God i Save Tingim Tru Yumi—Olsem Wanem Yumi Save?
EM I wanpela bikpela askim ol man i bin tingim inap planti tausen yia pinis, olsem: Sapos God i laikim tru yumi, orait bilong wanem i gat planti pen na hevi i stap? Ating yu wanbel olsem, sapos yu laikim tru wanpela man, yu no laik bai em i kisim pen, na sapos wanpela hevi i painim em, yu bai traim long helpim em. Long dispela as, planti manmeri i lukim bikpela pen na hevi long graun na ol i ting God i no save tingim yumi. Olsem na pastaim yumi mas skelim ol mak i soim olsem God i laikim yumi tru, na em i tingim yumi.
Ol Samting God i Bin Wokim
God Jehova em Man i bin “wokim skai na graun na solwara na olgeta samting i stap long en.” (Aposel 4:24) Orait taim yumi tingim ol samting Jehova i bin wokim, yumi mas bilip olsem em i save tingim yumi, a? Tingim ol samting i save givim amamas long yu. Yu save laikim gutpela kaikai? Jehova inap givim wanpela kain kaikai tasol bilong helpim yumi long i stap laip. Tasol nogat, em i bin wokim planti kain kain kaikai bambai yumi ken amamas long swit bilong en. Na tu, Jehova i bin bilasim graun long kain kain naispela diwai, plaua, na ol maunten samting na bai yumi ken amamas long i stap bilong yumi.
Na tingim tu olsem wanem Jehova i bin wokim yumi. Yumi inap lap long ol samting, na amamas long harim musik, na amamas long lukim ol naispela samting, tasol ol i no samting yumi mas i gat bilong i stap laip—olgeta i presen God i bin givim na ol i helpim yumi long amamas long i stap bilong yumi. Na tingim pasin pren bilong yu wantaim ol narapela. Yumi olgeta i save amamas long toktok na poroman wantaim ol gutpela pren o holimpas wanpela yumi save laikim tru, a? Tru tumas, dispela pasin bilong yumi, olsem yumi inap laikim tru ol narapela, em presen i kam long wanpela God husat i laikim tru ol man! Taim God i wokim ol manmeri, em i bin inapim ol long laikim tru ol narapela, olsem na yumi save olsem dispela em wanpela pasin bilong God yet.
Baibel i Tok God i Laikim Tru Yumi
Baibel i tok God em i as bilong pasin laikim. (1 Jon 4:8) Pasin laikim bilong em i kamap klia long ol samting em i bin wokim, na tu, em i kamap klia long Tok bilong em, em Baibel. Olsem: Baibel i givim ol stiatok bilong helpim yumi na bai yumi no ken sik tumas, na i kirapim yumi long mekim olgeta samting inap long skel tasol, na i givim tok lukaut long dring spak na kaikai planti tumas.—1 Korin 6:9, 10.
Na Baibel i givim gutpela tok long pasin bilong i stap gut wantaim ol narapela, na i kirapim yumi long laikim tru narapela narapela na rispek long ol na mekim gutpela pasin long ol. (Matyu 7:12) Baibel i no orait liklik long ol pasin na tingting i save givim pen na hevi long ol man—olsem pasin mangal, tok baksait, jeles, pasin adaltri, na kilim man i dai. Sapos olgeta man i wok strong long bihainim ol dispela gutpela tok bilong Baibel long i stap bilong ol, bai i no gat planti pen na hevi i stap long olgeta hap.
Tasol nambawan samting tru i kamapim klia pasin laikim bilong God em olsem: Em i bin givim Pikinini bilong em, Jisas, bilong baim bek yumi ol man. Jon 3:16 i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol . . . bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Olsem na Jehova i stretim rot pinis long pinisim dai na olgeta kain pen na hevi.—1 Jon 3:8.
Tru tumas, i gat planti samting i kamapim long ples klia olsem Jehova i laikim tru yumi. Olsem na em i no amamas long lukim yumi karim pen na hevi. Em bai mekim samting bilong pinisim pen na hevi. Yumi no gat wok long skelim skelim dispela samting—Baibel i tokim yumi stret long olsem wanem God bai pinisim pen na hevi.
[Piksa long pes 4]
Pasin laikim em presen i kam long wanpela God husat i laikim tru ol man