ASKIM BILONG OL YANGPELA
Hau Bai Mi Ken Sakim Traim?
Aposel Pol i tok: “Taim mi gat laik long mekim pasin i stret, pasin nogut i stap wantaim mi.” (Rom 7:21) Sampela taim yu pilim olsem? Sapos olsem, dispela atikol bai helpim yu long sakim traim long mekim pasin nogut.
Samting yu mas save long en
Planti taim traim na presa bilong ol wanlain i save wok bung wantaim. Baibel i tok: “Ol poroman nogut i save bagarapim ol gutpela pasin bilong man.” (1 Korin 15:33, futnot) Presa bilong ol narapela o midia inapim kirapim yu long mekim samting i no stret na stiaim yu long bihainim “planti manmeri [husat] i mekim pasin nogut.”—Kisim Bek 23:2.
“Presa bilong ol narapela i laikim yu na orait long yu inap kirapim yu long mekim ol samting em ol narapela i mekim na bai ol i stap pren bilong yu.”—Jeremy.
Tingim dispela: Wai na em hatwok long sakim traim sapos yu tingting tasol long ol narapela i gat wanem tinging long yu?—Provep 29:25.
Samting nogut bilong en: No ken larim presa bilong ol wanlain i kirapim yu long brukim ol stretpela lo yu save bihainim.
Samting yu ken mekim
Save long ol samting yu bilip long en. Sapos yu no save long samting yu bilip long en, yu inap kamap olsem wanpela doli ol narapela i kontrolim. Em gutpela moa long bihainim tok bilong Baibel: “Skelim olgeta samting, bai yupela i ken save olsem ol i stret o nogat, na holimpas ol samting i gutpela.” (1 Tesalonaika 5:21) Taim yu klia gut long ol bilip bilong yu, em bai isi long holimpasim ol dispela bilip na sakim ol traim we inap pulim yu long mekim ol samting we i no stret wantaim bilip bilong yu.
Tingim dispela: Wai na yu bilip olsem ol stretpela lo bilong God i bilong helpim yu?
“Mi luksave olsem taim mi bihainim gut ol samting mi bilip long en na mi sakim ol traim, ol narapela i rispekim mi moa.”—Kimberly.
Eksampel bilong Baibel: Daniel. I luk olsem kirap long taim Daniel i stap olsem wanpela tineja, em “i pasim tok long bel” olsem em bai bihainim ol lo bilong God.—Daniel 1:8.
Sapos yu no save long samting yu bilip long en, yu inap kamap olsem doli ol narapela i kontrolim
Save long ol samting yu mas wok strong long en. Baibel i tok long “ol laik i save kamap long bel bilong ol yangpela”—dispela strongpela laik i save kamap long taim yu yangpela. (2 Timoti 2:22) Ol dispela laik i no makim tasol laik bilong mekim maritpasin, nogat, em inap makim tu laik bilong stap wankain olsem ol wanlain na laik bilong bihainim laik bilong yu yet long taim yu no redi long mekim olsem.
Bilong tingim: Baibel i tok: “Laik bilong bel bilong olgeta man wan wan i save traim ol, dispela laik i save giamanim ol na pulim ol.” (Jems. 1:14) Olsem wanem? Planti taim, wanem laik i save traim yu?
“Yu mas tok tru long yu yet long ol traim we i isi tru long yu pundaun long en. Mekim wok painimaut long hau yu inap sakim ol dispela traim, na raitim ol poin yu ken yusim. Long dispela rot, taim dispela traim i kamap gen, yu inap save long hau yu bai sakim.”—Sylvia.
Eksampel bilong Baibel: Devit. Sampela taim em i karim hevi bilong ol narapela i putim presa long em, na tu, long daunim ol laik bilong em yet. Tasol Devit i kisim skul long ol popaia bilong em na wok strong long stap gut. “O God, yu ken wokim nupela klinpela bel insait long mi. Na putim nupela tingting insait long mi na bai mi ken sanap strong.”—Buk Song 51:10.
Bosim yu yet. Baibel i tok: “Yupela i no ken larim pasin nogut i winim yupela.” (Rom 12:21) Dispela i makim olsem yu no ken stap olsem wanpela husat i larim traim i winim em. Yu inap mekim disisen long mekim stretpela samting.
Bilong tingim: Hau bai yu bosim yu yet long taim traim i kamap na mekim samting i stret?
“ Mi tingim hau bai mi pilim sapos mi pundaun long wanpela traim. Dispela bai mekim mi amamas? Ating yu bai amamas, tasol insait long sotpela haptaim. Bai mi amamas yet bihain long sampela haptaim? Nogat, bai mi bel hevi. Dispela bai helpim mi? Nogat!”—Sophia.
Eksampel bilong Baibel: Pol. Maski em tokaut olsem em i gat tingting kranki, Pol i bosim em yet. Em i tok: “Mi save panisim tru bodi bilong mi yet na mekim bodi i stap wokboi bilong mi.”—1 Korin 9:27, futnot.
Samting nogut bilong en: I olsem yu sindaun long sia bilong draiva na yu bosim samting yu bai mekim long taim bilong traim.
Tingim, ol traim i bilong sotpela haptaim. Melissa i gat 20 krimas i tok: “Planti samting i stap olsem ol bikpela traim long taim mi stap long haiskul, nau ol i no bikpela samting. Taim mi tingim gen, dispela i helpim mi long luksave olsem ol traim i kamap long nau bai pinis na bihain bai mi amamas olsem mi mekim gutpela disisen long sakim.”