Trupela Bilip—Man Inap Kisim Yet Dispela Samting?
‘Pasin bilong bilip em i olsem man i bilip tru long marimari bilong God, em i bilip strong tru long dispela, olsem na em i redi long i dai bilong holimpas dispela bilip.’—MARTIN LUTHER, 1522.
‘Klostu olgeta man i save tingim mani kago tasol, na ol i no save bihainim pasin na bilip Kristen.’—LUDOVIC KENNEDY, 1999.
I GAT kain kain tingting long pasin bilong bilip. Long bipo, klostu olgeta man i bilip long God. Tasol long nau, planti man i no save bilip tumas long ol samting na i gat planti kain kain pen na hevi, olsem na pasin bilong bilip long God na Baibel i wok long pinis hariap.
Trupela Bilip
Planti man i ting “bilip” i makim olsem man i holim bilip bilong lotu o em i bihainim wanpela pasin bilong lotu. Tasol long Baibel, “bilip” i makim olsem man i bilip strong tru long God na long ol tok promis bilong em, na em i no gat tupela tingting long ol dispela samting. Em i mak bilong ol disaipel bilong Jisas Krais.
Wanpela taim, Jisas Krais i tok yumi mas beten long olgeta taim na yumi “no ken les.” Taim em i mekim dispela tok, em i askim olsem trupela bilip bai stap long taim bilong yumi o nogat. Em i tok: “Taim Pikinini Bilong Man i kam, em bai i lukim ol manmeri i stap long graun ol i bilip, o nogat?” Bilong wanem em i kamapim kain askim olsem?—Luk 18:1, 8.
Lusim Bilip
Planti samting inap mekim na ol man i no bilip moa long ol samting bipo ol i bin bilip long en. Ol samting inap kamapim dispela, em ol hevi na traim i save painim ol man. Profesa Michael Goulder, em i mekim wok pris long Manchester, Inglan, taim wanpela balus i pundaun na bagarap long Munich long 1958. Planti man bilong soka tim bilong Manchester United ol i dai long dispela bagarap. Long wanpela program bilong BBC televisen, Joan Bakewell i tok, Goulder “i pilim olsem em i no inap mekim wanpela samting bilong helpim ol man taim em i lukim ol i wari na krai nogut tru.” Dispela samting i mekim na em i “no bilip moa long God i save stiaim wokabaut bilong man.” Goulder i kamapim tingting bilong em na i tok “Baibel i no . . . tok bilong God i stret olgeta,” tasol “em i tok bilong man i gat ol popaia long en, na ating spirit bilong God i bin kamapim wan wan tok bilong en tasol.”
Bilip bilong sampela man i save pinis isi isi. Dispela samting i painim Ludovic Kennedy, em i wanpela niusman na man bilong raitim buk. Em i tok, kirap long taim em i pikinini yet, ‘em i gat tupela tingting [long God] olsem em i stap o nogat, na isi isi mi no bilip moa.’ I luk olsem i no gat wanpela man inap kamapim ol gutpela bekim bilong ol askim bilong em. Papa bilong em i dai taim em i raun long solwara, na dispela i bagarapim tru liklik hap bilip em i bin holim. Em i tok, mipela i beten long God long “em bai lukautim mipela na ol samting nogut bilong solwara na ol birua i no inap bagarapim mipela.” Tasol God i no harim ol dispela beten na long taim bilong Namba Tu Pait sip bilong pait bilong ol Jeman i bagarapim bikpela sip papa bilong em i stap long en.—Buk All in the Mind—A Farewell to God.
Kain samting olsem i bin painim planti man. Aposel Pol i tok: “Planti man ol i no bilip.” (2 Tesalonaika 3:2) Yu ting olsem wanem? Man inap bilip tru long God na long Tok bilong em long dispela taim em planti man moa i no bilip tumas long ol samting? Skelim ol tok bilong dispela samting long stori i kamap bihain long dispela.