Yu Inap Kisim Trupela Bilip

Taim Sarah Jayne i gat 19 krismas, em i kisim save olsem em i gat sik kensa bilong ovari. Bihain long operesen bilong em, em i pilim orait na em i ting em bai stap gut long bihain. Olsem na taim em i gat 20 krismas, em na wanpela man i pasim tok long marit na em i kirap stretim ol samting bilong marit. Long dispela yia yet, sik kensa i kamap gen, na em i kisim save olsem em bai i stap laip inap sampela wik tasol. Sarah Jayne i dai long Jun 2000, paslain liklik long taim em i kisim 21 krismas.

OL MAN i kam lukim Sarah Jayne long haus sik, ol i kirap nogut long em i stap bel isi na bilip long ol gutpela samting bai kamap long bihain, na em i bilip tru long God na long Tok bilong em, em Baibel. Maski bikpela hevi tru i painim em, em i bilip tru long em bai kirap bek long matmat na lukim gen ol pren bilong em. (Jon 5:​28, 29) Em i tok: “Bai mi lukim yupela olgeta long nupela taim God bai kamapim.”

Sampela ol i tok kain bilip olsem i save giamanim man. Ludovic Kennedy i tok: ‘Ol man i save pret, ol i bilip long gutpela laip man inap kisim bihain long taim em i dai. Ol i ting taim biugel i krai laspela taim, ol man bai kisim kain kain gutpela samting, ol bai stap long wanpela kain gaden Iden, na stap amamas wantaim ol man i bin dai paslain long ol na ol man i dai bihain long ol.’ Tasol mipela i mas tok olsem: Wanem tingting i gutpela moa​—⁠yumi bilip olsem “yumi bilong i stap nau tasol, olsem na yumi mas amamas long olgeta samting,” olsem Kennedy i tok, o yumi bilip long God na long tok promis bilong em long ol man i dai pinis ol bai kirap bek? Sarah Jayne i bilip long God na long kirap bek. Olsem wanem em i kisim kain bilip olsem?

‘Kam Long God na Wok Long Painim Em’

Bilong yu ken bilip tru long wanpela man, yu mas save long em na lain long pasin bilong em long tingting na mekim ol samting. Bilong mekim olsem, tingting na bel i mas wok wantaim long kisim dispela save. Na i wankain tu taim yu wok long kisim pasin bilong bilip tru long God. Yu mas kisim save long em, na long pasin bilong em, na save olsem olgeta tok bilong em na ol samting em i bin mekim i gutpela na yu inap bilip tru long en.​—⁠Song 9:10; 145:​1-21.

Sampela i ting yumi no inap mekim olsem. Ol i tok, God i stap longwe tru, na yumi no inap save long em, na yumi no save em i stap tru o nogat. Man i no bilip tumas em inap tok: “Sapos God i samting tru long ol Kristen olsem long Sarah Jayne, bilong wanem em i no kamapim em yet long mipela ol narapela?” Tasol olsem wanem? God i stap longwe tru na yumi no inap painim em? Aposel Pol i toktok long ol saveman long Atens, na em i tok: “God i bin wokim skai na graun wantaim olgeta samting i stap long en,” na tu, em i bin givim ol samting ol man i mas kisim bilong ol i ken ‘kam long em na painim em.’ Pol i tok tu: “Em i no i stap longwe long yumi olgeta wan wan.”​—⁠Aposel 17:​24-27.

Orait olsem wanem yu ken ‘kam long God na painim em’? Sampela i bin mekim olsem taim ol i skelim ol samting i stap long ples antap na graun. Planti ol i ting dispela samting tasol i kamapim klia tru olsem i mas i gat Man bilong wokim olgeta samting.a (Song 19:1; Aisaia 40:26; Aposel 14:​16, 17) Ol i gat wankain tingting olsem aposel Pol, em i bin tok: “Stat long taim God i mekim kamap olgeta samting na i kam inap nau, ol man i lukim ol samting em i bin wokim. Long dispela rot ol man inap save long sampela pasin bilong God i stap hait. Ol inap save long as bilong pasin bilong God, na ol inap save long bikpela strong bilong en i stap oltaim oltaim.”​—⁠Rom 1:20; Song 104:⁠24.

Yu Mas i Gat Baibel

Tasol bilong yu ken bilip tru long God, yu mas i gat narapela samting em i bin kamapim. Em wanem samting? Em Baibel​—⁠Tok bilong God em spirit holi i kamapim, na long dispela buk God i kamapim laik bilong em. (2 Timoti 3:​16, 17) Sampela bai tok: “Tasol wet pastaim. Olsem wanem yu inap bilip long tok bilong Baibel taim yu lukim ol samting nogut ol man i tok ol i bihainim Baibel ol i save mekim?” Tru, ol samting ol lain bilong Kristendom i bin mekim i nogut tru, olsem ol i gat tupela maus, ol i bagarapim ol man, na mekim pasim pamuk. Tasol ol man i save tingting stret, ol inap luksave olsem Kristendom i giaman tasol long bihainim tok bilong Baibel.​—⁠Matyu 15:⁠8.

Baibel yet i tokaut olsem planti man bai tok ol i lotu long God, tasol “ol bai i givim baksait long Bikpela tu.” Aposel Pita i tok: “Dispela bai i mekim ol man nabaut i tok nogut long Rot bilong pasin i tru.” (2 Pita 2:​1, 2) Jisas Krais i tok ol dispela man i “man bilong mekim pasin nogut,” na ol pasin nogut bilong ol i kamapim klia ol i wanem kain man tru. (Matyu 7:​15-23) Sapos man i sakim Baibel, long wanem, ol lain bilong Kristendom i mekim kain kain pasin nogut, dispela i wankain olsem man i tromoi pas i kam long gutpela pren, long wanem, man i bringim pas i kam em i save mekim pasin nogut.

Sapos man i no gat Baibel, em i no inap kisim trupela bilip. Long rot bilong Baibel tasol Jehova i save kamapim tingting bilong em long ol samting. Em i kamapim bekim bilong kain askim em planti man i bin tingim inap longpela taim pinis, olsem: Bilong wanem God i larim pen na hevi i stap, na em bai mekim wanem long dispela samting. (Song 119:105; Rom 15:⁠4) Sarah Jayne i bilip olsem Baibel em i Tok bilong God em spirit holi i kamapim. (1 Tesalonaika 2:13; 2 Pita 1:​19-21) Olsem wanem em i kisim kain bilip olsem? I no olsem papamama tasol i tokim em long bilip olsem, nogat; em yet i lusim taim bilong skelim gut olgeta tok i kamapim olsem Baibel em tok bilong God yet, em i bin kamapim long ol man. (Rom 12:⁠2) Em i luksave olsem Baibel i gat bikpela strong long stiaim laip bilong ol man i bihainim ol lo bilong en bilong stiaim tingting. Na tu, long rot bilong ol buk olsem The Bible​​—⁠God’s Word or Man’s?,b em i skelim planti tok bilong Baibel yet i kamapim klia olsem God i as bilong ol tok bilong en.

‘Tok Bilong God i Kirapim Bilip’

Tasol sapos yumi holim Baibel o yumi bilip olsem spirit holi i kamapim tok bilong en, dispela tasol i no inap. Aposel Pol i tok: “Yumi harim tok bilong God na dispela i kirapim bilip.” (Rom 10:17) Pasin bilong harim tok bilong Baibel i strongim bilip, tasol sapos yu holim Baibel, dispela samting tasol i no inap. Yu inap “harim” tok God i mekim taim yu ritim na stadi long Tok bilong em. Ol yangpela tu inap mekim olsem. Pol i tok taim Timoti i “liklik pikinini yet,” mama na bubu bilong em ol i lainim em long “tok bilong God.” Yu ting dispela i makim olsem ol i subim em long bilip long Baibel? Nogat! Ol i no subim o giamanim Timoti. Ol i “skulim” em na em i “bilip strong” long tok em i harim na ritim.​—⁠2 Timoti 1:5; 3:​14, 15.

Ol samting Sarah Jayne i ritim na harim, dispela i skulim em tu. Olsem ol Beria i bin mekim long taim bilong ol aposel, Sarah Jayne i “harim tok” [long rot bilong papamama na ol narapela tisa] na em i “laikim tru.” Taim em i liklik pikinini yet, ating em i bilip long tok bilong papamama. Tasol bihain, taim em i kamap bikpela, em i no bilip nating o orait tasol long olgeta samting ol i lainim em long en. Em i ‘skelim tok i stap long buk bilong God, bilong em i ken save, dispela tok i tru o nogat.’​—⁠Aposel 17:⁠11.

Yu Inap Kisim Trupela Bilip

Yu tu inap kisim trupela bilip​—⁠em dispela kain bilip aposel Pol i tok long en long pas em i raitim long ol Kristen Hibru. Em i tok, dispela kain bilip i olsem yumi “save gut tru olsem, olgeta gutpela samting God i promis pinis long yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.” (Hibru 11:⁠1) Taim yu kisim dispela kain bilip, bai yu bilip tru olsem olgeta samting yu wet long en​—⁠na tok promis bilong God long kirapim bek ol daiman​—⁠em bai kamap tru. Yu bai save olsem i gat as tru na yu ken bilip na wet long ol dispela samting bai kamap​—⁠em i no wanpela tingting nating tasol. Bai yu kisim save olsem Jehova i save inapim tru olgeta wan wan tok promis bilong em. (Josua 21:45; 23:14; Aisaia 55:​10, 11; Hibru 6:18) Nupela taim God i tok promis long kamapim, bai yu bilip tru long en olsem em i kamap pinis. (2 Pita 3:13) Na bai yu bilip olsem God Jehova, Jisas Krais, na Kingdom bilong God i stap tru, na ol i no sampela tingting nating tasol.

Jehova i no lusim yu i stap wanpis na yu yet i mas wok long kisim trupela bilip. Em i givim Tok bilong em bilong olgeta man i ken kisim, na tu, em i bin kamapim kongrigesen Kristen long olgeta hap, em dispela kongrigesen i givim bel long helpim ol man i gat gutpela bel long bilip long God. (Jon 17:20; Rom 10:​14, 15) Kisim olgeta helpim Jehova i save givim long rot bilong oganaisesen bilong em. (Aposel 8:​30, 31) Na bilip em i wanpela pasin spirit holi i save kamapim, olsem na oltaim beten askim God long dispela spirit i ken helpim yu long kisim trupela bilip.​—⁠Galesia 5:⁠22.

Yu no ken tingting planti taim ol man i no save bilip tumas ol i tok bilas long ol man i tok ol i bilip long God na Tok bilong em. (1 Korin 1:​18-21; 2 Pita 3:​3, 4) Trupela bilip em i bikpela samting tru bilong strongim yu long sakim kain tok bilas olsem. (Efesus 6:16) Sarah Jayne i kisim save olsem dispela em i tru, na oltaim em i strongim ol man i kam lukim em long haus sik, long ol i mas strongim bilip bilong ol yet. Em i tokim ol: “Pilim tok i tru. Stadi long Tok Bilong God. Stap klostu long oganaisesen bilong God. Beten oltaim. Givim bel long wok bilong Jehova.”​—⁠Jems 2:​17, 26.

Wanpela nes i lukim pasin bilong Sarah Jayne long bilip long God na long ol man i dai pinis bai kirap bek, na em i tok: “Yu bilip tru long dispela samting, a?” Taim ol i askim em long olsem wanem em inap ting ol gutpela samting bai kamap maski em i karim bikpela hevi, em i tok: “Mi bilip long Jehova. Em i pren tru bilong mi, na mi laikim em tru.”

[Ol Futnot]

[Piksa long pes 6]

Kirap long taim Timoti i “liklik pikinini yet” mama na bubu i lainim em long “tok bilong God”

[Piksa long pes 6]

Ol Beria i gutpela lain, long wanem, ol i skelim tok bilong God long olgeta de

[Kredit Lain]

Piksa bilong piksa-slait “Photo-Drama of Creation,” 1914

[Ol Piksa long pes 7]

Sapos yumi gat Baibel, dispela samting tasol i no inap, yumi mas harim na bihainim tok bilong en

[Piksa long pes 7]

“Bai mi lukim yupela olgeta long nupela taim God bai kamapim”