Yu Inap Daunim Bel Hevi!
WANPELA saveman i bin tok olsem: “Sapos taim nogut i painim yu na bun bilong yu i slek, orait yu no gat strong tru.” (Sindaun 24:10) Sapos yu bin bel hevi long sampela taim, yu bai wanbel long dispela tok.
I no gat wanpela man em i no save bel hevi. Sapos em i bel hevi liklik, ating em bai stap olsem inap wanpela o tupela de samting na bel hevi bai pinis. Tasol taim bel i bagarap o yumi bel nogut, dispela hevi inap stap longpela taim moa. Sampela Kristen em ol i bin stap gut long Jehova inap planti yia, ol i kisim bikpela bel hevi na dispela i mekim na ol i lusim ol miting bilong kongrigesen na ol i no insait moa long wok autim tok.
Sapos yu bel hevi, strongim bel! Ol gutpela wokboi bilong God long bipo ol i bin daunim bel hevi, na God bai helpim yu, na yu tu inap long mekim olsem.
Taim Ol Narapela i Bagarapim Bel Bilong Yu
Yu no ken ting olsem yu inap abrusim sampela liklik tok kranki ol narapela i mekim o sampela pasin ol i mekim long yu na ol i no bin tingting gut pastaim. Tasol yu inap mekim wanpela samting, olsem: Yu no ken larim ol popaia bilong ol narapela i pasim yu long mekim wok bilong Jehova. Sapos wanpela man i bin bagarapim bel bilong yu, ating yu inap kisim helpim taim yu tingim olsem wanem Hana, em mama bilong Samuel, em i bin daunim bel hevi bilong em.
Hana i gat bikpela laik tru long karim pikinini, tasol em i no inap. Namba tu meri bilong man bilong em, Penina, em i karim pinis ol pikinini man na ol pikinini meri. Penina inap long pilim hevi bilong Hana, tasol nogat; Penina i tingim Hana olsem wanpela birua na em i mekim pasin nogut long em, olsem na Hana i ‘krai na i no save kaikai.’—1 Samuel 1:2, 4-7.
Wanpela taim Hana i go long haus lotu sel bilong mekim beten. Eli, em hetpris bilong Israel, em i lukim Hana i opim maus long pasin bilong toktok. Em i no save olsem Hana i wok long beten, olsem na Eli i ting em i spak. Em i tok strong long Hana olsem: “Wanem taim bai yu lusim pasin bilong spak? Yu mas lusim dispela [pasin].” (1 Samuel 1:12-14) Man! Yu inap tingim bikpela bel hevi bilong Hana? Em i kam long haus lotu bilong kisim strong. Em i no ting wanpela man i gat biknem tru long Israel em bai sutim nating tok long em!
Long dispela taim rot i op long Hana inap kisim bikpela bel hevi. Ating kwiktaim em inap long lusim haus lotu, na tokaut strong olsem em bai i no inap i go bek long haus lotu long olgeta taim Eli i mekim wok long en olsem hetpris. Tasol nogat! Hana i tingim pasin bilong em long pas gut wantaim Jehova em i bikpela samting. Em i save olsem God bai i no inap amamas sapos em i mekim kain pasin olsem. Haus lotu sel em ples bilong lotu tru long Jehova. Jehova i bin putim nem bilong em long dispela haus. Na maski Eli i gat sin long skin, Jehova i makim em olsem mausman bilong em.
Gutpela pasin bilong Hana long bekim tok Eli i sutim long em, dispela i olsem gutpela piksa bilong yumi ken bihainim long nau. Em i no larim Eli i sutim nating tok long em, tasol em i bekim tok long gutpela pasin daun. Em i bekim tok olsem: “Bikman, mi no spak. Mi no bin dringim wain na bia samting. Nogat tru. Mi bel hevi nogut tru, olsem na mi prea na autim hevi bilong mi long Bikpela. Yu no ken ting mi olsem wanpela meri nogut. Nogat. Mi pilim nogut tru na tingting bilong mi i bagarap. Olsem na mi beten long dispela pasin yu bin lukim.”—1 Samuel 1:15, 16.
Yu ting Hana i kamapim klia tok bilong em? Yes, em i bin mekim olsem. Em i toktok gut long Eli; em i no mekim sampela tok nogut long pasin bilong Eli long sutim nating tok long em. Na Eli tu i bekim gutpela tok long em, olsem: “Maski, yu ken bel isi na yu go. Na God bilong yumi Israel i ken givim yu dispela samting yu bin askim em.” Taim ol i stretim pinis dispela samting, Hana ‘i go na em i kaikai na bihain em i no moa bel hevi.’—1 Samuel 1:17, 18.
Dispela stori i skulim yumi long wanem samting? Hana i kirap kwik long stretim wanpela tingting kranki, tasol em i mekim long pasin daun. Olsem na long dispela rot em i no bagarapim pasin bilong em long pas gut wantaim Jehova na Eli. Planti taim, pasin bilong toktok gut wantaim na mekim pasin i no skrapim bel bilong narapela, em inap pasim ol liklik hevi long kamap bikpela!
Yumi mas luksave olsem bilong stretim ol pasin kranki namel long yumi yet na ol narapela, yumi olgeta i mas i gat pasin daun na yumi mas redi long senisim tingting bilong yumi. Sapos wanpela wanbilip i no orait long ol samting yu mekim bilong stretim wanpela hevi namel long yupela, orait yu ken lusim dispela hevi long han bilong Jehova, na bilip olsem em bai stretim dispela hevi long taim na long rot bilong em yet.
Olsem Wanem? Yu Mas Lusim Wanpela Gutpela Wok?
Sampela man ol i bel hevi, long wanem, ol i mas lusim wanpela gutpela wok bilong God ol i bin mekim. Ol i bin amamas long mekim wok bilong helpim ol brata bilong ol, na taim ol i mas lusim dispela gutpela wok, ol i pilim olsem ol i no inap long mekim wok moa long ol. Sapos yu pilim olsem, orait yu inap kisim stretpela tingting taim yu skelim stori bilong wanpela man bilong raitim Baibel, em Mak; narapela nem bilong em Jon Mak.—Aposel 12:12.
Mak i bin i go wantaim Pol na Barnabas long namba wan raun bilong ol long autim gutnius, tasol taim ol i go inap sotpela hap tasol, em i lusim ol na i go bek long Jerusalem. (Aposel 13:13) Bihain, Barnabas i laik kisim Mak i go wantaim ol long narapela raun gen. Tasol Baibel i kamapim tok bilong Pol, em i tok: “Dispela man bipo em i bin lusim mitupela long provins Pamfilia, na em i no laik i go wantaim mitupela long mekim wok, olsem na mitupela i no ken kisim em i go wantaim mitupela.” Barnabas i no wanbel long tok bilong Pol. Baibel i stori moa: “Tupela i tok kros planti long dispela samting. Olsem na [Pol na Barnabas] i bruk na tupela i no moa wok wantaim. Barnabas i kisim Mak i go wantaim em, na tupela i kalap long wanpela sip na i go long ailan Saiprus. Na Pol i kisim Sailas.”—Aposel 15:36-40.
Ating Mak i pilim nogut tru taim em i kisim save olsem aposel Pol, em man i gat nem, em i no laik wok wantaim em, na tu, i gat wanpela tok pait i kamap long ol pasin bilong em long mekim wok, na dispela i mekim na Pol na Barnabas i bruk. Tasol i gat sampela samting moa i kamap.
Pol na Sailas ol i sot yet long wanpela poroman bilong raun wantaim ol. Taim ol i kamap long Listra, ol i painim wanpela man bilong senisim Mak, em wanpela yangpela man nem bilong em Timoti. Ating taim ol i makim Timoti, em i bin kisim baptais inap 2-pela o 3-pela yia tasol i go pinis. Tasol Mak i bin stap wantaim kongrigesen Kristen kirap long taim em i kamap nupela—em i stap longpela taim moa, winim Pol. Tasol Timoti i kisim dispela gutpela wok.—Aposel 16:1-3.
Mak i pilim olsem wanem taim em i kisim save olsem wanpela yangpela man em i no gat planti save long mekim wok em i kisim ples bilong em? Baibel i no stori long dispela samting. Tasol Baibel i tok, Mak i stap gut yet long mekim wok bilong Jehova. Em i mekim gut ol dispela wok em inap yet long mekim. Maski em i no inap long wok wantaim Pol na Sailas, em inap long i go wantaim Barnabas long Saiprus, em as ples bilong Barnabas. Na tu, Mak i wok wantaim Pita long Babilon. Bihain, rot i op long em i ken wok wantaim Pol—na Timoti—long Rom. (Kolosi 1:1; 4:10; 1 Pita 5:13) Na bihain moa, spirit holi i kirapim Mak long raitim wanpela bilong ol 4-pela Gutnius!
I gat wanpela gutpela samting yumi inap lainim long dispela stori. Mak i no tingting planti tumas long gutpela wok em i lusim na larim dispela samting i pasim em long mekim ol wok em inap long mekim. Mak i wok strong yet long mekim wok bilong Jehova, na Jehova i blesim em.
Olsem na sapos yu mas lusim wanpela gutpela wok samting, yu no ken bel hevi. Sapos yu holim stretpela tingting na wok strong yet long mekim wok bilong God, rot bai op na yu ken mekim ol narapela gutpela wok. I gat planti samting bilong mekim long wok bilong Bikpela.—1 Korin 15:58.
Wanpela Gutpela Wokman Bilong Jehova i Bel Hevi
I hatwok long pait strong long holimpas bilip. Sampela taim bai yu bel hevi. Na ating yu bai pilim olsem i no stret yu stap bel hevi, na yu ting olsem wanpela gutpela wokman bilong God em i no ken pilim olsem. Tingim Elaija, em i wanpela strongpela profet bilong Israel.
Kwin Jesebel bilong Israel em wanpela meri i bin wok strong long mekim lotu Bal i go bikpela, na taim em i kisim save olsem Elaija i kilim i dai ol profet bilong Bal, em i tok tru antap long kilim Elaija i dai. Elaija i bin daunim ol birua em ol i gat bikpela strong moa winim strong bilong Jesebel, tasol nau wantu tasol em i bel hevi tru na em i laik i dai. (1 King 19:1-4) Olsem wanem dispela samting inap kamap? Em i lusim tingting long wanpela samting.
Elaija i lusim tingting long lukluk i go long Jehova olsem As bilong strong bilong em. Husat i bin givim strong long Elaija long kirapim bek man i dai pinis na long daunim ol profet bilong Bal? Em Jehova tasol. Tru tumas, Jehova inap givim strong long em long sanap strong, na em i no ken larim belhat bilong Kwin Jesebel i daunim em.—1 King 17:17-24; 18:21-40; 2 Korin 4:7.
Sampela taim ating yumi olgeta i tubel liklik long pasin bilong bilip na wetim Jehova. Olsem Elaija, ating sampela taim yu bai kisim tingting bilong ol man long wanpela hevi, na yu no mekim wok long “gutpela tingting na save i kam long God” bilong helpim yu long karim dispela hevi. (Jems 3:17) Tasol Jehova i no lusim Elaija, maski inap sotpela taim bilip bilong em i no strong tumas.
Elaija i bin ranawe i go long Berseba, na bihain em i go long ples drai nating, na em i ting i no gat man bai painim em long dispela hap. Tasol Jehova i painim em. Em i salim wanpela ensel bilong mekim gut bel bilong em. Dispela ensel i lukautim Elaija long bret ol i kukim nupela na em i givim gutpela wara long em bilong dring. Taim Elaija i malolo pinis, dispela ensel i tokim em long wokabaut inap 300 kilomita samting i go long maunten Horep, na long dispela hap Jehova bai strongim em moa yet.—1 King 19:5-8.
Long maunten Horep, Elaija i lukim Jehova i kamapim bikpela strong bilong em, na dispela i strongim tru bilip bilong Elaija. Bihain, long wanpela nek i toktok isi tru Jehova i tokim em olsem em i no i stap wanpis. Jehova i stap wantaim em, na 7,000 brata bilong em ol tu i stap wantaim em, maski Elaija i no save long ol. Orait, nau Jehova i makim sampela wok em i mas mekim. Em i no pinisim Elaija olsem profet bilong em!—1 King 19:11-18.
I Gat Helpim
Sapos sampela taim yu bel hevi liklik, bai yu lukim olsem yu bai pilim gutpela moa sapos yu kisim liklik malolo o yu kisim gutpela kaikai. Nathan H. Knorr, em i wanpela memba bilong Gavening Bodi i go inap long taim em i dai long 1977, em i bin tok olsem ol bikpela hevi bai kamap olsem ol liklik hevi sapos yu kisim gutpela slip long nait. Tasol sapos dispela hevi i stap yet, orait maski yu kisim gutpela slip, em bai i no inap daunim dispela hevi—yu mas kisim helpim bilong daunim bel hevi.
Jehova i bin salim wanpela ensel bilong strongim Elaija. Long nau, God i save strongim yumi long rot bilong ol elda na ol strongpela Kristen. Ol elda i stap olsem “ples hait ol manmeri i ken i go na hait long en long taim bilong bikpela win.” (Aisaia 32:1, 2) Tasol sapos yu laik bai ol i strongim yu, orait yu yet i mas mekim sampela samting bambai ol i ken strongim yu. Elaija i bin bel hevi tru, tasol em i go long maunten Horep bilong Jehova i ken tokim em long ol samting em i mas mekim. Yumi save kisim ol gutpela tok bilong strongim yumi long rot bilong kongrigesen Kristen.
Taim yumi orait long kisim helpim na sanap strong long ol traim i save painim yumi, olsem yumi bel hevi o yumi mas lusim wanpela gutpela wok bilong spirit, yumi helpim Jehova long bekim wanpela bikpela tok. Em wanem tok? Satan i bin tok olsem ol man i save mekim wok bilong Jehova, long wanem, ol i tingim ol yet tasol. Satan i save pinis olsem yumi bai mekim wok bilong Jehova taim olgeta samting long i stap bilong yumi i wok gut, tasol em i tok yumi bai lusim wok bilong God taim ol hevi i painim yumi. (Jop, sapta 1 na 2) Olsem na sapos yumi sanap strong long mekim wok bilong Jehova maski yumi bel hevi, yumi inap helpim Jehova long bekim ol tok Satan i sutim long em bilong bagarapim gutnem bilong em.—Sindaun 27:11.
Hana na Mak na Elaija ol i gat ol hevi i mekim na ol i no amamas inap sotpela taim. Tasol ol i karim ol dispela hevi na ol i mekim ol gutpela wok long i stap bilong ol. Jehova bai helpim yu, na yu tu inap long daunim bel hevi!