Yu Ting Yu Inap Go Klostu Long Wanpela God Yu No Inap Lukim?

‘Olsem wanem mi inap pas gut wantaim wanpela man mi no inap lukim?’ em wanpela askim yu inap kamapim. Yumi ken ting em i wanpela gutpela askim. Tasol skelim ol dispela samting:

BILONG kamap gutpela pren na pas gut wantaim narapela man, pasin bilong lukim ol samting i bikpela samting olsem wanem? Yu ting ol samting yumi no inap lukim, i bikpela samting tu bilong helpim yumi long pas gut wantaim ol narapela? Tru tumas! Long dispela as sampela manmeri i bin kamap gutpela pren wantaim ol narapela long rot bilong raitim pas. Long ol pas ol i save tokaut long ol samting ol i save laikim, ol samting ol i no save laikim, ol mak ol i laik winim, ol lo ol i laik bihainim, ol samting ol i save lap long en, na long ol narapela pasin bilong ol o long ol samting ol i laik kisim save long en.

Pasin bilong ol aipas tu i soim olsem taim man inap lukluk, dispela i no bikpela samting bilong kamap gutpela pren wantaim narapela. Tingim stori bilong Edward na Gwen, em tupela marit i aipas.a Edward i bungim Gwen long wanpela skul bilong ol aipas, em tupela i bin wanskul taim ol i bikpela pinis. Edward i laikim tru ol pasin bilong Gwen, em i save bihainim ol stretpela pasin long toktok bilong em na long ol narapela samting em i mekim, na em i gat gutpela tingting long wok. Gwen tu i kirap long laikim Edward, long wanem, olsem em yet i tok, “Edward i kamapim ol pasin em ol i bin lainim mi long ting olsem ol i bikpela samting.” Tupela i kirap long poroman gut wantaim, na tripela yia bihain tupela i marit.

Edward i tok: “Taim yutupela i stap wantaim, maski yu aipas dispela i no inap pasim yu long kamapim pasin bilong pas gut wantaim. Tru, narapela i no inap long lukim narapela, tasol dispela i no pasim bel bilong yu long pilim ol samting.” Nau, 57 yia bihain, tupela i strong yet long laikim tru narapela narapela. Tupela i stori olsem i gat 4-pela samting i bin helpim tupela long pas gut wantaim: (1) kisim save long ol pasin bilong narapela, (2) tingim ol dispela pasin na kirap laikim ol, (3) wok long toktok gut wantaim, na (4) mekim ol samting wantaim.

Dispela 4-pela samting i bikpela samting long pasin bilong pas gut wantaim narapela, maski em namel long ol pren, ol poroman marit, o bikpela samting moa, namel long ol man na God. Long stori i kamap bihain long dispela, bai yumi kisim save long olsem wanem pasin bilong bihainim dispela 4-pela samting inap helpim yumi long pas gut wantaim God, maski yumi no inap lukim em.b

[Ol Futnot]