Wok Long Mekim Ol Pasin Yu Bin Lain Long En

“Olgeta pasin mi bin skulim yupela long mekim na yupela i save gut long ol, na olgeta pasin yupela i bin harim mi i autim tok long ol na yupela i bin lukim mi i mekim, dispela olgeta pasin yupela i mas mekim oltaim. Na God, em i as bilong pasin bilong bel isi, em bai i stap wantaim yupela.”​—⁠FILIPAI 4:⁠9.

1, 2. Yu ting Baibel i stiaim i stap bilong ol man em ol i tok ol i man bilong lotu? Stori long dispela samting.

“LOTU i Wok Long Kisim Strong, Tasol Stretpela Pasin i Wok Long Lusim Strong.” Dispela het-tok long wanpela nius (Emerging Trends) i kamapim ripot bilong wanpela lain i bin skelim dispela samting long Amerika. I luk olsem namba bilong ol manmeri i save go long lotu long Amerika i wok long go bikpela, na ol i tok lotu em i bikpela samting long i stap bilong ol. Tasol dispela ripot i tok: “Maski dispela namba i bikpela tru, i olsem planti manmeri bilong Amerika i no ting olsem bilip bilong lotu i gat strong long bosim sindaun bilong ol wan wan man na ol lain man.”

² Dispela pasin i no kamap long wanpela kantri tasol, nogat. Long olgeta hap bilong graun, planti man em ol i tok ol i bilip long Baibel na ol i man bilong lotu, ol i no larim Baibel i stiaim tru i stap bilong ol. (2 Timoti 3:⁠5) Bos bilong wanpela lain i gat wok long skelim dispela pasin em i tok: “Tru, yumi save tingim tru Baibel, tasol pasin bilong lusim hap taim long ritim na stadi long en na bihainim, em yumi lusim pinis dispela pasin.”

3. (a) Baibel i save mekim wanem long ol man i kamap Kristen tru? (b) Olsem wanem ol disaipel bilong Jisas i bihainim tok bilong Pol long Filipai 4:⁠9?

³ Tasol ol Kristen tru i narapela kain. Ol i save bihainim ol tok bilong Baibel na dispela i bin senisim tingting na pasin bilong ol. Na nupela pasin bilong ol i stap ples klia na ol man i lukim. (Kolosi 3:​5-10) Ol disaipel bilong Jisas i no save putim Baibel i stap na i no gat wok bilong en na das i pulap long en, nogat. Aposel Pol i tokim ol Kristen long Filipai: “Olgeta pasin mi bin skulim yupela long mekim na yupela i save gut long ol, na olgeta pasin yupela i bin harim mi i autim tok long ol na yupela i bin lukim mi i mekim, dispela olgeta pasin yupela i mas mekim oltaim. Na God, em i as bilong pasin bilong bel isi, em bai i stap wantaim yupela.” (Filipai 4:⁠9) Ol Kristen i no bilip tasol long tok i tru bilong Baibel. Ol i kirap mekim ol samting olsem ol i bin lainim​—⁠ol i wok long bihainim ol tok bilong Baibel insait long famili, long ples wok, insait long kongrigesen, na long olgeta narapela samting long i stap bilong ol.

4. Bilong wanem i hatwok long bihainim ol lo bilong God?

⁴ I hatwok long bihainim ol lo na stiatok bilong Baibel long sindaun bilong yumi. Yumi stap long graun Satan i bosim, em Baibel i kolim em olsem “giaman god bilong dispela graun.” (2 Korin 4:4; 1 Jon 5:19) Olsem na yumi mas was gut, nogut wanpela samting i pasim yumi long bihainim rot bilong i stap gut long God Jehova. Olsem wanem yumi ken holimpas pasin bilong i stap gut long God?

Tingim Gut “Ol Dispela Gutpela Tok”

5. Wanem insait bilong tok bilong Jisas olsem yumi mas bihainim em “oltaim”?

⁵ Wanpela samting yumi mas mekim bilong bihainim ol tok yumi bin lainim, em yumi mas sambai long lotu i tru, maski ol man i no bilip ol i birua long yumi. Bilong sanap strong na karim hevi, yumi mas taitim bun na wok strong. Jisas i tok: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en na bihainim mi [“oltaim,” NW ].” (Matyu 16:24) Jisas i no tok yumi mas bihainim em inap wanpela wik, o wanpela mun, o wanpela yia tasol, nogat. Em i tok yumi mas bihainim em “oltaim.” Tok bilong em i makim olsem wok disaipel bilong yumi i no bilong i stap sotpela taim tasol o em i wanpela lotu yumi givim bel long en nau tasol na tumora yumi lusim, nogat. Pasin bilong sambai long lotu i tru i olsem yumi stap gut long God na sanap strong long rot yumi bin makim bilong wokabaut long en, maski wanem samting i painim yumi. Yumi inap mekim olsem wanem?

6. Wanem ol dispela gutpela tok Pol i bin skulim ol Kristen bilong pastaim long en?

⁶ Pol i tokim wanwok bilong em Timoti: “Yu mas tingim gut ol dispela gutpela tok mi bin givim yu na yu mas autim tok long wankain pasin na skulim ol manmeri. Olsem na yu mas bilip strong long Krais Jisas na givim bel bilong yu long em.” (2 Timoti 1:13) Wanem insait bilong dispela tok bilong Pol? Long dispela ves Pol i kolim wanpela tok Grik i makim piksa wanpela man i wokim. Piksa i no gat planti samting long en, tasol sampela mak long piksa i stap ples klia na man i skelim gut ol samting long tingting em inap pilim gut samting dispela piksa i makim. Na i wankain tu long tok i tru Pol i skulim Timoti na ol narapela long en​—⁠em i no bilong kamapim bekim stret bilong olgeta liklik liklik askim bilong man. Tasol dispela tok i tru ol i kisim save long en em inap soim rot long ol​—⁠olsem ol mak man i wokim long piksa​—⁠bambai ol man i gat stretpela bel ol inap pilim tru ol samting Jehova i laik bai ol i mekim. Tasol bilong God i ken amamas long ol, ol i mas wok yet long holimpas tok i tru, olsem ol i mas bihainim ol pasin ol i bin lain long en.

7. Olsem wanem ol Kristen i ken holimpas “ol dispela gutpela tok”?

⁷ Long taim bilong ol aposel, ol man olsem Himeneus, Aleksander, na Filetus, ol i wok long kamapim sampela tingting i no stret wantaim “ol dispela gutpela tok.” (1 Timoti 1:​18-20; 2 Timoti 2:​16, 17) Ol Kristen bilong pastaim ol i ken mekim wanem na bai ol man bilong tromoi bilip tru i no ken pulim ol i go na lusim rot? Ol i mas stadi gut long ol tok i stap long buk bilong God na bihainim long i stap bilong ol. Ol man i bihainim pasin bilong Pol na ol narapela man i bin stap gut long God, ol inap luksave long ol samting i no stret wantaim tok i tru ol i bin lainim na nau ol inap sakim ol dispela samting. (Filipai 3:17; Hibru 5:14) Ol i no “gat laik nogut bilong tok resis na tok pait nabaut long ol liklik samting nating,” nogat. Ol i wok strong long bihainim stret rot bilong givim bel long God. (1 Timoti 6:​3-6) Na yumi mekim wankain pasin taim yumi wok long bihainim ol tok i tru yumi bin lainim. Taim yumi lukim olsem ol planti milion manmeri i mekim wok bilong Jehova long olgeta hap ol i holim strong ol tok i tru bilong Baibel ol i bin lainim, dispela i save strongim tru bilip bilong yumi.​—⁠1 Tesalonaika 1:​2-5.

Sakim “Ol Kain Kain Stori Nating”

8. (a) Satan i save mekim wanem bilong bagarapim bilip bilong yumi long nau? (b) Pol i mekim wanem tok lukaut long 2 Timoti 4:​3, 4?

⁸ Satan i wok strong na bai yumi lusim pasin bilong i stap gut long God, na bilong mekim olsem, em i laik bai yumi kisim tupela tingting long ol tok yumi bin lainim. Olsem long taim bilong ol aposel, long nau tu ol man bilong tromoi bilip tru na sampela man moa ol i laik bagarapim bilip bilong ol man i no save wanem pasin i gutpela na wanem pasin i nogut. (Galesia 2:4; 5:​7, 8) Sampela taim ol i mekim wok long ol nius na TV samting bilong tromoi ol tok kranki na tok giaman long ol pasin na tingting bilong lain bilong Jehova. Pol i mekim tok lukaut olsem ol bai pulim sampela Kristen na ol bai lusim tok i tru. Em i tok: “Bihain ol man bai i no laik harim moa ol stretpela tok. Nogat. Yau bilong ol bai i skrap long harim ol narakain narakain tok, na ol bai i kisim planti man bilong skulim ol long kain tok ol i save laik long harim. Olsem na ol bai i givim baksait long tok tru na putim yau long ol kain kain stori nating.”​—⁠2 Timoti 4:​3, 4.

9. Ating Pol i tingim wanem samting taim em i toktok long “ol kain kain stori nating”?

⁹ Sampela i no holim strong “ol dispela gutpela tok,” nogat. Ol i larim “ol kain kain stori nating” i pulim tingting bilong ol. Wanem ol dispela stori nating? Ating Pol i tingim sampela stori nating bilong ol tumbuna, olsem ol stori i stap long Buk Tobit,a em spirit holi i no bin kirapim ol man long raitim. Na ating sampela stori nating em ol tok win i save kirapim tru bel bilong ol man na ol i laik skelim skelim ol dispela tok win. Na tu, ating sampela, long laik bilong ol yet, ol i larim tok bilong sampela man i giamanim ol, em ol i save tok olsem ol lo God i putim i no bikpela samting long bihainim, o ol i save sutim tok long ol man i go pas long lukautim kongrigesen. (3 Jon 9, 10; Jut 4) Tasol maski i gat wanem ol samting i bin stap bilong pundaunim ol, i luk olsem sampela i laik harim ol stori nating, winim ol tok i tru bilong Baibel. I no longtaim na ol i lusim pasin bilong bihainim ol tok ol i bin lainim, na dispela i nogutim ol long ol samting bilong spirit.​​—⁠2 Pita 3:​15, 16.

10. Long nau i gat wanem ol stori nating i stap? Olsem wanem Jon i kamapim klia olsem yumi mas was gut?

¹⁰ Long nau yumi inap abrusim pasin bilong larim ol stori nating i pulim nabaut tingting bilong yumi sapos yumi skelim gut ol samting yumi harim na ritim. Olsem: Planti taim ol nius na TV samting i mekim ol tok bilong kamapim strong pasin pamuk. Planti man i laik kirapim ol manmeri long ting yumi no inap save olsem God i stap o nogat, o i no gat wanpela God i stap. Ol saveman i strong long daunim tok bilong Baibel i tok spirit bilong God i bin kamapim ol tok bilong en. Na ol man i tromoi bilip tru long nau ol i wok strong bambai ol Kristen i kisim tupela tingting long bilip bilong ol, na long dispela rot bilip bilong ol i bagarap. Ol profet giaman long taim bilong ol aposel ol tu i bin wok long bagarapim bilip bilong ol man, na aposel Jon i mekim tok lukaut long dispela samting, em i tok: “Ol pren, planti giaman profet i save raun nabaut long graun. Olsem na yupela i no ken bilip long olgeta man i kam long yupela na i tok, ‘Spirit bilong God i givim tok long mi.’ Nogat. Yupela i mas traim olgeta spirit, bai yupela i ken save, ol i kam long God, o nogat.” (1 Jon 4:⁠1) Olsem na yumi mas was gut.

11. Wanem wanpela rot bilong skelim olsem bilip bilong yumi i strong o nogat?

¹¹ Pol i tingim dispela na em i tok: “Oltaim yupela i mas skelim pasin na tingting bilong yupela yet na painimaut, bilip bilong yupela i stap strong, o nogat.” (2 Korin 13:⁠5) Pol i tok strong long yumi mas wok oltaim long skelim yumi yet na bai yumi ken save, yumi holimpas olgeta bilip Kristen o nogat. Sapos yumi gat pasin bilong putim yau long tok bilong ol man i bel nogut na toktok planti long lain bilong Jehova, yumi mas beten na skelim yumi yet. (Song 139:​23, 24) Olsem wanem? Yumi gat pasin bilong sutim tok long lain bilong Jehova? Sapos olsem, i gat wanem as na yumi mekim? Wanpela i bin mekim sampela tok o pasin i bagarapim bel bilong yumi? Sapos olsem, yumi bihainim stretpela tingting long dispela samting? Ol hevi i painim yumi long dispela graun, ol bai stap sotpela taim tasol. (2 Korin 4:17) Na maski sampela hevi i painim yumi insait long kongrigesen, bilong wanem yumi mas lusim wok bilong God? Sapos yumi bel hevi long wanpela samting, mobeta yumi wok strong long stretim dispela samting na nau yumi larim i stap long han bilong Jehova.​​—⁠Song 4:4; Sindaun 3:​5, 6; Efesus 4:⁠26.

12. Olsem wanem ol Beria i bin stap olsem gutpela piksa yumi ken bihainim?

¹² Nogut yumi sutim tok long ol narapela​—⁠yumi mas holim stretpela tingting long ol save yumi kisim long rot bilong stadi na ol miting bilong kongrigesen. (1 Korin 2:​14, 15) Na nogut yumi skelim skelim tok bilong Baibel. I gutpela yumi bihainim wankain tingting olsem ol Beria long taim bilong ol aposel, em ol i bin ritim na skelim gut ol tok i stap long buk bilong God! (Aposel 17:​10, 11) Orait nau yumi mas kirap bihainim ol pasin olsem yumi bin lainim, na sakim ol kain stori nating na holimpas tok i tru.

13. Wanem samting inap mekim na yumi kamapim ol stori nating na ol i go nabaut, maski yumi no bin tingting long mekim olsem?

¹³ I gat narapela kain stori nating yumi mas lukaut gut long en. Planti planti stori bilong kirap nogut long en i save go nabaut long rot bilong E-meil na ol narapela rot. Em i pasin bilong gutpela tingting sapos yumi was gut long ol kain stori olsem, na moa yet sapos yumi no save long as bilong ol dispela tok. Na maski wanpela Kristen i gat gutpela nem i salim wanpela ekspiriens o stori i kam, nogut em i bin kisim dispela tok long maus bilong ol narapela tasol. Olsem na yumi mas was gut, nogut yumi kamapim gen o givim ol dispela tok o stori long ol narapela na yumi no save ol i tru o nogat. Yumi nolaik tru long kamapim gen ol “kranki stori” o “ol kain kain stori nating” i save nogutim ol samting i holi. (1 Timoti 4:⁠7) Na tu, yumi gat wok long mekim tok i tru long ol narapela, olsem na yumi bihainim gutpela tingting sapos yumi abrusim ol pasin inap kirapim yumi long stori nabaut long ol tok i no tru, maski yumi no bin tingting long mekim olsem.​​—⁠Efesus 4:⁠25.

Bihainim Tok i Tru Em Bai Helpim Yumi

14. Taim yumi bihainim ol pasin olsem yumi bin lainim long Baibel, dispela i save helpim yumi olsem wanem?

¹⁴ Sapos yumi bihainim ol tok yumi bin lainim long rot bilong stadi long Baibel na ol miting Kristen, dispela bai helpim yumi long planti samting. Olsem: Bai yumi inap pas gut moa wantaim ol wanbilip bilong yumi. (Galesia 6:10) Na tu, taim yumi bihainim ol stiatok bilong Baibel, tingting na pasin bilong yumi bai senis na kamap gutpela. (Song 19:⁠8) Na sapos yumi bihainim ol pasin olsem yumi bin lainim, yumi ‘givim biknem long tok bilong God,’ na long dispela pasin yumi pulim ol narapela i kam long lotu i tru.​​—⁠Taitus 2:​6-​10.

15. (a) Olsem wanem wanpela yangpela i bin strongim bel na autim tok long skul? (b) Dispela ekspiriens i bin lainim yu long wanem samting?

¹⁵ Namel long ol Witnes Bilong Jehova i gat planti yangpela ol i save bihainim ol pasin olsem ol i bin lainim long rot bilong stadi long Baibel na ol buk na nius Kristen na long go oltaim long ol miting bilong kongrigesen. Gutpela pasin bilong ol i stap olsem strongpela witnes long ol tisa na ol wanskul bilong ol. (1 Pita 2:12) Tingim Leslie, em wanpela yangpela meri bilong Amerika i gat 13 krismas. Em i tok bipo em i bin hatwok long kamapim bilip bilong em long ol wanskul, tasol wanpela taim i kamap na dispela pasin bilong em i senis. “Klas i toktok long pasin bilong sampela man ol i strong long yumi mas baim ol samting long ol. Wanpela meri i apim han na tok ol Witnes Bilong Jehova i save mekim olsem.” Orait Leslie, em wanpela Witnes, em i mekim wanem? Em i tok: “Mi sambai long bilip bilong mi, na ating olgeta i kirap nogut long dispela, long wanem, mi save stap isi tru long skul.” Orait wanem samting i kamap long pasin Leslie i mekim long strongim bel na tokaut? Em i tok: “Mi tilim wanpela buklet na liklik nius long sumatin, long wanem, em i gat sampela askim moa.” Yumi save, Jehova i amamas tru taim ol yangpela em ol i bihainim ol pasin ol i bin lainim ol i strongim bel na autim tok long skul!​​—⁠Sindaun 27:11; Hibru 6:⁠10.

16. Olsem wanem Skul Tiokratik Bilong Autim Tok i bin helpim wanpela yangpela Witnes?

¹⁶ Yumi ken tingim tu stori bilong Elizabeth. Kirap long taim em i gat 7-pela krismas na long olgeta yia em i stap long komiuniti skul, em i save singautim ol tisa bilong em i go long Haus Kingdom taim em i gat wanpela tok long Skul Tiokratik Bilong Autim Tok. Sapos wanpela tisa i no inap i go, orait taim skul i pinis long apinun Elizabeth bai stap na mekim dispela tok long tisa. Long laspela yia bilong em long haiskul, Elizabeth i raitim wanpela ripot i gat 10-pela pes na i stori long ol gutpela helpim yumi save kisim long Skul Tiokratik Bilong Autim Tok, na em i ritim dispela tok long ai bilong 4-pela tisa. Na tu, ol i singautim em long mekim wanpela tok olsem em i save mekim long Skul Tiokratik, na stori em i makim, em “Bilong Wanem God i Larim Pasin Nogut i Stap?” Wok bilong ol Witnes Bilong Jehova long skulim ol man long rot bilong Skul Tiokratik Bilong Autim Tok i bin helpim gut Elizabeth. Em wantaim planti yangpela Kristen moa i save bihainim pasin olsem ol i lainim long Baibel, na long dispela rot ol i litimapim nem bilong Jehova.

17, 18. (a) Baibel i givim wanem tok long yumi long stretpela pasin? (b) Stretpela pasin bilong wanpela Witnes Bilong Jehova i bin mekim wanem long wanpela man?

¹⁷ Baibel i tokim ol Kristen olsem ol i mas bihainim stretpela pasin long olgeta samting ol i mekim. (Hibru 13:18) Sapos yumi mekim pasin i no stret, em inap mekim na yumi no pas gut moa wantaim ol narapela​—⁠na bikpela samting tru, yumi no pas gut moa wantaim Jehova yet. (Sindaun 12:22) Taim yumi mekim gutpela pasin ol man inap bilip long en, dispela i kamapim olsem yumi bihainim ol pasin olsem yumi bin lainim, na dispela i mekim na planti man ol i rispek long ol Witnes Bilong Jehova.

¹⁸ Tingim ekspiriens bilong wanpela man bilong ami, nem bilong em Phillip. Em i bin raitim nem bilong em long wanpela sek na em i no raitim mani long en, na sek i lus tasol em i no save​—⁠em i kisim save long dispela taim wanpela man i salim sek long em i stap insait long skin pas. Wanpela Witnes Bilong Jehova i bin painim dispela sek na em i raitim liklik pas bilong toksave olsem bilip bilong em i bin kirapim em long bekim dispela sek. Phillip i kirap nogut long dispela samting. Em i tok: “Ol inap stilim 9,000 dola long mi!” Long wanpela taim paslain long dispela, ol i bin stilim hat bilong em insait long haus lotu. I luk olsem wanpela man em i save long en i bin kisim dispela hat, tasol wanpela man em i no save long en i bekim dispela sek em inap kisim planti tausen dola long en! Tru tumas, ol Kristen i bihainim stretpela pasin ol i save litimapim nem bilong God Jehova!

Bihainim Yet Ol Pasin Yu Bin Lainim

19, 20. Sapos yumi mekim ol pasin i stret wantaim ol samting yumi bin lainim long Baibel, dispela bai helpim yumi olsem wanem?

¹⁹ Ol man i save bihainim ol pasin olsem ol i bin lainim long Baibel ol i save kisim planti gutpela samting long en. Disaipel Jems i tok: “Dispela lo i save brukim strong bilong sin na mekim yumi i stap fri, em i stret olgeta. Na sapos wanpela man i glasim gut dispela lo na i bihainim tru tok bilong en, orait God bai i mekim olgeta wok bilong dispela man i kamap gutpela tru.” (Jems 1:25) Tru tumas, sapos yumi mekim ol pasin i stret wantaim ol samting yumi bin lainim long Baibel, bai yumi stap amamas tru na yumi inap karim ol hevi i save painim yumi. Na bikpela samting moa, Jehova bai mekim gut long yumi na yumi ken tingting long kisim laip i stap oltaim!​​—⁠Sindaun 10:22; 1 Timoti 6:⁠6.

²⁰ Olsem na yu mas wok strong yet long stadi long Tok Bilong God. Bung oltaim wantaim ol man i save lotuim Jehova, na putim gut yau long ol tok i kamap long ol miting Kristen. Bihainim ol tok yu lainim, na wok long mekim oltaim, na “God, em i as bilong pasin bilong bel isi, em bai i stap wantaim [yu].”​—⁠Filipai 4:⁠9.

[Futnot]

Yu Tingim Yet?

• Wanem “ol dispela gutpela tok,” na olsem wanem yumi ken wok long holim strong?

• Yumi mas sakim wanem “ol kain kain stori nating”?

• Ol man i bihainim ol pasin ol i bin lainim long Baibel, ol i kisim wanem ol gutpela samting long en?

[Piksa long pes 17]

Ol Kristen bilong pastaim inap mekim wanem na bai ol man i bin tromoi bilip tru i no ken pulim ol i go?

[Ol Piksa long pes 18]

Long rot bilong ol nius, televisen, Intenet, na ol man bilong nau i bin tromoi bilip tru, yumi inap kisim tupela tingting long bilip bilong yumi

[Piksa long pes 19]

I no gutpela long stori nabaut long ol samting yumi no save em i tru o nogat

[Ol Piksa long pes 20]

Long wok, long skul, na long ol narapela hap, ol Witnes Bilong Jehova i save bihainim ol tok ol i ritim long Baibel