“Sapos God i Helpim Yumi, Orait Husat Bai i Birua Long Yumi?”
“Bai yumi tok wanem long dispela ol samting God i mekim? Sapos God i helpim yumi, orait husat bai i birua long yumi?”—ROM 8:31.
1. Husat i lusim Isip wantaim ol Israel? Wanem samting i kirapim ol long mekim olsem?
OL ISRAEL i bin stap 215 yia long kantri Isip na inap planti yia ol i wok kalabus, tasol taim ol i lusim Isip, ‘planti arapela lain manmeri i go wantaim ol.’ (Kisim Bek 12:38) Ol dispela manmeri i no bilong lain Israel, ol i bin lukim 10-pela bikpela hevi i mekim nogut tru long Isip na mekim ol god giaman bilong Isip i kamap olsem samting bilong lap long en. Tasol ol i bin lukim tu strong bilong Jehova long lukautim lain bilong em, na ol i lukim moa yet kirap long namba 4 bikpela hevi. (Kisim Bek 8:23, 24) Tru, ol i no save gut long ol samting Jehova i tingting pinis long mekim, tasol i gat wanpela samting ol i save gut long en: Ol god bilong Isip i no bin lukautim ol Isip, tasol Jehova i bin kamapim tru strong bilong em long helpim ol Israel.
2. Bilong wanem Rehap i helpim ol Israel ol i kam bilong lukstil? Olsem wanem yumi ken tok, pasin bilong Rehap long bilip tru long God i no lus nating?
2 Foti yia bihain, taim ol Israel i laik go insait long Graun Bilong Promis, senis bilong Moses, em Josua, i salim tupela man i go lukstil long dispela graun. Long dispela hap ol i bungim Rehap, em wanpela meri bilong Jeriko. Rehap i bin harim stori bilong ol strongpela wok Jehova i bin mekim bilong lukautim ol Israel inap 40 yia, kirap long taim ol i lusim Isip, olsem na em i save, sapos em i laik bai God i ken mekim gut long em, em i mas helpim lain bilong Em. Rehap i bihainim gutpela tingting, olsem na bihain, taim ol Israel i bagarapim taun Jeriko, God i lukautim Rahab wantaim famili bilong em. Long rot bilong mirakel ol i abrusim bagarap, na dispela samting yet i kamapim klia olsem God i stap wantaim ol. Em nau, bilip bilong Rehap long God bilong ol Israel em i no lus nating.—Josua 2:1, 9-13; 6:15-17, 25.
3. (a) Jisas i wokim wanem mirakel klostu long taun Jeriko ol i bin wokim gen? Ol bikman bilong lotu Juda i mekim wanem? (b) Sampela Juda, na bihain planti man i no Juda, ol i kisim save long wanem samting?
3 Fiftin handet yia bihain, klostu long taun Jeriko em ol i bin wokim gen, Jisas Krais i oraitim wanpela aipas i save singaut long mani. (Mak 10:46-52; Luk 18:35-43) Dispela man i krai long Jisas i mas marimari long em. Dispela i makim olsem em i save God i helpim Jisas na orait long em. Tasol ol bikman bilong lotu Juda wantaim lain bilong ol, ol i no laik tokaut olsem ol mirakel bilong Jisas i kamapim klia olsem em i mekim wok bilong God. Ol i wok long sutim tok long pasin bilong em. (Mak 2:15, 16; 3:1-6; Luk 7:31-35) Ol i kilim em i dai, na maski ol i kisim save olsem Jisas i kirap bek, ol i no laik yet long tokaut olsem em samting God i mekim. Ol i go pas long mekim nogut tru long lain bilong Jisas. Ol i laik pasim wok bilong ol long “autim gutnius bilong Bikpela Jisas.” Tasol sampela Juda, na bihain planti man i no Juda, ol i tingim ol dispela samting i kamap na ol i skelim stret long tingting bilong ol. Ol i lukim olsem God i sakim pinis ol hetman i tingim ol yet i stretpela man, na em i helpim ol disaipel bilong Jisas Krais ol i gat pasin daun.—Aposel 11:19-21.
Husat Lain Long Nau God i Orait Long Ol?
4, 5. (a) Sampela i tingim wanem samting taim ol i laik makim lotu ol bai bihainim? (b) Bilong save wanem lotu i trupela lotu, yumi mas tingim wanem bikpela samting?
4 Nau tasol long TV ol i givim askim long wanpela bikman bilong lotu long ol samting bilong trupela lotu, na em i tok: “Lotu i trupela sapos em i helpim yu long kamap gutpela man o gutpela meri taim yu bihainim dispela lotu.” Tru, lotu i tru i save helpim man long kamap gutpela, tasol yu ting dispela samting yet i makim olsem God i orait long dispela lotu? Yu ting dispela samting tasol i makim wanpela lotu i trupela?
5 Olgeta man i laik bai ol yet i ken makim samting ol i laik mekim, na makim tu wanem lotu ol i laik bihainim. Tasol maski man inap mekim olsem, i no olsem em i makim lotu i stret long bihainim, nogat. Olsem: Sampela man, taim ol i laik makim lotu ol bai insait long en, ol i tingim hamas man i insait long dispela lotu, o mani kago o ol bilaspasin bilong en, o famili bilong ol i bilong dispela lotu o nogat. Tasol ol dispela samting i no makim wanpela lotu i trupela lotu o nogat. Bikpela askim i olsem: Wanem lotu i kirapim man long bihainim laik bilong God na i mekim ol samting i kamapim klia olsem God i orait long dispela lotu, na bai ol lain bilong en i ken tok, “God i helpim yumi”?
6. Wanem tok bilong Jisas i helpim yumi long save wanem lotu i tru na wanem lotu i giaman?
6 Jisas i kamapim wanpela lo bilong helpim yumi long save wanem lotu i tru na wanem lotu i giaman. Em i tok: “Yupela lukaut long ol giaman profet. . . . Ol i olsem ol weldok i pasim skin bilong sipsip, bai ol i ken i go klostu long ol sipsip na holimpas ol. Yupela lukim pasin bilong ol na bai yupela i save, ol i giaman profet, o nogat.” (Matyu 7:15, 16; Malakai 3:18) Orait nau yumi ken stori long sampela “pasin,” o mak, bilong lotu i tru, na bai yumi ken save God i orait long wanem lain long nau.
Ol Mak Bilong Save God i Orait Long Wanem Lain
7. Bilong lainim ol man long ol samting em Baibel tasol i as bilong en, yumi mas mekim wanem?
7 Baibel i as bilong ol tok ol i autim. Jisas i tok: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam. Sapos wanpela man i gat laik tru bilong bihainim tok bilong God, orait em bai i save tru long as bilong dispela tok mi autim. Em bai i save, dispela tok i kam long God, o em i kamap long tingting bilong mi yet.” Na tu: “Ol pikinini bilong God i save harim olgeta tok bilong God.” (Jon 7:16, 17; 8:47) Olsem na bilong God i ken orait long yumi, yumi mas lainim ol man long ol tok God i kamapim long Baibel na em tasol, na yumi mas sakim ol tok em ol tumbuna o save bilong ol man i as bilong en.—Aisaia 29:13; Matyu 15:3-9; Kolosi 2:8.
8. Bilong wanem yumi mas kamapim nem bilong God insait long lotu?
8 Ol i save kolim nem bilong God, em Jehova, na ol i tokaut long dispela nem. Aisaia i tok profet olsem: “Long dispela taim bai yupela i singim song olsem, ‘Kolim nem bilong Bikpela [“Jehova,” NW ] na singaut long em na tok tenkyu long em. Tokaut long olgeta lain manmeri long ol bikpela wok em i bin mekim, na tokim ol long em i gat biknem. Singim ol song na litimapim nem bilong Bikpela. Em i kisim biknem long ol gutpela gutpela wok em i mekim. Tokim olgeta lain manmeri long ol gutpela gutpela wok bilong en.’ ” (Aisaia 12:4, 5) Jisas i lainim ol disaipel bilong em long beten olsem: “Papa bilong mipela, yu stap long heven, nem bilong yu i mas i stap holi.” (Matyu 6:9) Olsem na maski ol Kristen i Juda o man bilong narapela lain, ol i mas stap olsem “wanpela lain i holim nem bilong [God].” (Aposel 15:14, NW ) Tru tumas, God i laik tru long helpim ol man i amamas long stap olsem “wanpela lain i holim nem bilong em.”
9. (a) Olsem wanem na pasin bilong amamas em i mak bilong ol man i bihainim lotu i tru? (b) Olsem wanem Aisaia i soim olsem lotu i tru i narapela kain long lotu i giaman?
9 Ol i bihainim pasin bilong God long amamas. Jehova em i as bilong “gutnius,” olsem na em i God bilong “amamas.” (1 Timoti 1:11) Olsem na i no gat as na ol man i lotu long em ol i no amamas na oltaim ol i ting i no gat gutpela samting inap kamap, a? Maski planti hevi i stap long graun na ol Kristen yet i gat sampela hevi, ol Kristen tru i save stap amamas, long wanem, oltaim ol i save kisim ol gutpela kaikai bilong spirit. Aisaia i soim olsem ol i narapela kain long ol man i bihainim lotu giaman taim em i kamapim tok bilong Jehova, em i tok: “Mi God, Bikpela, mi tok olsem. Ol wokman bilong mi bai ol i gat planti kaikai na wara. Tasol yupela ol lain i save givim baksait long mi, bai yupela i stap hangre na bai yupela i no gat wara bilong dring. Ol lain bilong mi, ol bai i amamas, tasol yupela bai i sem nogut tru. Bel bilong ol wokman bilong mi bai i pulap long amamas na bai ol i singim ol song bilong amamas. Tasol bel bilong yupela bai i pulap long sori na tingting bilong yupela bai i pas na yupela bai i krai strong tru.”—Aisaia 65:13, 14.
10. Man i bihainim lotu i tru, olsem wanem em i no gat wok long kisim save long rot bilong traim traim na popaia nabaut?
10 Ol lo bilong Baibel bilong stiaim tingting i stap olsem as bilong ol pasin ol i bihainim na ol samting ol i tingting long mekim. Man bilong raitim Buk Sindaun i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:5, 6) Ol man God i helpim ol, em ol man i lukluk i go long em bilong soim rot long ol, na ol i no bihainim ol kain kain tingting bilong ol man i sakim tok bilong God. Taim man i bihainim Tok Bilong God long i stap bilong em, em i no gat wok long traim traim na popaia nabaut na long dispela rot em i kisim save, nogat.—Song 119:33; 1 Korin 1:19-21.
11. (a) I gat wanem as na ol man bilong trupela lotu i no ken bruk i go long wanpela lain pris pasto na wanpela lain man nating bilong lotu? (b) Ol man i go pas long wok bilong lukautim lain bilong God, ol i mas bihainim wanem kain pasin ol sipsip i ken lukim na bihainim?
11 Ol i bihainim wankain pasin long mekim wok olsem kongrigesen Kristen bilong pastaim i mekim. Jisas i kamapim dispela tok bilong stiaim tingting: “Ol man i no ken kolim yupela ‘Tisa.’ Nogat. Wanpela tasol em i tisa bilong yupela, na yupela olgeta i stap brata brata. Na long graun hia yupela i no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven. Na ol i no ken kolim yupela ‘Hetman.’ Yupela i gat wanpela hetman tasol, em man God i makim bilong kisim bek ol manmeri bilong en. Bikman bilong yupela em i mas i stap wokman bilong yupela.” (Matyu 23:8-11) Olgeta long kongrigesen i stap brata brata, olsem na i no gat wok long wanpela lain pris pasto i bosim ol, em ol i kisim ol bikpela nem i gat namba long en na ol i antap long ol man nating bilong lotu. (Jop 32:21, 22) Ol man i lukautim lain sipsip bilong God ol i kisim tok olsem: “Yupela i mas amamas long mekim dispela wok, olsem God i laik yupela i mekim. Nogut yupela i bihainim laik bilong ol arapela tasol na mekim. Na yupela i no ken mekim dispela wok bilong kisim pe tasol. Nogat. Yupela i mas i gat laik tru long mekim dispela wok.Yupela i no ken i stap olsem ol bikman na daunim dispela ol manmeri God i bin putim long han bilong yupela. Nogat. Yupela i mas mekim gutpela pasin tasol, bai ol i ken lukim na bihainim.” (1 Pita 5:2, 3) Ol wasman Kristen tru ol i no “bosim bilip” bilong ol sipsip. Ol i save wok wantaim ol long mekim wok bilong God, na ol i wok long mekim gutpela pasin em ol narapela i ken lukim na bihainim.—2 Korin 1:24.
12. Ol man i laik bai God i orait long ol na helpim ol, ol i mas i stap olsem wanem long ol gavman bilong graun?
12 Ol i aninit long ol gavman bilong graun, tasol ol i no insait long ol samting bilong dispela graun. Sapos man i no “stap aninit long ol gavman,” orait God i no ken helpim em. Bilong wanem? Long wanem, “God yet i putim ol na ol i stap. Olsem na ol man i sakim tok bilong gavman, ol i sakim tok bilong ol man God yet i bin putim long wok bilong ol.” (Rom 13:1, 2) Tasol Jisas i save, sampela taim tok bilong gavman inap pait wantaim tok bilong God, olsem na em i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Mak 12:17) Ol man i laik bai God i orait long ol na helpim ol, ol i mas “wok pastaim long painim kingdom bilong God wantaim stretpela pasin bilong em,” na bihainim tu ol lo bilong gavman i no pait wantaim lo bilong God. (Matyu 6:33, Nupela Testamen na Ol Sam; Aposel 5:29) Jisas i kamapim klia dispela samting taim em i stori long ol disaipel bilong em olsem: “Ol i no bilong dispela graun, olsem mi yet mi no bilong dispela graun.” Na em i tok moa: “Kingdom bilong mi em i no bilong dispela graun.”—Jon 17:16; 18:36.
13. Pasin sori i save mekim wanem wok bilong kamapim klia husat ol i lain tru bilong God?
13 Ol i save “mekim gutpela pasin” long olgeta man—i no ol wantok tasol. (Galesia 6:10) Pasin sori Kristen i save mekim wankain pasin long olgeta man, maski ol i bilong wanem skin o lain o tok ples, o ol i maniman o rabisman, o ol i bin skul gut o nogat. Pasin bilong mekim gut long olgeta man na moa yet long ol wanbilip, dispela i helpim pasin bilong kamapim klia wanem lain tru God i orait long ol na helpim ol. Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:35; Aposel 10:34, 35.
14. Ol man God i orait long ol, yu ting ol narapela tu i orait long ol? Stori long dispela.
14 Ol i orait long kisim hevi na pen long mekim laik bilong God. “Sapos ol i bin mekim nogut long mi, orait ol bai i mekim nogut long yupela tu. Na sapos ol i bin bihainim tok bilong mi, orait ol bai i bihainim tok bilong yupela tu.” (Jon 15:20; Matyu 5:11, 12; 2 Timoti 3:12) Planti man i no save laikim ol man em God i orait long ol na helpim ol, na yumi ken tingim Noa, pasin bilong em long bilip i kamapim long ples klia pasin nogut bilong olgeta manmeri bilong graun. (Hibru 11:7) Long nau, ol man i laik bai God i ken orait long ol na helpim ol, ol i no save daunim strong bilong tok bilong God o brukim ol lo bilong em bilong stiaim tingting na bai ol i no ken kisim nogut long han bilong ol birua, nogat. Ol i save pinis olsem sapos ol i stap gut long wok bilong God, orait ol man bai ‘kirap nogut na tok nogut’ long ol.—1 Pita 2:12; 3:16; 4:4.
Em Taim Bilong Skelim Gut
15, 16. (a) Wanem ol askim inap helpim yumi long save God i orait long wanem lain bilong lotu? (b) Planti milion manmeri i bin kisim wanem tingting? Bilong wanem?
15 Askim skin bilong yu, ‘Wanem lain bilong lotu i gat nem long bihainim gut Tok Bilong God, maski sampela tok bilong en i narapela kain long ol bilip bilong planti man? Wanem lain i strong long kamapim nem tru bilong God na kisim dispela nem bilong makim ol i lain bilong Em? Wanem lain i tokaut olsem Kingdom bilong God tasol em i rot bilong pinisim ol hevi bilong graun? Wanem lain i bihainim ol lo bilong God long ol samting bilong stretpela pasin, maski ol man i ting ol i bihainim pasin bilong bipo tasol? Wanem lain i no gat ol pris pasto ol i mas baim bilong mekim wok, na olgeta bilong dispela lain ol i man bilong autim tok? Wanem lain i gat nem olsem lain i bihainim lo bilong gavman, maski ol i no laik insait long wok politik? Wanem lain i save mekim pasin sori na lusim hap taim na mani long helpim ol man long kisim save long God na ol samting em i tingting pinis long mekim? Na wanem lain ol narapela i wok yet long daunim ol, na tok bilas long ol, na mekim nogut long ol, maski ol i mekim ol dispela gutpela samting yumi kolim pinis?’
16 Planti milion manmeri long olgeta hap bilong graun i bin skelim gut ol samting na ol i bilip olsem ol Witnes Bilong Jehova tasol i save bihainim lotu i tru. Ol i kisim dispela tingting taim ol i skelim ol samting ol Witnes Bilong Jehova i skulim ol man long en, na pasin ol i bihainim, na ol gutpela samting em lotu bilong ol i kamapim. (Aisaia 48:17) Planti milion manmeri i save mekim tok olsem tok profet bilong Sekaraia 8:23 i tok: “Mipela i harim olsem God i stap wantaim yupela . . . Olsem na mipela i laik kamap wanlain wantaim yupela.”
17. Bilong wanem ol Witnes Bilong Jehova i no hambak taim ol i tok lotu bilong ol tasol em lotu i tru?
17 Yu ting ol Witnes Bilong Jehova i hambak taim ol i tokaut olsem God i orait long lain bilong ol tasol? Nogat. Yumi ken tingim ol Israel, taim ol i stap long Isip ol i bin tokaut olsem God i orait long ol tasol, maski ol Isip i gat lotu bilong ol yet. Na ol Kristen long taim bilong ol aposel i bin tokaut olsem God i orait long lain bilong ol, tasol ol lain bilong lotu Juda nogat. Ol samting yumi lukim i kamapim long ples klia olsem ol Witnes i tok stret taim ol i tok God i orait long ol tasol. Long 235 kantri, ol Witnes Bilong Jehova i mekim dispela wok em Jisas i tok lain tru bilong em bai mekim long taim bilong las de, olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14.
18, 19. (a) Bilong wanem i no gat as na ol Witnes Bilong Jehova i mas lusim wok bilong ol long autim tok, maski ol man i birua long ol? (b) Olsem wanem Song 41:11 i soim olsem God i orait long ol Witnes na em i helpim ol?
18 Ol Witnes Bilong Jehova bai wok yet long mekim dispela wok, na sapos ol man i mekim nogut long ol o birua long ol, ol i no ken larim dispela i pasim wok bilong ol. Ol i mas mekim wok bilong Jehova na ol bai mekim tru. Insait long 100 yia i go pinis, planti man i bin mekim kain kain samting bilong pasim ol Witnes long mekim wok bilong God, tasol samting ol birua i laik mekim i lus nating, long wanem, Jehova i bin tok promis olsem: “I no gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim ol kain kain tok long yu. Long dispela pasin mi save was gut long olgeta wokman bilong mi na mekim ol i win.”—Aisaia 54:17.
19 Maski planti man long olgeta hap i birua long ol Witnes Bilong Jehova, ol i strong moa na ol i mekim bikpela wok moa yet, winim bilong bipo, na dispela i kamapim long ples klia olsem Jehova i amamas long wok ol i mekim. King Devit i tok: “Sapos ol birua i no daunim mi, bai mi ken save yu laikim mi.” (Song 41:11; 56:9, 11) I no gat wanpela taim na ol birua bilong God inap daunim ol manmeri bilong Jehova, long wanem, Gopas bilong ol, Jisas Krais, i mekim wok i go bilong daunim tru olgeta birua!
Yu Inap Bekim?
• Wanem sampela man bilong bipo em God i bin orait long ol na helpim ol?
• Wanem sampela mak bilong lotu i tru?
• Wanem samting i mekim na yu yet yu bilip olsem God i orait long ol Witnes Bilong Jehova na helpim ol?
[Piksa long pes 13]
Ol man i laik bai God i orait long ol na helpim ol, ol i mas larim Baibel tasol i stap olsem as bilong ol bilip bilong ol
[Piksa long pes 15]
Ol elda Kristen i stap olsem gutpela piksa bilong ol sipsip i ken bihainim