“Wanem Taim Bai Yu Harim Singaut Bilong Mi na Yu Helpim Mipela?”

Jayne i krai na tok: “Mi laik bai dispela pen i pinis!” Em i gat sik kensa na sik i kisim olgeta hap bilong bodi. Famili na ol pren i laik tru long tekewe sik na pen bilong em! Ol i beten askim God long helpim em. Yu ting God bai harim beten bilong ol? Em i tingim pen bilong Jayne?

GOD i save long pen na hevi bilong yumi ol man. Baibel i tok: “Olgeta samting God i bin wokim, olgeta i pilim pen.” (Rom 8:22) God i save olsem planti milion manmeri olsem Jayne, ol tu i karim pen long olgeta de​—ol i pilim pen long skin, bel, o long tingting. God i save lukim 800 milion manmeri husat i stap hangre, na planti milion moa husat i kisim pen long han bilong famili o poroman marit, na planti papamama em ol i wari long sindaun bilong ol pikinini long bihain. Olsem wanem? Sampela taim yu save tingting olsem God bai pinisim ol dispela hevi o nogat? Tingim: Yumi yet i gat laik long helpim famili bilong yumi, olsem na i stret yumi ken ting olsem God tu em i gat laik long helpim yumi ol man bilong graun; em yet i bin wokim yumi.

Sapos yu bin mekim dispela askim, orait i no yu wanpela tasol i bin mekim olsem. Winim 2,600 yia i go pinis, wanpela gutpela man, em Habakuk, em i bin kisim wankain tingting olsem planti man long nau, na em i askim God: “Bikpela, planti taim mi singaut long yu. Wanem taim bai yu harim singaut bilong mi na yu helpim mipela, na ol dispela samting nogut i kamap long mipela i no ken bagarapim mipela? Mi lukim planti hevi i kamap long ol manmeri. Bilong wanem yu larim ol dispela hevi i kamap? Olsem wanem na yu . . . no mekim wanpela samting? Long olgeta hap mi lukim ol i bagarapim ol manmeri na ol samting bilong ol. Na ol man i save kros na pait nabaut.” (Habakuk 1:​2, 3) Habakuk em wanpela profet Hibru, na long taim bilong em, em i bin lukim ol pasin nogut tru bilong pait na bagarapim man. Long nau, nius bilong ol kain pasin olsem i save kamap long olgeta de na dispela i save bagarapim tru bel bilong ol man i gat pasin sori.

Yu ting God i rabisim tingting bilong Habakuk? Nogat. Em i putim yau long ol askim bilong Habakuk na mekim gut bel bilong em. Em i tok promis olsem em bai pinisim pen na hevi, na dispela i bin strongim bilip bilong Habakuk. Dispela tok promis bilong God inap strongim bilip bilong yu tu, olsem i bin kamap long Jayne na famili bilong em. Ol stori i kamap bihain long dispela bai bekim ol dispela askim: Olsem wanem yumi inap save tru olsem God i tingim tru yumi? God bai mekim wanem bilong pinisim pen na hevi? Em bai mekim long wanem taim?