Ol Witnes Bilong Jehova—Ol i Wok i Go Moa Wantaim Strongpela Bilip!

Ripot Bilong Miting Bilong Olgeta Yia

LONG dispela taim bilong planti man i no save bilip tumas long ol samting, ol Witnes Bilong Jehova i narapela kain, long wanem, ol i gat strongpela bilip. Dispela samting i kamap klia long miting bilong olgeta yia bilong Sosaiti Was Taua bilong Pensilvenia. Ol i wokim dispela miting long Haus Kibung bilong ol Witnes Bilong Jehova long Jesi Siti, Nu Jesi, long Sarere, Oktoba 7, 2000.a

Wanpela memba bilong Gavening Bodi na siaman bilong program, em John E. Barr, em i kirapim program na em i tok: “Namel long planti bilion manmeri bilong dispela graun, yumi save na bilip olsem Pikinini bilong Jehova, em Krais Jisas, em i sindaun long sia king long heven na bosim ol man namel long ol birua bilong em.” Inap 6-pela gutpela ripot i kam long olgeta hap bilong graun ol i kamapim klia dispela strongpela bilip bilong ol Witnes.

Tok i Tru Bilong Baibel i Daunim Wok Bilong Ol Spirit Nogut Long Haiti

Planti man long Haiti i save mekim wok bilong ol spirit nogut. Kodineta bilong Komiti Bilong Brens, em John Norman, em i tok: “Planti man i save mekim wok bilong ol spirit nogut ol i kolim vudu bilong lukautim ol yet.” Wanpela glasman i tingting planti taim bagarap i painim em na ol i katim na rausim wanpela lek bilong em. Em i ting: ‘Olsem wanem dispela samting inap painim mi sapos ol spirit i save lukautim mi?’ Olsem planti narapela man, dispela man i kisim save long tok i tru long rot bilong ol Witnes Bilong Jehova, na ol i helpim em long lusim wok bilong ol spirit nogut. Namba bilong ol man i bung long Memorial bilong tingim indai bilong Krais long Epril 19, 2000, i winim namba bilong ol pablisa bilong Kingdom inap 4-pela taim, na dispela i kamapim klia olsem namba bilong ol pablisa inap i go bikpela tru long Haiti.

Ol i Givim Bel Long Autim Tok Long Bikpela Teritori Bilong Korea

Long Korea, inap 40 pesen bilong ol Witnes Bilong Jehova ol i save mekim wok bilong God long olgeta de. Kodineta bilong Komiti Bilong Brens, em Milton Hamilton, em i tok: “Teritori bilong mipela i gat 47 milion manmeri long en, tasol mipela i gat bikpela lain bilong autim tok, olsem na inap wanpela taim long olgeta mun mipela i save autim tok long teritori bilong mipela.” Namba bilong ol pablisa long ol kongrigesen bilong ol yaupas i go bikpela tru. Long wanpela sekit bilong ol yaupas, ol i lukautim 800 Baibel-stadi. I olsem olgeta pablisa i gat wanpela stadi. Sori tru, ol yangpela brata i mas kalabus yet, long wanem, ol i no laik insait long ol samting bilong pait. Tasol lain bilong kalabus i save mekim gutpela pasin long ol dispela gutpela Kristen, na ol i save givim gutpela wok long planti brata, em wok ol i save givim long man ol inap bilip long em.

Helpim Lain Pablisa Long Meksiko, Em i Go Bikpela

Inap 533,665 pablisa bilong Kingdom i putim ripot bilong wok autim tok long Meksiko long Ogas 2000. Namba bilong lain i kam long Memorial i winim namba bilong ol pablisa inap 3-pela taim. Kodineta bilong Komiti Bilong Brens, em Robert Tracy, em i tok: “Mipela i putim mak bilong sanapim 240 Haus Kingdom moa long dispela yia. Tasol mipela i mas kisim planti Haus Kingdom moa.”

Ol yangpela bilong ol Witnes Bilong Jehova long Meksiko ol i gat gutpela pasin tru. Wanpela pater bilong Misin Katolik i stori long wanpela yangpela olsem: “Mi laik bai namel long lain bilong mi i gat wanpela man i kain olsem em. Mi amamas tru long dispela lain, long wanem, ol i strong long bihainim bilip bilong ol na ol i mekim gutpela wok long Baibel. Ol i tokaut strong long wok king bilong God, maski ol inap i dai taim ol i mekim olsem.”

Ol i Stap Gut Long God Long Taim Nogut Long Siera Leon

Kirap long Epril 1991, em taim pait i kirap insait long Siera Leon, planti tausen manmeri i bin dai, o skin bilong ol i kisim bikpela bagarap. Kodineta bilong Komiti Bilong Brens, em Bill Cowan, em i tok: “Pait na ol bikpela hevi i bin kirapim tru tingting bilong ol manmeri. Planti man em bipo ol i no laik harim tok bilong yumi, nau ol i gat laik long harim. Planti man i save kam nating insait long ol Haus Kingdom bilong yumi bilong kam long namba wan miting bilong ol. Planti man i save go toktok wantaim ol brata long rot na askim ol long stadi long Baibel wantaim ol.” Maski planti hevi i wok long kamap insait long dispela kantri, wok bilong autim tok bilong Kingdom i karim kaikai long Siera Leon.

Bikpela Wok Bilong Sanapim Ol Haus Kingdom Long Saut Afrika

Long nau ol i sot long planti tausen Haus Kingdom long teritori em brens-ofis bilong Saut Afrika i save lukautim. Ol i sanapim pinis planti handet Haus Kingdom. Wanpela bilong Komiti Bilong Brens, em John Kikot, em i tok: “Bipo ol brata bilong yumi i bin bung aninit long wanpela diwai o long wanpela haus ol i no wokim gut, tasol nau ol inap bung long wanpela gutpela haus i gat ol sia long en. Maski ol dispela Haus Kingdom i no gat planti gutpela bilas long en, ol i winim ol narapela haus long hap ol i stap long en. Long sampela hap, bihain long ol i wokim pinis Haus Kingdom, namba bilong ol pablisa bilong kongrigesen i dabol insait long yia bihain.”

Nupela Lain Witnes Long Yukren

Long yia bilong wok bilong 2000, dispela kantri i gat 112,720 pablisa, winim olgeta taim bipo. Winim 50,000 bilong ol i bin kisim save long tok i tru bilong Baibel insait long 5-pela yia i go pinis. Kodineta bilong Komiti Bilong Brens, em John Didur, em i tok: “Tru tumas, Jehova i bin kirapim nupela yangpela lain Witnes bilong litimapim nem bilong em! Insait long tupela yia i go pinis, mipela i bin tilim 50 milion nius​—⁠namba bilong ol manmeri bilong dispela kantri i wankain. Long olgeta mun, mipela i kisim wan tausen pas i kam long ol man i gat laik long kisim sampela save moa.”

Ol Narapela Gutpela Samting Bilong Program

Daniel Sydlik, em i wanpela memba bilong Gavening Bodi, em i mekim wanpela tok i kirapim tingting bilong ol brata sista. Dispela tok em i as bilong wanpela stori i stap long dispela nius, nem bilong en “Gavening Bodi i Narapela Long Sosaiti Was Taua Bilong Pensilvenia.”

Theodore Jaracz bilong Gavening Bodi i mekim wanpela tok i kirapim tingting bilong ol man, nem bilong en “Ol i Makim Ol Wasman na Wokman Bilong Kongrigesen Long Pasin Tiokratik.” Wanpela stori i stap long dispela nius i stori long dispela samting.

David Splane bilong Gavening Bodi i mekim wanpela gutpela tok i stori long yia-teks bilong yia 2001. Tok bilong aposel Pol i as bilong yia-teks: “Sanap strong na bilip tru long olgeta laik bilong God.” (Kolosi 4:​12, NW ) Ol Witnes Bilong Jehova long olgeta hap bilong graun, ol i tingting strong long mekim olsem taim ol i stap gut long wok bilong autim gutnius bilong Kingdom bilong God long olgeta hap bilong graun.​—⁠Matyu 24:14.

[Futnot]