Ripot Long Wok Bilong Kingdom
Ol Man Bilong Nau i Dai Bilong Holimpas Bilip i Mekim Wok Witnes Long Swiden
LONG tok Grik dispela tok “witnes” em martyr, na ol i mekim wok long dispela tok “martyr” long tok Inglis na insait bilong en i olsem, “man i dai bilong kamapim bilip bilong em.” Planti Kristen long taim bilong ol aposel i dai bilong holimpas bilip na dispela i dai bilong ol i autim tok bilong Jehova.
Na i wankain long taim bilong yumi, planti tausen Witnes i dai long han bilong lain bilong Hitler, long wanem, ol i no laik insait long ol samting bilong politik na pasin bilong litimapim kantri. Ol dispela Witnes tu i dai bilong holimpas bilip, na long dispela pasin ol i mekim bikpela wok witnes. Dispela samting i kamap long Swiden inap sampela yia i go pinis.
Long 50 yia i go pinis Namba Tu Pait i pinis na bilong makim dispela, gavman bilong Swiden i kamapim wanpela bikpela wok bilong lainim ol man long ol samting i bin kamap long taim bilong ol Natsi. Ol i kolim dispela wok em olsem Living History. Ol i singautim ol Witnes Bilong Jehova long insait long en na kamapim ol ekspiriens bilong ol.
Ol Witnes i kamapim ol stori na piksa na het-tok bilong en i olsem: Ol Man i Lusim Tingting Long Ol Lain i Bin Kisim Hevi Long Han Bilong Ol Natsi. Pastaim ol i kamapim ol dispela stori long Haus Kibung bilong ol Witnes Bilong Jehova long Strängnäs. Ol Witnes i abrusim bagarap long taim bilong ol Natsi, ol i kamapim ol ekspiriens bilong ol long 8,400 samting manmeri i kam long namba wan de! Long pinis bilong 1999, dispela bung i bin kamap long winim 100 haus tumbuna na ol pablik laibreri long Swiden, na inap 150,000 manmeri i bin lukim. Sampela bilong ol i wokman bilong gavman na ol i mekim gutpela tok long ol samting ol i lukim.
I no gat wanpela narapela bung olsem dispela em i stori long wok bilong ol Witnes Bilong Jehova long Swiden em planti man i lukim na ol i laikim. Planti man i kam lukim ol i askim olsem: “Bilong wanem yupela i no bin tokim mipela long samting i bin painim yupela long taim bilong ol Natsi?”
Bihain long ol i bin kamapim ol dispela stori na piksa long hap bilong wanpela kongrigesen, ol i tok namba bilong ol Baibel-stadi i go antap olsem 30 pesen! Wanpela Witnes i singautim wanpela wanwok bilong em i kam lukim ol dispela samting. Dispela wanwok i amamas long kam na em i kisim wanpela pren tu i kam. Bihain, dispela pren i tok em i hatwok long save long as na ol man inap kisim kain strongpela bilip olsem, na ol i no laik sainim wanpela pepa i tok long ol i givim baksait long bilip bilong ol, ol i redi long dai pastaim. Dispela i kirapim ol long stori moa na bihain em i kirap stadi long Baibel.
Olsem ol wanbilip bilong ol long taim bilong ol aposel, ol dispela bilipman i dai bilong holimpas bilip long taim bilong yumi, pasin bilong ol i tokaut strong olsem Jehova wanpela tasol em i God tru, na i stret yumi bilip na stap gut long em.—KTH 4:11.
[Piksa Kredit Lain long pes 13]
Camp prisoner: Państwowe Muzeum Oświęcim-Brzezinka, courtesy of the USHMM Photo Archives