Jehova i Soim Yumi Long Pasin Bilong Kaunim Ol De Bilong Yumi
“Soim mipela long pasin bilong kaunim ol de bilong mipela bambai mipela inap bihainim gutpela tingting.”—SONG 90:12, NW.
1. Bilong wanem i stret long askim Jehova long soim yumi long pasin bilong ‘kaunim ol de bilong yumi’?
GOD JEHOVA em i Man bilong wokim yumi na Man bilong givim laip long yumi. (Song 36:9; KTH 4:11) Olsem na em wanpela tasol em inap tru long soim yumi long pasin bilong bihainim gutpela tingting long ol samting yumi mekim long ol yia yumi stap laip. Em nau, i stret man bilong raitim song i krai long God olsem: “Soim mipela long pasin bilong kaunim ol de bilong mipela bambai mipela inap bihainim gutpela tingting.” (Song 90:12, NW ) Yumi mas tingim gut dispela tok i stap long Song 90. Tasol pastaim yumi ken stori liklik long ol bikpela tok bilong dispela song em spirit bilong God i bin kamapim.
2. (a) Husat i bin raitim Song 90, na yumi ken ting em i bin raitim long wanem taim? (b) Song 90 i mas givim wanem tingting long yumi long i stap bilong yumi?
2 Het-tok bilong Song 90 i kolim dispela song olsem “beten bilong Moses, dispela man bilong God.” Dispela song i kamapim klia olsem yumi ol man bilong graun i save stap sotpela taim tasol. Olsem na yumi ken ting Moses i bin raitim dispela song long taim God i kisim bek pinis ol Israel long kalabus long Isip na insait long dispela 40 yia ol i bin wokabaut long ples drai nating na planti tausen ol i dai, olsem na dispela lain i no bilip, ol i pinis. (Namba 32:9-13) Tasol maski Moses i raitim we, Song 90 i soim yumi olsem yumi ol man bilong graun i save stap sotpela taim tasol. Olsem na yumi mas bihainim gutpela tingting long ol samting yumi mekim long olgeta wan wan de yumi stap laip.
3. Wanem ol bikpela tok i stap long Song 90?
3 Long Song 90, ves 1 i go 6 i kamapim olsem Jehova em i haus bilong yumi bilong i stap oltaim oltaim long en. Ves 7 i go 12 i soim yumi long ol samting yumi mas i gat na bai yumi ken mekim wok long dispela sotpela taim bilong yumi bambai Jehova i ken orait long yumi. Na olsem ves 13 i go 17 i tok, yumi laik tru bai Jehova i mekim pasin sori long yumi na mekim gut long yumi. Tru, dispela song i no makim ol samting yumi olgeta wan wan wokman bilong Jehova bai mekim, nogat. Tasol yumi mas tingim gut na putim long bel ol tok bilong dispela song i olsem beten. Olsem na nau yumi ken glasim gut Song 90 olsem ol man i dediket long God ol bai mekim.
Jehova—Em “Haus Tru” Bilong Yumi
4-6. Olsem wanem Jehova em i “haus tru” bilong yumi?
4 Namba wan tok bilong dispela song i olsem: “Bikpela, yu olsem haus tru bilong mipela. Ol tumbuna i bin i stap long yu, na nau mipela tu i stap olsem. Oltaim oltaim yu stap God, long bipo na long bihain tu. Olgeta maunten i no kamap yet, [“olsem meri i karim pikinini,” “NW” ] na yu no bin wokim olgeta samting bilong graun yet [“olsem meri i kisim pen bilong karim pikinini,” “NW” ], tasol yu stap.”—Song 90:1, 2.
5 Long yumi, dispela “God i save stap oltaim,” Jehova, em i “haus tru”—olsem wanpela haus spirit yumi ken ran i go hait long en na stap gut. (Rom 16:26) Yumi stap bel isi na yumi no pret, long wanem, oltaim em i stap bilong helpim yumi, olsem Man bilong harim beten. (Song 65:2) Yumi save putim ol hevi bilong yumi long Papa long heven long rot bilong gutpela Pikinini bilong em, olsem na ‘bel isi God i save givim yumi i mekim bel na tingting bilong yumi i stap gut tru.’—Filipai 4:6, 7; Matyu 6:9; Jon 14:6, 14.
6 Yumi stap gutpela long ol samting bilong spirit, long wanem, Jehova i olsem wanpela “haus tru” bilong yumi. Na em i putim ol rum “insait long ol haus”—ating ol i makim ol kongrigesen bilong lain bilong em—olsem ol gutpela ples hait bilong spirit em ol wasman i gat pasin sori ol i stap long en na ol i helpim yumi tru long i stap bel isi. (Aisaia 26:20; 32:1, 2; Aposel 20:28, 29) Na tu, yumi sampela i bilong ol lain famili i bin mekim wok bilong God inap planti planti yia na ol i lukim pinis olsem em i wanpela “haus tru” bilong ol i go inap long olgeta taim bihain.
7. Olsem wanem ol maunten i bin kamap “olsem meri i karim pikinini,” na God i bin kamapim graun “olsem meri i kisim pen bilong karim pikinini”?
7 Jehova i bin stap taim ol maunten i no kamap yet “olsem meri i karim pikinini,” na taim em i no bin wokim yet graun “olsem meri i kisim pen bilong karim pikinini.” Long tingting bilong yumi ol man, wok bilong kamapim dispela graun wantaim ol maunten samting, na olgeta samting bilong mekim graun i wok gut, em i wanpela bikpela wok tru. Na taim man bilong raitim song i tok, ol maunten i kamap “olsem meri i karim pikinini,” na Jehova i bin kamapim graun “olsem meri i kisim pen bilong karim pikinini,” dispela man i soim olsem em i tingim tru bikpela wok Jehova i bin mekim taim em i kamapim ol dispela samting. Orait yumi tu i mas tingim na pilim tru dispela bikpela wok God i bin mekim, a?
Oltaim Jehova i Stap Bilong Helpim Yumi
8. Wanem insait bilong dispela tok, Jehova i stap God “long bipo na long bihain tu”?
8 Man bilong raitim song i tok, “Oltaim oltaim yu stap God, long bipo na long bihain tu.” Long tok Hibru, dispela tok ol i tanim olsem “long bipo na long bihain tu,” em inap makim samting i gat pinis bilong en tasol yumi no save hamas yia samting em bai stap. (Kisim Bek 31:16, 17; Hibru 9:15) Tasol long Song 90:2 na sampela hap moa bilong Ol Skripsa Hibru, dispela tok ol i tanim olsem “long bipo na long bihain tu” em i makim samting bai stap oltaim oltaim. (Saveman 1:4) Tru, long tingting bilong yumi, yumi no inap save olsem wanem God i bin i stap long olgeta taim bipo. Tasol Jehova i no bin kamap nupela long wanpela taim bipo, na em i no ken i dai tu. (Habakuk 1:12, NW ) Long olgeta taim Jehova bai i stap laip na em bai i redi long helpim yumi.
9. Man bilong raitim song i makim wan tausen yia bilong ol man i stap laip i olsem wanem samting?
9 Spirit bilong God i bin kirapim man bilong raitim song long makim olsem wan tausen yia bilong ol man i stap laip em i olsem sotpela taim tru long God, em i save stap oltaim oltaim. Man bilong raitim song i toktok long God olsem: “Yu save mekim ol manmeri i dai na ol i kamap graun gen. Na yu tok olsem, ‘Yupela manmeri bilong graun, yupela i mas i dai na tanim graun gen.’ Long tingting bilong yu 1,000 yia i olsem wanpela de tasol, na dispela taim i go pinis kwiktaim tumas, olsem asde tasol. Na em i olsem sotpela taim ol soldia i save stap sentri long nait.”—Song 90:3, 4.
10. Olsem wanem God i save mekim man “i kamap graun gen”?
10 Ol man i save dai, na God i save mekim ol “i kamap graun gen.” I olsem Jehova i tokim ol: ‘Yupela mas i go bek gen long dispela graun mi bin wokim yupela long en.’ (Stat 2:7; 3:19) Dispela tok i sutim olgeta man—ol man i gat strong na ol man i no gat strong, ol maniman na ol rabisman—long wanem, i no gat wanpela man bilong graun ‘i ken baim bek em yet long mani. Na em i no inap givim mani long God inap long baim laip bilong en. Em i no inap baim God bai God i larim em i stap laip oltaim na em i no ken i dai.’ (Song 49:6-9) Tasol yumi tenkyu tru long ‘God i bin givim dispela wanpela Pikinini tasol bilong em long ol man. Em i mekim olsem bilong olgeta manmeri i bilip long em bai ol i kisim laip i stap gut oltaim oltaim’!—Jon 3:16; Rom 6:23.
11. Olsem wanem yumi ken tok, longpela taim long yumi i olsem sotpela taim tru long God?
11 Metusela i bin stap 969 yia, tasol long tingting bilong God em i no bin stap inap wanpela de olgeta. (Stat 5:27) Long God wan tausen yia i olsem asde tasol—olsem wanpela de i gat 24 aua long en—taim em i go pinis. Na man bilong raitim song i tok tu olsem, long God wan tausen yia i olsem 4-pela aua ol soldia i save stap sentri long nait. (Hetman 7:19) Olsem na longpela taim long yumi em i olsem sotpela taim tru long God Jehova, em i save stap oltaim oltaim.
12. Olsem wanem God i “save rausim ol man”?
12 Tru tumas, taim yumi tingim God i save stap oltaim oltaim, long nau yumi ol man i save stap sotpela taim tasol. Man bilong raitim song i tok: “Yu save rausim ol man, olsem wara i tait na i kisim ol man na ol i dai. Ol i stap sotpela taim olsem driman tasol. Ol i olsem gras i save kamap nupela long moningtaim, na i kamap bikpela na plaua i kamap. Tasol long apinun em i drai olgeta.” (Song 90:5, 6) Moses i bin lukim planti tausen Israel ol i dai long ples drai nating, i olsem ‘God i rausim ol olsem wara i tait na i kisim ol man na ol i dai.’ Tasol ol yia bilong yumi ol man bilong graun i olsem “driman” i gat sotpela taim bilong en—i olsem yumi slip wanpela nait tasol.
13. Olsem wanem yumi wankain “olsem gras”? Dispela i mas givim wanem tingting long yumi?
13 Yumi wankain ‘olsem gras i save kamap nupela long moningtaim na plaua i kamap,’ tasol strongpela san i kukim na long apinun em i drai olgeta. Tru tumas, yumi save stap sotpela taim tasol olsem gras i save drai insait long wanpela de tasol. Olsem na yumi no ken lusim nating dispela liklik hap taim yumi stap laip. Yumi mas askim God long soim yumi long olsem wanem yumi ken mekim wok long ol yia bilong yumi i stap yet long dispela taim bilong nau.
Jehova i Helpim Yumi Long ‘Kaunim Ol De Bilong Yumi’
14, 15. Truim bilong Song 90:7-9 i kamap olsem wanem long ol Israel?
14 Man bilong raitim song i tok moa long God olsem: “Yu gat kros long mipela, olsem na yu save bagarapim mipela. Yu belhat long mipela, olsem na mipela i pret nogut tru. Yu save lukim olgeta pasin nogut bilong mipela. Na olgeta sin mipela i hait na mekim, em yu putim ples klia na yu lukim pinis. Kros bilong yu i save sotim taim bilong mipela i stap long graun. Tru tumas, taim bilong mipela i save pinis kwik, olsem mipela i pulim win wanpela taim tasol.”—Song 90:7-9.
15 Ol Israel i no bilip, God i ‘bagarapim ol.’ ‘Em i belhat long ol na ol i pret nogut tru.’ Sampela “ol i bin i dai long ples drai nating,” em strafe ol i kisim long God. (1 Korin 10:5) Jehova ‘i lukim olgeta pasin nogut bilong ol.’ Em i skelim ol long kot long ol rong ol i bin mekim long ples klia, tasol ‘ol sin ol i hait na mekim,’ ol dispela sin tu ‘em i lukim pinis.’ (Sindaun 15:3) God i belhat long ol dispela Israel i no bin tanim bel, olsem na ‘taim bilong ol i pinis kwik, olsem ol i pulim win wanpela taim tasol’ na ol i pinis. Na yumi tu i wankain—yumi save stap liklik taim tasol, olsem yumi pulim win wanpela taim tasol.
16. Sapos sampela i mekim hait sampela pasin nogut, ol i mas mekim wanem?
16 Sapos yumi mekim hait sampela pasin nogut, ating pastaim yumi inap haitim dispela pasin na ol narapela man i no inap save long en. Tasol dispela rong yumi mekim hait, em i stap ‘ples klia na God i lukim pinis,’ na dispela pasin bilong yumi bai mekim na yumi no pas gut moa wantaim em. Bilong stretim dispela samting na pas gut wantaim Jehova gen, yumi mas beten askim em long lusim rong bilong yumi, na lusim pasin bilong mekim rong, na larim ol elda Kristen i helpim yumi long ol samting bilong spirit. (Sindaun 28:13; Jems 5:14, 15) I gutpela yumi mekim olsem, nogut ‘taim bilong yumi i pinis kwik, olsem yumi pulim win wanpela taim tasol’ na yumi no inap tingting long kisim laip i stap oltaim.
17. Planti man i save stap hamas yia? Insait long ol dispela yia, wanem samting save painim ol?
17 Man bilong raitim song i toktok long ol yia yumi ol man bilong graun i save stap laip, na em i tok: “Mipela i save stap inap 70 yia tasol. Na sapos mipela i gat strong, mipela i ken i stap inap 80 yia. Tasol long dispela olgeta yia mipela i stap, mipela i save hatwok na painim hevi tasol. Dispela olgeta yia i pinis kwiktaim, na mipela tu i go pinis.” (Song 90:10) Planti man i save stap inap 70 yia tasol, na taim Kalep i gat 85 krismas, em i tok skin bilong em i gat strong yet. Tru, sampela man ol i bin winim planti yia moa, olsem Aron (123), Moses (120), na Josua (110). (Namba 33:39; Lo 34:7; Josua 14:6, 10, 11; 24:29) Tasol long ol dispela Israel i bin lusim Isip na ol i no bilip, ol man i winim 20 krismas ol i dai insait long 40 yia. (Namba 14:29-34) Long planti kantri long nau tu, planti man i save stap inap 70 yia samting olsem man bilong raitim song i makim. Long ol dispela yia yumi stap, yumi save “hatwok na painim hevi tasol.” Ol dispela yia i pinis kwiktaim, na ‘yumi tu i go pinis.’—Jop 14:1, 2.
18, 19. (a) Wanem insait bilong dispela tok, “soim mipela long pasin bilong kaunim ol de bilong mipela bambai mipela inap bihainim gutpela tingting”? (b) Sapos yumi bihainim gutpela tingting, dispela bai kirapim yumi long mekim wanem?
18 Orait nau man bilong raitim song i tok: “Husat i save gut long bikpela strong bilong kros bilong yu? Na husat i save long bikpela pret i kamap long ol manmeri taim yu kros long ol? Soim mipela long pasin bilong kaunim ol de bilong mipela bambai mipela inap bihainim gutpela tingting.” (Song 90:11, 12; NW ) I no gat wanpela man i save tru long strong bilong kros bilong Jehova o em i save belhat i go inap long wanem mak, na dispela i mas kirapim yumi long pret na daun moa long Jehova. Na tu, dispela i mas kirapim yumi long askim em long ‘soim yumi long pasin bilong kaunim ol de bilong yumi bambai yumi inap bihainim gutpela tingting.’
19 Ol tok bilong man bilong raitim song em wanpela beten olsem Jehova i mas skulim lain bilong em long bihainim gutpela tingting taim ol i tingim na mekim wok long ol yia bilong ol i stap yet na bai God i ken orait long ol. Sapos man i stap inap 70 yia, em i gat 25,500 de samting. Tasol maski yumi gat hamas krismas, ‘yumi no save wanem samting bai i kamap long tumora. Laip bilong yumi i olsem smok i save kamap na i stap liklik taim tasol na i pinis olgeta.’ (Jems 4:13-15) “Taim nogut i save painim yumi olgeta,” olsem na yumi no inap tok yumi bai stap hamas yia moa. Long dispela as yumi mas beten askim Jehova long givim gutpela tingting long yumi na bai yumi ken save long ol samting yumi mas mekim taim hevi i painim yumi, na long mekim pasin i stret long ol narapela, na mekim wok bilong Jehova inap tru long skel bilong yumi nau long dispela de stret! (Saveman 9:11; Jems 1:5-8) Jehova i save stiaim yumi long rot bilong Baibel, na spirit bilong em, na oganaisesen bilong em. (Matyu 24:45-47; 1 Korin 2:10; 2 Timoti 3:16, 17) Gutpela tingting i save kirapim yumi long “wok pastaim long painim kingdom bilong God” na mekim wok long ol de bilong yumi long pasin i save givim biknem long God na i mekim bel bilong em i amamas. (Matyu 6:25-33, Nupela Testamen na Ol Sam; Sindaun 27:11) Tru, pasin bilong givim bel olgeta long lotuim em, dispela i no ken pinisim olgeta hevi bilong yumi, tasol yumi save kisim bikpela amamas long en.
Blesing Bilong Jehova i Kamapim Amamas
20. (a) Olsem wanem God i save “sori”? (b) Jehova bai mekim wanem pasin long yumi sapos yumi bin mekim bikpela rong tasol yumi tanim bel tru?
20 Em bai gutpela tru sapos yumi ken i stap amamas long olgeta yia bilong yumi i stap yet! Olsem na Moses i krai long Jehova olsem: “Bikpela, hamas taim yet bai belhat bilong yu i stap? Yu mas sori long mipela ol wokman bilong yu. Yu save laikim mipela oltaim, na dispela i ken pulapim mipela long olgeta moningtaim. Olsem na long olgeta taim mipela i stap laip mipela i ken amamas na belgut.” (Song 90:13, 14) God i no save popaia. Tasol em i save “sori” na lusim belhat bilong em na em i no givim strafe long ol man i bin mekim rong tasol ol i tanim bel na senisim pasin bilong ol taim em i givim tok lukaut long ol. (Lo 13:17) Olsem na maski yumi mekim bikpela rong, sapos yumi kamapim long ples klia olsem yumi tanim bel tru, Jehova bai ‘sori long yumi,’ na bai i gat as na yumi ken “amamas na belgut.” (Song 32:1-5) Na taim yumi bihainim stretpela pasin, bai yumi pilim tru olsem God i laikim tru yumi, na ‘yumi ken amamas na belgut long olgeta de yumi stap laip.’
21. Long Song 90:15, 16, ating Moses i askim God long wanem samting?
21 Man bilong raitim song i beten strong olsem: “Pastaim yu givim hevi long mipela. Tasol nau yu ken mekim mipela i amamas bilong inapim ol dispela taim mipela i karim hevi. Planti yia mipela i stap nogut, olsem na nau yu ken givim amamas long mipela inap olsem olgeta yia nogut. Yu ken soim ol strongpela wok bilong yu long mipela ol wokman bilong yu. Yu ken soim gutpela gutpela strong bilong yu long ol tumbuna pikinini bilong mipela.” (Song 90:15, 16) Ating Moses i bin askim God long mekim gut long ol Israel na bai ol i ken amamas inap long planti yia, wankain olsem ol yia ol i bin karim hevi na ol yia em planti samting nogut i bin painim ol. Moses i askim God olsem “ol strongpela wok” bilong em long mekim gut long ol Israel i ken kamap ples klia long ol wokman bilong Em na Em i ken soim biknem bilong em long ol pikinini bilong ol. I stret yumi ken beten askim God long salim ol blesing i kam daun long ol man bilong bihainim tok long nupela taim God i tok promis long kamapim.—2 Pita 3:13.
22. Olsem Song 90:17 i tok, i stret yumi beten long wanem samting?
22 Bilong pinisim tok bilong Song 90, Moses i beten olsem: “Bikpela, yu God bilong mipela, mipela i laik bai yu marimari long mipela na mekim gut long mipela. Na olgeta samting mipela i mekim i ken kamap gutpela. Tru tumas, yu ken strongim olgeta samting mipela i mekim na em bai i stap gut.” (Song 90:17) Ol dispela tok i soim olsem i stret yumi ken beten askim God long mekim gut long yumi taim yumi mekim wok bilong em. Maski yumi bilong lain Kristen God i bin makim o yumi ol poroman bilong ol, olsem “ol arapela sipsip,” yumi amamas long ‘God i mekim gut long yumi.’ (Jon 10:16) Yumi amamas tru long God i bin ‘strongim olgeta samting yumi mekim’ long wok bilong autim tok bilong Kingdom na long ol narapela rot tu!
Wok Yet Long Kaunim Ol De Bilong Yumi
23, 24. Sapos yumi tingim tingim long bel ol tok bilong Song 90, dispela inap helpim yumi olsem wanem?
23 Sapos yumi tingim tingim long bel ol tok bilong Song 90, dispela inap helpim yumi moa yet long wetim Jehova, em “haus tru” bilong yumi. Taim yumi tingim ol tok bilong en olsem yumi save stap liklik taim tasol, yumi mas pilim moa yet olsem God i mas soim yumi long olsem wanem yumi ken kaunim ol de bilong yumi. Na sapos yumi strong long painim gutpela tingting i kam long God na yumi bihainim, yumi ken bilip tru olsem Jehova bai mekim pasin sori long yumi na mekim gut long yumi.
24 Jehova bai wok yet long soim yumi long pasin bilong kaunim ol de bilong yumi. Sapos yumi larim em i skulim yumi, bai yumi inap kaunim yet ol de bilong yumi i go inap oltaim oltaim bihain. (Jon 17:3) Tasol sapos yumi laik tru long kisim laip i stap oltaim, Jehova i mas i stap olsem ples yumi ken hait long en na i stap gut. (Jut 20, 21) Dispela samting i kamap ples klia tru long ol gutpela tok bilong Song 91, olsem yumi bai lukim long stori i kamap bihain long dispela.
Bai Yu Bekim Olsem Wanem?
• Olsem wanem Jehova em i “haus tru” bilong yumi?
• Olsem wanem yumi inap tok, long olgeta taim Jehova i redi long helpim yumi?
• Olsem wanem Jehova i save helpim yumi long ‘kaunim ol de bilong yumi’?
• Wanem samting i helpim yumi long i stap ‘amamas na belgut long olgeta de yumi stap laip’?
[Piksa long pes 11]
Taim “olgeta maunten i no kamap yet,” Jehova i stap God
[Piksa long pes 12]
Metusela i bin stap 969 yia, tasol long tingting bilong Jehova i stap bilong em i no winim wanpela de
[Ol Piksa long pes 14]
Jehova i bin ‘strongim olgeta samting yumi mekim’