Amamas Long Kisim Save Long Jehova
“Ol man i harim tok bilong God na i bihainim, em ol i ken amamas.”—LUK 11:28.
1. Jehova i kirap givim tok long ol man long wanem taim?
JEHOVA i save laikim tru ol manmeri na em i save tingim tru i stap bilong ol. Olsem na yumi no ken kirap nogut long em i save givim tok long ol. Pasin bilong em long givim tok long ol man i bin kirap long gaden Iden. Olsem Stat 3:8 i tok, wanpela taim long “apinun, taim ples i kol,” Adam na Iv “i harim [nek bilong] God.” Sampela man i ting dispela i makim olsem em pasin bilong Jehova long givim tok long Adam long kain taim olsem long olgeta de. Dispela tingting i tru o nogat, em yumi no save. Tasol Baibel i kamapim long ples klia olsem God i bin lusim hap taim bilong givim tok long namba wan man long ol samting em i mas mekim, na tu, bilong skulim em long ol samting em i mas save long en bambai em inap mekim ol wok bilong em.—Stat 1:28-30.
2. Namba wan man na meri i mekim wanem na Jehova i no stiaim ol moa? Wanem samting i kamap long dispela?
2 Jehova i givim laip long Adam na Iv, na em i givim wok long ol long bosim ol animal na olgeta hap bilong graun. I gat wanpela tambu tasol—ol i no ken kaikai long diwai bilong givim save long samting i gutpela na samting i nogut. Satan i stiaim tingting bilong Adam na Iv, olsem na ol i sakim tok bilong God. (Stat 2:16, 17; 3:1-6) Ol i laik mekim ol samting long laik bilong ol yet, na ol yet i laik makim wanem samting i stret na i no stret. Taim ol i mekim olsem, ol i mekim pasin longlong na God i no stiaim ol moa. Long dispela samting ol bikpela hevi tru i kamap long tupela yet na olgeta pikinini bilong tupela em ol i no kamap yet. Adam na Iv i go lapun na bihain ol i dai na ol i no inap wet na God bai kirapim bek ol. Ol tumbuna pikinini bilong ol i kisim sin long ol na ol hevi i kamap long en, em indai.—Rom 5:12.
3. Bilong wanem Jehova i givim tok long Kein? Kein i mekim wanem?
3 Maski pasin bikhet i kamap long Iden, Jehova i wok yet long givim tok long ol man em i bin wokim. Sin i laik pundaunim Kein, em namba wan pikinini man bilong Adam na Iv. Jehova i givim tok lukaut long em olsem bikpela hevi bai painim em, na em i tokim em long “mekim gutpela pasin.” Tasol Kein i sakim dispela gutpela tok na em i kilim i dai brata bilong em. (Stat 4:3-8) Olsem na dispela tripela manmeri bilong pastaim ol i sakim tok bilong Man i bin givim laip long ol, em dispela God i save givim tok long ol man bambai ol i ken i stap gut. (Aisaia 48:17) Ating Jehova i mas bel hevi stret long dispela samting, a?
Jehova i Kamapim Em Yet Long Ol Bilipman Bilong Bipo
4. Jehova i bilip tru long wanem samting long ol tumbuna pikinini bilong Adam? Em i tingim dispela samting, na em i tokaut long wanem gutpela samting ol man inap wet long en?
4 I gat as na Jehova i no ken givim moa tok long ol man, tasol em i no mekim olsem. Em i bilip tru olsem sampela tumbuna pikinini bilong Adam bai bihainim tok em i givim long ol bilong stiaim ol. Taim Jehova i tokaut long strafe bai painim Adam na Iv, em i tok profet long wanpela “lain,” olsem pikinini, bai kamap na birua long Snek, em Satan. Bihain, pikinini bai krungutim het bilong Satan, na em bai dai. (Stat 3:15) Dispela tok profet em wanpela gutpela tok long ol man i ken wetim, em “ol man i harim tok bilong God na i bihainim.”—Luk 11:28.
5, 6. Paslain long taim bilong ol aposel, Jehova i givim tok long ol manmeri olsem wanem? Dispela i bin helpim ol olsem wanem?
5 Jehova i kamapim laik bilong em long ol gutpela bilipman bilong bipo, olsem Noa, Abraham, Aisak, Jekop, na Jop. (Stat 6:13; Kisim Bek 33:1; Jop 38:1-3) Bihain, long rot bilong Moses em i kamapim ol lo long lain Israel. Lo Bilong Moses i bin helpim ol long planti samting. Taim ol Israel i bihainim dispela Lo, dispela lain manmeri bilong God ol i stap narapela kain long olgeta narapela lain. God i tokaut klia long ol Israel olsem sapos ol i bihainim Lo, em bai mekim gut long ol long ol samting bilong skin na ol samting bilong spirit, na ol bai kamap wanpela lain pris, olsem wanpela lain holi. Lo Bilong Moses i kamapim tu ol lo bilong kaikai na ol lo bilong i stap klin na bai sik i no ken kalap tumas long ol. Tasol Jehova i bin givim tok lukaut long ol tu olsem ol bikpela hevi bai painim ol sapos ol i no bihainim tok.—Kisim Bek 19:5, 6; Lo 28:1-68.
6 Bihain, God i kamapim sampela hap moa bilong Baibel. Sampela hap i stori long ol samting Jehova i bin mekim long sampela lain man. Sampela hap i mekim ol naispela tok bilong stori long ol gutpela gutpela pasin bilong em. Sampela hap i gat ol tok profet long en i toktok long ol samting Jehova bai mekim bilong kamapim laik bilong em long bihain. Ol bilipman bilong bipo ol i bin stadi gut long ol dispela tok bilong God na ol i bihainim. Wanpela i tok: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.” (Song 119:105) Long ol manmeri i amamas long harim tok, Jehova i skulim ol na givim gutpela save, olsem lait, long ol.
Lait i Wok Long Kamap Strong Moa
7. Tru, Jisas i bin mekim planti mirakel, tasol em i gat nem long wanem wok? Bilong wanem i olsem?
7 Long taim bilong ol aposel, sampela lain insait long lotu Juda i bin bungim sampela pasin bilong ol tumbuna wantaim Lo. Ol i paulim ol tok bilong Lo, olsem na Lo i no givim lait long ol man, nogat; ol pasin bilong ol tumbuna i mekim na Lo i givim hevi long ol. (Matyu 23:2-4) Tasol long 29 C.E. Jisas i kamap olsem Mesaia. Em i gat wok bilong mekim, olsem: Em i mas dai bilong helpim ol manmeri, na tu, em i mas “autim tok tru.” Tru, em i mekim planti mirakel, tasol nambawan wok em i gat nem long en, em wok olsem “Tisa.” Ol samting em i skulim ol man long en i olsem lait i go long ol man i stap tudak long ol samting bilong spirit. I stret na Jisas yet i tok: “Mi yet mi lait bilong graun.”—Jon 8:12; 11:28; 18:37.
8. Long taim bilong ol aposel, spirit bilong God i kamapim wanem ol hap bilong Baibel? Olsem wanem ol dispela hap i helpim ol Kristen bilong bipo?
8 Bihain ol i skruim 4-pela Gutnius long Baibel, em 4-pela stori ol i bin raitim long i stap bilong Jisas, na Buk Aposel, em i stori long lotu Kristen i go long planti hap bihain long indai bilong Jisas. Na tu, spirit bilong God i kirapim ol disaipel bilong Jisas long raitim ol pas, na tu, Buk Kamapim Tok Hait, em i gat ol tok profet long en. Ol dispela hap bilong Baibel wantaim Ol Skripsa Hibru i olsem Baibel olgeta. Long rot bilong dispela buk em spirit bilong God i kamapim, ol Kristen inap save long tok i tru “i bikpela tru, na i go longpela moa, na i go antap tru, na i go daun moa.” (Efesus 3:14-18) Ol inap kisim “tingting bilong Krais.” (1 Korin 2:16) Tasol ol dispela Kristen bilong bipo i no bin klia gut long olgeta liklik liklik samting Jehova bai mekim bilong kamapim laik bilong em. Aposel Pol i raitim pas long ol wanbilip olsem: “Nau yumi save hap hap tasol long ol samting bilong God. I olsem yumi lukim ol long glas tasol.” (1 Korin 13:12) Kain glas olsem bai kamapim ol bikpela samting tasol, i no olgeta liklik liklik samting. Bihain bai ol i kisim sampela save moa long Tok Bilong God.
9. Long “taim bilong las de” ol man i bin kisim save long wanem ol samting?
9 Nau yumi stap long wanpela hap taim ol i kolim “taim bilong las de,” em taim i gat “planti hevi nogut tru.” (2 Timoti 3:1) Daniel i tok profet olsem long dispela taim “stretpela save bai kamap planti.” (Daniel 12:4, NW ) Olsem na Jehova, em Bikpela Man Bilong Givim Ol Tok, em i helpim ol man i gat stretpela bel long kisim gut insait bilong ol tok bilong Baibel. Planti milion manmeri long nau ol i save olsem Krais Jisas i kamap King long heven long 1914. Na tu, ol i save olsem klostu nau em bai pinisim olgeta pasin nogut na mekim graun olgeta i kamap wanpela paradais. Nau ol i autim dispela bikpela samting bilong gutnius bilong Kingdom long olgeta hap bilong graun.—Matyu 24:14.
10. Inap planti handet yia, ol manmeri i bin mekim wanem long tok bilong Jehova?
10 Em nau, long bipo yet na i kam inap long nau, Jehova i bin kamapim laik bilong em long ol manmeri long graun. Baibel i stori long planti manmeri em ol i bin putim gut yau long tok bilong em, na bihainim gutpela tingting na save bilong em, olsem na em i bin mekim gut long ol. Na Baibel i stori long sampela manmeri em ol i bin sakim gutpela tok God i bin givim bilong helpim ol—ol i bihainim rot bilong lus Adam na Iv i bihainim. Jisas i tok piksa long dispela samting taim em i stori long tupela rot. Wanpela i go long ples bilong lus. Em i op tumas na i isi long bihainim, na planti manmeri i sakim Tok Bilong God ol i bihainim dispela rot. Narapela rot i go long ples bilong kisim laip oltaim. Maski dispela rot i liklik, tasol em rot ol wan wan manmeri i bihainim. Em ol manmeri i bilip olsem Baibel em i Tok Bilong God, na ol i bihainim ol tok bilong en.—Matyu 7:13, 14.
Tenkyu Long Ol Samting Yumi Holim
11. Save na bilip bilong yumi long Baibel i kamapim klia wanem samting?
11 Olsem wanem? Yu wanpela bilong ol manmeri i wokabaut long rot i go long laip? Sapos olsem, ating yu laik i stap long dispela rot, a? Olsem wanem yu inap mekim olsem? Long olgeta taim tingim tingim long bel ol gutpela samting yu bin kisim long i stap bilong yu long rot bilong save yu kisim long Baibel, na pilim tru ol dispela samting. Yu bin putim gut yau long gutnius na dispela i kamapim klia olsem God i mekim gut long yu. Jisas i kamapim dispela samting taim em beten long Papa bilong em, olsem: “Papa, yu Bikpela bilong heven na bilong graun, mi tenkyu long yu, long wanem, yu bin haitim ol dispela samting long ol man i gat gutpela tingting na save, na yu bin soim long ol man i stap olsem ol liklik pikinini tasol.” (Matyu 11:25) Ol man bilong painim pis na ol man bilong kisim takis ol i kisim gut ol tok Jisas i skulim ol man long en, tasol ol hetman bilong lotu i gat bikpela skul long ol samting bilong lotu ol i no kisim. Jisas i tok moa: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jon 6:44) Sapos yu kisim pinis save long Baibel na yu bilip na bihainim ol tok bilong en, dispela i kamapim olsem Jehova i helpim yu pinis long kam long em. Dispela em wanpela as na yu ken stap amamas.
12. Baibel i givim save long yumi long wanem ol samting?
12 Baibel i gat ol tok i tru bilong helpim man long kamap fri na ol tok i givim save long ol man. Ol man i bihainim save ol i kisim long Baibel, ol i lusim pinis kalabus bilong ol bilip kranki bilong ol tumbuna, na bilip giaman, na pasin bilong ol man long ol i no gat save, em ol dispela pasin i bosim strong i stap bilong planti milion manmeri. Olsem: Taim yumi save long ol man i dai pinis ol i stap olsem wanem, dispela i helpim yumi na yumi no pret olsem ol man i dai pinis inap mekim nogut long yumi, o ol famili bilong yumi i dai pinis ol i karim pen, nogat. (Esekiel 18:4) Taim yumi save tru long ol ensel nogut, dispela i helpim yumi long abrusim ol wok bilong ol spirit nogut. Na dispela bilip olsem ol man i dai pinis ol bai kirap bek, em i mekim gut bel bilong ol man em wanpela long famili bilong ol i dai. (Jon 11:25) Ol tok profet bilong Baibel i soim yumi, long nau yumi stap long wanem taim, na ol i strongim bilip bilong yumi long ol tok promis bilong God long ol samting bai kamap bihain. Na ol i strongim tu bilip bilong yumi olsem yumi inap i stap oltaim oltaim.
13. Pasin bilong bihainim Tok Bilong God i helpim yumi olsem wanem long ol samting bilong skin?
13 Ol lo bilong stiaim tingting em God i kamapim long Baibel i skulim yumi long bihainim ol pasin i helpim yumi long ol samting bilong skin. Olsem: Baibel i skulim yumi long abrusim ol pasin i mekim skin bilong yumi i kamap doti, olsem pasin bilong smok na kisim drak. Yumi klia long pasin bilong dring spak. (2 Korin 7:1) Pasin bilong bihainim ol lo bilong God long stretpela pasin i helpim yumi na yumi no ken kisim ol sik bilong pamuk. (1 Korin 6:18) Taim yumi bihainim tok bilong God olsem no ken laikim tumas mani, yumi no bagarapim bel isi bilong yumi olsem planti man i save mekim taim ol i wok long kisim planti mani kago samting, nogat. (1 Timoti 6:10) Pasin bilong bihainim Tok Bilong God long i stap bilong yu i bin helpim yu olsem wanem long ol samting bilong skin?
14. Olsem wanem spirit holi i helpim i stap bilong yu?
14 Sapos yumi bihainim Tok Bilong God, bai yumi kisim spirit holi bilong Jehova. Bai yumi wok long kisim ol pasin bilong Krais, olsem pasin marimari na pasin sori. (Efesus 4:24, 32) Na tu, spirit bilong God i kamapim ol gutpela pasin long yumi—olsem laikim tru ol narapela, amamas, bel isi, i no belhat kwik, helpim ol man, mekim gutpela pasin long ol, bilip, stap isi, daunim laik bilong olpela bel. (Galesia 5:22, 23) Ol dispela pasin i helpim yumi long stap amamas na pas gut wantaim ol narapela na famili bilong yumi. Ol bai strongim bel bilong yumi na dispela bai helpim yumi long karim ol hevi na no ken pret. Olsem wanem? Yu luksave long olsem wanem spirit holi i bin helpim i stap bilong yu long kamap gutpela moa?
15. Taim yumi mekim ol samting i stret wantaim laik bilong Jehova, dispela i helpim yumi olsem wanem?
15 Taim yumi mekim ol samting i stret wantaim laik bilong Jehova, dispela i helpim yumi long strongim pasin bilong yumi long pas gut wantaim em. Yumi bilip strong moa olsem em i save pilim tru tingting bilong yumi na laikim tru yumi. Ol samting i painim yumi i skulim yumi olsem em i save sambai long yumi long taim bilong hevi. (Song 18:18) Yumi pilim olsem em i save harim tru ol beten bilong yumi. (Song 65:2) Yumi wetim Jehova long soim rot long yumi, na yumi bilip tru olsem dispela bai helpim yumi. Na yumi gat gutpela samting tru long wet long en olsem long taim God i makim em bai helpim ol manmeri i stap gut long em long kamap gutpela olgeta na ol bai kisim presen olsem laip i stap oltaim. (Rom 6:23) Disaipel Jems i tok: “Yupela i mas i go klostu tru long God, na em bai i kam klostu tru long yupela.” (Jems 4:8) Olsem wanem? Yu pilim olsem pasin bilong yu long pas gut wantaim Jehova i kamap strong moa, taim yu bin go klostu moa long em?
Gutpela Samting Tru
16. Sampela Kristen long taim bilong ol aposel i bin lusim wanem ol pasin?
16 Aposel Pol i tokim ol Kristen long taim bilong em, em God i bin makim ol long spirit holi, olsem bipo sampela bilong ol i bin mekim pasin pamuk, trabel long ol maritmeri, mekim kain kain pasin sem wantaim ol narapela man, stil, mangal, spak, tok bilas, na pulim samting bilong ol narapela man. (1 Korin 6:9-11) Tok i tru bilong Baibel i kirapim ol long senisim pasin bilong ol; God i ‘wasim ol’ na ol i kamap klin. Traim long tingim i stap bilong yu sapos yu no kisim ol dispela gutpela tok i tru i mekim yu i kamap fri, em yu bin kisim save long en long Baibel. Tru tumas, tok i tru em wanpela gutpela samting tru i winim olgeta narapela samting. Man! Yumi amamas tru long Jehova i save givim tok long yumi, a?
17. Ol Witnes Bilong Jehova i bin kisim wanem ol kaikai bilong spirit long ol miting Kristen?
17 Na tu, tingim ol gutpela samting yumi kisim long rot bilong bikpela lain brata bilong olgeta kain skin! Lain “wokboi i gat gutpela tingting” i givim kaikai bilong spirit long taim stret, olsem ol Baibel, na nius, na ol buk samting long kain kain tok ples. (Matyu 24:45-47) Long ol miting bilong kongrigesen long yia 2000, ol Witnes Bilong Jehova long planti kantri i bin kamapim gen ol bikpela tok long 8-pela buk bilong Ol Skripsa Hibru. Ol i tingim i stap bilong 40 man na meri bilong Baibel, em buk Insight on the Scriptures i kamapim stori bilong ol. Ol i stadi long 33 sapta bilong buk Nambawan Man Tru i Winim Olgeta Narapela Man na klostu olgeta sapta bilong buk Pay Attention to Daniel’s Prophecy! Ol i skelim 36 stori bilong nius Wastaua, na tu, inap 52 stori bilong stadi bilong dispela nius. Na lain bilong Jehova i kisim kaikai bilong spirit long 12-pela Wok Kingdom Bilong Yumi, na long olgeta wik ol i harim wanpela pablik-tok long kain kain tok bilong Baibel. Man! Ol i kisim planti gutpela save long ol samting bilong spirit!
18. Kongrigesen Kristen i save helpim yumi long wanem ol rot?
18 Long olgeta hap bilong graun, i gat 91,000 kongrigesen i save helpim na strongim yumi long rot bilong ol miting na pasin bilong bung wantaim. Na yumi gat ol strongpela wanbilip Kristen i save amamas long helpim yumi long ol samting bilong spirit. (Efesus 4:11-13) Tru tumas, yumi bin kisim save long tok i tru na dispela i bin helpim tru yumi. Yumi amamas long save long Jehova na mekim wok bilong em. Tok bilong man i raitim Song i stret olgeta, em i tok: ‘Ol manmeri i putim Bikpela i stap God bilong ol, ol i ken amamas.’—Song 144:15.
Yu Tingim Yet?
• Paslain long taim bilong ol Kristen, Jehova i bin givim tok long husat?
• Olsem wanem lait bilong spirit i kamap strong moa long taim bilong ol aposel? long taim bilong yumi?
• Taim yumi bihainim save yumi kisim long Jehova, yumi save kisim wanem ol gutpela samting?
• Bilong wanem yumi save amamas long save yumi kisim long God?
[Ol Piksa long pes 8, 9]
Jehova i kamapim laik bilong em long Moses, Noa, na Abraham
[Piksa long pes 9]
Long nau, Jehova i kamapim klia ol tok bilong Baibel
[Ol Piksa long pes 10]
Tingim ol gutpela samting yumi kisim long rot bilong bikpela lain brata bilong olgeta kain skin!