Wok i Go Yet Long Winim Laspela Pait!
“Mi lukluk gen na mi lukim wanpela waitpela hos, na man i sindaun long en em i holim banara. Ol i givim em wanpela hat bilong man i winim pait, na em i go olsem man i winim pait na em i wok long winim planti pait moa.”—KTH 6:2.
1. Long driman, Jon i lukim wanem ol samting i mas kamap bihain?
GOD i mekim na aposel Jon inap lukluk i go long taim bihain bihain, inap olsem 1,800 yia, na stori long Krais i kamap King. Jon i mas i gat strongpela bilip na bai em inap bilip olsem samting em i lukim long dispela driman bai kamap tru. Yumi long nau i gat ol samting i kamapim klia olsem Krais i kamap King long 1914. Yumi bilip na long tingting yumi lukim Jisas Krais “i go olsem man i winim pait na em i wok long winim planti pait moa.”
2. Taim Kingdom i kamap, Satan i mekim wanem? Dispela i kamapim klia wanem samting?
2 Taim Kingdom i kamap pinis, ol i rausim Satan long heven. Dispela i mekim na em i belhat na pait strong moa yet, tasol dispela i no helpim em liklik long winim pait. (KTH 12:7-12) Belhat bilong em i mekim na pasin bilong graun i wok long i go nogut moa yet. I olsem ol lain manmeri i wok long bagarap. Long ol Witnes Bilong Jehova, ol dispela samting i kamapim klia olsem King bilong ol i wok i go long “winim pait” na daunim olgeta birua bilong em.
Lain Bilong Nupela Taim i Wok Long Kamap
3, 4. (a) Kirap long taim Kingdom i kamap pinis, wanem sampela senis i bin kamap insait long kongrigesen Kristen? I gat wanem as na ol i mas mekim ol dispela senis? (b) Olsem Aisaia i tok profet, ol dispela senis i bin kamapim wanem ol gutpela samting?
3 Taim Kingdom i kamap pinis, nau em taim bilong stretim sampela pasin na wok bilong kongrigesen Kristen em i bin kamap bek pinis na i kisim sampela wok moa bilong Kingdom—olsem bai em i ken stret wantaim pasin kongrigesen Kristen i bin bihainim long taim bilong ol aposel. Olsem na Wastaua bilong Jun 1 na 15, 1938, i skelim pasin em oganaisesen Kristen i mas bihainim. Bihain, long Wastaua bilong Disemba 15, 1971, wanpela stori “Gavening Bodi i Narapela Long Koporesen Gavman i Orait Long En,” i stori gut long Gavening Bodi bilong nau em i wanem kain lain. Long 1972, ol i makim ol lain elda bilong helpim na stiaim wok bilong ol kongrigesen.
4 Taim ol i kamapim bek stretpela pasin bilong bosim wok, dispela i strongim tru kongrigesen Kristen. Narapela samting i helpim wok bilong strongim kongrigesen Kristen i olsem: Lain Gavening Bodi i stretim rot na bai ol elda i ken skul long ol wok bilong ol na wok bilong harim kot insait long kongrigesen. Aisaia 60:17 i bin tok profet long wok bilong stretim isi isi ol samting long oganaisesen bilong God long graun, na long ol gutpela samting i kamap long dispela, olsem: “Bai mi senisim ol bras bilong yu wantaim gol, na ol ain bilong yu wantaim silva. Na bai mi senisim tu ol plang bilong yu wantaim bras na ol ston bilong yu wantaim ain. Na bai mi makim pasin bilong gutpela sindaun na bel isi bilong bosim yu, na stretpela pasin bai i stiaim wokabaut bilong yu. Na bai i no gat man moa i bosim yu na mekim nogut long yu.” Ol dispela gutpela senis i kamapim klia olsem God i blesim na orait long ol man i givim bel long mekim wok bilong Kingdom bilong em.
5. (a) Taim Jehova i mekim gut long lain bilong em, Satan i mekim wanem? (b) Stret olsem Filipai 1:7 i tok, lain bilong Jehova i bin mekim wanem taim Satan i kamapim belhat bilong em?
5 Taim Kingdom i kamap pinis, God i helpim na stiaim gut lain bilong em, tasol Satan i lukim dispela samting. Tingim ol samting i kamap: Long 1931, dispela liklik lain Kristen i tokaut long ai bilong ol man olsem ol i no sumatin tasol bilong Baibel. Stret olsem Aisaia 43:10 i tok, ol i Witnes Bilong Jehova! Yumi no save dispela samting yet i mekim o nogat, tasol Satan i kirapim ol man long mekim nogut tru long ol Witnes long olgeta hap bilong graun. Long ol kantri tu i save larim ol man i stap fri long ol samting bilong lotu, olsem Amerika, Kanada, na Jemani, ol Witnes i mas paitim tok long ol haus kot na bai ol inap i stap fri long ol samting bilong lotu. I kam inap long 1988, Sprim Kot Bilong Yunaitet Stets i bin skelim gen 71 kot ol Witnes Bilong Jehova i insait long en, na ol Witnes i winim 47 bilong ol dispela kot. Long nau, long olgeta hap bilong graun, ol i mekim yet ol kot bambai ol i ken “helpim na strongim gutnius,” wankain olsem ol Kristen bilong pastaim i bin mekim.—Filipai 1:7.
6. Ol tambu i bin pasim lain bilong Jehova long wok strong i go? Stori long dispela.
6 Kirap long 1930 i go inap long stat bilong Namba Tu Pait, long Jemani, Spen, Japan, na long sampela kantri moa, ol gavman dikteta i tambuim wok bilong ol Witnes Bilong Jehova o pasim sampela wok bilong ol. Tasol long yia 2000, long dispela 3-pela kantri i gat olsem 500,000 manmeri i save autim tok bilong Kingdom bilong God. Dispela namba i winim tru—olsem dabolim 10-pela taim—namba bilong ol Witnes i bin stap long olgeta hap long 1936! Tru tumas, ol tambu i no inap pasim lain bilong Jehova long wok strong yet aninit long Gopas bilong ol i winim pait, em Jisas Krais.
7. Wanem bikpela samting i kamap long 1958? Wanem bikpela senis i kamap bihain long dispela?
7 Dispela samting i kamap ples klia long 1958 long Nu Yok Siti, taim ol Witnes Bilong Jehova i wokim wanpela bikpela kibung tru, winim olgeta narapela kibung bilong ol. Nem bilong dispela kibung em Laik Bilong God Kibung Intenesenel, na inap 253,922 manmeri i kam bung. Long 1970 i no gat tambu moa long dispela 3-pela kantri yumi kolim pinis—long Is Jemani tasol. Tasol tambu i stap yet long wok bilong ol Witnes long Soviet Yunion na long sampela kantri em Soviet Yunion i bosim, em ol i insait long Kontrak Bilong Woso. Long nau, long ol dispela kantri bipo ol i Komiunis, i gat planti Witnes tru i save autim tok, winim 500,000.
8. Jehova i mekim gut long lain bilong em, na wanem samting i kamap long dispela? Wanpela Wastaua long 1950 i tok wanem long dispela?
8 God i bin mekim gut long ol Witnes Bilong Jehova na ol i kamap planti moa, long wanem, ol i “wok pastaim long painim kingdom bilong God wantaim stretpela pasin bilong em.” (Matyu 6:33, Nupela Testamen na Ol Sam) Tru tumas, tok profet bilong Aisaia i kamap tru pinis: “Ol lain i liklik tru bai ol i kamap planti moa olsem ol manmeri bilong ol bikpela na strongpela kantri. Mi Bikpela, mi tok, ol dispela samting bai i kamap hariap long taim mi makim pinis.” (Aisaia 60:22) Na dispela lain i wok yet long go bikpela. Insait long 10-pela yia i go pinis, inap 1,750,000 manmeri moa i tokaut olsem Kingdom tasol i mas bosim graun. Long laik bilong ol yet ol i bin go insait long wanpela lain em wanpela Wastaua bilong 1950 i bin stori long en olsem: “Long nau, God i wok long bungim wanpela lain bilong nupela taim. . . . Dispela lain bai winim taim bilong Armagedon . . . na stap olsem namba wan lain long mekim wok long ‘nupela graun’ . . . Ol i bihainim pasin tiokratik long mekim ol wok, na ol i save pinis long pasin bilong oganaisesen long mekim wok.” Bilong pinisim stori, Wastaua i tok olsem: “Orait yumi olgeta wantaim yumi mas wokabaut i go yet, olsem lain bilong nupela taim!”
9. Ol samting ol Witnes Bilong Jehova i bin kisim save long en insait long ol yia i go pinis, dispela i bin helpim ol olsem wanem?
9 Tasol long nau, dispela lain bilong nupela taim em ol i wok long go bikpela bikpela, ol i bin kisim save long pasin bilong stretim gut wok, na dispela i bin helpim gut ol long nau, na bihain long Armagedon long wok ol bai mekim bilong mekim ol samting i kamap gutpela gen. Ol Witnes i bin lain long pasin bilong stretim gut wok bilong ol bikpela kibung, na helpim kwik ol brata long kaikai o marasin samting taim bagarap i kamap, na wokim kwik ol haus kibung samting. Dispela samting i bin kirapim planti man long laikim ol Witnes Bilong Jehova na rispek long ol.
Stretim Sampela Tingting Kranki
10, 11. Stori long samting i bin kamap na i stretim sampela tingting kranki bilong ol man long ol Witnes Bilong Jehova.
10 Tasol i gat sampela i save sutim tok long ol Witnes Bilong Jehova olsem ol i no bihainim pasin bilong ol manmeri bilong ples. Ol i mekim tok olsem, long wanem, long pasin bilong kisim blut, wok politik samting, smok, maritpasin, ol Witnes i save bihainim ol tok bilong Baibel. Tasol nau, planti man moa i tokaut olsem tingting bilong ol Witnes long ol dispela samting em i gutpela. Olsem: Wanpela dokta long Polan i ring long ofis bilong ol Witnes Bilong Jehova na tok em wantaim ol wanwok long haus sik i bin lusim planti aua long toktok long pasin bilong givim blut long man. Samting i kirapim dispela toktok em wanpela stori i bin kamap long dispela de stret long wanpela nius (Dziennik Zachodni) bilong Polan. Dokta i tok: “Mi yet mi hevi tru long ol i save mekim planti wok tumas long blut. Ol i mas stretim dispela samting, na mi amamas long yupela i bin tokaut long dispela pasin bilong givim blut long man. Mi laik kisim sampela save moa long en.”
11 Long wanpela kibung i kamap long Swiselan long yia i go pinis, lain bilong haus sik long Amerika, Israel, Kanada, na Yurop, i toktok long pasin bilong oraitim sikman na no ken givim blut long em. Ol i tok, maski planti dokta i gat narapela tingting, ol i save olsem namba bilong ol sikman i kisim blut na ol i dai, i winim namba bilong ol sikman i no kisim blut na ol i dai. Planti taim ol sikman Witnes inap kirap kwik na lusim haus sik, winim ol sikman i bin kisim blut, na dispela i daunim pe bilong baim dokta samting.
12. Stori long gutpela tok em sampela man i gat namba i bin mekim long pasin bilong ol Witnes ol i no insait long wok politik.
12 Na tu, planti man i bin mekim gutpela tok long pasin bilong ol Witnes Bilong Jehova long ol i no bin insait long wok politik samting long taim bilong Namba Tu Pait na long ol yia paslain long en, em long taim lain Natsi i bin wok strong long mekim nogut long ol na ol i sanap strong na karim dispela hevi. Wanpela video (Jehovah’s Witnesses Stand Firm Against Nazi Assault) ol Witnes Bilong Jehova i bin wokim na soim long namba wan taim long banis kalabus Ravensbruk, long Jemani, long Novemba 6, 1996, planti man i bin mekim gutpela tok amamas long dispela video. Long namba wan taim ol i soim dispela video long banis kalabus nogut tru long Bergen-Belsen long Epril 18, 1998, Wolfgang Scheel, dairekta bilong wanpela lain (Center for Political Education) long Saksoni, i tok: ‘Ol Witnes Bilong Jehova i bin strong moa long sakim gavman bilong Hitler, winim ol misin Kristen. Maski yumi laikim o no laikim ol bilip na lotu bilong ol, ol i bin sanap strong long taim bilong gavman Natsi, olsem na long dispela samting i stret yumi litimapim nem bilong ol.’
13, 14. (a) Wanpela bikman i mekim wanem tok bilong helpim ol Kristen bilong pastaim? (b) Stori long sampela gutpela tok em sampela man i bin mekim bilong helpim ol manmeri bilong God long nau.
13 Taim ol bikman o ol kot i mekim sampela tokaut i helpim ol Witnes Bilong Jehova long ol samting ol man i gat tok long en, ating dispela i save daunim pasin bilong bel nogut long ol Witnes na i kirapim ol man long kisim gutpela tingting long ol. Planti taim dispela i opim rot long ol Witnes i ken toktok wantaim ol man em bipo ol i no laik harim tok bilong ol. Olsem na ol Witnes Bilong Jehova i amamas na pilim tru dispela pasin ol bikman na ol kot i mekim. Dispela i kirapim yumi long tingim samting i bin kamap long Jerusalem long taim bilong ol aposel. Taim ol kaunsil, em nambawan kot bilong ol Juda, i laik kilim i dai ol Kristen, long wanem, ol i save autim tok, orait Gamaliel, em i wanpela “tisa bilong lo” i gat biknem, em i mekim wanpela tok lukaut olsem: “Yupela man bilong Israel, sapos yupela i laik mekim wanpela samting long ol dispela man, mobeta yupela i tingting gut pastaim. . . Yupela i no ken mekim wanpela samting long ol dispela man. Nogat. Yupela i mas larim ol i stap. Sapos dispela wok ol i mekim em i kirap long tingting bilong ol man tasol, orait em bai i bagarap. Tasol sapos God yet i kirapim dispela wok, orait yupela bai i no inap pasim ol. Nogut yupela i pait long God!”—Aposel 5:33-39.
14 Olsem Gamaliel, long taim bilong yumi sampela bikman i bin mekim sampela tok i helpim ol Witnes Bilong Jehova long pasin bilong i stap fri long lotu. Olsem: Wanpela man, bipo em siaman bilong wanpela lain (International Academy for Freedom of Religion and Belief), i tok: ‘Maski ol manmeri i no laikim ol bilip bilong wanpela lotu, i no stret yumi pasim dispela lotu long mekim ol samting i stret long ol i ken mekim.’ Na taim gavman bilong Jemani i makim wanpela lain bilong skelim ol liklik lotu, wanpela saveman bilong ol samting bilong lotu, long yunivesiti bilong Laipsik, i kamapim wanpela askim olsem: ‘I gat wanem as na ol i skelim ol liklik lotu tasol na ol i no skelim dispela tupela bikpela lotu [Misin Katolik na Misin Luteran]?’ Bilong kisim bekim bilong dispela askim, yumi ken harim tok bilong wanpela man, bipo em wanpela bikman bilong gavman long Jemani, em i tok: ‘Sampela man insait long ol misin ol i strong tumas long bihainim lotu, na ol i bin stiaim strong dispela lain bilong gavman long samting ol i mekim.’
Yumi Bilip na Wetim Husat i Helpim Yumi?
15, 16. (a) I gat wanem as na Gamaliel i no inap pasim olgeta hevi i bin painim ol Kristen? (b) Tripela man i gat namba i laik helpim Jisas, tasol olsem wanem ol i no inap helpim em olgeta?
15 Tok bilong Gamaliel i kamapim klia olsem sapos God i orait long wanpela wok, orait ol man i no inap pasim. Tok em i givim long ol kaunsil i helpim ol Kristen bilong pastaim, tasol ol Kristen i no lusim tingting olsem tok bilong Jisas long ol man bai mekim nogut tru long ol disaipel bilong em, dispela tu i mas kamap tru. Samting Gamaliel i mekim em i pasim ol bikman bilong lotu long kilim ol i dai, tasol dispela i no pasim olgeta pasin bilong mekim nogut long ol Kristen. Baibel i tok: “Ol i singautim ol aposel i kam, na ol i tokim ol man long wipim ol. Na ol i tambuim ol long ol i no ken autim tok moa long nem bilong Jisas. Na ol i lusim ol i go.”—Aposel 5:40.
16 Taim Jisas i sanap long kot, Pontius Pailat i no painim wanpela rong long em, na em i laik lusim Jisas i go. Tasol em i no inap. (Jon 18:38, 39; 19:4, 6, 12-16) Tupela kaunsil, em Nikodemus na Josep bilong Arimatea, ol i mekim sampela wok bilong helpim Jisas, tasol ol tu i no inap pasim kot long mekim nogut long Jisas. (Luk 23:50-52; Jon 7:45-52; 19:38-40) Tru tumas, ol man inap mekim wok bilong helpim ol manmeri bilong Jehova—maski i gat wanem as na ol i mekim—tasol ol i no inap pasim olgeta hevi i laik painim ol. Ol lain bilong dispela graun bai wok yet long bel nogut long ol man i bihainim tru Krais, wankain olsem ol i bin bel nogut long Jisas yet. Jehova tasol inap pinisim tru ol hevi bilong ol.—Aposel 2:24.
17. Ol Witnes Bilong Jehova i gat stretpela tingting long wanem samting? Tasol bilong wanem ol i strong long mekim yet wok bilong autim gutnius?
17 Ol Witnes Bilong Jehova i gat stretpela tingting long ol samting, olsem na ol i save, ol man bai wok yet long mekim nogut long ol. Taim dispela graun bilong Satan i pinis olgeta, long dispela taim tasol, pasin bilong birua long ol bai pinis. Tasol pasin bilong ol man long mekim nogut long ol Witnes, dispela i no mekim na ol i lusim wok bilong ol long autim tok bilong Kingdom. Nogat. Long wanem, God i orait long ol na helpim ol. Ol i lukluk i go long Gopas bilong ol i gat strongpela bel, em Jisas Krais, em i stap olsem gutpela piksa bilong bihainim.—Aposel 5:17-21, 27-32.
18. Wanem hevi bai painim lain bilong Jehova long bihain? Tasol ol i bilip strong olsem wanem samting bai kamap long dispela?
18 Kirap long taim lotu i tru i kamap nupela, ol birua i wok long mekim nogut long en. Klostu nau, Gok—em Satan taim em i raus long heven—bai kirap na mekim save long pinisim trupela lotu. Tasol trupela lotu bai stap. (Esekiel 38:14-16) “Ol king bilong olgeta kantri bilong graun,” ol i stap aninit long Satan, ol “bai i pait long Pikinini Sipsip, na Pikinini Sipsip bai i winim ol tru. Em i Bikpela bilong olgeta bikman, na em i King bilong olgeta king.” (KTH 16:14; 17:14) Em nau, King bilong yumi em i wok i go long winim laspela pait na klostu nau em bai pinisim olgeta birua bilong em. Em i gutpela samting tru long yumi inap wokabaut i go wantaim em, na yumi save olsem liklik taim bai i no gat wanpela man i daunim tok bilong ol man i lotuim Jehova taim ol i tok: “God i helpim yumi”!—Rom 8:31; Filipai 1:27, 28.
Yu Inap Stori Long Dispela?
• Kirap long taim Kingdom i kamap nupela, Jehova i bin mekim wanem bilong strongim kongrigesen Kristen?
• Satan i bin mekim wanem bilong pasim Krais long winim pait na daunim olgeta birua? Na wanem samting i bin kamap long dispela?
• Yumi mas i gat wanem stretpela tingting long gutpela pasin ol man i no Witnes ol i mekim long yumi?
• Liklik taim Satan bai mekim wanem? Na wanem samting bai kamap long dispela?
[Piksa long pes 18]
Ol kibung i save kamapim klia olsem lain bilong Jehova i wok i go yet
[Ol Piksa long pes 20]
Long taim bilong Namba Tu Pait, ol Witnes i no insait long wok politik, na dispela samting i wok yet long litimapim nem bilong Jehova