Ol i Makim Ol Wasman na Wokman Bilong Kongrigesen Long Pasin Tiokratik

“Yupela i mas was gut long yupela yet, na long olgeta manmeri bilong sios bilong God . . . na Holi Spirit i makim yupela i stap wasman bilong ol dispela sipsip bilong God.”​—⁠APOSEL 20:⁠28.

1, 2. Olsem wanem tok bilong Aisaia 60:22 i wok long kamap tru?

BIPO tru Jehova i tok promis long wanpela samting bai kamap long taim bilong pinis na em i narapela kain tru. Profet Aisaia i bin tok: “Lain i liklik tru bai ol i kamap planti moa olsem ol manmeri bilong ol bikpela na strongpela kantri. Mi Bikpela, mi tok, ol dispela samting bai i kamap hariap long taim mi makim pinis.”​—⁠Aisaia 60:⁠22.

² Olsem wanem? I gat samting i makim olsem dispela tok profet i wok long kamap tru long nau? Tru tumas, i gat! Long 1870 samting, lain bilong Jehova i kamapim wanpela kongrigesen long Alegeni, Pensilvenia, long Amerika. Pastaim ol i wanpela liklik lain tasol, tasol nau planti tausen kongrigesen i kamap na ol i stap strong long olgeta hap bilong graun. Planti milion man bilong autim tok bilong Kingdom​—⁠olsem wanpela strongpela kantri​—⁠ol i bung long 91,000 samting kongrigesen i stap long 235 kantri. Yumi save tru olsem Jehova i wok long hariapim dispela wok bilong bungim ol man i lotu tru long em paslain long kirap bilong taim bilong “bikpela hevi tru,” em klostu nau i laik kamap.​—⁠Matyu 24:21; KTH 7:​9-14.

3. Wanem insait bilong dispela tok, kisim baptais “long nem bilong Papa na bilong Pikinini na bilong Holi Spirit”?

³ Ol dispela planti milion manmeri ol i dediketim ol yet long Jehova, na ol i bihainim tok bilong Jisas na ol i kisim baptais “long nem bilong Papa na bilong Pikinini na bilong Holi Spirit.” (Matyu 28:19) Ol i baptais “long nem bilong Papa,” na dispela i makim olsem ol dispela man i dediket pinis ol i save Jehova em i Papa bilong ol long heven na em i Man bilong givim laip long ol na ol i mas daun long wok bos bilong em. Bilong baptais ‘long nem bilong Pikinini,’ dispela i makim ol i tokaut olsem Jisas Krais em i Man bilong baim bek ol, na go pas bilong ol, na King bilong ol. Na tu, ol i luksave long wok spirit holi bilong God, o strong bilong em, i save mekim long stiaim ol samting long sindaun bilong ol. Dispela i makim olsem ol i bin baptais ‘long nem bilong spirit holi.’

4. Ol wokman Kristen bilong God ol i kisim namba bilong mekim dispela wok olsem wanem?

⁴ Taim ol nupela disaipel i kisim baptais, ol i kisim namba long kamap wokman bilong God Jehova. Husat i givim namba long ol? Tok i stap long 2 Korin 3:5 i stret long ol, olsem: “God wanpela tasol i save mekim mipela inap long dispela wok [olsem kamap wokman bilong God].” God Jehova yet i givim namba long ol long kamap wokman bilong em, na ol i no inap tingim narapela samting i winim dispela! Bihain long ol i baptais pinis, ol bai wok long kamap strong long mekim dispela wok bilong spirit, olsem wokman bilong autim “gutnius,” sapos ol i larim spirit bilong God i stiaim ol na ol i bihainim yet Tok bilong em.​—⁠Matyu 24:14; Aposel 9:⁠31.

Makim Ol Long Pasin Tiokratik—⁠Pasin Demokratik Nogat

5. Ol i save bihainim pasin demokratik long makim ol wasman na wokman bilong kongrigesen? Stori long dispela samting.

⁵ Namba bilong ol wokman bilong God ol i autim tok long olgeta taim i wok long i go bikpela, olsem na bilong lukautim ol long samting bilong spirit i mas i gat ol wasman ol i mekim gut wok bilong ol na ol wokman bilong kongrigesen bilong helpim ol. (Filipai 1:⁠1) Ol i makim ol kain man olsem wanem? Ol i no save bihainim pasin bilong Kristendom, em ol lotu ol i holim nating nem Kristen. Olsem: Ol i no save bihainim pasin demokratik, olsem man i kisim planti vot insait long kongrigesen em i kisim wok wasman Kristen. Nogat. Ol i save makim ol wasman long pasin tiokratik. Wanem insait bilong dispela tok?

6. (a) Gavman tiokratik em i wanem samting? (b) Bilong wanem yumi ken tok ol i bihainim pasin tiokratik taim ol i makim ol wasman na wokman bilong kongrigesen?

⁶ Gavman tiokratik em i wanpela gavman God i bosim. Long laik bilong ol yet ol Witnes Bilong Jehova i daun long wok bos bilong God na wok gut wantaim long mekim laik bilong em. (Song 143:10; Matyu 6:​9, 10) Yumi ken tok ol i bihainim pasin tiokratik taim ol i makim ol wasman Kristen, olsem ol elda, na ol wokman bilong kongrigesen, long wanem, ol i bihainim pasin God i putim na i stap long Baibel taim ol i skelim na makim ol kain man olsem. Na Jehova i stap olsem “bikpela king bilong olgeta samting,” olsem na i stret em i ken makim pasin oganaisesen bilong em long graun bai bihainim bilong mekim wok.​—⁠1 Stori 29:11; Song 97:⁠9.

7. I gat wanem pasin bilong bosim ol Witnes Bilong Jehova?

⁷ Ol Witnes Bilong Jehova i no save makim wanem kain pasin bilong bosim lotu ol bai bihainim olsem planti lotu bilong Kristendom i save mekim. Ol dispela Kristen ol i wok long bihainim ol pasin na lo Jehova i putim. Taim ol i makim ol wasman bilong kongrigesen ol i no bihainim wankain pasin olsem ol misin, em ol man i votim ol, o ol hetman bilong misin i makim ol, o wanpela lain pasto samting i stap insait long wanpela distrik i makim ol. Sapos sampela samting bilong dispela graun i laik pasim o paulim dispela wok bilong makim ol man, lain bilong Jehova i no inap larim dispela samting i kamap. Ol i strong long bihainim pasin bilong ol aposel taim ol i bin tok: “Mipela i mas bihainim tok bilong God tasol. Mipela i no ken bihainim tok bilong ol man.” (Aposel 5:29) Olsem na ol Witnes i save daun long God long olgeta samting. (Hibru 12:9; Jems 4:⁠7) God i save orait long ol man i bihainim pasin tiokratik.

8. Olsem wanem pasin demokratik na pasin tiokratik ol i narapela narapela kain?

⁸ Yumi ol wokboi bilong Bikpela Man i bihainim pasin tiokratik, em Jehova, yumi mas save gut long olsem wanem pasin demokratik i narapela kain long pasin tiokratik. Long pasin demokratik olgeta lain i mas i gat mausman bilong ol na ol bai wokim eleksen na kempein na votim man. Kain pasin olsem i no insait long pasin bilong makim man long pasin tiokratik. Dispela i no wok bilong ol man o wanpela koporesen em gavman i orait long wok bilong en, nogat. Pol i stori long Jisas na Jehova i makim em long ‘mekim wok namel long ol manmeri bilong ol arapela lain’ na em i tokim ol Galesia olsem: “Ol man ol i no salim mi, na wanpela man i no bin putim mi long wok aposel. Nogat. Mi bin kisim dispela wok long han bilong Jisas Krais wantaim God Papa, em i bin kirapim Krais long matmat.”​—⁠Rom 11:13; Galesia 1:⁠1.

Spirit Holi i Makim Ol

9. Aposel 20:28 i tok wanem long pasin bilong makim ol wasman Kristen?

⁹ Pol i kirapim ol wasman i stap long Efesus long tingim olsem spirit holi bilong God i bin makim ol long holim dispela wok. Em i tok: “Yupela i mas was gut long yupela yet, na long olgeta manmeri bilong sios bilong God, em ol dispela manmeri em i bin baim long blut bilong Pikinini bilong em yet. Na Holi Spirit i makim yupela i stap wasman bilong ol dispela sipsip bilong God.” (Aposel 20:28) Ol dispela wasman Kristen i mas larim spirit holi i stiaim ol taim ol i mekim wok wasman namel long ol sipsip bilong God. Sapos wanpela man i holim wok wasman na em i no winim moa mak God i putim, bihain spirit holi bai mekim wok bilong rausim dispela man long wok bilong em.

10. Olsem wanem spirit holi i gat bikpela wok long mekim insait long pasin tiokratik bilong makim man?

¹⁰ Olsem wanem spirit holi i mekim bikpela wok olsem? Namba wan samting, spirit holi yet i bin kamapim ol tok i kolim ol mak man i mas winim bilong mekim dispela wok. Long ol pas Pol i salim long Timoti na Taitus, Pol i kolim ol mak man i mas winim bilong mekim wok olsem wasman na wokman bilong kongrigesen. Em i kolim 16 narapela narapela mak. Olsem: Ol man i kamap wasman ol man i no inap lukim wanpela rong long ol, ol i mas tingting stret long ol samting ol i mekim, na bihainim ol gutpela tingting tasol, na mekim stret wok bilong ol, na lukautim gut ol man i kam long haus bilong ol, na save gut long pasin bilong skulim ol manmeri long pasin God i laikim, na bosim gut meri pikinini bilong ol yet. Ol i no ken spak, na laikim tumas long kisim mani, na belhat kwik. Na tu, i gat klostu wankain mak ol man i laik kamap wokman bilong kongrigesen i mas winim.​—⁠1 Timoti 3:​1-10, 12, 13; Taitus 1:​5-9.

11. Wanem sampela mak ol man i laik mekim wok insait long kongrigesen i mas winim?

¹¹ Taim yumi skelim ol dispela mak, yumi kisim save olsem ol man i go pas long lotuim Jehova ol i mas i stap olsem gutpela piksa long bihainim pasin Kristen. Ol man i laik holim wok long kongrigesen ol i mas kamapim long ples klia olsem spirit holi i wok long stiaim ol. (2 Timoti 1:14) Ol dispela man i mas kamapim long ples klia olsem spirit bilong God i wok long kamapim ol dispela pasin long ol, olsem ‘laikim tru ol arapela na amamas na stap bel isi na no belhat kwik na helpim ol man na mekim gutpela pasin long ol na wokabaut stret oltaim na stap isi na daunim laik bilong olpela bel.’ (Galesia 5:​22, 23) Ol bai kamapim ol dispela pasin long ol samting ol i mekim long ol wanbilip na ol narapela. Tru, ating sampela bai kamapim moa yet sampela pasin em spirit holi i as bilong en, na sampela bai winim moa yet sampela narapela mak bilong kamap wasman. Tasol long olgeta samting ol i mekim, ol brata i gat laik long kamap wasman o wokman bilong kongrigesen ol i mas soim olsem ol i save tingim ol samting bilong spirit na ol i winim ol mak Tok Bilong God i kolim.

12. Yumi ken tok spirit holi i save makim husat?

¹² Taim Pol i tokim ol narapela long bihainim pasin bilong em, em i no sem long tok olsem, long wanem, em yet i bihainim pasin bilong Jisas Krais, na Jisas i “soim [yumi] pinis dispela pasin bilong em, bai [yumi] i ken bihainim.” (1 Pita 2:21; 1 Korin 11:⁠1) Olsem na ol man i winim ol mak Baibel i kolim na ol i makim ol man bilong mekim wok olsem wasman o wokman bilong kongrigesen, yumi ken tok olsem spirit holi i bin makim ol.

13. Olsem wanem spirit holi i helpim ol elda ol i gat wok long skelim husat inap kamap wasman o wokman bilong kongrigesen?

¹³ I gat narapela samting i save kamapim olsem wanem spirit holi i save wok long skelim na makim ol wasman. Jisas i tok “Papa bilong yupela i stap long heven em bai i amamas long givim Holi Spirit long ol man i askim em.” (Luk 11:13) Olsem na taim ol elda bilong wanpela kongrigesen i bung bilong skelim ol brata ol i pilim olsem ol i winim mak, ol i save beten askim God long spirit bilong em i ken stiaim tingting bilong ol. Ol i save lukim tok i stap long Baibel na spirit holi i helpim ol long skelim gut long tingting olsem brata i winim ol mak Baibel i kolim o nogat. Ol brata i wok long skelim olsem brata i winim ol mak o nogat, ol i no ken lukluk long ai tasol na skelim, na tingting long hamas skul em i bin kisim o long save bilong em. Bikpela samting ol i mas tingim i olsem: Dispela man em i man bilong tingting long ol samting bilong spirit na ol brata sista long kongrigesen i no pret long askim em long givim sampela gutpela tok bilong Baibel bilong helpim ol.

14. Yumi kisim wanem save long tok bilong Aposel 6:​1-3?

¹⁴ Tru, ol lain elda i save wok wantaim ol wasman bilong raun long tokaut olsem ol i tingim husat ol brata i winim mak bilong mekim wok elda o wokman, tasol bilong makim ol, ol i bihainim pasin ol kongrigesen i bin bihainim long taim bilong ol aposel. Long wanpela taim ol i sot long sampela man i winim mak bilong spirit long lukautim wanpela bikpela wok. Lain bilong lukautim ol Kristen i tokim ol olsem: “Yupela i mas painim 7-pela man namel long yupela, ol i gat gutpela nem namel long ol manmeri, na Holi Spirit i pulap long ol, na ol i gat gutpela save. Na yumi ken putim ol dispela man bilong lukautim dispela wok.” (Aposel 6:​1-3) Tru ol Kristen i gat namba long dispela hap yet ol i bin skelim husat brata ol inap mekim dispela wok, tasol ol man i gat namba bilong makim ol, em ol man i stap long Jerusalem. Ol i bihainim wankain pasin long nau.

15. Olsem wanem Gavening Bodi i insait long wok bilong makim ol man long mekim wok insait long oganaisesen?

¹⁵ Gavening Bodia Bilong Ol Witnes Bilong Jehova i save makim ol brata i stap long ol Komiti Bilong Brens. Taim ol i mas pasim tok long husat bai kisim bikpela wok olsem, Gavening Bodi i save tingim dispela tok bilong Jisas: “Ol man i kisim planti samting, ol i mas bekim planti samting gen. Sapos ol manmeri i putim planti samting long han bilong wanpela man, orait ol bai i tokim em long bekim planti samting moa.” (Luk 12:48) Na tu, Gavening Bodi i save makim ol elda bilong Betel na ol wasman bilong raun. Tasol ol i save makim sampela brata long i stap mausman bilong ol na mekim dispela wok bilong makim ol wasman na wokman samting. Baibel i as bilong dispela pasin.

‘Makim Ol Hetman, Olsem Mi Bin Tokim Yu Bipo’

16. Bilong wanem Pol i bin lusim Taitus long Krit? Na dispela i givim wanem save long yumi long pasin tiokratik bilong makim ol man long nau?

¹⁶ Pol i tokim wanwok bilong em Taitus: “Mi bin lusim yu i stap long ailan Krit, bilong yu ken stretim olgeta hap wok i no stret yet, na yu ken makim ol hetman bilong sios long olgeta taun, olsem mi bin tokim yu bipo.” (Taitus 1:⁠5) Orait nau Pol i kolim ol mak Taitus mas tingim taim em i skelim ol man, ol i winim mak bilong mekim kain wok olsem o nogat. Olsem na long nau, Gavening Bodi i makim ol strongpela brata long ol brens-ofis long i stap olsem ol mausman bilong ol, bilong makim ol elda na wokman bilong kongrigesen. Ol i was gut bambai ol brata ol i stap olsem mausman bilong Gavening Bodi ol i klia tru na bihainim stret ol tok Baibel i kamapim long pasin bilong makim ol elda na wokman bilong kongrigesen. Olsem na long dispela rot Gavening Bodi i save makim ol man i winim ol mak bilong mekim wok insait long ol kongrigesen bilong ol Witnes Bilong Jehova long olgeta hap.

17. Ol brens-ofis i save mekim wanem taim ol lain elda i tokim ol olsem ol i ting wanpela brata inap kamap wanpela wasman o wokman bilong kongrigesen?

¹⁷ Taim wanpela brens-ofis bilong Sosaiti Was Taua i kisim tok bilong ol lain elda olsem ol i ting wanpela brata inap kamap wasman o wokman bilong kongrigesen, ol man i gat save pinis ol i larim spirit bilong God i stiaim ol long makim ol dispela brata. Ol dispela man i gat namba long makim ol brata ol i save ol i mas bekim tok long God long samting ol i mekim, olsem na ol i save ol i no ken hariap long makim wanpela man, nogut sin bilong dispela man i pas long ol.​—⁠1 Timoti 5:⁠22.

18, 19. (a) Taim ol i laik tokaut long husat ol i makim, ol i save mekim olsem wanem? (b) Dispela pasin bilong tingim na makim ol brata bilong mekim wok insait long kongrigesen i wok olsem wanem?

¹⁸ Taim ol i laik tokaut long husat ol i makim, ol bai salim wanpela pas i gat mak bilong wanpela koporesen i stap long en. Sampela taim ol bai salim kain pas olsem bilong makim sampela brata long wanpela kongrigesen.

¹⁹ Wok wasman na wokman bilong kongrigesen em ol brata i kisim long pasin tiokratik, em i kam long Jehova long rot bilong Pikinini bilong em na lain bilong em hia long graun, em lain “wokboi i gat gutpela tingting” na maus bilong en, em Gavening Bodi. (Matyu 24:​45-47) Olgeta wok bilong tingim na makim ol man long kamap elda o wokman, em spirit holi yet i save stiaim dispela wok. Yumi ken tok olsem, long wanem, ol mak man i mas winim i stap long Baibel, na spirit holi i bin kamapim olgeta tok bilong en, na brata ol i makim i kamapim ol pasin bilong spirit holi long ol samting em i mekim. Olsem na yumi ken tok spirit holi i bin makim ol dispela man long mekim wok. Long taim bilong ol aposel ol i bin bihainim pasin tiokratik long makim ol wasman na wokman bilong kongrigesen, na ol i bihainim wankain pasin long nau.

Amamas Long Jehova i Stiaim Yumi

20. Bilong wanem bel bilong yumi i kirapim yumi long mekim wankain tok olsem Devit i bin mekim long Song 133:⁠1?

²⁰ Long nau yumi kisim planti samting bilong spirit na wok bilong autim tok bilong Kingdom i go bikpela, na yumi ken amamas olsem Jehova i go pas long dispela wok bilong makim ol wasman na wokman bilong kongrigesen. Dispela pasin, em Baibel i as bilong en, i save helpim yumi ol Witnes Bilong Jehova long bihainim ol stretpela lo bilong God. Na tu, pasin Kristen na hatwok bilong ol dispela wasman na wokman bilong kongrigesen i save helpim gutpela bel isi na pasin wanbel bilong yumi ol wokboi bilong Jehova. Olsem na bel bilong yumi i kirapim yumi long mekim wankain tok olsem Devit: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut.”​—⁠Song 133:⁠1.

21. Olsem wanem tok bilong Aisaia 60:17 i wok long kamap tru long nau?

²¹ Yumi amamas tru long Jehova i save stiaim yumi long rot bilong Baibel na spirit holi bilong em! Na Aisaia 60:17 i kamapim wanpela tok i gat insait tru bilong en, em i tok: “Bai mi senisim ol bras bilong yu wantaim gol, na ol ain bilong yu wantaim silva. Na bai mi senisim tu ol plang bilong yu wantaim bras na ol ston bilong yu wantaim ain. Na bai mi makim pasin bilong gutpela sindaun na bel isi bilong bosim yu, na stretpela pasin bai i stiaim wokabaut bilong yu. Na bai i no gat man moa i bosim yu na mekim nogut long yu.” Taim ol Witnes Bilong Jehova i wok moa yet long bihainim pasin tiokratik long ol samting ol i mekim, yumi bin kisim ol gutpela blesing long olgeta hap bilong oganaisesen bilong God long graun.

22. Em i stret yumi amamas long wanem samting? Yumi mas strong long mekim wanem?

²² Yumi amamas tru long ol pasin tiokratik i stap bilong stiaim ol samting yumi laik mekim. Na long pasin tiokratik ol wasman na wokman bilong kongrigesen ol i kisim dispela wok, na yumi amamas long hatwok ol i mekim. Yumi givim bel olgeta long givim biknem long Papa bilong yumi long heven, em i givim planti samting bilong spirit long yumi na blesim tru yumi. (Sindaun 10:22) Olsem na yumi mas strong long wokabaut i go wantaim oganaisesen bilong Jehova. Na bikpela samting moa yet, yumi laik i stap wanbel yet long mekim wok i litimapim tru nem holi bilong Jehova.

[Futnot]

Bai Yu Bekim Olsem Wanem?

• Bilong wanem yumi ken tok olsem taim ol i makim ol wasman na wokman bilong kongrigesen ol i bihainim pasin tiokratik, pasin demokratik nogat?

• Olsem wanem spirit holi i save makim ol strongpela man Kristen long mekim wok?

• Olsem wanem Gavening Bodi i insait long wok bilong makim ol man long kamap wasman na wokman bilong kongrigesen?

• Ol i bihainim pasin tiokratik na makim ol man long mekim wok, na bilong wanem yumi mas tenkyu long Jehova long dispela samting?

[Ol Piksa long pes 15]

Ol elda na wokman bilong kongrigesen, em ol i makim ol long pasin tiokratik, ol i holim gutpela wok