Pilim Hevi Bilong Narapela—Em i Kamapim Pasin Sori
HELEN Keller i tok: “Sapos rot i op long yu ken daunim bel hevi bilong narapela, laip bilong yu i gat as bilong en.” Keller i save gut long pasin bilong stap bel hevi. Taim em i gat 19 mun tasol, wanpela sik i mekim na em i kamap aipas na yaupas. Tasol wanpela tisa i gat pasin sori i skulim Helen long rit na rait long rait brel, na bihain tisa i skulim em long toktok.
Tisa bilong Keller, em Ann Sullivan, em i save gut long pasin bilong karim hevi bilong skin i bagarap. Klostu em yet i aipas. Tasol isi isi Ann i kamapim wanpela pasin bilong toktok wantaim Helen, em long rot bilong raitim ol leta long han bilong em. Pasin bilong tisa long pilim hevi bilong em i bin kirapim Helen long givim bel long wok bilong helpim ol aipas na ol yaupas. Em i bin wok hat tru long daunim hevi bilong stap aipas na yaupas, na dispela i bin kirapim em long pilim tru hevi bilong ol narapela i stap olsem. Em i laik helpim ol.
Ating yu luksave pinis olsem long dispela taim bilong ol man i tingim ol yet tasol, em isi tru long yumi “no sori” long narapela na givim baksait long hevi bilong em. (1 Jon 3:17) Tasol God i tokim ol Kristen long laikim ol narapela na laikim tru ol wanbilip. (Matyu 22:39; 1 Pita 4:8) Ating yu save long samting tru i kamap: Yumi tingting pinis long laikim ol narapela, tasol planti taim yumi no luksave olsem yumi gat rot long helpim ol. Ating as bilong dispela em yumi no save long wanem samting stret bai helpim ol. Pasin bilong pilim hevi bilong narapela i helpim yumi long sori na mekim gut em.
Dispela Pasin i Wanem Samting?
Pasin bilong pilim hevi bilong narapela em i olsem man i save gut long sindaun bilong narapela, na save long samting em i pilim long bel na tingting. Na tu, sampela i tok em pasin olsem yu pilim hevi bilong narapela olsem em i hevi bilong yu yet. Olsem na bilong pilim hevi bilong narapela, namba wan samting em yumi mas save gut long sindaun bilong em, na namba tu, yumi mas pilim samting sindaun bilong man i mekim long em. Yes, pasin bilong pilim hevi bilong narapela i olsem yumi pilim bel hevi bilong em long bel bilong yumi yet.
Dispela tok “pilim hevi bilong narapela” i no stap long Baibel, tasol Baibel i kamapim ol narapela narapela tok i makim dispela pasin. Aposel Pita i tokim ol Kristen long ‘sori long olgeta man na laikim tru ol arapela manmeri bilong God na marimari long ol.’ (1 Pita 3:8) Tok Grik ol i tanim olsem “sori” i makim pasin bilong “pilim pen na hevi bilong ol narapela” o “sori long ol.” Aposel Pol i mekim kain tok olsem taim em i tokim ol Kristen long “amamas wantaim ol man i amamas na krai wantaim ol man i krai.” Pol i tok moa olsem: “Yupela i mas tingim ol brata i wankain olsem [yupela] yet.” (Rom 12:15, 16, King Jems Nupela Testamen) Ating yu wanbel long tok olsem i hatwok long laikim tru narapela olsem yumi laikim yumi yet sapos yumi no traim tingim gut sindaun bilong man ya.
Sampela pasin bilong pilim hevi bilong narapela i stap long skin bilong klostu olgeta man. Olsem: Planti man i sori tru taim ol i lukim ol piksa i gat ol pikinini i bagarap long hangre o ol refiuji i bel hevi tru. Na mama i gat pasin sori i no inap tru long givim baksait long pikinini bilong em i krai. Tasol olgeta pen na hevi ol man i karim i no stap ples klia. I hatwok tru long save long tingting bilong man i stap bel hevi, o long sampela hevi bilong skin i no stap ples klia, o long hevi bilong sampela pasin kranki bilong kaikai—sapos yumi yet i no bin karim kain hevi olsem! Tasol Baibel i soim olsem yumi inap kisim pasin bilong sori long ol narapela em sindaun bilong ol i narapela kain long yumi, na yumi mas kisim dispela pasin.
Sampela Stori Bilong Baibel
Jehova em i nambawan gutpela piksa long pasin bilong pilim hevi bilong narapela. Em yet i gutpela olgeta, tasol em i no ting yumi tu i mas i stap olsem, long wanem, “em i save olsem em i bin kisim graun na wokim yumi na em i tingim yumi i olsem das tasol.” (Song 103:14; Rom 5:12) Na tu, em i save long strong bilong yumi, olsem na ‘em bai i no inap larim wanpela bilong ol traim i kamap long yumi, em i winim strong bilong yumi.’ (1 Korin 10:13) Long rot bilong ol wokboi bilong em na long spirit holi, em i helpim yumi long painim rot bilong winim ol traim.—Jeremaia 25:4, 5; Aposel 5:32.
Jehova yet i save pilim ol pen na hevi ol manmeri bilong em i karim. Em i tokim ol Juda i bin lusim Babilon na kam bek long ples bilong ol: “Man i holim yupela em i holim kiau bilong ai bilong mi.” (Sekaraia 2:8, NW ) Devit i save gut long pasin bilong God long pilim hevi bilong narapela, olsem na em i tokim God: “Yu save long mi karim hevi na mi pilim nogut tru long en, na mi krai i stap. Orait yu tingting yet long dispela, na yu raitim pinis long buk bilong yu.” (Song 56:8) Yumi amamas long save olsem Jehova i tingim—olsem raitim long wanpela buk—aiwara bilong ol gutpela wokboi bilong em taim ol i wok hat long stap gut long em!
Olsem Papa bilong em, Jisas Krais i save tingim bel bilong man. Taim em i oraitim wanpela man yaupas, em i kisim man i go na lusim ol narapela, ating em i mekim olsem bilong dispela mirakel i no ken mekim yaupas i sem o pret. (Mak 7:32-35) Long narapela taim, Jisas i bin lukim wanpela meri wanpis em klostu ol bai planim pikinini man bilong em long matmat. Meri i gat dispela wanpela pikinini tasol. Wantu Jisas i pilim pen na hevi dispela meri i karim, na em i go long dispela lain i karim bodi na kirapim bek dispela yangpela man.—Luk 7:11-16.
Bihain long em i kirap bek, Jisas i kamap long Sol long rot i go long Damaskus, na em i tokaut long Sol olsem pasin nogut Sol i mekim long ol disaipel i mekim wanem long em yet. Em i tokim Sol: “Mi Jisas, yu wok long bagarapim mi.” (Aposel 9:3-5) Jisas i pilim hevi ol disaipel bilong em i karim, olsem wanpela mama i pilim hevi bilong pikinini bilong em i sik. Olsem tasol, Hetpris bilong yumi long heven, em Jisas, em i save “sori long yumi.”—Hibru 4:15.
Aposel Pol i bin lain long pilim pen na hevi bilong ol narapela na long tingting i stap long bel bilong ol. Em i tok: “Sapos strong bilong wanpela Kristen i pinis, orait mi pilim olsem strong bilong mi tu i pinis. Na sapos samting i kamap na i mekim wanpela Kristen i pundaun long sin, orait mi save kros tru long dispela samting.” (2 Korin 11:29) Taim wanpela ensel i wokim mirakel na opim rot long Pol na Sailas long lusim kalabus long Filipai, namba wan tingting bilong Pol em bilong tokim wasman bilong kalabus olsem i no gat wanpela i ranawe. Pasin bilong pilim hevi bilong narapela i kirapim Pol long tingting planti, nogut wasman hia bai kilim i dai skin bilong em yet. Pol i save long pasin bilong ol Rom, olsem wasman bilong kalabus bai kisim bikpela strafe sapos wanpela kalabusman i ranawe—asua bai i bikpela moa sapos em i bin kisim toksave long was gut long dispela kalabus man. (Aposel 16:24-28) Wasman hia i kirap nogut long dispela gutpela pasin bilong Pol long helpim em na bai em i no ken bagarap, olsem na em yet wantaim famili bilong em ol i mekim ol samting bilong kamap Kristen.—Aposel 16:30-34.
Rot Bilong Kisim Dispela Pasin
Baibel i kirapim yumi planti taim long bihainim pasin bilong Papa bilong yumi long heven na Pikinini bilong em, Jisas Krais, olsem na pasin bilong pilim hevi bilong narapela em i wanpela pasin yumi mas kisim. Olsem wanem yumi inap kisim? I gat tripela bikpela rot bilong helpim yumi long pilim moa yet hevi na tingting bilong bel bilong ol narapela, olsem: putim yau, lukluk, na wokim tingting.
Putim yau. Long rot bilong putim gut yau yumi kisim save long ol hevi i save painim ol narapela. Sapos yumi putim gut yau, ating dispela bai kirapim ol long kamapim olgeta tingting bilong bel. Miriam i tok: “Mi inap toktok gut wantaim wanpela elda sapos mi bilip tru olsem em bai putim gut yau. Mi laik save olsem em i klia gut long hevi bilong mi. Mi inap bilip moa long em taim em i givim ol askim i soim olsem em i bin putim gut yau long ol tok bilong mi.”
Lukluk. Planti man i no save tokaut stret long ol samting i stap long bel bilong ol o wanem hevi ol i karim. Tasol man i lukluk gut, em bai luksave taim wanpela wanbilip Kristen i bel hevi, o wanpela yangpela i lusim pasin bilong toktok, o wanpela strongpela wokman bilong God i lusim pasin bilong amamas. Em i bikpela samting long ol papamama i luksave long wanpela hevi taim em i nupela. Marie i tok: “Mi no save olsem wanem em inap mekim, tasol mama i save pinis long tingting i stap long bel bilong mi paslain long mi toktok wantaim em, olsem na mi no hatwok long stori gut long hevi.”
Wokim tingting. Nambawan gutpela rot bilong kirapim pasin bilong pilim hevi bilong narapela em bilong askim yu yet olsem: ‘Sapos mi yet i gat dispela hevi samting, bai mi pilim olsem wanem? Dispela bai kirapim mi long mekim wanem? Wanem samting bai helpim mi?’ Pasin bilong tripela pren giaman bilong Jop i soim olsem ol i no bin mekim olsem ol yet i karim hevi olsem Jop. Olsem na ol i kotim em long sampela rong ol i ting tasol em i bin mekim.
Long ol manmeri i gat sin, planti taim pasin bilong kotim man long sampela popaia i winim pasin bilong traim long save gut long bel bilong em. Tasol sapos yumi wok strong long tingim pen bilong man i karim hevi, dispela bai helpim yumi long sori long em na lusim pasin bilong kotim em. Wanpela strongpela elda, Juan, em i tok: “Tok kaunsel bilong mi i gutpela moa taim mi putim gut yau na mi wok strong long save gut long olgeta samting paslain long kamapim sampela tok.”
Ol buk na nius bilong ol Witnes Bilong Jehova i bin helpim planti manmeri long dispela samting. Nius Wastaua na Kirap! i bin stori long sampela bikpela hevi, olsem pasin bilong stap bel hevi tumas na pasin bilong mekim nogut long pikinini. Ol dispela tok i kamap long taim stret na i helpim ol man long pilim moa yet tingting bilong ol man i karim hevi long dispela samting. Na tu, buk Sampela Askim Bilong Ol Yangpela—Ol Gutpela Bekim i bin helpim planti papamama long save gut long ol hevi bilong pikinini bilong ol.
Dispela Pasin i Helpim Wok Kristen
Planti bilong yumi bai i no inap givim baksait long hevi bilong wanpela pikinini i sot tru long kaikai sapos yumi gat rot long givim sampela kaikai long em. Sapos yumi gat pasin bilong pilim hevi bilong narapela, bai yumi save tu long i stap bilong man long ol samting bilong spirit. Baibel i stori long Jisas olsem: “Em i lukim ol bikpela lain manmeri, na em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” (Matyu 9:36) Long ol samting bilong spirit, planti milion manmeri long nau i stap olsem, na ol i mas i gat helpim.
Olsem ol man long taim bilong Jisas, ating yumi mas daunim sampela tingting kranki o tingting bilong sampela pasin bilong ples na bai yumi inap mekim ol tok i go daun long bel bilong man. Wokboi bilong God i gat pasin bilong pilim hevi bilong narapela, em bai wok strong long kamapim ol tok ol narapela inap wanbel long en o stori long ol samting i stap long tingting bilong ol manmeri na bai ol tok bilong em i swit. (Aposel 17:22, 23; 1 Korin 9:20-23) Ol gutpela pasin yumi mekim, long wanem, yumi pilim hevi bilong narapela, dispela inap kirapim ol man long amamas moa long harim tok bilong Kingdom, olsem wasman bilong kalabus long Filipai i bin amamas long harim tok bilong Pol.
Pasin bilong pilim hevi bilong narapela i bikpela samting bilong helpim yumi long lusim tingting long pasin kranki bilong ol narapela long kongrigesen. Sapos yumi wok strong long save long tingting bilong brata i bin bagarapim bel bilong yumi, dispela bai helpim yumi long lusim tingting long rong bilong em. Ating yumi tu bai i mekim wankain pasin sapos dispela samting i bin kamap long yumi na yumi gat wankain sindaun olsem brata hia. Pasin bilong Jehova long pilim hevi bilong ol narapela i kirapim em long tingim yumi i “olsem das tasol,” olsem na ating pasin bilong yumi yet long pilim hevi bilong ol narapela i mas kirapim yumi tu long lusim tingting long ol popaia bilong ol na “lusim sin bilong ol.”—Song 103:14; Kolosi 3:13.
Sapos yumi gat wok long givim sampela tok kaunsel long man, ating pasin bilong yumi long givim dispela tok bai i gutpela moa sapos yumi save long bel na tingting bilong dispela man i bin mekim rong. Elda Kristen i pilim hevi bilong narapela bai tingim tok olsem: ‘Mi tu inap mekim kain popaia olsem. Mi yet inap stap olsem dispela man hia.’ Olsem na Pol i tok: “Mekim pasin isi long dispela man na helpim em long stretim pasin bilong em. Tasol yupela i mas lukaut gut long yupela yet. Nogut Satan i traim yupela na yupela tu i pundaun long sin.”—Galesia 6:1.
Na tu, pasin bilong pilim hevi bilong narapela inap kirapim yumi long helpim man sapos rot i op long mekim olsem, maski wanpela wanbilip Kristen i no askim yumi long helpim em. Aposel Jon i tok: “Sapos wanpela man i gat ol samting bilong dispela graun, na em i lukim narapela brata i sot long ol samting, na sapos em i no sori long dispela brata, orait yumi save, pasin bilong God bilong laikim tru ol arapela, em i no i stap long dispela man. . . . Yumi no ken laikim ol brata long tok tasol o long maus tasol. Nogat. Yumi mas givim bel bilong yumi tru long ol na mekim gutpela pasin long ol.”—1 Jon 3:17, 18.
Bilong bihainim pasin sori na “mekim gutpela pasin long ol” brata, pastaim yumi mas luksave long samting ol i sot long en. Olsem wanem? Yumi save skelim ol samting ol brata i sot long en bilong yumi ken helpim ol? Dispela em i pasin bilong pilim hevi bilong narapela.
Kisim Pasin Bilong Sori Long Ol Narapela
Ating i no pasin bilong yumi long pilim hevi bilong narapela, tasol yumi inap kisim dispela pasin. Sapos yumi wok strong moa long putim yau long ol narapela, na lukluk gut long ol, na tingim olsem yumi yet bai mekim wanem sapos yumi gat wankain sindaun, dispela bai helpim yumi long kisim moa yet pasin bilong pilim hevi bilong narapela. Na em bai kirapim yumi long mekim moa yet pasin sori, mekim gut long narapela, na sori long ol pikinini, ol narapela Kristen, na ol man i stap klostu.
No ken larim pasin bilong tingim yu yet tasol i daunim pasin bilong pilim hevi bilong narapela. Pol i tok: “Yupela i no ken lukautim ol samting bilong yupela tasol. Nogat. Yupela wan wan i mas lukautim ol samting bilong ol arapela manmeri bilong yupela na helpim ol long i stap gut.” (Filipai 2:4) Bilong yumi ken stap oltaim, Jehova na Bikpris em i makim, Jisas Krais, ol i mas i gat pasin bilong pilim hevi bilong yumi. Olsem na yumi tu i mas kisim dispela pasin. Em bai strongim yumi long kamap gutpela wokman moa bilong God na gutpela papamama moa. Nambawan bikpela samting, dispela pasin bai helpim yumi long luksave olsem “amamas bilong man i givim samting long ol arapela man, dispela i winim amamas bilong man i kisim samting bilong em yet.”—Aposel 20:35.
[Piksa long pes 25]
Wanpela pasin bilong pilim hevi bilong narapela, em yumi save skelim ol samting ol i sot long en bilong yumi ken helpim ol
[Piksa long pes 26]
Olsem wanem? Bai yumi lain long pilim hevi bilong narapela olsem mama i gat pasin sori i save mekim long pikinini bilong em?