Rot Bilong Luksave Long Lotu i Tru
KLOSTU olgeta lotu i save tok olsem ol tok ol i skulim ol man long en, em i kam long God. Olsem na yumi mas bihainim tok bilong aposel Jon, em i tok: “Ol pren, planti giaman profet i save raun nabaut long graun. Olsem na yupela i no ken bilip long olgeta man i kam long yupela na i tok, ‘Spirit bilong God i givim tok long mi.’ Nogat. Yupela i mas traim olgeta spirit, bai yupela i ken save, ol i kam long God, o nogat.” (1 Jon 4:1) Olsem wanem yumi inap traim samting na bai yumi inap save em i kam long God o nogat?
Olgeta samting i kam long God i save kamapim klia ol pasin bilong em, na moa yet nambawan gutpela pasin bilong em, em pasin laikim. Olsem: Yumi inap smelim smel bilong ol samting na amamas long en—smel bilong ol liklik liklik sayor, ol plaua bilong gaden, o nupela bret—na dispela samting i soim olsem God i laikim tru yumi. Na yumi inap lukim bataplai, ol gutpela kala bilong san i go daun, o smail bilong yangpela pikinini, na dispela tu i soim olsem God i laikim yumi. Na yumi inap harim naispela musik, krai bilong pisin, o nek bilong wanpela yumi laikim tumas. Pasin bilong yumi ol man, maski i no nambawan olgeta, em tu i kamapim klia pasin laikim bilong God. Olsem na planti taim yumi save pilim tru dispela tok bilong Jisas: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Yumi save amamas long soim pasin laikim, long wanem, God i wokim yumi i ‘kamap olsem em yet.’ (Stat 1:27) Jehova i gat planti gutpela pasin, tasol pasin laikim em i nambawan gutpela pasin bilong em.
Ol rait em God i as bilong en, ol i mas kamapim klia pasin laikim bilong em. Ol lotu bilong dispela graun ol i holim planti olpela rait. Olsem wanem? Ol dispela rait i kamapim klia pasin laikim bilong God?
Ol olpela rait bilong lotu i no save stori tumas long pasin bilong God long laikim yumi o long ol samting yumi ken mekim bilong soim olsem yumi laikim God. Olsem na planti milion manmeri i no bin kisim bekim bilong dispela askim bilong ol, “Yumi lukim pasin laikim insait long ol samting God i bin wokim, olsem na bilong wanem pen na hevi i wok long stap yet?” Tasol i gat wanpela olpela buk bilong lotu i stap na i stori gut long pasin laikim bilong God. Dispela buk em Baibel. Em i stori tu long ol samting yumi yet i ken mekim bilong soim pasin laikim.
Buk i Stori Long Pasin Laikim
Tok Bilong God, em Baibel, i tok Jehova em i God bilong ‘pasin laikim.’ (1 Jon 4:8) Baibel i tok pasin laikim i bin kirapim Jehova long givim laip i no gat sik o dai long en long namba wan man na meri. Tasol pasin bilong bikhet long wok bos bilong God i mekim na pen na hevi i kamap long olgeta manmeri. (Lo 32:4, 5; Rom 5:12) Jehova i kirap mekim sampela wok bilong stretim bek ol samting i bin lus. Baibel i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Baibel i stori tu olsem pasin laikim i bin kirapim God long kamapim wanpela stretpela gavman long han bilong Jisas, bilong kamapim gutaim gen long olgeta manmeri i bihainim tok bilong Em.—Daniel 7:13, 14; 2 Pita 3:13.
Baibel i tokaut long nambawan wok bilong yumi man, olsem: “ ‘Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.’ Dispela lo em i bikpela, na em i namba wan tru. Na namba 2 lo em i wankain olsem dispela. Em i olsem, ‘Yu mas laikim ol wantok olsem yu laikim yu yet.’ Dispela tupela lo i as bilong olgeta tok bilong lo.” (Matyu 22:37-40) Baibel i tok God yet i bin kamapim olgeta tok i stap long en. Pasin bilong God i stap ples klia long Baibel, olsem na yumi ken save tru olsem dispela buk i bin kam long God bilong ‘pasin laikim.’—2 Timoti 3:16.
Long dispela rot—pasin laikim—yumi inap luksave long wanem ol olpela rait i bin kam long God. Pasin laikim em mak tu bilong ol man i lotu tru long God, long wanem, ol man i lotu tru long God ol i save bihainim pasin bilong em na mekim pasin laikim.
Rot Bilong Luksave Long Ol Man i Laikim Tru God
Ol man i laikim tru God ol i save stap ples klia, na moa yet nau long dispela taim yumi stap long en em Baibel i kolim “taim bilong las de” we ol man i ‘laikim ol yet tasol, na laikim tumas long kisim mani, na laikim tumas ol kain kain pasin bilong amamas bilong dispela graun, na ol i no laikim God.’—2 Timoti 3:1-4.
Olsem wanem yumi inap luksave long ol man i laikim tru God? Baibel i tok: “Sapos yumi laikim tru God, orait yumi save bihainim ol lo bilong en.” (1 Jon 5:3) Pasin bilong laikim tru God i save kirapim ol man long daun long ol lo bilong stretpela pasin em Baibel i as bilong en. Olsem: Long Baibel i gat ol lo bilong marit na maritpasin. Ol marit tasol i ken slip wantaim, na marit em i bilong i stap oltaim oltaim. (Matyu 19:9; Hibru 13:4) Wanpela meri long Spen em i stadi long ol tok bilong lotu, na taim em i kam long wanpela miting we ol Witnes Bilong Jehova i givim bel long stadi long ol lo bilong stretpela pasin em Baibel i as bilong en, em i tok: “Taim mi lusim miting, mi pilim olsem mi gat nupela strong. Samting i mekim na mi pilim olsem, em ol gutpela tok bilong Baibel mi harim, na tu, mi lukim olsem ol i save pas gut wantaim na bihainim ol gutpela na stretpela pasin.”
Ol Kristen tru i save laikim tru God, na tu, ol i save laikim tru ol narapela. Nambawan bikpela wok bilong ol em bilong tokaut long Kingdom Bilong God, olsem em tasol i rot bilong helpim ol man. (Matyu 24:14) I no gat narapela wok i winim wok bilong helpim ol man long kisim save long God, long wanem, dispela save inap helpim ol inap oltaim oltaim. (Jon 17:3) Ol trupela Kristen i save soim pasin laikim long ol narapela rot tu. Ol i helpim ol man i gat hevi. Olsem: Taim wanpela guria long Itali i kamapim bikpela bagarap, wanpela niuspepa i tok ol Witnes Bilong Jehova i save “helpim gut ol man i gat hevi, maski ol i bilong wanem lotu.”
Ol trupela Kristen i save laikim tru God na ol narapela, na tu, ol i save laikim ol wanbilip. Jisas i tok: “Mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:34, 35.
Pasin laikim i stap namel long ol trupela Kristen, dispela i narapela kain tru o olsem wanem? Wanpela hausmeri, nem bilong em Ema, i bin ting olsem. Em i wok long La Paz, Bolivia, we skin bilong ol man i save makim ol olsem ol i maniman o man i stap rabis. Ema i tok: “Namba wan taim mi go long wanpela miting bilong ol Witnes Bilong Jehova, mi lukim wanpela man i bilas gut em i sindaun toktok wantaim wanpela meri Indian. Mi no bin lukim kain samting olsem bipo. Long dispela taim stret, mi save olsem dispela lain ol i lain bilong God.” Wanpela yangpela meri bilong Brasil, nem bilong em Miriam, em tu i tok: “Bipo mi no save long rot bilong stap amamas; insait long famili tu mi no stap amamas. Namba wan taim mi lukim pasin bilong laikim tru narapela, em namel long ol Witnes Bilong Jehova.” Long Amerika, nius dairekta bilong wanpela televisen stesin i tok: “Sapos ol man i bihainim bilip bilong yupela, ol hevi bilong dispela kantri i no ken i stap moa. Mi wanpela niusman, na mi save olsem as bilong oganaisesen bilong yupela em pasin laikim na pasin bilong bilip strong long God.”
Painim Lotu i Tru
Pasin laikim em mak bilong lotu i tru. Jisas i tok lotu i tru i kain olsem wanpela rot ol man i wok long painim, na taim ol i painim pinis, ol i bihainim. Lotu i tru tasol inap bringim man long laip oltaim. Jisas i tok: “Yupela i mas i go insait long liklik dua. Dua i go long ples bilong lus, em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.” (Matyu 7:13, 14) I gat wanpela lain Kristen tasol i wanbel long wokabaut wantaim God na bihainim lotu i tru. Olsem na lotu yu makim em i bikpela samting. Sapos yu painim dispela lotu na yu bihainim, dispela em i nambawan gutpela rot long bihainim, long wanem, ol manmeri i bihainim dispela lotu ol i save mekim pasin laikim.—Efesus 4:1-4.
Bai yu amamas tru taim yu bihainim lotu i tru! I kain olsem yu wokabaut wantaim God. Long ol save i kam long God, yu inap lain long bihainim savetingting na mekim pasin laikim bambai yu inap pas gut wantaim ol narapela. Na yu inap save long i gat wanem as na yumi stap, na kliagut long ol promis bilong God na wetim gutpela samting i kamap bihain. Sapos yu wok long painim lotu i tru, bai yu no inap bel hevi long yu bin mekim olsem.
[Piksa long pes 5]
Namel long ol olpela rait bilong lotu, Baibel tasol i kamapim klia pasin laikim bilong God
[Ol Piksa long pes 7]
Ol Kristen tru i save mekim pasin laikim