Ol Man i Askim . . .

Olsem Wanem? God i Gat Kirap Bilong En?

▪ Baibel i tok, God i no bin kamap nupela long wanpela taim. Em i bin stap oltaim oltaim. Dispela tingting olsem God i no gat kirap bilong en, i hatwok long kliagut long en, tasol dispela i no ken mekim na yumi sakim dispela tingting.

Yumi no ken ting olsem yumi bai kliagut long olgeta samting bilong God. Aposel Pol i tok: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en. Yumi no inap tru long bihainim olgeta rot bilong en.” (Rom 11:33) Yumi no inap kliagut long olgeta tingting na save bilong God, wankain olsem wanpela bebi i no inap kliagut long olgeta pasin na tingting bilong papamama bilong em. Dispela tok em holi spirit i bin kirapim Pol long raitim, em i stori long savetingting na pasin marimari bilong God, tasol em i kamapim tu olsem i gat sampela samting long pasin bilong God Jehova em tingting bilong yumi ol man i no inap kisimgut. Wanpela bilong ol dispela samting, em dispela tok olsem God i no bin kamap nupela long wanpela taim. Tasol yumi ken bilip tru long ol tok em Baibel i mekim long God. Jisas Krais i tok long ol rait holi olsem: “Tok bilong yu i tru olgeta.”​—Jon 17:17.

Moses i beten long Jehova olsem: “Oltaim oltaim yu stap God, long bipo na long bihain tu.” (Song 90:2) Long dispela ves, Moses i kolim tupela tok, God i bin stap bipo tru na bihain tu em bai stap. Jehova em “Man bilong i stap oltaim oltaim.” (KTH 4:10) Olsem na God bai stap inap olgeta taim bihain. Na tu, God i bin stap bipo tru. Yumi ken tok, i no gat wanpela i bin wokim God na i no gat wanpela taim God i bin kamap nupela. Nogat. Long bipo bipo tru God i bin stap.

Sampela samting em yumi no save gut long as bilong en, ating dispela i hatwok long yumi kliagut long en. Tasol sampela taim yumi save orait long kain save olsem, olsem ol namba i stap aninit long mak bilong siro na ol namba i stap antap long mak bilong siro. Sapos yumi kaunim ol namba kirap long siro na i go antap o i kam daun, i no gat pinis bilong en. I gutpela yumi bihainim kain tingting olsem taim yumi tingim ol yia long laip bilong Man Bilong Wokim olgeta samting.

Olsem na i stret God wanpela tasol i gat dispela biknem olsem: “King bilong olgeta taim.” (1 Timoti 1:17) Tingim dispela: Jisas Krais, ol planti milion ensel long heven, na ol manmeri long graun, olgeta i gat kirap bilong laip bilong ol, long wanem, i gat wanpela Man i bin wokim ol. (Kolosi 1:​15, 16) Tasol God i no gat kirap bilong laip bilong em. Sapos yumi sakim dispela tingting na ting olsem i gat wanpela i bin wokim God, orait bai askim i kamap long husat i bin wokim God. Jehova wanpela tasol i bin stap “oltaim oltaim.” (Song 90:2) O yumi ken tok, Jehova i bin stap long “olgeta taim bipo.”​—Jut 25.

God i save stap oltaim oltaim na dispela inap mekim sampela samting long yumi. Beten bilong Moses i kamapim klia olsem pasin bilong God long stap oltaim i mekim na yumi tu inap stap oltaim. Maski yumi no save stap oltaim long nau, Baibel i tok long God olsem, “yu olsem haus tru bilong mipela. Ol tumbuna i bin i stap long yu, na nau mipela tu i stap olsem.” Olsem wanpela Papa i gat pasin laikim, Jehova i bin stap bipo, nau em i stap, na bihain tu em bai stap bilong helpim lain bilong em. Yu ken larim dispela tok i mekim gut bel bilong yu!​—Song 90:​1.