Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w01 3/15 p. 10-14
  • Winim Pait Bilong Daunim Sin i Stap Long Skin

No gat vidio bilong dispela seksen.

Sori, popaia kamap long lodim vidio.

  • Winim Pait Bilong Daunim Sin i Stap Long Skin
  • Wastaua i Tokaut Long Kingdom Bilong Jehova—2001
  • Ol Liklik Het Tok
  • Wankain Infomesen
  • Ol Traim na Sin Ol i Stap Tru
  • No Ken Ting Yu No Inap Pundaun
  • Yumi Inap Sakim Ol Traim!
  • Beten Inap Helpim Yumi
  • Mekim Ol Samting Bilong Sakim Traim
  • Rot Bilong Sakim Ol Traim
    Kirap!—2014
  • Hau Bai Mi Ken Sakim Traim?
    Askim Bilong Ol Yangpela
  • Traim
    2017 Kirap!
  • Was i Stap na Sakim Ol Traim
    Wastaua i Tokaut Long Kingdom Bilong Jehova (Stadi)—2024
Lukim Moa
Wastaua i Tokaut Long Kingdom Bilong Jehova—2001
w01 3/15 p. 10-14

Winim Pait Bilong Daunim Sin i Stap Long Skin

“Sapos tingting bilong man i bihainim laik bilong olpela bel tasol, orait dispela man bai i dai.”​​—⁠ROM 8:⁠6.

1. Sampela i ting olsem wanem long bodi bilong yumi man? I gat wanem askim yumi mas tingim?

“YU BIN wokim olgeta hap bilong bodi bilong mi . . . i narakain na i nambawan tru.” (Song 139:​13, 14) Devit i bin mekim dispela singsing taim em i tingim tingim wanpela samting Jehova i bin wokim​—⁠em bodi bilong man. Devit i litimapim nem bilong Jehova long dispela samting, tasol i gat sampela tisa bilong lotu em ol i ting bodi bilong yumi i olsem haus em sin i hait i stap long en, na sin i mekim wok long bodi bilong kamapim ol samting nogut. Sampela i bin kolim bodi bilong man olsem ‘samting bilong haitim pasin olsem no gat save liklik, na as bilong ol pasin nogut tru, na rop i kalabusim man long mekim olkain pasin i no stret, na laip i no gat amamas liklik long en, na bodi i dai pinis tasol em i wokabaut yet.’ Tru, aposel Pol i tok: “I no gat wanpela gutpela samting i stap insait long mi.” (Rom 7:18) Tasol yu ting dispela i makim olsem yumi stap kalabus insait long wanpela bodi i gat sin na yumi no inap lusim dispela kalabus?

2. (a) Wanem insait bilong dispela tok, “tingting bilong man i bihainim laik bilong olpela bel”? (b) Wanem pait namel long “bodi” na ‘spirit’ i save kamap insait long ol man i laik mekim ol samting God i laikim?

2 Sampela taim Baibel i kolim tok olsem “olpela bel” bilong makim man i gat sin, em i bin kisim long tumbuna bilong em, em bikhetman Adam. (Efesus 2:3; Song 51:5; Rom 5:12) Dispela sin yumi kisim long em i kamapim ol “pasin nogut” bilong olpela bel. (Rom 6:​19) Na Pol i mekim tok lukaut olsem: “Sapos tingting bilong man i bihainim laik bilong olpela bel tasol, orait dispela man bai i dai.” (Rom 8:⁠6) Insait bilong dispela tok, “tingting bilong man i bihainim laik bilong olpela bel,” i olsem: Ol laik nogut bilong skin i gat sin long en i bosim man na kirapim em long mekim ol pasin nogut. (1 Jon 2:​16) Olsem na sapos yumi laik mekim ol samting God i laikim, orait tingting bilong yumi long ol samting bilong spirit i save pait wantaim sin i stap long skin bilong yumi, em oltaim i save subim yumi strong long mekim ol “pasin bilong olpela bel.” (Galesia 5:​17-​23; 1 Pita 2:11) Pol i stori long dispela pait i stap insait long bodi bilong em, na bihain em i tok: “O sori, dispela hevi i bagarapim tru tingting bilong mi! Husat bai i helpim mi na mi lusim dispela bodi bilong i dai?” (Rom 7:24) Olsem wanem? Ol traim i bin pulim Pol na em i no inap sakim? Baibel i tok, nogat tru!

Ol Traim na Sin Ol i Stap Tru

3. Planti man i gat wanem tingting long sin na traim? Tasol Baibel i mekim wanem tok lukaut long dispela kain tingting?

3 Long nau planti man i no laik ting olsem sin em wanpela samting i stap tru. Sampela i tingim dispela tok “sin” i olsem samting nating, na ol i save kolim taim ol i stori long ol liklik pasin kranki bilong man. Ol i no save olsem “yumi olgeta i mas kamap long kot bilong Krais. Na sapos yumi bin mekim gutpela pasin long taim yumi stap long bodi o sapos yumi bin mekim pasin nogut, yumi olgeta wan wan bai i kisim pe inap long pasin yumi bin mekim.” (2 Korin 5:10) Na tok bilong sampela i makim olsem ol i no ting ol traim i samting nogut. Pasin bilong sampela lain, em ol i save strong long inapim kwik olgeta laik bilong bel, maski em i laik bilong kisim kaikai, o mekim maritpasin, o kisim amamas, o mekim wanpela wok. Ol i laik kisim olgeta samting, na ol i laikim nau tasol! (Luk 15:12) Ol i tingting tasol long ol amamas bilong nau, na ol i no tingting long amamas ol inap kisim bihain, em amamas bilong “dispela laip em i laip tru.” (1 Timoti 6:19) Tasol Baibel i skulim yumi long tingting gut na lukluk i go long ol samting bilong bihain, na abrusim olgeta samting inap bagarapim yumi long ol samting bilong spirit o bilong skin. Wanpela savetok bilong Baibel i tok: “Man i gat gutpela tingting, em i save olsem, hevi i laik kamap long em, na em i abrusim. Tasol man i no gat tingting, em i lukim trabel i stap long rot bilong en na em i go na bungim na karim hevi.”​—⁠Sindaun 27:⁠12.

4. Pol i givim wanem tok lukaut long ol Kristen long 1 Korin 10:​12, 13?

4 Taim Pol i raitim pas long ol Kristen long Korin​—⁠em wanpela taun i gat nem olsem ples bilong olkain pasin sem​—⁠em i givim tok lukaut long ol i toktok long ol traim na strong bilong sin. Em i tok: “Sapos wanpela man i ting em i sanap strong, orait em i mas lukaut gut. Nogut em i pundaun. Ol traim i bin kamap long yupela, ol i no ol narakain traim. Nogat. Ol i wankain olsem ol traim i save kamap long olgeta man. Na God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.” (1 Korin 10:​12, 13) Yumi olgeta​—⁠ol yangpela na lapun, ol man na meri​—⁠yumi save bungim planti traim long skul, long ples wok, o long ol narapela hap. Olsem na yumi mas skelim gut tok bilong Pol na bai yumi ken save, ol dispela tok inap helpim yumi olsem wanem.

No Ken Ting Yu No Inap Pundaun

5. Bilong wanem yumi no ken ting yumi gat strong long sakim ol traim?

5 Pol i tok: “Sapos wanpela man i ting em i sanap strong, orait em i mas lukaut gut. Nogut em i pundaun.” Sapos yumi ting yumi gat strong long sakim pasin i no stret, yumi mas lukaut. Dispela tingting i kamapim olsem yumi no save sin em i wanem samting, na yumi no save long strong bilong sin. Ol man olsem Moses, Devit, Solomon, na aposel Pita, ol i bin pundaun na mekim sin, olsem na yumi no ken ting yumi no inap mekim olsem, a? (Namba 20:​2-13; 2 Samuel 11:​1-27; 1 King 11:​1-6; Matyu 26:​69-75) Sindaun 14:16 i tok: “Man i gat gutpela tingting i save lukaut gut na abrusim olkain trabel. Tasol man i no gat gutpela tingting, em i ting em inap mekim olgeta kain samting, na em i no wari long pasin bilong en.” Na Jisas i tok: “Yupela i mas was na prea i stap. Nogut traim i kamap long yupela na yupela i pundaun. Tru, bel em i gat laik bilong mekim samting, tasol bodi em i no gat strong.” (Matyu 26:41) I no gat wanpela sinman bilong graun inap ting ol laik nogut bilong bel i no inap pulim em, olsem na yumi mas tingim gut tok lukaut bilong Pol na sakim ol traim. Sapos yumi no mekim olsem, yumi inap pundaun.​​—⁠Jeremaia 17:⁠9.

6. Wanem taim yumi mas redi long sakim ol traim? Yumi mas mekim wanem bilong redi long sakim?

6 Man i gat gutpela tingting em bai redi long sampela hevi inap kamap bihain. King Asa i bin lukim olsem gutaim em i taim stret bilong strongim banis bilong ol taun na mekim ol narapela wok bilong sakim ol birua long taim bilong pait. (2 Stori 14:​2, 6, 7) Em i save pinis, sapos em i kirap redim ol samting long taim ol birua i kam pait, em bai lus long pait. Na i wankain tu long yumi​—⁠taim yumi stap bel isi na tingting i klia na i no gat wanpela samting bilong traim yumi, dispela em i gutpela taim bilong tingim gut ol samting yumi bai mekim sapos wanpela traim i kamap. (Song 63:⁠6) Daniel wantaim ol poroman bilong em i stap aninit long God ol tu i bin tingim ol samting ol i mas mekim bilong i stap gut long lo bilong Jehova taim ol wokman bilong king i no strong yet long ol i mas kaikai ol gutpela gutpela kaikai bilong king. Olsem na ol i strong long holimpas bilip bilong ol na ol i no kisim ol kaikai i no klin long ai bilong God. (Daniel 1:⁠8) Taim ol samting i no kamap yet bilong traim yumi, yumi mas pasim tok strong long bel olsem yumi bai stap stret. Olsem bai yumi gat strong long sakim sin.

7. Taim yumi save i gat sampela moa ol i bin sakim ol traim, olsem wanem dispela i mekim gut bel bilong yumi?

7 Tok bilong Pol i strongim tru bel bilong yumi, em i tok: “Ol traim i bin kamap long yupela, ol i no ol narakain traim. Nogat. Ol i wankain olsem ol traim i save kamap long olgeta man”! (1 Korin 10:13) Aposel Pita i tok: “Yupela i mas i stap strong long bilip na sakim [Satan]. Yupela i save, ol arapela manmeri bilong God, ol i stap long olgeta hap bilong graun, ol tu i save karim wankain pen olsem yupela.” (1 Pita 5:⁠9) Tru tumas, ol narapela tu i bin kisim wankain traim, tasol God i helpim ol na ol i sakim ol dispela traim, na yumi tu inap mekim olsem. Tasol yumi ol Kristen tru i stap namel long ol lain bilong graun i save mekim ol kain kain pasin nogut, olsem na yumi save, i gat sampela traim bai painim yumi. Orait olsem wanem yumi ken save tru olsem yumi bai winim pait bilong daunim sin i stap long skin na sakim ol traim i laik kirapim yumi long mekim sin?

Yumi Inap Sakim Ol Traim!

8. Wanem wanpela rot bilong sakim ol traim?

8 Wanpela rot bilong helpim yumi na yumi no stap moa olsem “wokboi bilong sin” i olsem: Sapos inap, yumi mas abrusim ol traim. (Rom 6:⁠6) Sindaun 4:​14, 15 i tok: “Yu no ken wokabaut long rot bilong ol man nogut, na yu no ken bihainim pasin bilong ol. Yu mas abrusim tru dispela rot na yu mas i go i stap longwe long en.” Planti taim yumi save pinis long ol samting inap kirapim yumi long mekim sin. Olsem na samting yumi ol Kristen i mas mekim i stap ples klia​—⁠yumi mas “abrusim tru dispela rot,” olsem stap longwe long wanpela man o meri o wanpela samting o wanpela ples em inap kirapim ol laik nogut bilong bel na nau bel i kirap tru long mekim pasin i no stret.

9. Baibel i tok wanem long ranawe long ol samting i laik traim yumi?

9 Narapela rot bilong winim ol traim, em yumi mas ranawe long ol samting i laik traim yumi. Pol i tok: “Oltaim yupela i mas i stap longwe long pasin pamuk.” (1 Korin 6:18) Na em i tok: “Yupela i mas i stap longwe long pasin bilong lotu long ol giaman god.” (1 Korin 10:14) Na Pol i tokim Timoti long givim baksait long pasin bilong laikim tumas mani, na “long olgeta kain laik nogut i save kamap long bel bilong ol yangpela.”​—⁠2 Timoti 2:22; 1 Timoti 6:​9-11.

10. Wanem tupela stori long Baibel i narapela narapela kain na i kamapim klia olsem yumi mas ranawe long ol traim?

10 Yumi ken tingim King Devit bilong Israel. Wanpela taim em i sanap antap long rup bilong haus na lukluk i go daun, na em i lukim wanpela meri i waswas, em i gat naispela skin tru. Em nau, ol laik nogut i kamap long bel bilong Devit. Em i mas lusim hap em i sanap long en na ranawe long dispela traim, tasol em i no mekim olsem. Em i salim wanpela man i go bilong kisim save olsem dispela meri​—⁠Batseba​—⁠em i husat, na ol samting i kamap long dispela i kamapim bikpela hevi tru. (2 Samuel 11:1–12:23) Tasol Josep i mekim wanem long taim meri nogut bilong bosman i strong long em i mas slip wantaim em? Baibel i tok: “Josep i no harim tok gris bilong em, na em i no slip wantaim em, na em i no i go klostu long em.” Long dispela taim Lo Bilong Moses i no kamap yet, olsem na Josep i no gat dispela Lo, tasol em i tokim meri: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” Orait wanpela taim meri i holimpas saket bilong Josep na i tokim em: “Yu kam slip wantaim mi.” Orait yu ting Josep i sanap i stap na tokim meri long as na em i no ken mekim? Nogat. “Em i ranawe i go ausait.” Josep i no givim rot long traim i kamap bilong pulim em long mekim pasin pamuk, nogat. Em i ranawe i go!​​—⁠Stat 39:​7-​16.

11. Sapos i gat wanpela traim i painim yumi planti taim, ating yumi inap mekim wanem?

11 Tru, sampela i ting pasin bilong ranawe i makim olsem man i no gat bun. Tasol taim yumi ranawe long wanpela traim, dispela em i pasin bilong gutpela tingting. Ating long ples wok i gat wanpela traim i painim yumi planti taim. Tru, ating yumi no inap lusim dispela wok na kisim narapela, tasol i gat sampela samting yumi inap mekim na bai yumi no stap klostu long samting i laik traim yumi. Yumi mas ranawe long olgeta samting yumi save i no stret, na yumi mas tingting strong long mekim ol samting i stret tasol. (Amos 5:​15) Sampela taim, bilong ranawe long ol traim yumi mas abrusim ol hap bilong Intenet i gat ol piksa nogut bilong pasin sem na ol ples ol i save bung na mekim ol samting bilong amamas na ol i save mekim sampela pasin i no gutpela. Na sampela taim, bilong ranawe long ol traim yumi mas rausim wanpela buk o nius samting bilong yumi, o painim sampela nupela poroman em ol i save laikim tumas God na ol inap helpim yumi. (Sindaun 13:20) Ol samting i save traim yumi bilong mekim sin, yumi mas strong na givim baksait long en. Dispela em i pasin bilong gutpela tingting.​​—⁠Rom 12:⁠9.

Beten Inap Helpim Yumi

12. Yumi askim God long mekim wanem samting taim yumi beten olsem, “Yu no ken larim ol traim i kamap long mipela”?

12 Pol i givim gutpela tok long yumi olsem: “God . . . i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.” (1 Korin 10:13) Wanpela rot bilong Jehova long helpim yumi i olsem: Em i save harim beten bilong yumi taim yumi beten askim em long helpim yumi na bai ol traim i no ken winim yumi. Jisas Krais i skulim yumi long beten olsem: “Yu no ken larim ol traim i kamap long mipela, tasol yu ken kisim bek mipela long [“dispela man nogut,” NW ].” (Matyu 6:13) Sapos yumi beten strong olsem, orait Jehova i no ken lusim yumi na larim ol traim i pundaunim yumi. Em bai kisim bek yumi long han bilong Satan na ol pasin bilong em long trik na giaman. (Efesus 6:11) Yumi mas askim God long helpim yumi long luksave long ol traim na strongim yumi long sakim ol dispela traim. Sapos yumi beten na krai long em olsem, orait em i no ken larim yumi i pundaun taim wanpela traim i painim yumi; em bai helpim yumi bambai “dispela man nogut” Satan i no ken pundaunim yumi.

13. Sapos i gat wanpela traim i wok long painim yumi oltaim, yumi mas mekim wanem?

13 Na yumi mas beten strong moa yet taim wanpela traim i wok long painim yumi oltaim. Sampela traim i save mekim na bel i gat bikpela pait long daunim ol kain kain tingting i kamap long en, na dispela i kirapim yumi long tingim gen olsem yumi ol sinman tasol. (Song 51:⁠5) Olsem: Yumi ken mekim wanem sapos wanpela pasin nogut bipo yumi bin mekim i wok long kamap oltaim long tingting bilong yumi? Olsem wanem sapos dispela i traim yumi na i laik pulim yumi long kirap mekim gen dispela pasin? Nogut yumi traim long daunim dispela tingting na em tasol​—⁠yumi mas beten na kamapim dispela hevi long Jehova, na yumi ken mekim planti taim sapos dispela hevi i stap yet. (Song 55:22) Long strong bilong Baibel na spirit holi bilong em, Jehova inap helpim yumi long rausim ol tingting nogut i stap long bel bilong yumi.​—⁠Song 19:​8, 9.

14. Bilong wanem beten i bikpela samting bilong helpim yumi na bai sin i stap long skin bilong yumi i no ken winim yumi?

14 Taim Jisas wantaim ol aposel i stap long gaden Getsemani, em i lukim olsem ai bilong ol i laik slip, olsem na em i tokim ol: “Yupela i mas was na prea i stap. Nogut traim i kamap long yupela na yupela i pundaun. Tru, bel em i gat laik bilong mekim samting, tasol bodi em i no gat strong.” (Matyu 26:41) Wanpela rot bilong winim ol traim, em yumi mas was i stap na bai yumi ken luksave long ol samting inap traim yumi, na bel i ken pilim gut pasin bilong ol traim long giamanim na pulim yumi. Na em i bikpela samting tu long yumi mas hariap na beten long Jehova long dispela traim bambai yumi ken kisim ol samting bilong spirit bilong mekim pait na daunim dispela traim. Yumi save kisim ol traim long ol samting yumi inap pundaun kwik long en, olsem na yumi no inap sakim long strong bilong yumi yet. Beten em i bikpela samting, long wanem, strong bilong God inap helpim yumi long sakim Satan. (Filipai 4:​6, 7) Na ating yumi mas i go long “ol hetman bilong sios” na bai ol i ken helpim yumi long ol samting bilong spirit na mekim beten.​​—⁠Jems 5:​13-​18.

Mekim Ol Samting Bilong Sakim Traim

15. Yumi mas mekim wanem bilong sakim ol traim?

15 Taim i gat rot, yumi mas abrusim ol traim, na tu yumi mas mekim ol samting bilong sakim traim inap long taim em i lusim yumi, o samting i bin kamapim dispela traim i no stap moa. Taim Satan i traim Jisas, em i wok long sakim Satan i go inap long taim Satan i lusim em. (Matyu 4:​1-​11) Disaipel Jems i tok: “Yupela i mas sakim Satan, na em bai i lusim yupela na ranawe.” (Jems 4:⁠7) Bilong sakim Satan, pastaim yumi mas putim Tok Bilong God long tingting bilong yumi na pasim tok strong long bel olsem yumi bai holimpas ol lo bilong God. Na i gutpela sapos yumi putim ol bikpela tok bilong Baibel long tingting bilong yumi, em ol tok i stret wantaim ol pasin bilong yumi em ol inap pundaunim yumi, na yumi mas tingim tingim long bel ol dispela tok. Na em i pasin bilong gutpela tingting sapos yumi go painim wanpela strongpela Kristen​—⁠olsem wanpela elda​—⁠em yumi ken kamapim hevi bilong yumi long em na yumi ken singaut long em bilong helpim yumi taim bel i laik kirapim yumi long mekim wanpela pasin i no stret.​—⁠Sindaun 22:⁠17.

16. Olsem wanem yumi ken bihainim yet stretpela pasin?

16 Baibel i tok yumi mas kamap olsem nupela man. (Efesus 4:24) Bilong mekim olsem, yumi mas larim Jehova i stretim stretim yumi na senisim tingting na pasin bilong yumi. Pol i raitim pas na tokim wanwok bilong em, Timoti, olsem: “Yu mas wok long kisim stretpela pasin na pasin tru bilong God na pasin bilong bilip tru na pasin bilong laikim tru ol arapela na pasin bilong sanap strong na karim olgeta hevi na pasin bilong isi long ol manmeri. . . . Yu mas ran strong long dispela gutpela resis na bai yu kisim laip i stap gut oltaim oltaim.” (1 Timoti 6:​11, 12) Yumi ken “wok long kisim stretpela pasin” taim yumi wok strong long stadi long Tok Bilong God bambai yumi ken save gut long ol pasin bilong em, na nau yumi ken bihainim pasin i stret wantaim ol lo bilong em. Na tu, yumi mas mekim olgeta wok Kristen, olsem autim gutnius na go long ol miting. Sapos yumi wok long go klostu long God na mekim wok long olgeta samting bilong spirit em i givim long yumi, dispela bai helpim yumi long kamap strong long ol samting bilong spirit na bihainim yet stretpela pasin.​—⁠Jems 4:⁠8.

17. Olsem wanem yumi save God i no ken lusim yumi taim wanpela traim i painim yumi?

17 Pol i tokim yumi olsem, maski wanem kain traim i painim yumi, em i no inap winim strong God i givim long yumi bilong sakim dispela traim. Jehova bai ‘wokim rot bilong helpim yumi, olsem em bai i mekim yumi i sanap strong, na dispela traim bai i no inap daunim yumi.’ (1 Korin 10:13) Tru tumas, sapos yumi wok yet long bilip na wetim God, em i no ken larim wanpela traim i winim yumi na bai yumi no gat strong bilong spirit inap long holimpas ol lo bilong em. Em i laik bai yumi winim pait bilong sakim ol traim i kamap bilong pulim yumi long mekim ol samting i no stret long ai bilong em. Na tu, yumi ken bilip long tok promis bilong em, olsem: “Bai mi no lusim yu. Bai mi no larim yu i stap nating. Nogat tru.”​​—⁠Hibru 13:⁠5.

18. I gat wanem as na yumi ken bilip tru olsem yumi bai winim pait bilong daunim sin i stap long skin bilong yumi?

18 Pol i bin pait strong long daunim sin i stap long skin bilong em, na em i no gat tupela tingting olsem em bai winim dispela pait o nogat. Em i no ting em i wanpela man i stap tarangu tru na i no gat strong liklik long sakim ol laik nogut bilong bel, nogat. Em i tok: “Mi mekim olsem man i ran strong, na i no save lukluk nabaut. Na mi mekim olsem man i boksen gut, na i no tromoi han nabaut na paitim win nating. Nogat. Mi save paitim tru bodi bilong mi na mekim em i bihainim laik bilong mi. Nogut mi autim gutnius long ol arapela man na bihain mi yet mi no kisim prais.” (1 Korin 9:​26, 27) Yumi tu inap winim pait bilong daunim sin i stap long skin bilong yumi. Long rot bilong Baibel, na ol buk na nius bilong Baibel, na ol miting Kristen, na ol strongpela wanbilip Kristen, gutpela Papa bilong yumi long heven em i save givim ol tok long yumi bilong kirapim gen tingting bilong yumi, na ol dispela tok i save helpim yumi long bihainim ol pasin i stret. Long dispela helpim yumi kisim long em, yumi inap winim pait bilong daunim sin i stap long skin bilong yumi!

Yu Inap Tingim?

• Wanem insait bilong dispela tok, “tingting bilong man i bihainim laik bilong olpela bel”?

• Yumi ken mekim wanem bilong redi long sakim ol traim?

• Yumi ken mekim wanem na bai ol traim i no ken winim yumi?

• Beten i gat wanem wok bilong helpim yumi long winim ol traim?

• Olsem wanem yumi save yumi inap winim pait bilong daunim sin i stap long skin bilong yumi?

[Ol Piksa long pes 10]

Baibel i no tok yumi stap tarangu tru na i no gat strong liklik long sakim ol laik nogut bilong bel

[Piksa long pes 12]

Wanpela rot bilong abrusim sin, em yumi mas ranawe long ol traim

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim