong ol yet​—⁠planti bilong ol em ol yangpela. Wanpela niuspepa (Folha de S. Paulo) i stori long wanpela ripot i tok, long kantri Brasil “namba bilong ol yangpela ol i kilim ol yet i dai i go antap olsem 26 pesen.” Tingim stori bilong Walter,a em i wanpela yangpela man bilong Sao Paulo. Em i no gat papamama, o haus slip, o wanpela hap em wanpela i ken go na i stap long en, na em i no gat ol gutpela poroman em inap bilip long ol. Olsem na bilong pinisim bel hevi em i go antap long wanpela bris na kalap i kam daun.

Wanpela mama wanpis, nem bilong em Edna, em i gat tupela pikinini pinis taim em i bungim narapela man. Wanpela mun bihain, ol i kirap sindaun wantaim long haus bilong mama bilong man, na mama i save insait liklik long wok bilong ol spirit nogut na em i meri bilong dring oltaim. Edna i karim narapela pikinini, na em i kirap long dring planti, na em i pilim bel hevi tru na em i traim kilim i dai skin bilong em yet. Bihain kot i tok em i no inap lukautim ol pikinini bilong em.

Olsem wanem long ol lapun? Pastaim Maria em i meri bilong amamas na toktok. Tasol taim em i wok long i go lapun, em i kirap tingting planti long wok nes bilong em, long wanem, em i pret, nogut em bai mekim sampela popaia. Dispela i mekim na em i bel hevi. Em i kisim sampela marasin bilong stretim dispela hevi, na bihain em i lukim ol dokta, na samting ol i mekim i helpim em. Tasol taim em i gat 57 krismas, ol i rausim em long wok na bikpela bel hevi i kisim em na em i pilim olsem em i no gat rot bilong pinisim dispela hevi. Maria i kirap tingting long kilim i dai em yet.

Profesa José Alberto Del Porto bilong Yunivesiti bilong Sao Paulo i tok: “Klostu 10 pesen bilong ol manmeri i gat bikpela bel hevi bai traim long kilim i dai ol yet.” Dokta David Satcher, em nambawan dokta bilong gavman bilong Amerika i tok, “Sori tru, namba bilong ol manmeri ol i kilim ol yet i dai i winim namba bilong ol manmeri ol narapela i kilim ol i dai.”

Taim man i traim kilim i dai em yet, sampela taim i olsem em i singaut long kisim helpim. Na yumi save, ol famili na pren i laik mekim samting i stret bilong helpim dispela man em i pilim i no gat gutpela samting bilong wetim i kamap long bihain. Tasol ol kain tok olsem “No ken bel hevi na sori long yu yet,” o “Hevi bilong planti man i winim hevi bilong yu” o “Hevi i save painim yumi olgeta sampela taim,” ol dispela kain tok i no inap helpim em. Mobeta yu stap pren tru bilong em na putim gut yau long tok em i kamapim. Yumi laik helpim dispela man long save, i stap bilong em i gat as bilong en.

Voltaire, em man bilong Frans i save raitim stori, em i bin tok: “Man i bel hevi na nau em i kilim i dai em yet, ating sapos em i bin wet inap wanpela wik bihain long taim em i bin tingting long kilim i dai em yet, bai em i gat laik long i stap laip.” Ol manmeri em bel bilong ol i bagarap stret, olsem wanem ol inap kisim save olsem i stap bilong ol i gat gutpela as bilong en?

[Futnot]

[Piksa long pes 3]

Namba bilong ol yangpela na ol manmeri i bikpela pinis ol i kilim i dai skin bilong ol yet i go antap

[Piksa long pes 4]

Olsem wanem yu inap helpim wanpela man o meri em i pilim olsem i no gat wanpela gutpela samting bilong wetim i kamap bihain?