Olsem Wanem Ol Santu Tru i Ken Helpim Yu?

LONG Baibel dispela tok Grik ol i tanim olsem “santuman” long sampela Baibel, ol inap tanim olsem “man holi.” Dispela nem i stret long husat? Wanpela dikseneri (Expository Dictionary of New Testament Words) i tok, “long tok Grik dispela tok ol i tanim olsem santuman i makim olgeta man i bilip, na i no makim tasol ol man i gat pasin holi moa yet o ol man i dai pinis em ol man i ting ol i mekim ol gutpela pasin holi i narapela kain tru.”

Olsem na aposel Pol i makim olgeta Kristen bilong bipo olsem ol i santuman tru o ol manmeri i holi. Olsem: Em i bin raitim wanpela pas long ol “manmeri bilong sios bilong God i stap long taun Korin, wantaim olgeta manmeri [“holi,” NW ] bilong God i stap long olgeta hap bilong provins Akaia.” (2 Korin 1:⁠1) Bihain, Pol i raitim pas long “yupela man bilong Rom, God i givim bel bilong em long yupela na em i bin singautim yupela na yupela i stap lain manmeri [“holi,” NW ] bilong em.” (Rom 1:⁠7) Dispela ol manmeri bilong God ol i no bin dai yet, na God i no ting pasin bilong ol i winim pasin bilong ol narapela bilipman, nogat. Tasol wanem samting i makim olsem ol i santuman, olsem man holi?

God i Makim Ol

Baibel i kamapim klia olsem ol man o wanpela oganaisesen i no inap makim man long kamap santuman o man holi. Baibel i tok: “God i bin kisim bek yumi na singautim yumi bai yumi stap manmeri bilong em yet. Em i no ting long gutpela pasin yumi mekim na em i singautim yumi. Nogat. Bipo tru, taim God i no mekim wanpela samting i kamap yet, em i singautim yumi long laik bilong em yet, na long han bilong Krais Jisas em i marimari long yumi na i mekim yumi i kamap manmeri bilong em yet.” (2 Timoti 1:⁠9) Long marimari bilong em yet, Jehova i save makim man i kamap holi na dispela i stret wantaim samting Em i tingting pinis long mekim.

Ol manmeri i holi long ol kongrigesen Kristen ol i insait long “nupela kontrak.” Blut bilong Jisas Krais i bin kapsait, em i strongim dispela kontrak na em i mekim ol dispela man insait long en i kamap holi. (Hibru 9:​15; 10:29; 13:​20, 24) Long ai bilong God ol i kamap klin, na ol “i stap lain pris God i makim bilong em yet, na long nem bilong Jisas Krais yupela i ken givim laip bilong yupela long God olsem ofa em i laikim tru.”​​—⁠1 Pita 2: ​5, 9.

Ol i Askim Ol Santuman Long Helpim Ol na Stap Namelman Bilong Ol

Planti milion man i bilip olsem ol “santuman” inap givim narapela kain strong long ol bilipman, olsem na planti manmeri i save adorim ol long rot bilong ol bun samting bilong ol, o ol i beten askim ol long helpim ol. Yu ting Baibel i as bilong dispela bilip? Long tok bilong em antap long maunten, Jisas i skulim ol disaipel long olsem wanem ol inap i go klostu long God, em i tok: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi.’ ” (Matyu 6:⁠9) Yumi mas beten long God Jehova wanpela tasol.

Bilong helpim dispela bilip olsem ol “santuman” i stap namelman bilong helpim yumi long i go klostu long God, sampela tisa bilong lotu i kolim tok bilong Rom 15:​30, i tok: “Ol brata, mi laik bai yupela i tingting long Bikpela bilong yumi Jisas Krais, na long dispela pasin bilong givim bel bilong yumi long ol arapela, em Holi Spirit i save kamapim long yumi. Na mi laik bai dispela tingting i ken kirapim yupela long mekim hatwok wantaim mi long prea. Yupela i mas prea long God i ken helpim mi.” Olsem wanem? Pol i laik kirapim ol dispela bilipman long beten long em o askim God long helpim ol long nem bilong em? Nogat. Baibel i kirapim yumi long beten askim God long helpim ol santuman tru, o man holi, tasol i no gat wanpela hap bilong Baibel em God i tokim yumi long beten long ol man holi o beten long God long rot bilong ol.​​—⁠Filipai 1:​1, 3, 4.

Tasol God i makim pinis wanpela man i stap Namelman, olsem rot bilong yumi long beten long God. Jisas i tok: “I no gat wanpela man inap i kam long Papa long narapela rot. Nogat. Long mi tasol.” Jisas i tok tu olsem: “Olgeta samting yupela i askim long nem bilong mi, em bai mi mekim. Olsem na Papa bai i kisim biknem long Pikinini bilong en. Olgeta samting yupela i askim long nem bilong mi, em bai mi mekim.” (Jon 14:​6, 13, 14) Yumi ken bilip tru olsem Jehova bai amamas long harim beten yumi mekim long nem bilong Jisas. Baibel i tok long Jisas olsem: “Oltaim em inap tru long kisim bek ol manmeri i kam klostu long God long nem bilong em, long wanem, em i stap laip oltaim, na em i save beten long God long helpim ol.”​​—⁠Hibru 7:⁠25.

Sapos Jisas i amamas long i stap namelman bilong yumi, bilong wanem ol man long ol lotu bilong Kristendom i save beten long ol “santuman” bilong helpim ol? Long buk bilong em (The Age of Faith) saveman Will Durant i skelim as bilong dispela pasin. Em i lukim olsem ol man i save pret long God i Gat Olgeta Strong na ol i pilim olsem i no hatwok tumas long go klostu long Jisas, tasol Durant i tok: “Ol man i no bihainim ol tok Jisas i mekim antap long maunten, olsem na ol i pret long toktok long Jisas stret. Ol i pilim olsem i gutpela long beten long wanpela santuman em ol i ting i stap long heven na askim em long bringim tok bilong ol i go long Krais.” Olsem wanem? I stret yumi ken pret long beten long God long rot bilong Jisas?

Baibel i tokim yumi olsem, long rot bilong Jisas yumi inap beten long God na “yumi no pret.” (Efesus 3:​11, 12) God i Gat Olgeta Strong i no stap longwe tumas long ol man na bai em i no inap long harim beten bilong yumi. Devit, em man bilong raitim song, em i no pret long beten olsem: “Yu save harim beten bilong mipela. Olsem na mipela olgeta manmeri i mas i go long yu.” (Song 65:⁠2) Jehova i no save givim strong bilong em long ol bun samting bilong ol “santuman” i dai pinis, nogat. Em i save givim spirit holi long ol man i bilip na i askim em. Jisas i tok: “Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.”​​—⁠Luk 11:⁠13.

Wok Bilong Ol Man Holi

Ol man holi em Pol i raitim pas long ol, ol i dai longtaim pinis na ol i bilong kisim “laip olsem prais,” olsem ol bai kirap bek na i go long heven. (KTH 2:​10) Ol man i lotuim God Jehova, ol i luksave olsem pasin bilong adorim ol santuman tru i no stret wantaim tok bilong Baibel na i no inap lukautim yumi na yumi abrusim ol hevi olsem sik, o bikpela win ren o guria samting, o hevi bilong mani, o go lapun, o dai, nogat. Olsem na ating yu gat askim olsem, ‘Ol man holi i save tingim yumi o nogat? Yumi inap ting ol bai mekim sampela samting bilong helpim yumi?’

Ol man holi i insait long wanpela tok profet Daniel i bin mekim. Inap 500 yia samting paslain long Krais, em i lukim wanpela driman na truim bilong en i wok long kamap inap long taim bilong yumi. Em i lukim 4-pela wel animal i lusim biksi na i kam antap na ol i makim ol gavman bilong ol man em ol i no helpim tru ol man. Orait nau Daniel i tok profet olsem: “Tasol bihain ol manmeri [“holi,” NW ] bilong God Antap Tru ol bai i kamap olsem ol king na bai ol i stap olsem oltaim oltaim.”​​—⁠Daniel 7:​17, 18.

Pol i strongim dispela tok olsem “ol manmeri bilong God” bai kisim “ol dispela gutpela gutpela samting God i bin makim bilong [ol],” em bilong mekim wok wantaim Krais long heven. (Efesus 1:​18-​21) Blut bilong Jisas i opim rot bilong ol 144,000 manmeri holi long kirap bek na kisim laip long heven. Aposel Jon i tok: “Ol manmeri i kirap bek long dispela namba wan taim, God i makim ol bilong em yet na ol i ken amamas. Namba 2 dai em i no gat strong bilong daunim ol dispela lain. Nogat. Ol bai i stap pris bilong God na bilong Krais. Na ol bai i stap king wantaim Krais long dispela 1,000 yia.” (KTH 20:​4, 6; 14: ​1, 3) Long driman Jon i harim ol ensel i singsing long Jisas olsem: “Long blut bilong yu yu bin baim bek ol manmeri, bilong givim ol long God. Yes, yu baim bek ol manmeri bilong olgeta lain man, na bilong olgeta tok ples, na bilong olgeta kain skin, na bilong olgeta kantri. Yu bin mekim ol i kamap ol pris bilong lain bilong king, na ol i stap lain pris bilong God bilong mipela. Na bai ol i stap king na bosim ol manmeri bilong graun.” (KTH 5:​9, 10) Dispela i strongim tru bel bilong yumi! God Jehova yet i makim ol dispela manmeri. Na tu, ol i bin givim bel na mekim wok bilong God long graun, na planti hevi bilong dispela graun i bin painim ol. (1 Korin 10:13) Olsem na yumi inap bilip tru olsem, dispela ol man holi o ol santuman i kirap bek na go long heven na mekim wok king, ol bai marimari long yumi na tingim yumi, long wanem, ol i save yumi gat ol pasin kranki na yumi no inap mekim stret olgeta samting.

Ol Blesing Aninit Long Kingdom

Dispela nupela Kingdom o gavman klostu nau bai pinisim olgeta pasin nogut i stap long graun. Long dispela taim, ol man bai go klostu long God winim bipo. Jon i tok: “Long sia king mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol.’ ” Em bai mekim gut long ol man, na tok profet i tok moa olsem: “Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​​—⁠KTH 21:​3, 4.

Man, em wanpela gutpela taim tru! Maika 4: 3, 4 i stori moa long gutpela wok king bilong Krais Jisas na ol 144,000 manmeri holi na i tok olsem: “Bikpela bai i stretim tok bilong olgeta lain manmeri na bai ol i sindaun gut wantaim. Na bai em i stretim tok bilong ol strongpela kantri i stap longwe na i stap klostu long Israel. Na bai ol i paitim bainat bilong ol i kamap olsem ain bilong brukim graun, na paitim spia bilong ol i kamap olsem naip. Na olgeta lain manmeri bai i no pait moa, na bai ol i no skul moa long pait. Na olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret. Bikpela I Gat Olgeta Strong i bin promis long mekim ol dispela samting.”

Ol manmeri holi i singautim ol man i kam bilong kisim ol dispela gutpela blesing. Meri i laik marit i makim ol dispela santuman tru em ol i tok: “Yu kam.” Na Baibel i tok moa: “Na olgeta man i harim dispela tok, ol tu i mas tok, ‘Yu kam.’ Na wanem man nek bilong en i drai, em i mas kam. Man i laik dring, em i mas kam na kisim wara bilong givim laip, em i olsem presen bilong God.” (KTH 22:17) Wanem samting i insait long “wara bilong givim laip”? Wanpela samting, em stretpela save long ol samting God i tingting pinis long mekim. Jisas i beten long God na em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:⁠3) Bilong kisim dispela save yumi mas stadi long Baibel oltaim. Long rot bilong Baibel yumi amamas tru long yumi inap kisim save olsem ol man holi i husat tru na olsem wanem God bai mekim wok long ol dispela man holi bilong helpim ol man i go inap oltaim oltaim!

[Piksa long pes 4]

Spirit Holi i kirapim Pol long raitim ol pas i go long ol santuman tru

[Piksa long pes 4, 5]

Ol disaipel bilong Jisas i kamap ol santuman tru, o mani holi

[Piksa long pes 6]

Yumi ken beten long God long rot bilong Jisas Krais

[Piksa long pes 7]

Ol santuman, o man holi, i kirap bek, ol bai i mekim wok king long pasin sori na bosim graun