Yu Ting i Gat Rot na Ol Man i Ken Kamap Wanbel?
MASKI yu gat wanem bilip, ating yu wanbel long dispela tok olsem insait long olgeta lotu i gat ol man i laikim tumas tok i tru. Ol manmeri i laikim tumas tok i tru na ol i givim bel long painim, sampela bilong ol i stap insait long lotu Hindu, Katolik, lotu Juda, na long sampela narapela lotu. Tasol i luk olsem lotu i save mekim na ol man i bruk bruk. Sampela i insait long lotu bambai ol i ken hait na mekim sampela wok nogut. Yu ting wanpela taim bihain ol manmeri bilong olgeta lotu i laikim tumas gutpela pasin bai ol i kamap wanbel? I gat rot bilong kirapim ol long wanbel na wok gut wantaim?
“Yumi tingting planti long lukim olsem lotu i as na ol lain i bruk moa yet!” Tingim ol pait olsem. Ol Hindu i pait wantaim ol Budis long Sri Lanka. Ol Talatala, Katolik, na ol Juda, ol i bin insait long ol pait na kilim man i dai. Ol lotu i gat nem Kristen, ol i save pait long ol Muslim long Bosnia, Sesnia, Indonisia, na Kosovo. Na long Mas 2000, kros pait bilong tupela de long samting bilong lotu i mekim na 300 man bilong Naijiria i dai. Tru tumas, pasin birua em lotu i as bilong en i helpim ol dispela pait i go bikpela moa.
Ol manmeri i gat gutpela bel ol i bel hevi long ol pasin nogut i kamap insait long lotu. Olsem: Planti man bilong lotu, ol i kirap nogut long harim olsem sampela sios i larim pris pasto i holim yet wok bilong ol maski ol i bin mekim pasin sem long pikinini. Na i gat ol bilipman i sem tru long tok pait i stap namel long planti lotu em ol i tok ol i Kristen—sampela i orait long pasin sodom na pasin bilong rausim bel na sampela nogat. I no hatwok long luksave olsem lotu i no kamapim pasin wanbel. Tasol i gat ol man i laikim tumas tok tru ol i stap insait long olgeta lotu. Ol stori hia i kamapim klia dispela.
Ol i Laik Tru Long Painim Tok Tru
Fidelia em i givim bel tru long lotu bilong em long Katolik Sios Bilong San Francisco long La Paz, Bolivia. Em i save brukim skru long imis bilong Maria, na em i baim ol kandel i gutpela moa bilong sanapim long ai bilong kruse. Olgeta wik em i givim planti kaikai long pris na bai em i ken tilim long ol rabisman. Tasol faipela bebi bilong Fidelia i dai paslain long ol i kisim baptais. Taim pris i tokim Fidelia, ol dispela bebi i karim pen long ples tudak bilong klinpaia, Fidelia i gat laik long save: ‘Sapos God em i gutpela man, olsem wanem kain samting olsem inap kamap?’
Tara em i wanpela dokta, em i go bikpela insait long lotu Hindu long Kathmandu, Nepal. Em i bihainim ol kastam bilong ol tumbuna na mekim lotu, em i lotuim ol god insait long ol tempel Hindu na em i gat ol imis long haus. Tasol Tara i tingting planti long ol askim olsem: Bilong wanem i gat planti pen na hevi? Bilong wanem ol manmeri i save dai? Lotu bilong em i no gat gutpela bekim bilong ol dispela askim.
Nau yumi ken tingim Panya, em i go bikpela long lotu Budis long wanpela haus arere long wara long Bangkok, Tailan. Ol i lainim em olsem man i save karim ol pen na hevi, long wanem, em i bin mekim sampela rong taim em i bin stap laip long ol narapela narapela taim bipo. Na dispela hevi bai lusim man sapos em i daunim olgeta laik bilong skin. Olsem ol narapela bilong lotu Buda, Panya i lain long rispek long ol bruder bilong ol, em ol i save pasim ol yelopela laplap na kam long haus long olgeta bikmoning bilong kisim mani samting bilong tilim long ol rabisman. Panya i bihainim pasin bilong lotu na makim taim bilong stap isi na mekim tingting i dai. Em i save bungim planti imis bilong Buda, long wanem, em i ting ol bai lukautim em. Wanpela bikpela bagarap i mekim na tupela lek bilong em i dai, na bihain Panya i go long ol haus bruder bilong ol Buda na bai ol i wokim mirakel na oraitim sik bilong em. Mirakel i no painim em na em i no bin kisim sampela bikpela save moa long ol samting bilong spirit. Tasol em i bin kisim save long wok bilong glasman na posin samting na em i go insait long ol dispela.
Mama i karim Virgil long Amerika. Taim em i stap long skul koles em i joinim lain bilong ol Blak Muslim. Em i givim bel long tilim ol nius bilong dispela lain, ol dispela nius i stori olsem Satan em ol waitskin. Lain ya i ting dispela em i as na ol waitskin i bin mekim planti pasin nogut tru long ol blakskin. Virgil i givim bel long dispela lain, tasol em i tingting planti long ol askim olsem: Olsem wanem na olgeta waitskin i nogut? Na bilong wanem planti tok bilong ol Blak Muslim em i samting bilong mani?
Maski Charo i go bikpela long wanpela kantri bilong Saut Amerika we planti man moa i bilong lotu Katolik, Charo i givim bel long lotu Talatala. Em i amamas long em i no insait long pasin bilong lotuim imis olsem planti narapela i mekim. Charo i amamas long go lotu long olgeta Sande, long wanem, taim ol i mekim lotu em i amamas long singaut “Haleluja!” na em i insait long ol singsing na danis i kamap bihain long toktok. Charo i bilip tru olsem em i bon-agen na God i kisim em pinis. Em i save tilim mani bilong em long 10-pela hap, na wanpela hap em i givim long lotu. I gat wanpela evanjelis em i save laikim tru, na taim dispela evanjelis i kamap long TV na singaut long mani, Charo i salim mani i go long em bilong helpim ol pikinini long Afrika. Tasol taim em i askim pasto, bilong wanem God bilong sori i givim pen long ol man long helpaia, Charo i luksave olsem pasto i no inap kamapim gutpela bekim. Na bihain em i bin painimaut olsem ol lain i no bin yusim mani bilong em bilong helpim ol pikinini long Afrika.
Dispela faipela manmeri i bilong narapela narapela ples, tasol wanpela samting bilong ol i wankain: Ol i laikim tumas tok tru na ol i givim bel long painim ol trupela tok i bekim ol askim bilong ol. Tasol yu ting ol inap kamap wanbel long mekim lotu i tru? Stori bihain long dispela bai bekim dispela askim.
[Piksa long pes 4]
Yu ting ol man bilong narapela narapela ples inap kamap wanbel?
[Piksa Kredit Lain long pes 3]
G.P.O., Jerusalem